Matai 18

Aneane ku sanianiiangenga

(Maruku 9.33-37; Luka 9.46-48)

1Sakamani kwidra, ku lasitu la kela kivaga ki Yesu, “Ikai ki kuni subelebelenge aneane ku sanianiangenga?”

2Ku Yesu la dawlu pakainganai ku tangea ka vavalake, si paacegecege iniane pikai kabicelrakane liniane, 3si iya kai, “Nau pudriadriingai pelaela numiane, lu akabaalrithi numi, si mia kai ki vavalake, lri dulru numi akawkawlu ki kuni subelebelenge. 4Ku miyaiya kai ki vavalake ngitatualebe, ikai ki kuni subelebelenge amani ku sanianiiangenga. 5Ku ngwalai nakwane si tarumara pasudalru ku miyaiya kai ka vavalake, amaninga ku tarwamara pasudalru nakwane.”

Madha lrilrilrigili si papasalriu ki umawmase

(Maruku 9.42-48; Luka 17.1-2)

6“Sanaka aneane ikai ki sinzia la malra ki tangea adravane ka kaika sapatumatumane ka umawmase pakidaili cilri nakwane, maesaesai arakai ku tapasilribulribwane ka lrenege pakerenge ki lreini, si la pwa ki laveke pawrenere papacai. 7Kai kawmasane adravane ikai ku pakatwase ki umawmase si cilri nakwane ku miyaiya kikai, matiatubi turamuru! Kudra ngimiyaiya kai unu lri ngimia, ai kudra amani ku pangiamia kikai ku umawmase yai lri matikuru!

8“Alaiyasi papasalriu muswane kwi vaeva ka alrimasu si kwi vaeva ka drapalesu, malrane ngetele si cilri. Ku thithili ku alrima ku thithili ku drapale la malra ku palralrawthu ka niake, mathaithaaririana paraamuru kudra ki malrepenge ku drapale si alrima ala kicilri pwa ki kai maedredrepe ka apwi. 9Alaiyasi kwini vaeva kwi macasu la papasalriu muswane, malra batwathe mwalra, si cilri. Luka vaeva ku maca la malrane ku palralrawthu ka niake, mathaithariri turamuru kwini ki malrepenge ku maca ala kiciilri puswadriadringi ki apwi.”

Pathalrilriku ka amuli kawlrau ka kiu

(Luka 15.3-7)

10“Kunumi dradreela, madha sidreadreadrekase adravane ka tikiyane ka kaika sapatumatumane ka umawmase. Nau pelaela numiane, ikai belenge, kudra sasiakawlu lini belenge taikaiyane cucubungu ki Ama ka yabelenge.#18.10 Yakai ku sidrumane ka hungu ku wadrima kai mwasaka 11 ka vaga “Asi lwiyane ku kela ki Lalake ki Umawmase ku pacugane lri palribulu ki sakawlrawlrau ka umawmase.” (Drela ki Luka 19.10.)

12“Kunumi ala kidremedreema, alaiyasi ikai ku tangea ku umawmase ku yakai ku idai ku kiu, la kawlrau ku vaeva, kwini lasu bekace kai sarare kwini ki 99 ka kiu pikai ubulane, si katwase silape kwini ki amuli ka kiu? 13Nau pelaela numiane, kwini lasu lu kidringainga kwini vaeva ka kiu lri tara kiraraagai turamuru, ka silrialribate turamuru ku takiragadhane kwini ki 99 ka kai amuli ka lakiu! 14Laka thadaalrane, ku Tama numi#18.14 “Tama numi” ikai ki drumane ka hungu ku amia kai “Ama ka yasubelebelenge”. ka yasubelebelenge sanaka aneanenga adravane ka kaika sapatumatumane ka umawmase kai walreme paamuli.”

Ku apangimiane ki pasalriu ka retesane

15“Alaiyasi pasalriu muswane ku retesanesu#18.15 “Alaiyasi pasalriu muswane ku retesanesu” ikai ki drumane ka hungu ku amia kai “Alaiyasi pasalriu ku retesanesu”., lri mwasu kikawriva iniane, si pelaela ku tapasalrivaneini; ai lu tadrwadrusa numi paiya madu kwini. Kwi lasu alaiyasi kilalra ku tapakipapawlringavanesu, lri masasiwlri numi mararetese. 16Kwi lasu alaiyasi kai kilalra, ililuka ku tadrusa ku palrasu si katwase mwa; lukamiyaiya kwini sanaka nikaelaelane yakai ku tadrusa ku tatulru ku umawmase ku lri dulru siwmi. 17Kwi lasu alaiyasi ka miyaiyana kai kilalra, peaelaela madu ki swa kiwkai patuelre ku tangimiamiane. Kwi lasu lu kai kilalrana ki swa kiwkai, malranga kwini ki lasu tupalrapalra tutarakikaziluzilu.”

