Romanos 10
10
1Ñani yo, kuꞌva yo, kaꞌan ni yu xiꞌin Ndioxi xaꞌa na ñuu Israel, saa chi ^kuni ni yu ña na kaku na. 2Ra xíni̱ tu yu, ña chikaa ni na ndiee ña ndikun na Ndioxi va, ndi su kundäa vi ini na xaꞌa ña kuni ra. 3Saa chi xïni vi na ndia kuꞌva ke ^xa Ndioxi ña sandiꞌi ra xaꞌa kuachi yuvi, ra nduu na ta kuꞌva iyoo yuvi na köo kuachi nuu ra, chi ña xa na ke nduku mii va na kuꞌva ña nduu na ta kuꞌva iyoo yuvi na köo kuachi nuu ra, ra ^xïin vi na sa na ta kuꞌva kuni mii ra ña vaꞌa na nduu na yuvi na köo kuachi. 4Ndi su xa saxinu va Cristo nuu ndiayu Ndioxi ña ndakoo ra Moisés, ña kan ke takundiꞌi yuvi na ndiaa ini Cristo, ra ^ndasa ra na ta kuꞌva iyoo yuvi na köo kuachi nuu Ndioxi va.
5Ndi su ndiayu Ndioxi ña ndakoo ra Moisés, ra suꞌva va kachi ña: “Yuvi na ^kuni koo ta kuꞌva iyoo yuvi na köo kuachi, ra xiniñuꞌu ndiakua na saxinu na takundiꞌi va ndiayu Ndioxi ña ndakoo ra Moisés, ra saa ke kutiaku na”, kachi ña. 6Ndi su ña kaꞌan xaꞌa ña ^ndasa Ndioxi yoo, ta kuꞌva iyoo yuvi na köo kuachi nuu ra xaꞌa ña ndiaa ini yo Cristo, ra üꞌvi vi ña, saa chi suꞌva va kachi ña: “Xiniñüꞌu sa vi yo iin ña uꞌvi ni ña ndaa yo ndivi, ra kaꞌan yo xiꞌin Cristo, ña na kixi ra sañaꞌa ra yoo, 7ra nii xiniñüꞌu tu ndee yo ndia nuu ñuꞌu na ndii vi, ña kuꞌun yo kaꞌan yo xiꞌin Cristo ña na ndakundichi ra, ra kixi ra kuiin ra xiꞌin yo.” 8Saa chi tuꞌun Ndioxi, ra suꞌva va ke kachi ña xaꞌa yo: “Xa xiꞌin va kun iyoo tuꞌun Ndioxi, ra iyoo tu ña nima va kun, ra saa tu yuꞌu va kun.” Ra mii tuꞌun yoꞌo ke kaꞌan ndoso tu yo nuu yuvi va, ña kaꞌan yo xiꞌin na ña na kondiaa ini na Ndioxi. 9Tu na ndakuiin kun xiꞌin yuꞌu kun ña kuu Jesús ra xaꞌndia chiñu nuu kun, ra kandixa kun xiꞌin ndinuni nima kun ña sandatiaku va Ndioxi ra nuu ña ndii, saa ra kaku va kun. 10Saa chi xiꞌin ndinuni nima va yuvi ke xiniñuꞌu kandixa na Ndioxi, ra saa ke ndakiꞌin mani ra na, ña nduu na ta kuꞌva iyoo yuvi na köo kuachi nuu ra; ra xiꞌin yuꞌu na ke ndakuiin na xaꞌa Jesucristo ña vaꞌa na kaku va na.
11Ra saa ke kachi tu mii tuꞌun Ndioxi ña tiaa na ta yachi ña kaꞌan, kachi suꞌva va: “Takundiꞌi yuvi na ndiaa ini Jesucristo, ra ndakäva vi ini na kan, saa chi ndaköo ndaꞌa vi ra na”, ^kachi ña. 12Saa chi ndakäxin vi Jesús yuvi, chi nii judío kuvi na, ra nii süvi va na, ndi su iin kuu ndiꞌi va na nuu ra, saa chi mii Tata yo Jesús kuvi ra kuu xitoꞌo takundiꞌi va yuvi, ra tiáyú ni ra xiꞌin takundiꞌi va yuvi na nduku ña mani nuu ra, saa chi chindiee taꞌan va ra xiꞌin na. 13Ra kaꞌan tu tuꞌun Ndioxi kachi ña suꞌva va: “Takundiꞌi yuvi na ndiaa ini Ndioxi, ra nduku na ña mani nuu ra, ra kaku va na.”
