ROOM DIMA 1

1Man Pɔla n sɔbri gbaŋŋu wa n‑tiri ya. Mani n nyɛ sɔ Naawunni ŋɔn booli ma ni n ti leebi u tuumu la, ka laa n‑gaŋŋi ma n‑zaali u lahabasuŋŋu tuntumna. 2Lala lahabasuŋŋu wa zugu ka Naawunni daa pun daŋŋi n‑tisi noori zaŋŋi n‑kyaŋŋi ka yɛla, ka kyɛ ka u anabidima daa sɔbi a n‑dooli ŋɔn Naawunni Bukku maa puuni n‑wulisi ti. 3Di nyɛ la lahabaari kan wulisiri u Bii maa yɛla: ni, ba daa dɔ'ai u NaaDauda naam tuŋŋu za'anɔri ni, ka di zugu u siri nyɛ la ninsaala ni yɛlimaŋni. 4Zaŋŋi n‑kyaŋŋi u Naawunni Siiya beebu muna - Naawunni daa zaŋŋi u yiiko n‑kyɛ ka u neaai kum ni, ka lala ka u daa gaŋŋi u ka ti baŋŋi, ni, u siri nyɛ la Naawunni Biiya. Ti Dugma Yisa Kirisita Masiiya nla. 5Ŋɔn zugu n kyɛ ka Naawunni niŋi bunsuma n‑niŋi ti ni, ka laa n‑kyɛ ka tirima leebi u tuumu. Ka u tum ti, ni ti ti kyɛ ka tingbana zaa niriba yi niŋi yɛdda u yuuri zugu ka deaai u noori. 6Ka ya Room dima gba bɛ la niriba wa ni, ka Naawunni booli ya, ni ya ti leebi Yisa Masiiya dinni. 7Tɔ: yarima ka n sɔbri gbaŋŋu wa n‑tiri ya, ya zaa ban bɛ Room tiŋŋa ka Naawunni wuri ya ka booli ya nti kyɛ ka ya leebi u niriba maa. Ti Ba Naawunni, ni ti Dugma Yisa Kirisita, tim ya bunsuma ni alaafɛ zaa.

8Tɔ: din daŋŋi tooni nyɛ la: ni, n teaari ya yɛla m‑puusiri Naawunni, Yisa Masiiya zugu, dama ya yɛdda niŋbu yɛla moonni n‑gyinni duniya zaa. 9N kur gyeemni Naawunni ni n sufu zaa, ka tumni u Bii maa lahabasuŋŋu tuma ni nimbirimoaa. Ka ŋɔn Naawunni nin kyɛ ka ya baŋŋi man ŋɔn kpalim n‑susiri u n‑teaari ya yɛla seem la saha kam. 10N yi ti bɛ wumpuusigu ni saha kam zaa maa ka n niŋni lala. N susiri Naawunni, ni, u sakkma, ni, n naayi nya soori ni n ti kyɛ ya saani na. 11Dama di kur mugsiri ma, ni n ti nya ya; ni n mari piiniseelli kan yi Naawunni Sii maa saani n‑ti ya, ka ya nin kpaŋŋi di zugu. 12Di nyɛ la: ti kpamsiri taaba sufu, man ni yarima zaa, ti zaa ŋɔn niŋni yɛdda seem zugu. 13M mabiisi, m boori ni ya baŋŋi, ni, n daa pun gbaai ya saani kyɛnni na sahaseesi, amaa n kɔŋŋi la soori halli ni zuna. M boori m mooli lahabasuŋŋu maa ya saani n‑nya seeba ban leebi Naawunni niriba, hoo man daa pun nya seem tinseesi ni la - dama n tuma maa antaam nla. 14Ba zaali ma, ni, n suŋŋma sɔkam zaa: ban mi beesigu soori maa, ni ban zi soori maa m‑paasi; ban mi bukku maa, ni ban zi bukku maa m‑paasi#:- ba zaa yɛla dɔli ma. 15Lala zugu n kyɛ ka m boori nimmoaa ni n kyɛ ya saani na m‑mooli Naawunni lahabasuŋŋu maa n‑ti ya Room timpuuni dima gba.

