MATTHEW 10
10
Simŭng-Duwŭh naan Pinyuruh
(Mrk 3.13-19; Luk 6.12-16)
1Jesus bagan simŭng-duwŭh naan murid-I da tikuruk ka nggen di ngara kuasa ngga pibu roh arap ka pibua barang masam andam udar. 2Ati inŭh dŭn ngara adi simŭng-duwŭh naan pinyuruh: Adi diŭ, Simon (adi dog kadŭn Peter) ngga jurud-i Andrew; James ngga jurud-i John, adi duwŭh madis anak Zebedee; 3Philip ngga Bartholomew; Thomas ngga Matthew, adi daya pinsuke; James anak Alphaeus, ka Thaddaeus; 4Simon adi Patriotik, ka Judas Iscariot adi jua Jesus.
Kraja Bara Pinyuruh
(Mrk 6.7-13; Luk 9.1-6)
5Ngara adi simŭng-duwŭh naan anŭ dog pait Jesus ngga pinganang sakati: “Dŭhnyah di ka tarun tana daya adi dŭh bangsa Jahudi puan kah kupo daya Samaria. 6Pak di ka biri adi manyap, anŭ inŭh daya Israel. 7#Luk 10.4-12 Panu di nyuse, ‘Dŭm dŭh tui Tapa re mritah!’#10.7 Tapa re mritah; anŭ inŭh so tigŭrŭ bang piminyu: Pritah Shorga. 8Pibua daya adi birandam, pakat daya adi kabŭs, pibua daya adi naman andam kurit adi bisā, ka pibu umot. Angān mbŭh kambat kuasa ati dŭh so angān bayar, jadi ndai meh sopŭrŭg-i dŭh kira bayar. 9Dŭhnyah taban mas, pirak, puan kah duit timaga di krape ngan; 10#1Co 9.14; 1Ti 5.18 dŭhnyah taban beg di pimanu ngan, puan kah tambah jipo, puan kah kasut, puan kah sikud. Daya adi nyiraja taŭn patut dog nggen kayuh adi-i biguna.
11“Kan angān ndŭg kupo puan kah anak kupo, jiroh daya adi raan kambat angān, ka rŭŭ ngga ayŭh ndŭg ka angān bu so tarun anŭ. 12Kan angān mŭrŭt ramin daya, nang, ‘Damai ka angān.’ 13Kambŭi daya di ramin anŭ kambat angān, isa-i tabi damai ngan rŭŭ ngga ngara; pak kambŭi ngara dŭh kambat angān, angān bisa pari tabi ngan. 14#Png 13.51 Ka kambŭi daya puan kah kupo dŭh an kambat angān, puan kah abah dingah angān, bu so nŭ ka gutog dabu so kaja ngan.#10.14 gutog dabu so kaja ngan; kayuh ati inŭh ndi masam pinyibakan. 15#Mat 11.24; Tib 19.24-28 Ingat nŭh! Di Andu Bisara Tapa re masi dŭ di daya di kupo Sodom ngga kupo Gomorrah so di daya di kupo anŭ!
Pimandŭg Pinyikisiis
(Mrk 13.9-13; Luk 21.12-17)
16 #
Luk 10.3
“Dingah ati! Aku pait angān keya ka biri ka ruang kasong tarun. Angān dŭh siŭn dŭh an nakit mun jippŭh ka duduh mun manuk asang. 17#Mrk 13.9-11; Luk 12.11-12, 21.12-15 Ingat, re agi daya an nakap angān ka taban angān ka yŭn bisara, ka re madŭs angān di ramin simayang-Jahudi. 18Amai angān murid Ku angān re dog bisara di sirung jawin bara pinguasa ka raja raja, isa angān bisa kidaan Agah kana di ngara ka di daya adi dŭh bangsa Jahudi. 19Kan ngara taban angān yŭn dog bisara, dŭhnyah gapang pasar ani re ngan nang, puan kah munki angān nang-i; kan tipuh-i mandŭg, angān re dog nggen kayuh adi re ngan nang. 20Amai pinganang adi angān piruah dŭh-i re tung jangān; ayŭh re mandŭg so Roh Sama ngan adi minyu so angān.
21 #
Mrk 13.12; Luk 21.16 “Daya re jua jurud adŭp-i yŭn dog ukum kabŭs, ka bara sama re ndai simŭnŭ di tunduh anak-i; anak re rawan pimas ka bada pimas dog ukum kabŭs. 22#Mat 24.9, 13; Mrk 13.13; Luk 21.17 Barang naan daya re tiru di angān sabab angān murid Ku. Pak asi asi adi bijijŭ ndŭg sikasŭn-i re dog nyiramat. 23Kan ngara kisiis angān di ndi kupo, bikaduh bu ka kupo bŭkŭn. Puan meh, angān dŭh re ngamas kraja ngan darŭm sopŭrŭg kupo Israel diŭ so Anak Manusia mandŭg.
