Luka 7
7
Ku Yesu pawadringai ki sasiakawlu ki mabelenge ka kwapingi ki swa Ruma
(Matai 8.5-13)
1Ku Yesu samaka pelaelanga kikai lavaga ki mapapangale, la katwase mu Kaperenawme. 2Ikai kwini yakai ku tangea ku mabelenge ka kwapingi ki swa Ruma, la ikai ku tukuciingalreini ku tangea ka sasiakawlu la kacaeme kipakilringau, si kisanu pacapacainga. 3Kwini mabelenge ka kwapingi sakilalra ku patharukai ki Yesu, la sudralru ki tapia ka ciwru ki swa Yuda mwa kitubi ki Yesu bwala sulrava si pawdringai ki sasiakawluli iya. 4Kwini lalasu sadarurunga ki Yesu, la kitubi turamuru iya kai, “Ki kikai umawmase tengatengane ka swadalepe paralubusu iniane; 5kialibake kai lasu naiane ka swa Yuda, pasiakainga naiane tudaane ku rarubwane ki swa Yuda nai.”
6Ku Yesu la katwase mwa tupapalra liniane. Sa lri padaalrunga si daruru kwini yai, kwini mabelenge ka kwapingi siakawlu ki tapia ka talrailragini mwa pelaela ki Yesu iya kai, “Tamatama, madha kipakwalrialri. Lu kelasu ki daaneli, kainaku swadalepe; 7adravanaku kainaku swadalepe kidrele muswane. Sana kawrivasu akuvavaale, ku sasiakawluli lri tara mudriingai. 8Mararaamau nakwane yakai ku sabebelenge ku lri drekase nakwane ku tabebelenge, la ikai ku salelebe nakwane ku kwapingi ku adrekasaneli; lu drekasaku kai ki umawmase lu mwa iya, kai lasu lri katwase mwa, lu drekasaku bwala iya kwini ki umawmase, lai lri kela; lu papiaku ki sasiakawluli kawriva ‘Pia kikai’ iya, kwi lasu lri katwase pia.”
9Ku Yesu sa kilalra kikai vaga, masamaali turamuru, si ngibangulu papia ki twapapapalra ka laumawmase iya kai, “Nau pelaela numiane, kudra miyaiya kai ku salrwane, adravane ikai ki swa Iseraylri, kainaku wadreleana!”
10Kudra la kiasikawlu kela ka laumawmase sa siwlringa mwa ki daane kwini ki mabelenge ka kwapingi, la drele kwini ki sasiakawlu ki mabelenge ki kwapingi ala mudringainga.
Papanianiake ki sawvalai ka lalake ki walibakane ka ababai
11La kai tarathainu#7.11 “La kai tarathainu” yakai ku sidrumane ku hungu ku amia kai “sakakaiyane”., ku Yesu la mwa Naine; ku situini si mapapangale la tupapalra iniane mwa. 12Sadaruru ki lrawlrawdru ki cekele, la supacengecenge ikai ku lri sateatedre ki wapacai. Kwini wapacai beraberathane ka lalake kudra ki walibakane ka ababai; twalai ki cekele la takaalra ku wakela, si tupapalra kwini ki walibakane ka ababai katwase sateatedre. 13Ku Tamatama la drele kwini ki walibakane ka ababai, ku kidremedremeini la suete ku kurwane, la iya kai kwini ki alisu, “Madha tubi!” 14La arucucubungu si kiraisi kwini ki tabulribulriane, kudra wabulribulri ka laumawmase la idrengere. Ku Yesu la iya kai, “Yacengecenge, ngidrakala!” 15Kwini wapacai la ngidrakale si nene, si pathagili avavaga. Ku Yesu la malra iniane patarumara ki tinaini.
16La kasamali turamuru makanaelre; kwini lalasu la drengedrengere ki Twaumase iya kai, “Yakai kai sanianiange ka yuginsia ikai mitane utaluvaivai!” La pelana iya kai, “Ku Twaumase wakela palribulu ki kawkawluini!”
