Balooma 10
10
1Bahi̱ki̱li̱ja baanakyanje, eki nkwete kwekumbula kwonini kandi kusaba Luhanga ni nti ajune Banai̱saaleeli̱ baanakyanje kifubilo kya bibhi byabo. 2Nanga nkimani̱ye ngoku beekambiiye kimui kukola ebi̱dheedhi̱ye Luhanga. Bhaatu tabakakengi̱ye kwonini mulingo ghwa ku̱heeleli̱ya Luhanga. 3Ngoku batamani̱ye mulingo oghu Luhanga akufoolaghamu bantu kuba bahi̱ki̱li̱i̱ye, ebo beeteelʼo oghwabo. Tabakudhootelagha mulingo ghwa kuba bahi̱ki̱li̱i̱ye oghu Luhanga aataayʼo. 4Obu Ki̱li̱si̱to aasi̱ye akamalʼo mulingo bantu bakuba bahi̱ki̱li̱i̱ye haabwa kukwata bilaghilo, niikuwo boona abaku̱hi̱ki̱li̱ja babe bahi̱ki̱li̱i̱ye haabwa ku̱mu̱hi̱ki̱li̱ja.
5Musa akahandiika haa muntu kuba ahi̱ki̱li̱i̱ye haabwa kukwata bilaghilo naaghila ati, “Weena oghu akukola ebi bilaghilo bilaghiiye, akuba mwomi̱i̱li̱.”#Kyabaleevi̱ 18:5 6Bhaatu Ebyahandi̱i̱ku̱u̱we bi̱ku̱bu̱ghagha haa muntu kuba ahi̱ki̱li̱i̱ye kusighikila haa ku̱hi̱ki̱li̱ja ngu, “Otalighila haa mutima ghwawe oti, ‘Ni ani̱ aku̱ni̱i̱na mu eghulu?’#Kyabilaghilo 30:13 ” (Ekikumani̱i̱si̱ya kwendelayo Ki̱li̱si̱to) 7“kedha oghila oti, ‘Ni ani̱ akughenda eku̱li̱mu̱?’#Kyabilaghilo 30:13 ” (Ekikumani̱i̱si̱ya kwendelayo Ki̱li̱si̱to mu baku̱u̱ye). 8Bhaatu Ebyahandi̱i̱ku̱u̱we bikughilagha ngu, “Kighambo kya Luhanga kikuli haai, kikuli mu kanu̱wa kaawe kandi haa mutima ghwawe,”#Kyabilaghilo 30:14 niikiyo tukubatebejagha tuti mu̱hi̱ki̱li̱je Ki̱li̱si̱to. 9Kaakuba waatula na kanu̱wa kaawe oti, “Yesu ni Mukama,” kandi ohi̱ki̱li̱ja mu mutima ghwawe ngoku Luhanga aamu̱hu̱mbu̱u̱ye mu baku̱u̱ye, olijunuwa. 10Nanga muntu akaaku̱hi̱ki̱li̱jagha aahiiye haa mutima, akubaluwagha kuba ahi̱ki̱li̱i̱ye, kandi akaakwatulagha na kanu̱wa ke, akujunuwagha. 11Ebyahandi̱i̱ku̱u̱we bikughilagha biti, “Weena oghu aku̱mu̱hi̱ki̱li̱ja, taalihemuka.”#I̱saaya 28:16 12Takikwita kantu muntu abe ali Mu̱yu̱daaya kedha atali Mu̱yu̱daaya. Nanga Mukama waatu Ki̱li̱si̱to ni Mukama kandi akuhaagha mi̱gi̱sa boona abaku̱mu̱hi̱ki̱li̱jagha. 13Nanga Ebyahandi̱i̱ku̱u̱we bikughilagha biti, “Weena oghu alibilikila li̱i̱na lya Mukama, alijunuwa.”#Yoweeli̱ 2:32
14Bantu bakugubha bati̱ya kubilikila oghu batahi̱ki̱li̱i̱je kubajuna? Kandi bakugubha bati̱ya ku̱mu̱hi̱ki̱li̱ja batabaghambiiyʼo ye? Kandi bakugubha bati̱ya ku̱mu̱u̱ghu̱wʼo muntu atabatebejiyʼo ye? 15Kandi bakugubha bati̱ya kughenda kutebeja batabatu̱mi̱ye? Ngoku kihandi̱i̱ku̱u̱we ngu, “Nga kili kilungi bantu kwisa kutughambila Makulu Ghasemeeye ghaa Luhanga.”#I̱saaya 52:7
16Bhaatu tabali Banai̱saaleeli̱ boona abahi̱ki̱li̱i̱je Makulu Ghasemeeye ghaa Luhanga. Nanga mulangi̱ I̱saaya akaghila ati, “Mukama, ni ani̱ ahi̱ki̱li̱i̱je butumuwa bwatu?”#I̱saaya 53:1 17Nahabweki, muntu aku̱hi̱ki̱li̱jagha haanu̱ma ya ku̱u̱ghu̱wa butumuwa haa Ki̱li̱si̱to. 18Bhaatu buuye eki nkumani̱i̱si̱ya ni ngu Banai̱saaleeli̱ ebo tabaaghu̱u̱ye butumuwa haa Ki̱li̱si̱to oghu? Majima kuwo bakabu̱u̱ghu̱wa! Ebyahandi̱i̱ku̱u̱we bikughilagha biti,
“Elaka elikulangilila butumuwa bwa Luhanga likamalakaka munsi yoona,
kandi bighambo ebi byahi̱ka hoona-hoona.”#Jabbu̱li̱ 19:4
19Nkutodhagha mbu̱u̱li̱ya nti: Banai̱saaleeli̱ aba tabeetegheleei̱ye? Musa akadu̱bha aaghila ati,
“Nkuleka mube nʼetima haabwa bantu abatali na mughaso.
Nkuleka musaalililuwe haabwa ehanga lya bantu badhoma.”#Kyabilaghilo 32:21
20Kandi na mulangi̱ I̱saaya dhee aabu̱gha atoobahi̱ye ati,
“Abamboone ni abateesalagha mbambala;
aba neeyoleki̱ye ni abataabu̱u̱li̱li̱yagha hambali ndi.”#I̱saaya 65:1
21Bhaatu haa bikwetʼo Banai̱saaleeli̱ aba, akughilagha ati,
“Bu̱li̱ kilo neesengeleli̱yagha Banai̱saaleeli̱ kunjisʼo,
bhaatu baaba bajeemi̱ kandi ntaaghu̱wa.”#I̱saaya 65:2
Currently Selected:
Balooma 10: TLJ
Highlight
Copy
Compare
Share
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
