Taasipane 17
17
Ukudru ki Arungu
1Ku Tamatama kawariva ki Musi, 2“Cuna ki swa Iseraylri ani baai muswane ku 12 ku ukudru, patwalai kwini ki tarasangililuku ki lazuku si paka vaevaeva, la pacase ku nagane lini kwini ki ukudru. 3La pacasa ku nagane ki Arungu pikai kwini ki ukudru ki swa Lrivi. Savavaeva kwini tarasangililuku ki lazuku. 4Malra kikai 12 ka ukudru pwa ki Alrivilrivi ka balrawbau, si picucubungu ki Langiane, ka amani ku tamadradresenganeli muswane. 5Kwidra pilrili ka umawmase ku ukudruini lri rigarigi. Lu mia kikai, Lri kainaku pakalilisinga ki swa Iseraylri, kai lri thurunga kiecebe numiane.”
6Ku Musi la cunu kwini ki tarasangililuku ki lazuku ki swa Iseraylri si baai iniane paka vaeva ku ukudru, elrelre laka 12; ku ukudru ki Arungu la pataelre kwini ukudru ki drumane. 7Ku Musi la malra kwini la ukudru pudaane ki Alrivilrivi ka balrawbau, si picucubungu ki Langiane ki Tamatama.
8Saka samakapusale, ku Musi la mudaane ki Alrivilrivi ka balrawbau, la drele kwini swakaiyane ki zuku ki Lrivi ka ukudru ki Arungu la rigariginga, si pupunga, la ngipaipainga, pumadru kalreme ku alumundu! 9Ku Musi la malra kwini la ukudru padrele ki swa Iseraylri; la makitu drelenga. Kwini la tarasangililuku la malra kwini ukudru lini iluku siwlri. 10Ku Tamatama la kawriva ki Musi, “Malra kwini ukudru ki Arungu sawlri picucubungu ki Langiane, apikaiyane pudringai kikai ukudru, tusapakipapawlringavane ki wabaebalre ka swa Iseraylri: Lwiyasi la pacungulu kalilisi, lri tara pacai.” 11Ku Musi la singikai ku drekase ki Tamatama pangimia.
12Ku swa Iseraylri la kawriva ki Musi, “Kiasalrunga nai! 13Sanaka ngwadadethe ki Alrivilrivi ka balrawbau lri pacai. Lu mia kwini, wapacainga nai makanaelre!”
Currently Selected:
Taasipane 17: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
