MARK 4
4
Upama Daya Nabur bine
(Mat 13.1-9; Luk 8.4-8)
1 #
Luk 5.1-3
Jesus piguru ngajar dinge di bŭngŭn Danu Galilee. Bara daya adi tikuruk maning Ayŭh mbŭh raru bagŭ ndŭg ka Ayŭh mindah ka guru darŭm arud. Arud anŭ di piin, ka bara daya mijog di tabing sindŭk piin. 2Ayŭh pakai upama ngga ngajar ngara pasar bagŭ masam kayuh; Ayŭh nang di ngara:
3“Dingah ati! Agi ndi sidah, ndi naan daya matak di nabur bine. 4Darŭm ayŭh nabur bine, kada bine rabu di aran, ka manuk mandŭg di man-i. 5Kada rabu di tana pibatuh, di yŭn kurang tana. Bine anŭ timbu, sabab tana anŭ dŭh tŭrŭp. 6Jadi, kan batŭh andu makat, ayŭh dog paras sura; ka sabab uat-i dŭh tŭrŭp, ayŭh rayu. 7Kada bine rabu di ruang reja, adi timbu ka piaka ayŭh ndŭg ka-i dŭh buān. 8Pak kada bine rabu di tana mandis, ayŭh timbu, jadi, ka piruah bagŭ buwa: agi adi taruh puru rupet, agi adi nŭm puru, ka agi adi siratus.”
9Ka Jesus nang, “Dingah meh garang, kambŭi angān biyŭn kajit!”
Pinŭtŭn Upama
(Mat 13.10-17; Luk 8.9-10)
10Kan Jesus mbŭh sadi, kada ngara adi ko dingah Ayŭh mandŭg tudu Ayŭh ngga ngara adi simŭng-duwŭh naan murid-I ka mite Ayŭh kidaan rati upama anŭ. 11“Angān dog nggen kuasa ngga mirati rusia pasar munki Tapa mritah,”#4.11 Tapa mritah; anŭ inŭh so tigŭrŭ bang piminyu: Pritah Tapa. Jesus nam ngara. “Pak ngara adi bŭkŭn, adi dŭh so tibaran ngan, dingah sopŭrŭg kayuh pakai upama, 12#Isa 6.9-10 isa,
‘Ngara bisa tingga ka tingga,
pak dŭh kiris;
ngara bisa dingah ka dingah,
pak dŭh mirati.
Amai kambŭi dŭh,
ngara an pari ka Tapa,
ka Tapa apun ngara.’ ”
Jesus Kidaan rati Upama Daya Nabur bine
(Mat 13.18-23; Luk 8.11-15)
13Jadi Jesus siken ngara, “Angān dŭh mirati upama ati? Simuki meh garang angān re mirati upama adi bŭkŭn? 14Ayŭh adi nabur bine nabur agah Tapa. 15Agi kada daya mbŭh keya ka bine adi rabu di aran; darŭm ngara dingah agah Tapa, Shetan mandŭg ka rasu sirapas-i. 16Adi bŭkŭn mbŭh keya ka bine adi rabu di tana pibatuh. Kan ngara dingah agah anŭ, ngara rasu kambat-i ngga gaŭn. 17Pak-i dŭh mŭrŭt tŭrŭp ka darŭm ngara, ka ngara dŭh tan tui. Jadi kan pinyusah ngga pinyikisiis mandŭg sitagar agah anŭ, ngara jimŭ ka dŭh tia sabah dieh. 18Adi bŭkŭn mbŭh keya ka bine adi dog nabur di ruang reja. Ngara inŭh adi dingah agah anŭ, 19pak pinyusah pasar pimudip, pinyiawang di pinyikaya, ngga sopŭrŭg pinyiripong adi bŭkŭn mbŭh piaka agah anŭ da-i dŭh buān buwa. 20Pak adi bŭkŭn mbŭh keya ka bine adi dog nabur di tana adi mandis. Ngara dingah agah anŭ, trima-i, ka buān bagŭ buwa: agi taruh puru rupet, agi nŭm puru, ka agi adi siratus.”
