Lrivi 16
16
Kakudhane ki Samupasalrivanane ka lrisi ka vai
1Sa kipapacainga kwidra tadrusa ka lalake ki Arungu ngwalai kwidra sa patarumara ku kalaumasane ka apwi ki Tamatama, 2ku Tamatama la iya kai ki Musi, “Pelaela ki taka ka Arungu, kathane kwidra ki takelretane ku zikange ka lri amaka mudaananeini kwini ki lrilrikudru ki makalrilau ka Alrivilriviilrivinga ka taikaikaiyane, lu pia kwini lri tara paacai, asi lwiyane yadaanaku ki Alrivilriviilrivinga ka taikaikaiyane, si athingalane ikai kwini ki ememe ka yataibelenge ki sacaebane ki Langiane. 3Kwi lasu lri tara paswalana patarumara ku vaeva ku lrulai ka sawvalai ka lwange tu Balrithane ki pasalrivane ka lrisi, vaeva ku balase ka nikiubawbalane ka kiu tu Lama ka lrisi, ala lri maka mwadringi ki Alrivilriviilrivinga ka taikaikaiyane.”
4La pacungulu, ku Tamatama baai pelaela kikai lebe kai kakudhane. Ku Arungu lulri mwadringi ki Alrivilriviilrivinga ka taikaikaiyane lri tara paswalana sikelre, silaimai ku sangiragelanane ki barakalai: La silaimai ku palimemelre si edredrekane ka kaswi ka lalasare ka kaimadhane, la silakete ku lalasare ka kaimadhane, si sitalrupunu ku sangiragelanane ka malubiri ka lalasare ka kaimadhane.
5Ku swa Iseraylri makanaelre lri malra kwini sapatarumarane ku niculwane si baai ki Arungu: Drusa ka balase ka kiu tu Balrithane ki pasalrivane ka lrisi, ku vaeva ka balase ka nikiubawbalane ka kiu tu Lama ka lrisi. 6Lri tara ngipapasikai si lawacekecekeleini patarumara ku vaeva ku sawvalai ka lwange tu Balrithane ki pasalrivane ka lrisi,. 7Ala, lri malra kwini drusa ka balase ka kiu si mwa lrawlrawdru ki Alrivilrivi ka balrawbau ki Tamatama. 8Lri ikai kwini kuzibiki si pacase, ku vaeva nipacasane “Abadhane ki Tamatama”, ku vaeva nipacasane “Abadhane ki Azazele#16.8 “Abadhane ki Azazele” ku pacugane ku pacase ki Hiburu kadrwa ku wathingale, alau nagane ki aidridringane ki yakai calragulragu.”. 9Ku Arungu lri malra kwini kuzibikini ku “Abadhane ki Tamatama” niyane ka balase ka kiu si patarumara tu Balrithane ki pasalrivane ka lrisi, 10lai malra kwini “Abadhane ki Azazele” Kwini drumane ka vaeva ka kiu lri papanianianiyake patarumara ki Tamatama, ala lri pakatwase kwini ki kiu pucalragulragu siwlri baai ki Azazele, si pasikai ki mapapangale mupasalriu.
11Ku Arungu lu ngipapasikai si pasikai ki wacekecekeleini patarumaramara ku sawvalai ka lwange tu Balrithane ki pasalrivane ka lrisi, 12kwini lasu lri malra kwidra nipasueteane ku lrangele ki tapatarumaramarane ka tatalianane si lragumu ki ererece ka taliane mwadringi ki Alrivilriviilrivinga ka taikaikaiyane. Lri malra kwini erai ki kiu mwadringi. 13Lri ikai cucubungu ki Tamatama padalai ku taliane, ku ebelre lani paidringi ki sacaebane ki Langiane, amani lu drele kwini ki sacaebane si la pacai. 14Lri malra ku erai ki sawvalai ka lwange, si arakai ku galawgau depe si paralikiliki icucubungu ki sacaebane, si icucubungu ki Langiane paralikiliki kingipitulu.
15Ala lri culu ku balase ku kiu, si pasikai ki mapapangale patarumara ku Balrithane ki pasalrivane ka lrisi, kwi lasu lri iluku ku erai ki kiu mwadringi ki Alrivilriviilrivinga ka taikaikaiyane, si paralikiliki pakai belenge ki sacaebane si cucubungu ki Langiane, mararaamau ku taparalikilikaneini ku erai ki lwange. 16Kwi lasu lri arakai ku miyaiya kai ku tapiane, ngwalai ku kaika takabulane ki swa Iseraylri si tapasalrivane lini, lri pasikai ki Alrivilriviilrivinga ka taikaikaiyane bula tulrisi, amani sa ikabicelrakane ki tasuladhane kwini Alrivilrivi ka balrawbau, ala kwini tasuladhane singikai ki lalrisi kaika mabula niyane. 17Twalai ku tamwadringane ki Arungu ki Alrivilriviilrivinga ka taikaikaiyane marasikai kwini ki kiapakabula ka lrisi, pakela kwini ki tamulatadrananeini kikwini ki zikange, kwini Alrivilrivi ka balrawbau kai lri maka ikai ku umawmase. Kwi lasu lri ngipapasikai si wacekecekeleini si mapapangale makanaelre bula tulrisi, 18kwi lasu lri tara mwa ki tapatarumaramarane ki Tamatama cucubungu, patarumara ku Lama ka lrisi, si bula ki tapatarumaramarane. Lri malra ku erai ki sawvalai ka lwange si balase ka kiu, si sakidri pwa kwini ki supate ka nitulawngane ki tapatarumaramarane. 19Lri arakai ku galawgau dapenge ku erai, sangupitulu; paralikiliki ki tapatarumaramarane. Lri arakai ku miyaiya kai ku kakudhane, ngwalai kwini pasalrivane ki swa Iseraylri bula ki tapatarumaramarane, lani kabulanga.