14Ra na kiꞌin xini yo vichin, ¿ni ke sa yuvi ña kondiaa ini na Ndioxi, ra nduku na ña mani nuu ra, tu täan kandixa na ra? ¿Ra ni ke sa tu na kandixa na ra, tu täan kaꞌan inka na xiꞌin na xaꞌa ra? 15¿Ra ni ke sa tu na xa ndikun Ndioxi ña kuꞌun na ña ndatuꞌun na xaꞌa Jesucristo xiꞌin yuvi, tu süvi Ndioxi kuvi ra nditiꞌvi na ña kuꞌun na? Ra suꞌva ke kachi tuꞌun Ndioxi ña tiaa na xinaꞌa ña kaꞌan, kachi suꞌva: “¡Tiaa ni nduvi, ta xa ^xaa yuvi nuu yo ña kaꞌan ndoso na tuꞌun vaꞌa ña ^taxi Ndioxi!”, ^kachi ña.
16Ndi su süvi takundiꞌi na ñuu Israel ndikandixa tuꞌun vaꞌa xaꞌa Jesucristo. Ra xaꞌa ña kan ke ndikaꞌan ra Isaías xiꞌin Ndioxi xinaꞌa, ta kachi ra suꞌva: “Tata, ¿yoo kuvi na ^kandixa nduꞌu ña kaꞌan ndoso ndi tuꞌun kun nuu na? Ndia nii na xïin kandixa”, kachi ra. 17Ra na kundaa ini yo, chi xaꞌa ña ^xini soꞌo yuvi tuꞌun Ndioxi va ke, vaꞌa ^xinu ini na, ra ^ndiaa ini na ra.
18Ra ña kan ke na ndakatuꞌun yu ndoꞌo, vichin: ¿A ndixa ndixïni soꞌo na tuꞌun Ndioxi? ¡Ndïxa! ¡*Xini va soꞌo na ña! Saa chi saa ke kachi mii tuꞌun Ndioxi ña tiaa na xinaꞌa ña kaꞌan, kachi suꞌva va:
Iin takundiꞌi va nuu ña yuuvi, ^xini soꞌo na ña kaꞌan takundiꞌi ñaꞌa ña xavaꞌa Ndioxi xaꞌa ndiee ña kuu mii ra,
ra kaꞌan tu ña, xiꞌin yuvi na ndee ndia nuu ndiꞌi nuu ñuꞌu va,
^kachi ña. 19Ra tuku va ndakatuꞌun yu ndoꞌo: ¿A ndixa ke ndikundäa ini na ñuu Israel xiꞌin tuꞌun Ndioxi ña xini soꞌo na, tuvi ndo? ¡Ndïxa! Kundaa va ini na xiꞌin ña. Saa chi tuꞌun Ndioxi ña tiaa ra Moisés ta yachi, ra suꞌva va ke kachi ña xaꞌa na:
Na ñuu Israel, ra ndukuiñu va ini na kuni na yuvi na köo yaꞌvi ndiaa, sa yu;
Ra kuniñuꞌu tu yu yuvi na tüꞌva kundaa ini va, ña sasaa yu na, ^kachi ña.
20Ra iin kaxi kaxi va ndikaꞌan ra Isaías, tuꞌun ña ndikaꞌan Ndioxi xiꞌin ra, kachi ra suꞌva:
Yuvi na kuëe ^nanduku yuꞌu ra ndaniꞌi va na yuꞌu;
Ra ndañaꞌa tu yu mii yu, nuu yuvi na kuëe ndakatuꞌun xaꞌa va yu, kachi ra.
21Ra ndikaꞌan ka va Ndioxi xiꞌin ra Isaías, xaꞌa na ñuu Israel, kachi ra suꞌva:
Iin nduvi ndaa va xitakaa ndaꞌa yu,
ña kana yu na ñuu iku, na xïin kandixa yuꞌu,
ndi su ndikandïxa vaꞌa vi na yuꞌu,
kachi ra.
© 2017, Wycliffe Bible Translators, Inc. All rights reserved