MATTHEW 23
23
Jesus Bakan pasar bara Gurū Ukum-adat Jahudi ngga bara Pharisee
(Mrk 12.38-39; Luk 11.43, 46, 20.45-46)
1Jadi Jesus minyu di bara daya bagŭ anŭ ka di bara murid-I. 2“Bara gurū Ukum-adat Jahudi ngga bara daya Pharisee inŭh adi dog nyibandar da jadi bara adi tukang kidaan rati Ukum-adat Moses. 3Jadi angān dŭh siŭn dŭh sita ka tunda sopŭrŭg kayuh adi ngara bada angān ndai; pak dŭhnyah nanya urah ngara, sabab ngara dŭh ndai kayuh adi ngara ngajar. 4Ngara bada daya kabis pinyirabis adi raru bat, pak adŭp ngara biar ndi trinju dŭh gŭh ngara an pakai ngga turung daya kabis pinyirabis anŭ. 5#Mat 6.1; Dit 6.8; Pkg 15.38 Ngara ndai bagŭ masam kayuh isa daya kiris. Tingga nŭh anak kutak adi brisi ngga ayat ayat pinganang Surat-kudus adi ngara na di arŭ ka di tangan ngara, ka tingga munki masam ramba-i! Ka ngatin gŭh munki masam ambu-i taris taris-abuh di jipo ngara!#23.5 taris-abuh di jipo ngara: Taris-abuh ati dog pakai jadi tandā pinyitŭtŭd di Tapa (Tingga Pkg. 15.37-41). 6Ngara suka tarun yŭn adi rabis kana di tika gawai samŭn baku baku adi tura ka jawin di ramin simayang-Jahudi; 7ngara suka dog tabi ka dog stabi di arong passar ka suka daya bagan adŭp-i ‘Gurū.’ 8Angān dŭh siŭn dog kadŭn ‘Gurū,’ sabab angān mbŭh darŭm ndi rawang ka biyŭn ndi adŭ Gurū. 9Ka angān dŭh siŭn kadŭn tadŭ tadŭ daya di ong ‘Sama,’ sabab angān biyŭn ndi adŭ Sama di shorga. 10Dŭh gŭh angān patut dog kadŭn ‘Pinguru,’ sabab Kristus inŭh adi sadi-I ndi naan pinguru ngan. 11#Mat 20.26-27; Mrk 9.35, 10.43-44; Luk 22.26 Adi siabo bās dupan angān dŭh siŭn dŭh jadi urun ngan. 12#Luk 14.11, 18.14 Asi asi adi bada adŭp-i bās re dog pirapat, ka asi asi adi pirapat adŭp-i re dog kibās.
Jesus Nunggu Urah Pingadong
(Mrk 12.40; Luk 11.39-42, 44, 52, 20.47)
13“Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān nagah daya kinyam Pinyipritah Tapa.#23.13 Pinyipritah Tapa; anŭ inŭh so tigŭrŭ bang piminyu: Pritah shorga. Dŭh-i angān abah kinyam Pinyipritah Tapa adŭ, pak angān nagah daya adi gruwŭn an kinyam-i.
[ 14Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān nipu bara dayung uban ka sirapas ramin-arŭn ngara, ka komŭnŭ nadar bidua tui di sirung jawin daya! Sabab anŭ ukum ngan re rabis bat!]#23.14 Agi kada rapi-surat dŭh nambah ayat ati (tingga Mrk 12.40).
15“Mbŭh raru paya inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān birayar mutas rawŭt ka tambus barang rais ramŭn an pibŭrŭt ndi naan daya ka darŭm adat ngan; ka kan angān mbŭh dapŭd, angān bada ayŭh piduwŭh kari arap mun adŭp ngan yŭn patut dog taran ka apui neraka!
16“Mbŭh raru payah inŭh angān, pinguru adi karak! Angān ngajar nang, ‘Kambŭi daya bipayu pakai Ramin Tuhan, ayŭh dŭh dog ngabŭt payu-i anŭ; pak kambŭi ayŭh bipayu pakai mas adi di Ramin Tuhan, ayŭh dog ngabŭt.’ 17Angān budo buang karak! Aki adi rabis biguna, mas kah Ramin Tuhan adi bada mas kudus? 18Angān ngajar gŭh, ‘Kambŭi daya bipayu pakai mija-sambah, ayŭh dŭh dog ngabŭt payu-i anŭ; pak kambŭi ayŭh bipayu pakai pinganggen adi di tunduh mija-sambah, ayŭh dog ngabŭt.’ 19Mbŭh raru karak inŭh angān! Aki adi rabis biguna, pinganggen kah mija-sambah adi bada pinganggen kudus? 20Jadi meh, kan daya bipayu pakai mija-sambah, ayŭh bipayu pakai mija-sambah samŭn pinganggen adi di tunduh-i; 21ka kan ayŭh bipayu pakai Ramin Tuhan, ayŭh bipayu pakai-i samŭn Tapa, adi rŭŭ dieh; 22#Isa 66.1; Mat 5.34 ka kan daya bipayu pakai shorga, ayŭh bipayu pakai Takta Tapa samŭn Ayŭh adi guru dieh.
