Matai 3
3
Tadindwane ki Yuhani ka tarapabanau
(Maruku 1.1-8; Luka 3.1-18; Yuhani 1.19-28)
1Sakamani kwidra, ku Yuhani ka tarapabanau wakela mwa Yuda calragulragu dindu. 2Kwini lasu la iya kai, “Ngitatupela, asi lwiyane padethenga ku kuni ki Twaumase!” 3Kai Yuhani amani kudra matikaikai ki yuginsia ka Isaiya; kai yuginsia amia kai:
Ikai calragulragu yakai ku umawmase ku watawtawtau:
Pasikaiya ki Tamatama padulru ku kadalrananeini,
si dringelrese ku lrika angukaiyaneini ku kadalranane!
4Ku Yuhani la siebele ku ubawbalane ku lrangici ki lrakeda, ku takilrisaisane la silakete ku lrangici, la kanekane ku apapawku si valu. 5Ku laumawmase la twalai Yerusalrime, si Yuda kidruanga, si talikai kadravane Yuredange kainganai mucucubungu iniane. 6Kwi lalasu makitu ngipapelaela ku pasalrivane lini, ku Yuhani la ikai kadravane Yuredange pabanau liniane.
7Ku Yuhani la drele ku takaalra ku swa Palrisai si swa Sadukise ka umawmase mialri kainganai kitubi ku akipabanavane, la iya kai liniane, “Kunumi ka lasiduduku ka sulrau! Ku asaibangane ki Twaumase lri padaalrunga si kela, kunumi yai lri dulru nai ubere amiamia numi? 8Arakaiya ku kakwakudhane numi patuthingale ala ka ngiatatupelanga numi. 9Madha kirimurimu cucungulane nai ki Aberahame lri dulru nai ubere ki akisaibangane iyaiya! Nau pelaela numiane, ku Twaumase lri dulru malra kikai lalrenege si pasikai ki Aberahame bekace tulagagane! 10Ku kumugu nisararanenga pikai ki tangadrane ki angatu, sana kai pumadru ku mathariri ka madru ku angatu lri kikumugu patueelre, si cilri pwa ki apwi. 11Arakaiyaku ku acilai pabanau numiane, ka sapathingalane ka ngiatatupelanga numi; ai, kudra tangeea kulri kabibilrili nakwane kela lri arakai ku Siri si apwi pabanau numiane. Kwi lasu sanianiange nakwane turaamuru, adravane ka atakililane ku keceini kainaku swadalepe. 12Kwi lasu waecenge ku balraku, si lri tapusu ki taleke, si pudrawsulane ku mugi; kudra lrapi, lai lri arakai ku kai maedredrepe ku apwi si lama!”
Kiapabanau ku Yesu
(Maruku 1.9-11; Luka 3.21-22)
13Sakamani kwidra, ku Yesu twalai Galrilri si papia kadravane Yuredange mwa kikawriva ki Yuhani, ku akipabanavane iniane. 14La kirimu kai palraingi kai Yuhani, si iya kai, “Saanai kipabanavaku muswane, asu baalrelringa kela silape nakwane!”
15Ai ku Yesu twabalre iya kai iniane, “Kikai pangimianga kikai, asi lwiyane lu piane kikai amani kudra pasalaladha ku murikai ki Twaumase.” Ku Yuhani ala palraingi iniane.
16Ku Yesu la kipabanau, sa twalai ki acilai utaluvaivai, ka belenge la pasikai iniane nguelebane; kwi lasu la drele ku Ri ki Twaumase mia ki tavagu mulebe, si mwa iniane. 17La pacuungulu, ikai ku lingau ku twalai belenge, iya kai, “Kikai amani ku kathalraili ka Lalake, madalamaku iniane.”
Currently Selected:
Matai 3: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017