17Patharukai ki Yesu ki kikai tangimiamiane kiamatikaikai salraelre Yuda si kudra ki ngwadadethe talikai kwini.
Ku situ ki tarapabanau ka Yuhani wakela drele ki Yesu
(Matai 11.2-19)
18Ku lasitu ki Yuhani la pelaela kikai tangimiamiane patuelre ki Yuhani. Ku Yuhani la dawlu ku tadrusa ka situini, 19si sikawlu liniane mwa drele ki Tamatama, si pakivaga liniane, “Amanisu kudra iyaiya ki Yuhani kudra lri kainganai, lrika mwakalavana nai kudra ki maelane ka tangea?”
20Kwini lalasu sa mwanga ki Yesu, la iya kai, “Ku tarapabanau ka Yuhani siakawlu naiane kela kivaga muswane ‘Amanisu kudra iyaiyaini kudra lri kainganai, lrika mwakalavana nai kudra ki drumane?’ ”
21La icengecenge kwidra ku Yesu pawdringai ki takaalra ku lamacaeme, ku kiapakilringau ki swalrubu, si kiaikai ki aidridringane ka umawmase, si kudra ki takaalra ku mamukici, la padrele liniane ki ledra. 22Ku Yesu la tubalre ki situ ki Yuhani iya kai, “Kunumi lu siwlria, kudra kilalra numi kudra drele numi, la pelaela ki Yuhani, amani kwidra mamukici wadrelenga, ku mapiapilai wadadavacenga, ku maraibiu la kabulanga, ku macele kialalranga, ku wapacai ku umawmase siaelanga panianiake, ku matiakukuru kialalranga ku hukuingi. 23Kudra kai malrikilriki nakwane ku umawmase ala mwaesai!”
24Ku lanisikawlane ki Yuhani sakatwasenga, ku Yesu la cubungu ki laumawmase matikai ki Yuhani, iya kai, “Ku paswalala sa mwa numi calragulragu si kipasilape ki Yuhani, manemane ku tadrele iya numi? Amani ku tavaivaivalrigane pangivelevele ki tirivu? 25Maneemanelringa kudra adrelane numi? Amani ku adrelane numi ku sialaimai ku papacasane ka umawmase? Kudra kiapilri ku mathariri ku asilaimadhane si palribate ku tasikacane ka umawmase yakai ki daane ki talialalai! 26Ala, laka manemane ku katwase numi drele? Amani ki Yuginsia? Unu, ai nau pelaela numiane, kwi lasu silrialribate ka madraadrawana ki yuginsia. 27Kwini lasu amani kudra matikai ki Sisiu kudra tangea; amia kai ku Twaumase, ‘Drela, lri sikawlaku ku sasiakawluli si lri kamani ku aswala muswane; lri pasikai muswane sudalrane.’ ” 28Ku Yesu la iyanga kai, “Nau pelaela numiane, ikai kawmasane kadrwa ku lrika silrialribate ka sanianiange ki Yuhani ku umawmase; ai ikai ki kuni ki Twaumase, kudra tangea ikai ki titikiyanenga lrika silrialribateana ka masanianiange ki Yuhani!”
29Ku mapapangale, paelre ki tarakikaziluzilu ka umawmase, sa kilalra ki Yesu, makitu pasalaladha ku urikai ki dringelresane ki Twaumase, asi lwiyane kwini lalasu tarwamaranga ku sapabanavane ki Yuhani. 30Ai ku swa Palrisai si tarabulrubulru ki hulrice malrase ki Twaumase ku tapasikaiyane liniane apadrekadrekase si kikake, asi lwiyane kwini lalasu kai tarwamara ku sapabanavane ki Yuhani.