23 #
Lev 27.30
“Mbŭh raru payah inŭh angān, bara gurū Ukum-adat, ka angān bara daya Pharisee! Angān pingadong! Angān jugan ka Tapa ndi utung darŭm simŭng so rapah rapah, mun silaseh, adar manis, ka jintan, pak angān dŭh tunda ajar adi biguna darŭm Ukum-adat, mun pinyitŭnggŭn ka pinyirasi ngga atin-tŭnggŭn. Kayuh kayuh ati angān patut ndai, buang dŭhnyah kambŭt adi bŭkŭn. 24Pinguru adi karak! Angān napis tura so piin nok ngan, pak tŭrŭn onta!
25“Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān pibisig sapa saker ngga pinggen, pak tura ka darŭm-i mbŭh puno ngga kayuh adi angān dapŭd so pinyiganas ka atin sibut. 26Daya Pharisee adi karak! Pibisig tura ka darŭm diŭ, ka komŭnŭ tura ka sapa re bisig gŭh!
27 #
Png 23.3
“Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān mbŭh keya ka kubur adi buda ngasad ko dog ngu, adi ramus tura ka sapa-i pak tura ka darŭm-i mbŭh puno ngga dudu turang ka tadang tadang manusia adi madam. 28Simŭnŭ gŭh angān, tura ka sapa angān tatŭng kana ngga sopŭrŭg daya, pak tura ka darŭm angān mbŭh puno ngga pinyikadong ka dosa.
Jesus Kidaan Ukum Ngara
(Luk 11.47-51)
29“Mbŭh raru payah inŭh angān, bara gurū Ukum-adat Jahudi, ka angān bara daya Pharisee! Angān pingadong! Angān nakit ndai da ramus kubur kubur bara nabi ka ngabuh batuh batuh-pingingat bara daya adi mbŭh kabŭs adi ko udip sanang; 30ka angān ko nang kambŭi angān udip di jaman tayung-babuk ngan, angān dŭh ndai kayuh adi ngara ndai bait kah siŭ bara nabi. 31Jadi angān taŭn mbŭh ngaku adŭp ngan bara sesang ngara adi ko siŭ bara nabi! 32Pijuu meh garang, ka ngamas kayuh adi tayung-babuk ngan ko piguru ndai. 33Angān jippŭh ka bara anak jippŭh! Simuki meh angān re pirupas adŭp ngan so dog taran ka apui neraka? 34Ka Aku meh kidaan di angān, Aku re pait ka angān nabi ngga daya adi bijak ka gurū; angān re siŭ kada so ngara, masak di rigang adi bŭkŭn, ka madŭs adi bŭkŭn di ramin simayang-Jahudi ka tadak ngara so kupo ndi ndŭg kupo andi. 35Ngapŭi meh, Tapa re ngukum angān amai bara daya adi dŭh sarah ko dog siŭ, so Abel adi dŭh sarah ndŭg Zechariah anak Berechiah, adi angān siŭ di asah Ramin Tuhan ngga mija-sambah. 36Aku kidaan di angān ngga sawŭ-i: ukum, amai sopŭrŭg pinyiŭ anŭ, re nyatŭk daya di jaman ati!
Pinyirindu Jesus di Jerusalem
(Luk 13.34-35)
37“Jerusalem, Jerusalem! Kuu siŭ bara nabi ka manjan ngga batŭh bara pinyisung adi Tapa pait ka kuu! Pikudu kari Aku raan dakŭp sopŭrŭg daya mu, nimun sindŭ siok nguruk anak anak-i di ribo urad-i, pak daya daya mu abah! 38Ngapŭi meh Ramin Tuhan mu re dog tagan ka engan. 39So madin, Aku kidaan di kuu, kuu re dŭh tia kiris Aku ndŭg ka kuu nang, ‘Tapa nyiberkat Ayŭh adi mandŭg ngga adŭn Tuhan.’ ”
Currently Selected:
MATTHEW 23: TBVONT
Highlight
Copy
Compare
Share
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
