Daniele 10

Wadrele ku maburusi ikai babiabila kadravane Tigerise

1Sa taratulrunga ka caili ku taatinuhikane ki Sairuse ka swa Perisia, ku Twaumase la papiyanga ki Beletisazare ka Daniele pelaela ku vaeva ka vaga. Kikai vaga yai patengatengane, ai makuciingalre pulringalringau#10.1 “ai makuciingalre pulringalringau” ku wahunyake madu iya kai “kwini yai ngwakai ki maadrau ka amakakaruburane”.. Ku Daniele yakai ki maburusi kipalalrwai.

2Sakamani kwidra, kwaku ka Daniele watubiaku taratulru ka niciwbi. 3Kingitulrulaku ka niciwbi kai kane ku kagagane, kai kane ku beate, kai ungulu ku bava, la kai garugarucu ki isiu.

4Ki aswalaalanga ki dramare samaka 24 ka vai, acegecegaku ikai babiabila ki kadravane Tigerise. 5Paswabelengaku, la drele ku tangea ku umawmase ku sialaimai ku malubiri ka lalasare ka kaimadhane ka laimai, la silakete ku kakingiane. 6Ku kinawmasaneini mia ki tinukucingaalrane ka lrenege ledra, ku lringau mia ki lrikace ledra; ku macaini mia ki apwi ledraedra, ku alrima si drapale mia ki niselredrane ka lriwlu likalikathe; ku lingau waelraelrange mia ki laumawmase ka maralealeale.

7Kathanaku tangeangea ka wadrele kikai maburusi. Kudra taelre nakwane ku umawmase kadrwa ku drele lini ku manemane; ai kwi lalasu mwakuludru turamuru, si mawbebere kilepenge. 8Tangeangeaku asuru ikai kwini, si dredredrele kikai matiasamali ka tangimiamiane. Laka kadrwa ku pukuli ku natikiyanenga, akabalrithi kai lringau, kadrwa ku umawmase ku wathingale nakwane. 9Sakilalraku ku lingauini, gwaruthunganaku ikai cakena, si kai pulringalringalringau. 10Ala pangitutuluku, ikai ku vaeva ku alrima ku waarake nakwane, la arakaiyaku ku alrima si paculru sutelrai, ai manwagiligiligiliana kai kinawmasaneli patuelre.

11Ku sasiakawlu belenge amia kai nakwane, “Daniele, ku Twaumase madalame muswane. Ngidrakala si acegecege, la kirarakete kilalra kai akawrivaneli muswane; kiasikawlaku kainganai mwa muswane kai.” Kwi lasu samaka kawrivanga kikai vaga, la acegecegaku, si manugigigiliana.

12Kwi lasu ala iya kai, “Daniele, madha mukuludru. Twalai ki aswalalanga ka vai sangisasaangatesu ikai cucubungu ki Twaumase kitubi ku athingalane kikai maburusi ku pacugane, ku Twaumase kialalraanga kwi inulrisu. Amani ku kelali palalrwai muswane. 13Ai ku palribulu ki kuni ki Perisia ka sasiakawlu belenge watelenge nakwane, lakamani ku ngiabalaili ku nitara 21 ku vai. La tangeangeaku asuru ikai Perisia, yakai ku tangeea ka kiacapili ki sasiakawlu belenge ka Mikaele kaiyanganai paralubu nakwane. 14Kaiasasane nau pasikai muswane lalrwai ku lrika akipadradresengane ki sakacekelesu; kikai yai ngwakai lukabibilrili ka maburusi.”

15Kwi lasu sakawrivariva nakwane, walengethaku drele cakena, si kameteemetenga ngusaiyaiyane. 16Kwini mia ki umawmase ka sasiakawlu belenge ala taale ku alrima si ecenge ki bibianeli, la iyaku kai iniane, “Tamatama, kikai maburusi pakamamelre nakwane ka kadrwa ku puku, si manugiligiligili. 17Miaku ki duri ka yacucubungu ki tawki; lri tumanaku kikawriva muswane? Kadrwanga ku pukuli, kadrwanga ku niakeli.”

18Kwi lasu la pelana arake nakwane, ala siwlriwlriane kai pukuli. 19Kwi lasu amia kai, “Madha mukuludru! Ku Twaumase madalame muswane turamuru; lri kasulivatesu, kagaranga.”

Kwi lasu samaka kawrivanga, la aru sapukuanenga naku. La iyaku kai, “Tamatama, pasiaulriwlrianengasu kai pukuli; kawrivanga ku lrika apelaelanesu nakwane!”

20-21Kwi lasu amia kai, “Anau keela kai wathingalesu? Ku kelali lri pelaelaku muswane kai tapacasane ka patengane ka sabulrwane ka hungu. Kaiasasane lri tara katwasenga naku siwlri, si makakaruburu ki palribulribulu ki kuni ki Perisia ka sasiakawlu belenge. Lukabilrilinga, ku palribulribulu ki kuni ki Gurike ka sasiakawlu belenge lri mutaluvaivai. Kathane ku palribulribulu ki swa Iseraylri ka Mikaele ka sasiakawlu belenge, kadrwa ku umawmase ku lri dulru paralubu nakwane telenge liniane.”

Currently Selected:

Daniele 10: NDV

Highlight

Copy

Compare