Lrivi 19
19
Padradrekase ngukai ki mabula si dringelresane
1Ku Tamatama wacunu ki Musi, 2papia ki mapapangale ki swa Iseraylri pelaela, “Kunumi kabula, asi lwiyane kwaku ka Tamatama, ka Twaumase numi yai mabula. 3Kunumi ka tangeea tara pasusua ku padradrekaseli, si musakene ki marudrawdrange, la pasusu ki Taisadrasadrane ka vai. Tamatamaku ka Twaumase numi.
4“Kunumi madha cilricilri nakwane si katwase sukubu ki samiamiange; la madha ngipapasikaikai darepe ku samiamiange. Tamatamaku ka Twaumase numi.
5“Lu culu numi ku sapatarumarane ki Sulivatane ka lrisi, tara pangimia ku baaili pelaela numiane kikai kakudhane, lri tarumaraku ku patarumara numi. 6Kwini nipatarumarane ku beate tara kanea demedeme ivaivai ki samakapusale. Luka samakatulrulu, luiyasi ikaiyana ku tedrane ku sapatarumarane ku beate, arakaiya ku apwi lama, 7asi lwiyane kikai kaika mabula. Lu ikai ku umawmase ku wakane, kainaku lri tarumara ku nipatarumarane. 8Ku wakane yakai ku pasalrivane, asi lwiyane kwini kai wasusu la pasalriunga kwini abadhane patarumara nakwane; kwini lasu lri tara patwalai ki kawkawluli kimwalra.
9“Luka kalakitalekane, madha malramalra paelre kwini ngwababiabila ku taleke, la madha siwlriwlri siludu kwidra la mwacilri ku madru. 10Kunumi madha nguelrelre lu kibudu numi, la madha siwlriwlri siludu ku nipawcilriane ku budu. Sura kilakikai si baai ki matiakukuru si singibadhane ka umawmase. Tamatamaku ka Twaumase numi.
11“Madha kupawpa; madha lrilrilrigili; madha tavuvuvulrucu. 12Lu kaika akalrithethane pasusu ku takiketeketane, kunumi madha papiapia ki naganeli kiketekete, si tusinalreme ki naganeli. Tamatamaku ka Twaumase numi.
13“Kunumi madha pangulravalravange ki sakacekele, la madha ribiribici ku lamanemane lini. Madha pwadaidailane ku abaadhane ku sapawlrawlravane ki mwalrawlrau, adravane ka nimaka vavaalane ku awngane. 14Madha pusupusu kaelaela ki macele, la madha teletelenge ku kadalranane ki mamukici, si patubakebake iniane. Kunumi musakena ukuludru nakwane; Tamatamaku ka Twaumase numi.
15“Madha kilrukilrungu ku dringelresane; madha pusakai ki matiakukuru, la mialri madha kikadadadalame ki yakai ku puku ka umawmase. Kunumi arakaiya ku aparamaramavane turingaringau ki sakacekele. 16Madha pasarasarau ku kaika tangimiamiane; madha tulilisi ku niake ki sakacekele. Tamatamaku.
17“Madha piadringi ki kidremedreme kalisilisi ki laretesane; wacungucungu madu kaelaela ku tapasalrivane ki sakacekele, amani lu ngimamurenerene mwa ki pasalrivane. 18Madha bilribilri ki badhasu; la mialri madha kalisilisi ki sakacekelesu. Kilibaka ki pasiagisisu, mia lu ngikakilibakesu. Tamatamaku.
19“Kunumi pasuswa ku padradrekaseli. Madha pabalabalau ki kaika thadalrane ka nilapulapwane. Madha pikaikai ki thadalrane ka angangade paivai ku makakaela ka sapaivai. Madha apaelrelre silaimai ku makakaela ku laimai.
20“Kwidra kia tusiasilanganenga ku duri ka ababai lu kaiyana kisawlri langai, si kaiyana angilralraingi, lwiyasi la ikai ku umawmase ku wamwa tadrusa iniane apece, kwini tadrusa lri tara kipathavungu#19.20 “kwini tadrusa lri tara kipathavungu” ku wahunyake madu iya kai “lri kidrele”., ai madha papacapacai, asi lwiyane kwini sakamiana ka duri. 21Kwini tawki lri iluku ku vaeva ku balase ka nikiubawbalane ka kiu mwa ki lrawlrawdru ki Alrivilrivi ka balrawbauli si tu Samupasalrivanane ka lrisi. 22Ku barakalai lri arakai kwini kiu ngitalikaiyane iniane marasikai ku kiapakabula ka lrisi, si langai ku pasalrivaneini; ku Tamatama lri pacepe iniane.
23“Lu mudaanenga numi kavai Kanange, adravane lredreke numi ku manemanane ku angatu, kwini nitara tulruane ka caili ku madru makudrulru, la madha kanekane. 24Kwidra sakasupate ki caili la pakaelrea tusapatarumarane ki Tamatama, ka sapatuthingalane ku sakiaseasenane numi nakwane. 25Lu darurunga ki saka taralrima ka caili, lri maka kanenga numi kwini madru. Lu pia numi kikai, kwini angatu lri aru tukalra pumadru. Tamatamaku ka Twaumase numi.
26“Kunumi madha kanekane ku eraeradhane ku beate. Madha tulrisilrisi sanaka manemanenga, la mialri madha pusupusu. 27Madha kirikiriti ku isiu, la madha ngikakungisingisi. 28Lu tubitubi numi ki wapacai, madha pacapacase ki kinawmasane numi, madha gelregelregelre ki kinawmasane numi. Tamatamaku.
29“Kunumi madha tupairairairange ki biu ki lalake numi si tusinalreme liniane. Lwiyasi pia numi kikai, lri ngibangulu numi papia ki langutwaumase, si kwini taikaiyane numi lri kisuete ki ngangane ki sawvalai si ababai. 30Kunumi pasusua ki Taisadrasadrane ka vai, musakene ki Alrivilrivi ka taikaikaiyaneli. Tamatamaku.
31“Kunumi madha tulrisi padawlu ki abake ki wapacai, la mialri madha pakivagavaga ki taraivigi taratulrisi. Lwiyasi pangimia numi kikai, kunumi kai numi ka mabulanga. Tamatamaku ka Twaumase numi.
32“Kunumi musakena ki tarudrawdrange, si acegecege musakene icucubungu ki maudrasenga ka umawmase. Kunumi musakena mukuludru nakwane; Tamatamaku ka Twaumase numi.
33“Kunumi madha tusinalrelrelreme kwini ki yakai numiane ka lasingibadhane ka umawmase. 34Tuthadalrana ki swa Iseraylri ku tamarasikaiyane numi liniane, si ngipapangialrava ku tangikakilibakanesu kilibake liniane. Ngulringava kunumi nayakaikai numi ka Izipiti. Tamatamaku ka Twaumase numi.
35“Madha arakaikai ku kaika aparamaramau ku saleketane, sakelretane, satintingane si lrilrigili ki umawmase; 36arakaiya ku aparamaramau ka tintingi, lekete, balrungubungu. Tamatamaku ka Twaumase numi; patwaladhaku Izipiti sangiluku numiane. 37Kunumi tara pangimia pasuswa ku padradrekaseli si hulriceli. Tamatamaku.”
Currently Selected:
Lrivi 19: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