Prita adi Dog Na di ribo Sambong
(Luk 8.16-18)
21 #
Mat 5.15; Luk 11.33 Jesus pijuu minyu, “Agi kah daya taban prita mŭrŭt ka na-i di ribo sambong, puan kah na-i di ribo pangō? Dŭh kah ayŭh na-i di tunduh rika prita? 22#Mat 10.26; Luk 12.2 Tadŭ tadŭ kayuh adi dog sukan re dog taban ka sapa, ka tadŭ tadŭ rusia re dog kidaan di daya. 23Dingah garang, kambŭi angān biyŭn kajit!”
24 #
Mat 7.2; Luk 6.38 Ayŭh nang gŭh di ngara, “Nakit ngatin kayuh adi angān dingah! Atur adi angān pakai ngga tingga arap kana daya re Tapa pakai ngga tingga arap kana adŭp ngan; pak jangān re rabis bat. 25#Mat 13.12, 25.29; Luk 19.26 Daya adi biyŭn re dog nggen tambah-i, ka daya adi dŭh biyŭn ani ani rapuh kayuh adi-i biyŭn re dog tambit gŭh so ayŭh.”
Upama Bine adi Timbu
26Jesus pijuu nang, “Kan Tapa mritah kayuh re keya ka ndi naan daya adi nabur bine di ŭmŭh-i. 27Sitadŭn ayŭh bŭŭs singarŭm ka burah sandu ndai kraja-i, bine anŭ timbu. Pak ayŭh dŭh puan munki-i timbu. 28Adŭp tana inŭh adi bada-i timbu ka buān buwa; sibungas-i ayŭh prisok, komŭnŭ ayŭh bitundun, sikasŭn-i tundun anŭ puno ngga buwa. 29#Jol 3.13 Kan buwa mbŭh masak, daya sun buwa-i amai-i mbŭh tipuh ngatŭm.
Upama Ruwang Sabi#4.29 SABI Pimuruh adi dog kadŭn Sabi di pimindai ati inŭh ndi masam pimuruh adi tungang timbu kira ka ndŭg taruh mita bigatung-i.
(Mat 13.31-32, 34; Luk 13.18-19)
30“Munki gaya kayuh kan Tapa mritah?” Jesus siken. “Upama ani re ta pakai ngga kidaan rati-I? 31Ayŭh agi simuti. Ndi naan daya taban ndi sirah ruwang sabi, ruwang adi siabo siit di ong, ka purun-i di tana. 32Kan-i mbŭh timbu, ayŭh jadi bās dŭ so sigara kudos. Ayŭh pijadi daan daan adi dang yŭn manuk bisarin di ribo sayung-i.”
33Jesus nyuse ajar-I pakai bagŭ masam upama adi mun anŭ, yŭn situngang tungang ngara mirati. 34Ayŭh taŭn ari pakai upama kan-I ngajar, pak kan Ayŭh mbŭh sadi ngga bara murid-I, Ayŭh kidaan rati sopŭrŭg-i di ngara.
Jesus Pirŭŭ Sabak Ribut
(Mat 8.23-27; Luk 8.22-25)
35Di andu anŭ, ngga arong singumi andu, Jesus nang di bara murid-I, “Ja ata mutas ka pah mandi rawŭt ati.”
36Jadi ngara tingge bara daya; bara murid-I mŭrŭt arud di yŭn Jesus taŭn mbŭh guru, ka matak ayō Ayŭh. Arud arud adi bŭkŭn agi gŭh diginŭ. 37Ka gŭgŭh agi sabak ribut, ka girumbang maka arud ndŭg ka mbŭh re puno da piin. 38Jesus agi di tura ka punok arud, bŭŭs pakai batar. Bara murid-I kies Ayŭh buang nang, “Gurū, dŭh kah Kaam piduri ata ati mbŭh re rŭnggŭd?”
39Jesus makat ka mritah sabak, “Pajam!” ka-I nang di rawŭt, “Pirŭŭ adŭp mu!” Sabak rasu rŭŭ, ka sopŭrŭg-i mbŭh batur tanang. 40Ka Jesus nang di bara murid-I, “Mani angān taru? Babŭ kah angān dŭh sabah di Aku?”
41Pak ngara mbŭh raru taru ka nang dupan adŭp-i, “Asi sawŭ daya ati? Ndŭg ka sabak ngga girumbang tunda pinganang-I!”
Currently Selected:
MARK 4: TBVONT
Highlight
Copy
Compare
Share
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