Atalingikaiyane ki pasalrivane ka balase ka kiu
20Ku Arungu lu maka marasikainga ku lrisi ki Alrivilriviilrivinga ka taikaikaiyane, si Alrivilrivi ka balrawbau ki Tamatama si tapatarumaramarane, lri malra kwini “Abadhane ki Azazele” Ka balase ka kiu si patarumara ki Tamatama. 21Lri pataru drusa kwini alrimaini pubelenge ki awlru ki kiu, pelaela pathingale ku pasalrivane, si tabaebalreane, si langilisianane patuelre ki swa Iseraylri, lri malra kikai lapasalrivane pataluela papia ki awlru ki kiu, ala lri sikawlu ku tangea malra kikai kiu sisau papia calragulragu. 22Kikai kiu lri siamece ku pasalrivane lini patuelre, si iluku kwini pasalrivane lini mwa kwini ki takakadrwane ku umawmase.
23Ku Arungu ala lri mwadringi ki Alrivilrivi ka balrawbau, si mwalra ku sangiragelanane ki barakalai lu mwadringi ki Alrivilriviilrivinga ka taikaikaiyane, si pikai kwini. 24La lri ikai ki Alrivilrivi ka taikaikaiyane sikelre, silaimai, ala lri mulatadre si ngipapasikai si pasikai ki pasalrivane ki mapapangale patarumara ku Lama ka lrisi. 25Lri pibelenge ki tapatarumaramarane lama kwini lamace ki niculwane patarumara ku Balrithane ki pasalrivane ka lrisi. 26Kwidra kiasikawlu sisau kwidra ki “Abadhane ki Azazele” Ka kiu pucalragulragu lri tara paswalana sinau ku laimai si sikelre ala lri maka siwlri mwa ki tasuladhane. 27Lri malra kwini Balrithane ki pasalrivane ka lrisi, ka sawvalai ka lwange si balase ka kiu iluku mulatadre ki tasuladhane si lama; ku lrangici, beate, buru lri mialri lama patuelre. Kwini erai lini wailukunga mudaane ki Alrivilriviilrivinga ka taikaikaiyane atalingikaiyane mupasalriu. 28Kwini kiasikawlu ka amani ku walama kwini aculwane ku umawmase lri tara paswala sinau ku laimai si sikelre ala lri maka siwlri mwa ki tasuladhane.
Pasusu ku Samupasalrivanane ka lrisi ka vai
29Kai swa Iseraylri lri palralrawthu pasusu kikai lebe kai kakudhane. Luka caili ki sakapitu ka dramare si samakamangeale ki vai, ku swa Iseraylri si kwini yakaikai liniane ka singibadhane makanaelre lri tara laisi, si kai kaungu. 30Ikai kikai ki vai, pasikaiya liniane mupasalrivane, si bula liniane, kwini lalasu lani ikai cucubungu ki Tamatama kabula. 31Kikai yai sanianiangenga ka vai; kwini lalasu lri tara laisi, kai kaungu. Kikai lakakudhane lrika palralrawthu lini pasusu. 32Kwidra singiakai ki kakudhane kipacegecege, la mucungulu ki tama marasikai ku awngane ki barakalai ka abebeelengenga ki barakalai lri bula tulrisi. Kwi lasu lri ngiragelane ku laimai ki barakalai, 33si pasikai ki Alrivilriviilrivinga ka taikaikaiyane, Alrivilrivi ka balrawbau ki Tamatama, tapatarumaramarane, barakalai, si mapapangale bula tulrisi. 34Kikai lakakudhane lri tara ka apalralrawthane pasusu. Kikai lrisi luka caili lri tara piya kingivaale, pasikai ki swa Iseraylri mwalra ku pasalrivane demedeme.
Ku Musi la singikai ku drekase ki Tamatama pangimia#16.34 “Ku Musi la singikai ku drekase ki Tamatama pangimia” ku wahunyake madu iya kai “ku Arungu paluludu pia ku drekase ki Tamatama ki Musi”..
Currently Selected:
Lrivi 16: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
