HEBRI BATII 1
1
Yaa Ɔlaa Nwu Lefe Di Obi Nɔɔ Suoto Kuɔwa Kuɔta Wo.
1Saa yi, Yaa lakakatɛ aata bawa loo diafe ni di Yaa ɔlaa babuɛtɛtɛ suoto obe kpinwu di sisuku ate ate suoto. 2Kafɔɔ di ayi yɛntɛle ya mmle kamɛ, Yaa lɛkakatɛ ɛɛta wo diefe ni di Obi nɔɔ suoto. Nnwɔɔ suoto di Yaa lefe ɛɛbla kayi ka mmle nɛ. Obi nwu nkpo ninle otii wɔ eediki eese alɛ aale nwɔ ni asaa amuu kleetɛ nɛ. 3Obi nwu nkpo niediki mmle okle di Yaa leklekle ni eetuo nɛ. Nnwɔɔ kafɔɔ ninkpe Yaa letembi le okle ninkpe nwɔ nii. Obi nwu nkpo kafɔɔ niɛyɔ Yaa ɔlaa osie wɔ ninkpe nwɔ ni akle kayi ka mmle osie kanya. Di obe wɔ atɔɔyɔ batii sikpile ɛɛkyɛ ma eeloo nii, atoosifi ɛɛlaasiɛ di kasiɛkɔ ka ninlenke ni di osi di Yaa oletannɛɛkyɛ.
Yaa Obi Nwu Nkpo Nlenke Yaa Batɔkyɛntɛ.
4Yaa lɛbla Obi nɔɔ nwu nkpo ɛɛtaka katoo alenke Yaa batɔkyɛntɛ. Diekye leyooto le di Yaa lɛyɔ ɛɛtɔɔ nii, lɛtaka katoo dilenke alema.
5Diekye Yaa diitɔkɔ batɔkyɛntɛ nɔɔ kuonwii diidii alɛ,
“Obi nii fale.
Miɛ ntookple fɔ kote.”
Ee Yaa diitɔkɔ tɔkyɛntɛ nɔɔ kuonwii alɛ,
“Kɔwa fɔ kote ɔbale,
nioso fabale mi Obi.”
6Di obe wɔ kafɔɔ di Yaa makyesee ni Obi nɔɔ kasale kayi, aabuɛ alɛ,
“Yaa batɔkyɛntɛ bamuu dikpe nii, beese asi kaasɔ beesumu nwɔ.”
7Di Yaa batɔkyɛntɛ suoto yi, Yaa labuɛ alɛ,
“Lɛbla batɔkyɛntɛ nii, alɛ baate fɛ kɔfɛɛfɔ.
Mba kafɔɔ nikɔbla nwɔ ni ɔkpɛ di osi, lɛbla ma nlɛ baate fɛ ɔtɔ ɔkplalomii.”
8Di Obi nwu nkpo suoto, Yaa labuɛ alɛ,
“O Yaa, sɛka kalekɔ lefɔ nwu nkpo mawɛ dinaa ni kaloo.
Le sɛka di batii lɛfɔ suoto di osuku kanya.
9Fambɔmbɔ lɛsaa biene ɔbla, feekyidi kafɔɔ lɛsaa lalaale.
Nkpo oso di Yaa lɛfɔ lediki fɔ nɛ, ɛɛta fɔ suoto lɛyɔɔ, ɛɛyɔ fɔ eese di lɛba le diibu nkpe nii,
dilenke ni nle ɛɛta ni akyɛnwo lɛfɔ.”
10Yaa lakple aabuɛ alɛ,
“O Saate, kaasɔ kakyekɔ, afɔ niabla kasɔ ka mmle kamuu,
afɔ kafɔɔ niɛyɔ nnɛɛ lɛfɔ fɛɛbla kolo.
11Asaa ya mmle amuu kamafe, kafɔɔ afɔ flɔbafe diidii.
Asaa ya mmle amuu matɔ fɛ mmle okle di abula ntɔ nii.
12Fabakatu asaa ya mmle fɛ mmle okle mankatu ni awu.
Babakyɛlɛnsa nya kafɔɔ fɛ abula.
Kafɔɔ afɔ diidii flɔbakyi.
Alɛɛ lɛfɔ kafɔɔ nnaa kaloo diidii.”
13Diidii Yaa diɛtɔkɔ batɔkyɛntɛ nɔɔ kuonwii alɛ,
“Siɛ mi di oletannɛɛkyɛ,
dilaase di obe wɔ lɛyɔ balo lɛfɔ
lekpee fɔ ni ninkpaa kalɔ.”
14Be di Yaa batɔkyɛntɛ nwu nkpo nle mɔ? Anwuna ale bɔɔbla sɛkpɛ manta Yaa, ni eekpee ma alɛ babakyakaako batii ba nimawɛ ni didiki nɛ.
Currently Selected:
HEBRI BATII 1: snw
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