31Ku Yesu la iya kai, “Ala, lri malraku ku manemane si pakiramau kikai zidai kai umawmase? Kwi lalasu ngiamiaini ki manemane? 32Kwi lalasu mararaamau kudra ki wanene ikai kadadalranane ki maci kivavavange ka lavavalake, kwini taingeane irurubu la papia ki taingeane irubu tawtau iya kai, ‘Lu pasikai nai numiane kulralru ku sakarudrarudrangane ku senai, kai numi wadralrai! Lu senai nai ku satubitubiane ki matiathalithi, la kai numi tubi!’ 33Ku tarapabanau ka Yuhani sakela, kai wakane kai waungulu, kunumi la iya numi kai, ‘Ka lasu kiamwa ki aidridringane!’ 34La kela kai Lalake ki Umawmase, la kane la ungulu, ai kunumi amia numi kai, ‘Ka lasu taraungulu ka mapikaekane, ka talragi ki tarakikaziluzilu si manganga ka umawmase!’ 35Ai, ku lrigilane ki Twaumase twalai kudra ki lakinawmasane ki sanaka tarumara ku thingalane ka umawmase si utaluvaivai.”
Tangitatupelane ki pasalrisalriu ka ababai
36Yakai ku tangea ku swa Palrisai wadawlu ki Yesu pakane, ku Yesu la mwa linianane. 37Ikai kwini ki cekele yakai ku tangea ku ababai, ka amani ku mapasaisalriu ku tapanianianiakaneini. Kwini alisu sakilalra ku Yesu lri ikai ki daane ki swa Palrisai kane ku aga iya, la kainganai iluku ku swaete ki didilrungu ku sangwalreeme ka lawlau. 38Kwini alisu la ilrilrikudru ki Yesu, la mwa ki drapaleini si tubitubi. Ku lreseini la pakadapenge ki drapale ki Yesu, la arakai ku isiuini sakidri pakameale, si uma, ala padelreme arakai kwini sangwalreeme ka lawlau. 39Kwini wapakane ki Yesu ka swa Palrisai sa drele, la iya kai kidremedreme, “Kikai umawmase kai, alaiyasi ka patengatengane ka yuginsia, nai thingale kikai kiarecenge iniane luka ngitwatumane ku takaababadhane; kikai alisu amani ku mapasaisalriu ka umawmase!”
40Ku Yesu la iya kai iniane, “Simune, yakai kai aiyaneli muswane.”
Ku Simune la tubalre, “Sinsi pelaela.”
41Ku Yesu la iya kai, “Yakai ku tadrusa ku mararaamau tara akiame ki tawki, ku tangea akiame ku 500 ku paisu, ku tangea akiame ku malrimale ku paisu. 42Kwini tadrusa la tara kadrwa ku puku lini sawlri, kwini tawki la supilri kudra kiame lini. Lu kidremedremesu, kwini lalasu saneaneane ku lrika madadalame ki tawki?”
43Ku Simune la tubalre, “Lu kidremedremaku amani kwini makakalra ku takipacepaneini.”
Ku Yesu la iya kai, “Pacengecengesu.” 44La ngibangulu ku Yesu si papia ki ababai, la iya kai ki Simune, “Wadrelesu kai ki ababai? Wakelaku mwa ki daanesu, la kaisu baai ku acilai nakwane patawdrapale, ai kai alisu arakai ku lreseini patawdrapale nakwane, si arakai ku isiuini sakidri pakameale. 45La kaisu tubarengerane kiraragai kidresenge nakwane, ai kai alisu sa mudaanaku kaiyana yasadra ku aumane ki drapaleli. 46Kaisu arakai ku lawlau padelreme ki awlruli, ai arakai kai alisu ku lawlau padelreme ki drapaleli. 47Nau pelaela muswane, kikai alisu ku tapaathingalaneini ku maadrau ka sakialibake, peaelaelaela ku makaalra ku pasalrisalriuini ka kiapacepenga patuelre. Kudra bekelane ku takipacepane, ku tapathingalaneini kilibake lrika bekelane.”
48Ku Yesu la iya kai kwini ki ababai, “Ku pasalrivanesu patuelre kiapacepenga.”
49Kudra la kialringulu ka laumawmase la pikidremedreme iya kai, “Kikai umawmase aneane? Si dulru pacepe ki pasalrivane ki umawmase!”
50Ku Yesu la iya kai kwini ki ababai, “Kwini salrwanesu palribulunga muswane; lu kasulivalivatanga katwase!”
Currently Selected:
Luka 7: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
