Taasipane 19
19
Abu ki duduli ka tina ka lwange
1Ku Tamatama wadrekase ki Musi si Arungu, 2cuna ki swa Iseraylri pasusu kikai lebe ka kakudhane. Iluka ku kai mapilai, kaiyana kiarakai pakaungu ka duduli ka tina ka lwange, 3baadha ki barakalai ka Ilriazare, ala malra kwini tina ka lwange bibili pulatadre ki tasuladhane, si icucubungu iniane culu. 4Ku Ilriazare lri tara arakai ku galawgau dapenge ku erai kai ki lwange, si papia ki talikai ki Alrivilrivi ka balrawbau sangu pitulu paralikiliki. 5Kwini vaeva ka lwange, paelre ki lrangici, beate, erai, buru, apakaelreane picucubungu ki barakalai lama. 6Ku barakalai ala lri malra ku vaeva ku cedare ka angatu, vaeva ku buraburu ka ubulu, si vaeva ku duduli ka calrisi cilri pwa ki apwi. 7Lu maka pianga kwini, ku barakalai lri sinau ku laimaini, ngiaubu ku acilai, ala lri maka mudaane ki tasuladhane; ai pakela ki miauawbu, kwini lasu ikai ki lrisi kaika mabula. 8Kwini waculu ki tina ka lwange ku umawmase lri mialri tara sinau ku laimai, si ngiaubu ku acilai; kathadaalrane, pakela ki miauawbu, kwini lasu ikai ki lrisi kaika mabula. 9Ala lri kamani kwidra ikai ki lrisi ka mabula ka umawmase ku lri sarubu kwini abu ki tina ka lwange, pulatadre ki vaeva ki takabulane. Kikai abu lri pudringai pikai kwini, sa arakaiyane ki mapapangale ki swa Iseraylri tusapakabulabulane ki acilai. Ku pacugane lu pia kikai ku lrisi pakai ku amwalrane ku pasalrivane. 10Kwini wasarubu ku abu ka umawmase lri tara sinau ku laimai, pakela ki miauawbu, kwini lasu kaika mabula. Kikai kakudhane lrika palralrawthu ka tinukakudhanane ka apasuswane ki swa Iseraylri si yakai liniane ka la singibadhane ka umawmase.
Kiaraisi ki wapacai
11Ku kiaraisi ki wapacai ku umawmase ikai ki lrisi lri makapitulu kaika mabula. 12Kwini lasu lri tara ikai ki samakatulrulu si samakapitulu arakai ku sapakabulane ku acilai ngibabula. Lu mia kikai, kwini lasu lrika mabulanga. Lwiyasi la kai ikai kwini ki samakatulrulu si samakapitulu ngibabula, kwini lasu kaika mabulanga. 13Ku kiaraisi ki wapacai si kai ngibabula ku umawmase kaika mabula, asi lwiyane kwini sapakabulane ka acilai kai waubu ki kinawmasaneini. Wakudrulrunga ki Alrivilrivi ka balrawbau ki Tamatama, lri tara patwalai ki mapapangale ki Twaumase kimwalra pakatwase.
14Lu ikai ku wapacai ikai ki balrawbau, kwidra yakai kwini daane ki balrawbau si mwa daane ki balrawbau ku umawmase lri makapitulu kaika mabula. 15Kwini yakai daane ki balrawbau ku kadrwa ku sacaecaebane ka takaiyane ki palungu mialri ka kaika mabula. 16Lu ikai ku umawmase ku kiaraisi ki kiapapacai si wapacai, ku kiaraisi ku culrale ki wapacai si tadralredralrekane, kwini lasu lri makapitulu kaika mabula.
17Kunumi malra ku abu ki duduli ka tina ka lwange, kwini nilamane tusamwalrane ki pasalrivane, pwa ki palungu, si drima ku alrivilrivi ka acilai, la pasikai liniane mwalra ku kudrulru. 18Ku aswalaalanga, lri ikai ka tangea ku mabula ka umawmase ku wamalra ku buraburu ka ubulu si dapenge pikai ki acilai, la paralikiliki ki balrawbau si yakai adringi ki balrawbau ka lawbubulu si kinawmasane ki umawmase. Kwini mabula ka umawmase ala lri ubu ku acilai pwa kwini ki kinawmasane ki kiaraisi ki culrale ki wapacai, kinawmasane ki wapacai, si tadralredralrekane. 19Ikai ki samakatulrulu si samakapitulu, kwini mabula ka umawmase lri ubu ku acilai pwa ki kinawmasane ki kaika mabula ka umawmase. Luka samakapitulu, lri bula kwini ki umawmase; kwini umawmase lri sinau ku laimai, si ngiaubu ki kinawmasaneini, lu tulrepenge kikai, lri mukalava pakela ku talriwgane ki vai, lai lri kabulanga.
20Lu ikai ku kaika mabula ikai ki lrisi la kai ngibabula, kwini lasu sakamia ka kaika mabula, amani sa kai arakai kwini sapakabulane ki acilai ubu ki kinawmasaneini. Wakudrulrunga ki Alrivilrivi ka balrawbau ki Tamatama, lri tara patwalai ki mapapangale ki Twaumase kimwalra pakatwase. 21Kunumi lrika palralrawthu numi pasusu kikai kakudhane. Kwini waubu ku acilai mwalra ku kudrulru mialri lri sinau ku laimai; sanaka wapungupungu kwini ki acilai ku umawmase pakela ki miauawbu kaika mabula. 22Ku kaika mabula ku umawmase ku ecengeini kaika mabula ku wapungupungu kai ki lamanemane ku umawmase, pakela ki miauawbu kaika mabula.
Currently Selected:
Taasipane 19: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