Kaika nipalraingane si nipalraingane

18“Lakamani, nau pelaela numiane, ku pakaicilri numi ikai kai kawmasane, ikai subelebelenge lri mialri pakaicilri; ku palraingi numi ikai kai kawmasane, ikai subelebelenge lri mialri kipalraingi.

19“Nau peelana pelaela numiane, ikai numi kai kawmasane, alaiyasi ikai ku tadrusa ku umawmase ku mararamau ku takidremedremane kitubitubi, adravane kitubi ku manemane, ku Ama ka yasubelebelenge lri tara pangimia numiane. 20Asi lwiyane, adravane ikai inu, lu ikai ku tadrusa ku tatulru ku umawmase la pangukaikai ku naganeli irubu, lri ikaiyaku liniane.”

Pathalrilriku patharukai ki kai pacepe ki umawmase ka manganga ka sasiakawlu

21Sakamani kwidra, ku Pitiru wakela kivaga ki Yesu iya kai, “Tamatama, lu pasalriu ku retesaneli, lri kingipialaku pacepe iniane? Makakelrete ku kingipitulu?”

22Ku Yesu la iya kai, “Kaika kingipitulu, kwini pitu lri kingimapitulu#18.22 “kwini pitu lri kingimapitulu” ku wahunyake madu iya kai “kingi 77”.. 23Asi lwiyane ku kuni subelebelenge maru amaninga kikai aiyane kai abulru: Yakai ku tangea ku talialalai ku lri sisange ki sasiakawluini. 24Kwi lasu sapathagili sisange, yakai ku mailuku pucucubungu iniane ku tangea ka sasiakawlu ku akiame iniane ku lukapia ka kudrai ku paisu. 25Asi lwiyane kikai lasu kadrwa ku saukiamane ku paisu, ku talialalai la drekase iya kai, pwa kilangai iniane paaduri pataruelre ki taelrelreini, ki lalalakeini, adravane ka lamanemaneini paelre kilangai, lani maka mukiame ku kiameini. 26Kwini sasiakawlu la icucubungu ki talialalai pidruru, si kitubi iya kai, ‘Ala kakuruaili! Lri tara mukiamaku pakanaelre.’ 27Ku talialalai la kiriimunga kakuru, si kai malranga ku kiameini, la pakatwase pangilralraingi iniane.

28“Kwini sasiakawlu sa mulatadrenga, la kipadradresenge ku tangea ku papalraini kisikawlu. Kikai papalraini akiame iniane ku kaika pia ku paisu, la ruthuku iniane, si there ki lreini, si iya kai, ‘Kudra kiamesu nakwane ku paisu sawlriaili!’ 29Kwini palraini la pidruru, si kitubi iniane iya kai, ‘Paceepaili, lri tara mukiamaku patuelre!’ 30Ai kwi lasu kai mwabangalre, wamaalralringa kwini ki papalraini putaememengane, pakela ku amaka mukiamaneini. 31Kudra drumane ka lapapalra lini sadrele ku tapangimiane la kagirimucu; kwi lalasu la katwase kikawriva ki talialalai, si pelaela iniane patuelre. 32Ku talialalai ala dawlu kwini ki sasiakawlu, si iya kai iniane, ‘Kusu ka mangangaanga ka sasiakawlu, ngwalai ku takitubianesu nakwane, ala mwalraku ku kiamesu patuelre, 33kaisu maka wadulru pacepe ki palrasu, mia ku tapaceepaneli muswane?’ 34Ku talialalai la kalisi turamuru, la malra kwini ki lasu emenge putaememengane pakipathavungu, pakela ku tamukiamaneini patuelre ku kiame.”

35Amia kai ku Yesu, “Alaiyasi kai numi ubangalre pasingikidremedreme pacepe ki retesane numi ka tangea, ku Ama ka yasubelebelenge lri mialri tungimiyaiya kikai numiane.”

Currently Selected:

Matai 18: NDV

Highlight

Copy

Compare