Mika 7
7
Tangilisianane ki swa Iseraylri
1Kikai ala matiangeeange kai tangimiamiane! Miakau amaniaku kudra masilrau ka umawmase, kai maka kiadringai ku tedrane ku madru patwalai ki icizike ka angatu, ikai ki babududu la kai maka kidringai ku asuru ku budu. Sanaka budu si aswalalanga kalreme ka icizike kialaabutunga patuelre. 2Ikai kai ki kadaengane belenge, ku tengatengane ka mapapedrenge ka umawmase wapacainga makanaelre. Adravane ka natangeeanga kadruanga ku umawmase ku patengatengane ku kidremedreme papia ki Twaumase. Sanaka umawmase mwakalavalava ku akelane ku apapacadhane; sanaka umawmase twalisiliisi ki sakacekeleini. 3Kwini lalasu yadrepele ka tarakanganganga, ku tabebelenge kunkwane si mabelenge ki tarasaibaibange la tarumara ku pavangalre makanaelre; ku la samanemanane ikai ku puku ka umawmase la karedededele liniane tukumi, si maparawrawralubu pia ku malisi. 4Ikai liniane, kudra sia mathaithaariringa, ku mapacengecengeecengenga, mia ki laubulu ka kadrwa ku paluludane.
Ku asaibangane ki Twaumase ki kawkawluini ku vai wadarurunga. Ki kikai saka siaswalane napangwakai ki yuginsia pakipapawlringau ki kawkawluini. Kikainga kwini lalasu pathagilinga mukuludru kai thingale ku apiane. 5Kunumi madha kasalrusalru ki pasiagiagisi numi, la madha kipawtengatenga ki talrailragi numi, adravane lu kawrivasu ki taelrelresu wadradrele madu. 6Ku lalalake ka sawvalai lri tudrekase ki tama lini; ku lalalake ka ababai lri baebalre ki latina lini; ku kiathareve si tinaini ka tamwaneini kithareve lri makakalisi; ku badha numi amani kwini wacekecekelesu.
7Ngukai nakwane, lri sidramaku ki Tamatama. Lri ukalavaku ki Twaumase ka Takipalribulribulaneli. Ku Twaumaseli lri kilalra kai inulrili.
Ku Tamatama palribulu ki kawkawluini
8Badha nai asingithaanga dradrarane. Adravane tubakebake nai, lri ngidrakaaleana nai. Ki kikai yakai nai ki kadradridrimitane, ai ku Tamatama lri patarumara naiane ku ledra. 9Kunai napasalriu nai ki Tamatama, lakamani, ki kikai lri tara kiadili nai ku sakaelaelaneini. Ai ki bibiilrilinga, lri pasikai naiane kidrikisi ku vaga, lri pusakai naiane. Lri ililuku naiane pudaane ki ledra; lri tara patakamacamaaca nai drele ku sapalribulaneini. 10Lukamaninga kwidra, ku badha nai lri tara drele, lai tara kainu. Kwi lalasu nakiavaganga naiane iya kai, “Ku Tamatama ka Twaumase numi yakai inu?” Lri tara drele nai patakamacamaca liniane lu kipamalebe, mia ki kadalranane ka dae ka kiadredredre.
11Swa Yerusalrime, ku atupelane raedre ki kepale ki cekele lri padaalrunga si kela! Lukamaninga kwidra, lri aru paswadrau numi ku pagisane ki kadaengane ki kuni. 12Ku sakacekele numi lri twalai kidruanga kainganai siwlri mu Yerusalrime. Kwi lalasu twalai tali talrawane ka Asiria, la twalai tali lrawdru ka Izipiti, talikai ki laveke, si talikai lregelrege kainganai. 13Ai, kwini talikaiyane kwini lri aubulane, asi lwiyane kwini laumawmase ngialisiane makanaelre.
Ku Tamatama makalithi ki kawkawluini
14 Tamatama ka amania ka waagu lapu ki pilrisu ka kawkawlusu! Kwi lalasu matiaseseepele ikai kwini ki calragulragu la kingithalringulu ki yadrepele ka malrange ka kadaengane. Pamwa liniane ka Basane si Gileade; pangimia kunadruma, ikai ki takakalrane ku ubulu ka dratane agwagu lapu liniane.
15 Tamatama, pasikaiya naiane putaluvaivai ku pinangu Twaumasane ka puku, mia kunadruuma sa sangilukusu naiane pakatwase ka Izipiti. 16Adravane kadrau ku puku ki sanaka kuni, ai sana drele kwi lalasu ku pukusu ka madrau lri ngituluku kakiwcu, si ku kiwcane lri ngitatamenge ku calringa lini si ngudwi lini. 17Kwi lalasu lri mia ki sulrau ka yacakena katwatwase; kwi lalasu lri ngituluku si lailai mulatadre ki nikepalane ka cekele, ikai cucubungu ki Tamatama ka Twaumaseta kakiwcu manugiligili.
18 Tamatama, kadrwa ku drumane ku twaumase kulri dulru kiramau muswane; pacepesu kudra ki abalu ka laumawmase. La kaisu ka tapikidremedreemane ku elathane, arakaailringasu ku thalradhane kilibake naiane. 19Lri pelanasu arakai ku thalradhane kathalrai naiane. Lri malrasu kai pasalrivane nai si pikai ki drapale iki pakaburau, la cilri pwa ki laveke adringi. 20Mararaamau ku tapalrainganesu ki cucungulane nai, lri padrelanesu ki mwabaibalrithi ki Aberahame si Yakubu ku takapatengatengananesu si kai maelaela ka sakialibakesu.
Currently Selected:
Mika 7: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
