Maruku 5

Ku Yesu pawadringai ki kiaikai ki aidridringane ka umawmase

(Matai 8.28-34; Luka 8.26-39)

1Kai lalasu la kela baiyu Galrilri talikaiyane kavai, ki kadaengane ki swa Gerasene. 2Sa mulebe ki varukuru ku Yesu kiapadradresenge ki tangea ka twalalai tadralredralrekane barurungulu ka umawmase; kikai umawmase kiaikai ki aidridringane, 3si ikaikai tadralredralrekane laka kadrwa ku umawmase ku maka waruthuku iniane, adravane ka kicikici la kai maka ruthuku iniane. 4La sangukalrale arakai ku sakatekatemane ki drapale si alrima kateme iniane, la kabebeetethelringa, si ngetele ki sakatekatemane, kadrwa ku umawmase ku wadulru ruthuku iniane. 5Lukavaiyane lukamaungu la ikai tadralredralrekane si ubulane karalealeale, la malra ku lrenege si ngilralrumalrumai.

6Kwini lasu la sadaaili drele ki Yesu, la kainganai lrabwale, si pidruru icucubungu ki Yesu, 7la akwadrau kawriva, “Lalake ki Abebeelengenga ka Twaumase ka Yesu, asu keela upungu nakwane? Lri cubungaku ki Twaumase kitubi muswane, madha pakwalrialri nakwane!” 8(Ku taiyaneini ki kai amani sa kawrivanga iniane ku Yesu iya kai, “Aidridringane, katwasa twalai kwini ki umawmase!”).

9Ku Yesu la kivaga iniane, “Sia aneane ku naganesu?”

Kwini lasu la tubalre, “Ku naganeli sia ‘Makalrakalra’, asi lwiyane, takalra nai turamuru!” 10La apapelaela kitubi ki Yesu ku kaika akipakatwasane lini kitukudha talikaiyane kwini.

11Ikai kwini adeethe ki lregelrege sisiane la icengecenge ikai ku makaalra ku labeke ku wakanekane; 12kwini aidridringane la kitubi ki Yesu iya kai, “Pamwa naiane ki labeke, la nai mwadringi ki labeke!” 13Ku Yesu la palraingi liniane; kwini aidridringane la twalai kwini ki kinawmasane ki umawmase katwase, si mwadringi mwa ki labeke; kwini labeke (lri ikai kau 2,000) la kalrungulrungu mulrevese ki tukadrane, si mwadringi ki baiyu, la murenere pacai patuelre.

14Kudra taralapulapu ki beke la makitu mubere; papia ki cekele si ki ngwadadethe ka tatitiki ka lacekele pelaela ku tangimiane. La makitu kela makanaelre drele kudra tangimiane lukamanemane. 15Kwini lalasu la mwa ki Yesu, la drele kudra nakiaikai ki aidridringane sa nene, si silaimainga, la pulringalringawnga, la makitu kakiwcu ukuludru. 16Ku wadrele kikai tangilribatane kikai ku laumawmase, makitu pelaela ki mapapangale ku takimwane ki aidridringane kwini lasu si patharwakai ki labeke ku tangimiamiane. 17Kwini lalasu la kitubi ki Yesu ku akatwasaneini kidaili ki taikaiyane lini.

18Sa mubelengenga ki varukuru ku Yesu, kudra nakiaikai ki aidridringane la kela kitubi ki Yesu iya kai, “Ala patupapalraili muswane.”

19Ku Yesu la kai palraingi, ai peaelaela iniane iya kai, “Lu mutavanana si pelaela ki laretesanesu, ku tapangimiane ki Tamatama kilibake muswane si ku tapasikaiyaneini muswane.”

20Kwini lasu la katwase, si pathagili ikai Dikapulrise pelaelaela ku tapasikaiyane ki kinawmasaneini ki Yesu; ku kialalra ku umawmase kadrwa ku kai masamali.

Lalake ki Yairu ka ababai si kiapucaemane ku siaeraeraerai ka ababai

(Matai 9.18-26; Luka 8.40-56)

21Ku Yesu la muvarukuru talubalre ki baiyu mu talikaiyane kwini; ikai babiabila ki baiyu la ikai ku takaalra ku mapapangale ku yaelrelre si kainganai mucucubungu iniane. 22Ikai kwini yakai ku tangea ku mabelenge ki tarakadrekadrenge ki rarubwane ki swa Yuda ka sia Yairu, la mialrini kela. Sa drele ki Yesu la pidruru icucubungu ki drapaleini, 23si kitutubi iniane iya kai, “Ku lalakeli macaeme kipakilringau avaluvaluthane, kiatubiaku muswane bwala pasikaiya iniane ansu, si pawdringai iniane, la palribulu ki niakeini!”