24 #
Luk 6.40; Jhn 13.16, 15.20 “Mating murid bās dŭ so gurū-i; mating urun bās dŭ so tuan-i. 25#Mat 9.34, 12.24; Mrk 3.22; Luk 11.15 Jadi anak-murid patut munos asŭng-i amai mbŭh brimun ngga gurū-i, ka simŭnŭ gŭh urun amai mbŭh brimun ngga tuan-i. Kambŭi ubak rawang dog kadŭn Beelzebul, bara di rawang anŭ re dog kadŭn ngga dŭn adi rabis arap!
Asi patut dog Taru
(Luk 12.2-7)
26 #
Mrk 4.22; Luk 8.17 “Jadi dŭhnyah taru daya. Ani ani adi dog sukan madin re dog kiruwar, ka barang masam rusia re dog puan. 27Kayuh adi Aku kidaan di angān darŭm karŭm angān dŭh siŭn dŭh an pari nyabŭt-i darŭm jawa sandu, ka kayuh adi angān dingah darŭm bisukan angān dŭh siŭn dŭh an piranggah-i so tibung ramin. 28Dŭhnyah taru ngara adi siŭ pŭrŭng pak dŭh biyŭn kuasa ngga siŭ simangi; pak taru meh Tapa, adi bisa pirabur pŭrŭng ngga simangi di apui neraka. 29Ngga ndi sen kuu bisa miris duwŭh manuk piit, pak ndi manuk piit dŭh gŭh rabu ka tana kambŭi dŭh so pinyibada Sama. 30Ka kuu, sirah ubok mu mbŭh gŭh dog niap. 31Ngapŭi meh dŭhnyah taru; angān mbŭh brega dŭ so manuk piit!
Ngaku ngga Tirawan Jesus
(Luk 12.8-9)
32“Ngara adi ngaku adŭp-i pinunda Ku di sirung jawin daya bagŭ, Aku re ngaku gŭh ngara di sirung jawin Sama Ku di shorga. 33#2Ti 2.12 Pak ngara adi tirawan Aku di sirung jawin daya bagŭ, Aku re tirawan gŭh di sirung jawin Sama Ku di Shorga.
Dŭh damai pak Kaii
(Luk 12.51-53, 14.26-27)
34“Dŭhnyah pikir Aku mbŭh mandŭg taban damai ka ong. Dŭh, Aku dŭh mandŭg taban damai, pak kaii. 35#Mic 7.6 Aku mandŭg isa bara anak dari rawan sama ngara, bara anak dayung rawan sindŭ ngara, iban dayung rawan dinŭh ngara; 36pinganyu ngan adi siabo arap re so rawang adŭp ngan.
37“Ngara adi rindu sama-i puan kah sindŭ-i rabis so Aku dŭh inŭh tibirang jadi murid Ku; ngara adi rindu anak dari-i puan kah anak dayung-i rabis so Aku dŭh inŭh tibirang jadi murid Ku. 38#Mat 16.24; Mrk 8.34; Luk 9.23 Ngara adi dŭh gŭrŭng rigang-i ka tunda Aku dŭh inŭh tibirang jadi murid Ku. 39#Mat 16.25; Mrk 8.35; Luk 9.24, 17.33; Jhn 12.25 Ngara adi suba an nyiramat asŭng-i re kinanyap-i; pak ngara adi kinanyap asŭng-i amai Aku re dapŭd udip adi sawŭ adi tan adu adu.
Upah yŭn Ngara adi Kambat murid Jesus
(Mrk 9.41)
40 #
Mrk 9.37; Luk 9.48, 10.16; Jhn 13.20 “Asi asi adi kambat angān kambat Aku; ka asi asi adi kambat Aku re kambat sianŭ adi pait Aku. 41Asi asi adi kambat pinyisung Tapa sabab ayŭh pinyisung Tapa, re sua dapŭd upah-i. Ka asi asi adi kambat daya adi kana sabab ayŭh daya kana, re sua kambat upah daya adi kana. 42Angān tatu puan nang asi asi adi nggen nok biar-i piin adud di ndi so bara pinunda Ku ati adi siabo sŭ darŭm pangkat-i sabab ayŭh pinunda Ku, re manŭn trima upah-i.”
Currently Selected:
MATTHEW 10: TBVONT
Highlight
Copy
Compare
Share
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
