Éfàsù 1

1Ŋìnó a ye tí Páwòlò, náa a Mbíṛì ká bàkà ye tí tú mì Bìndi-Mbíṛì tí Jézù nó ká kû cu wáràgà tí nó á ji yo tí ndâ ꞌduù mì Mbíṛì mbe kû ꞌvala toko ta Bìndi-Mbíṛì tí Jézù ta njembí yo gbaànjé gbí gbata Éfàsù. 2Ye kû ꞌdeke a tí ye énó máa, ndâ Bu ndoo tí Mbíṛì, ta Mbe tí ndoo Jézù tí Bìndi-Mbíṛì, ꞌví bàkà nambeè ji yo, ndú ꞌví si yo ꞌví dù nìkì maa.

Ndâ tó i mí Bìndi-Mbíṛì tacó tí lilí ꞌduù

3Ndoo ùlù Mbíṛì, tí Bu Mbe tí ndoo Jézù tí Bìndi-Mbíṛì,

tí mbe cù ꞌdê ngo cù wó tí Mbíṛì mítí ndoo, tí mbe je ndâ tó i ꞌdáá gî ꞌdo gbíṛì ji ndoo ta ṛè mì Bìndi-Mbíṛì.

4Mbíṛì ṛuka ndoo á kùṛo bà suu to tí nô,

yí ṛuka ndoo ta ṛè mì Bìndi-Mbíṛì.

Yí ṛuka ndoo, tacó bà kaa ndoo mò gí mì wó tí ndâ ꞌduù jáá kùṛo wó.

5Mbíṛì bàkà ndoo tí ndâ ꞌviì mì wó

náa a yí ká ko ndoo ta njembí wó gbaànjé ta ṛè mì Bìndi-Mbíṛì,

ꞌdo ká gbí ꞌdóó nambeè mì wó.

6Tacó wàa ndoo ꞌví ùlù ta ŋa nambeè tí nò náa yí bàkà ji ndoo sínò nó

ta ṛè mì Wú-gbí-ṛé wó tí Mbíṛì.

7Wú-gbí-ṛé wó tí nó mbe njaanga miṛi ndoo ꞌdo gbí vò i,

ta bà cì yí muu ndoo,

náa ndoo giì ꞌde tí ta à-cee-gî gítí ndâ vò i mì ndoo nô.

Ŋìnò a gbolò nambeè mì Mbíṛì,

8náa yí si à nì gí muu ndoo á go bà nì mù,

mbe je bà ꞌdi gbí-o, ta muu ji ndoo.

9Mbíṛì nì tàꞌdóó wó ji ndoo,

á go có mì wó mbe nìkì tí wó,

náa yí koṛo sàà si mí to ta ṛè mì Bìndi-Mbíṛì énó máa,

10o tí nò má gì gî, wàa,

Bìndi-Mbíṛì ꞌví gì gí bà bàkà go có tí nò.

Có tí nò énó máa:

Bìndi-Mbíṛì ꞌví kili ndâ i gbíṛì,

ta ndâ i muu to tí nó ꞌdáá gî á mí bà gbèe to,

wàa yí ꞌví dù tí gba mì ndú.

11Mbíṛì tí mbe bàkà ndâ i ꞌdáá gî bàkà ndoo tí ndâ ꞌviì-ꞌbá mì wó ta ṛè mì Bìndi-Mbíṛì,

á go có mì wó náa à sàà kuu gbí muu wó á kùṛo bà suu to tí nô.

12Mbíṛì ṛuka ze tacó wàa,

ze tí ndâ kpédélé ꞌduù tí nó mbe tee njembí ze á mítí Bìndi-Mbíṛì nó

ꞌví dù tí ndâ mbe ùlù ngba yì.

13Yo delè kpónó gì tí ndâ ꞌduù ta ṛè mì Bìndi-Mbíṛì,

tacó Bèṛi-mì-Mbíṛì náa Bìndi-Mbíṛì ci cí tí wó nó

gbì ndi ꞌbì wó mítí yo tí ndâ mbe ùnje gítí Bìndi-Mbíṛì,

mbe ꞌdi yúcó tí nó tí Banga-Ngú-Có

mbe njaanga wú ꞌdo tí miṛi yo gî, nó gî.

14Bèṛi-mì-Mbíṛì a mbó tacó bà tùbà máa,

ndoo bà dù tí ndâ ꞌviì-ꞌbá

yee tí o bà njaanga miṛi ndâ ꞌduù tí nó

náa Mbíṛì ṛuka ndú tí ndâ ꞌduù mì wó nó gî nô,

tacó bà ùlù ngba Mbíṛì.

Páwòlò ꞌdeke tí wó ji Mbíṛì

15Tacó énó, ye mâ giì ꞌdi có bà tee njembí yo mítí Mbe tí ndoo tí Jézù, ta có bà zè ndâ ꞌduù tí nó mbe kaa tí ndú ji Mbíṛì gî nó nìkì maa mì yo, 16ye giì dù ta o ꞌdáá gî kû ùlù Mbíṛì ta pétékè tàkòcò ye tacó tí yo. 17Ye kû ꞌdeke tí ye ta o ꞌdáá gî ji Mbíṛì mì Mbe tí ndoo Jézù tí Bìndi-Mbíṛì, Mbíṛì tí Bu wotí, máa, yí ꞌví si Bèṛi mì wó ꞌví je bà ꞌdi gbí-o, ta muu, ji yo. Tacó wàa, yo ꞌví ŋò ta yí ni gbáṛájáá énô. 18Mbíṛì kùtàá má si ṛo yo ꞌví dù go ṛo ṛi, wàa yo ꞌví ŋò ta ndâ ŋa i tí nó náa yí ci yo á gítí ndú nó, ta ŋa nambeè tí nó náa yí ci ndâ ꞌviì-ꞌbá á gí tí nó, 19ta ŋa wotí tí nó náa yí kû bàkà ji ndoo tí ndâ mbe tee njembí ndoo mítí wó nó, àá bà nìkì tí yo ma. Káa yo bà ŋò wotí tí nò ni a i mítí 20bá ꞌvala ndi Bìndi-Mbíṛì ꞌdo gbí muuꞌdú wó, ta bà ya yí gí bà ki tí wó gbí kùꞌbì mì Mbíṛì á gbíṛì, 21tí gbolò gba ta ŋa wó wálá, tí mbe wotí, tí mbe zogo to, tí ꞌduù náa ṛè wó kû wu me ká kpónó lá, ṛè wó delè bà wu bìndi bà ꞌvala ndi ndâ ꞌduù ꞌdo gbí muuꞌdú ndú ta ndòngbú o. 22Yí je wotí ji yí gítí ndâ i ꞌdáá gî, yí giì bàkà yí tí mbe zogo ndâ i ꞌdáá gî, tí kùṛo ndâ mbe kili ta ṛè wó tí Bìndi-Mbíṛì. 23Ndâ mbe kû kili ta ṛè mì Bìndi-Mbíṛì a dìì wó tí ndâ mbe bàkà yí tí ꞌduù ta ꞌbí i mbe gboo ꞌdo tí wó wálá cee to tí nó ꞌdáá gî.

Currently Selected:

Éfàsù 1: ndz

Highlight

Copy

Compare