24La katwase tupapalra ku Yesu iniane. La takaalra ku umawmase ku twapapalra iniane, si madrikidrikisi papia iniane.

25Ikai kwini yakai ku tangea ku ababai ku tara 12 ka caili kipucaemane ki siaerai, 26la kidrelenga ki takalra ki latarasulrasulrau, si kipakwalringa turamuru, si akaelrenga ku tacekecekelane; ai kudra caemane ki alisu la kakadrwana ku taadilane kabasau, arwakipakilriingawlringa kivaivai kamani. 27Kwi alisu sa kilalra ku patharukai ki Yesu, la mwa muadringi kiibu ki laumawmase, si mulrilrikudru ki Yesu, la sulrape ki laimaini, 28la pikidremedreme iya kai, “Sana ecengaku ki laimaini, lri tara mudriingadhaku.”

29Kudra caemaneini la makakaai idrengere, si ngithathingale ala ka mwadringainga ku caemaneini. 30Ku Yesu la makakaai thingale ala ka yakai ku puku ku twalai ki kinawmasaneini katwase, la ngibangulu ikai kwini ki laumawmase si iya kai, “Aneane kwini wasulrape ki laimaili?”

31Kudra situini la tubalre, “Drela, kai takalra kai laumawmase drikidrikisi muswane, asu kivaga aneane ku wasulape nakwane?”

32Ai ku Yesu la drele masiasirare, pakai ku athingalane luka aneane kwini wasulrape iniane. 33Kwini ababai la thingale ku tangimiane ki kinawmasaneini, la manugiligili ki mukuludrane si pidruru icucubungu ki Yesu, la pelaela ku tangimiamiane patueelre. 34Ku Yesu la kawriva iniane iya kai, “Lalake, kwini salrwanesu palribulunga muswane! Lu kasulivalivatanga katwase, kwini caemane kwi kiangeangeangesu kadrwanga.”

35Ku Yesu sa kawrivarivana kikai vaga yai, yakai ku umawmase ku twalai ki daane ki mabelenge ki tarakadrekadrenge ki rarubwane ki swa Yuda kiasaswarau kainganai, si pelaela ki Yairu, “Wapacainga ka lalakesu, asi vangaavangana ki Sinsi?”

36Ku Yesu la kai thengete#5.36 “Ku Yesu la kai thengete” ku wahunyake madu iya kai “Ku Yesu kialalra”. kwini taiyane lini kawriva, la kawriva kwini ki mabelenge ki tarakadrekadrenge ki rarubwane ki swa Yuda iya kai, “Madha mukulukuludru, kasalrwa sikakathane!” 37Ala kwi lasu la iluku ki Pitiru, Yakubu, si agi ki Yakubu ka Yuhani karedele mwa, la kai palraingi ki drumane patupalra. 38Sa kelanga kwini daane ki mabelenge ki tarakadrekadrenge ki rarubwane ki swa Yuda, ku Yesu la drele liniane makanaelre ka malrithaavulu, makitu karalealeale tubitubi. 39Ku Yesu la mudaane si iya kai liniane, “Anu tubitubi riariariange? Kai vavalake kai wapacai, masipelrenge sikakathane.”

40Ku laumawmase la makitu ulralrakai iniane, ku Yesu la pakatwase liniane, laka kathane ku marudrawdrange kwini ki vavalake si tatulru ka situini ku twapalra mudaane mwa ki tapeapecane ki vavalake ka ababai. 41Ku Yesu la arake kwini alrima ki vavalake ka ababai, si iya kai iniane, “Talitha, kumi!” ku pacugane, “Vavalake ka ababai, lri drekasaku muswane, ngidrakala!”

42Kwini vavalake ka ababai la makakaai ngidrakale si dadavace. (Ki kwidra kai alisu tara 12 ku cailini). Kikai tangimiane pakasamali liniane turamuru! 43Ku Yesu la pakipapawlringau cunu liniane madha pelaelaela ki umawmase iya, la cunwana baadha ku akaneane ki vavalake iya.

Currently Selected:

Maruku 5: NDV

Highlight

Copy

Compare