2 YOHANE 1
1
1Ami, bafũbanutɛ ɔnɔɔfo, nikɔkpana kukũ ko mmle nkyesee afɔ ɔsanko wɔ di Yaa lediki ni ku babi lɛfɔ. Mbɔmbɔ ye di nwaako ɔlaa nwu nkpo kamɛ. Diele lete nii kafɔɔ nimbɔmbɔ ye, kafɔɔ ku mba ninye ni nwaako ɔlaa nwu nkpo. 2Mumbɔmbɔ ye diekye nwaako ɔlaa nwu nkpo nsi wo kaamɛ, kubasiɛ wo kaamɛ kafɔɔ dinaa ni kaloo.
3Sibualɛ, nyaami ɔnya ku atoko ɔkyɛ ole wɔ niekye ni Teete Yaa loo nfũ ku Obi nɔɔ Yesu Kristo nfũ, disiɛko awo ba ninye ni nwaako ɔlaa nwu nkpo busi ni ku lɛbɔmbɔ.
Bitikanko Kristo Asaa Otuo Nkpaamaa Ku Lɛbɔmbɔ.
4Obe wɔ lanya babi lɛfɔ bawo ntikanko ni nwaako ɔlaa nwu nkpo fɛ mmle okle di Teete lekpee wo ni kufiofa, suoto latɛ siayɔɔ mi. 5Ɔsanko bɔmbɔtɛ, nunua kotikiti fɔ lekoto nlɛ ta bamuu loo bubɔmbɔ bawo. Diele kufiofa fɔle kɔkpana nkyesee fɔ, kafɔɔ kule nko buafũ buakyeko ni bia kasɔ kakyekɔ. 6Lɛbɔmbɔ le suoto kɔkakatɛ ni ninle alɛ nkpa osiɛ di Yaa kufiofa ko eekpee wo ni kanya. Fɛ mmle okle bianu ni kaasɔ kakyekɔ, kufiofa nɔɔ ninle alɛ, biasiɛ nkpa lɛɛbɔmbɔ kamɛ.
7Basaatuotɛ balaatɛ kpinwu ntoodie bookyi kayi ka mmle mankyɔnkyɔ batii. Boobuɛ alɛ Yesu Kristo ditawa kayi ka mmle fɛ otii. Otii nwu nkpo okle nle kyɔnkyɔtɛ ku Kristo lo. 8Nkpo oso bilolaa binyu nwaa alɛ ɔkpɛ lee dilaabla kasakasa, mmle okle biafũ ni letota lee le niewo ni nimu.
9Otii lele ninamufũ Kristo asaa otuo nwu nkpo aklee yi, ni aaye Yaa. Kafɔɔ olele niemufũ asaa otuo nɔɔ nwu nkpo eekle yi, ni Teete nwu nkpo ku Obi nkpe nwɔ. 10Nioso nse otii owo lɛwa ɔkyɛ lee, anan-yɔ asaatuo ya mmle awako yi, bitanfũ nwɔ leeyo lee. Bitantuna nwɔ bia lɛsɛɛsa. 11Diekye olele niefũ otii nwu nkpo okle ntɔɔbla onwii di asaakuu nɔɔ nwu nkpo ɔbla kamɛ.
Yohanes Ɔlaa Yɛntɛle.
12Nkpe sɛlaa kpinwu katɔkɔ ye nii, kafɔɔ noomiɛ nlɛ nkpana sĩ kuukũ kamɛ nkyesee ye. Nioso komiɛ osuku nlɛ kɔwa ɔkyɛ lee munkakatɛ anu ku anu alɛ suoto kayɔɔ bamuu loo ninwo nimu.
13Obilee sankobi wɔ kafɔɔ di Yaa lediki ni babi alɛ bɔɔsɛɛsa fɔ biene biene.
Currently Selected:
2 YOHANE 1: snw
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