16Vi bu mari ma lahabasuŋŋu wa zugu: dama lahabasuŋŋu maa nyɛ la Naawunni yiiko din kyɛ ka sɔkam zaa ŋɔn niŋi yɛdda la ti nya tuliginsim; Izraɛli dima daŋŋni la tooni, ka ban pa Izraɛli dima naayi pa. 17Lahabaari maa wulisi la Naawunni yɛlimaŋni soori ka di bɛ la yɛdda zugu ka laa n‑taasiri la yɛdda paasigu ni, ka ba naayi nya taalli kyɛ-m‑pɛŋŋi. Hoo din sɔbi seem Naawunni Bukku maa ni, ni, “Yɛlimaŋni daana nin nya nyɔvuri u yɛdda niŋbu zugu.”

18Dama Naawunni bɛ la arizana ni, ka u nin ti wulisi u sufu ŋɔn yisigi seem n‑tiri seeba ban mi ŋɔn Naawunni yɛlimaŋni maa ka bu boori ni di yi paalu. Ba za'asiri Naawunni ka tumni ba putoo tuma, ni ba tumbeeri tuma. 19Naawunni yɛla bamsim siri bɛ la ba saani, dama ŋɔn Naawunni mammaŋŋa daa kyɛ ka di yi paalu n‑ti ba. 20Dama sɔsɔ nini ku toaai n‑nya Naawunni yiiko ni u beebu an ka naari maa: amaa di zaa yɔri, ŋɔn daa naam duniya maa zugu n kyɛ ka ba baŋŋi anŋɔ zaa yɛla: a bamsim maa daa yi paalu lala saha maa, halli ni zuna. Dizugu niriba wa ka noori ni ba ti yiisi ba mansi ba taalli ni. 21Halli ban daa mi Naawunni yɛla maa zaa yɔri, ba daa za'asi ni, ni, ba ku gyeem u ŋɔn nyɛ Naawunni zugu, bee, ba puusi u barika di zugu. Ba teesi, ni, ba mari la yɛm, amaa ba ka; ka lala maa kyɛ ka ba yɛm maa baligi zaa. 22Ban daa boonni ba mansi baŋŋniba seem la, ba daa kur leebri la gyɛra, 23halli ka ba daa ti kyɛ Naawunni gyirima din ka naari maa, n‑takki n‑gyeemni bunseesi an ŋmanni la ninsaala, bee, bunyigra, bee, bunkɔbri, bee, bunvuura.

24Lala zugu ka Naawunni daa zaŋŋi ba m‑basi ba halibeoo tunfiisa maa puuni, ka ba naayi tumni din bu tu n‑sa'amni taaba ningbina. 25Dama ba za'asi la Naawunni yɛlimaŋni maa ka boori ziri, ka naayi gyeemni bunnaamna ka kyɛ buna Naamna maa mammaŋŋa; ŋɔn Naawunni Naamna sumni la pɛ'abu saha din ka baasigu; ammi. 26Lala zugu ka Naawunni daa kyɛ ba m‑basi ba vi kɔrisi tuma ni; halli ka ba pɔ'aba kyɛ doo ni pɔ'a la'aŋŋu ka takki m‑boori ba pɔ'ataaba. 27Ka ba dappa gba kyɛ doo ni pɔ'a la'ansuŋŋu ka dɔli ba sufu ni kɔribeeri ka kpɛ zugfa'asim tuma ni ba dabtaaba: ba boori bunseesi an ka soori, ka naayi deaari yɛlibeeri an sum ni ba lala tuma. 28Ban daa bu sakki ni ba baŋŋi Naawunni maa zugu n kyɛ ka Naawunni daa zaŋŋi ba m‑basi ba toori teesiyɔya ni, nti tumni tunseesi an bu tuusi. 29Lala maa zugu ba yi bɛ la tumpoosa ni, ni tumbeeri ni beem tuma, ni ala'akyi tuma ni; ba yɛla zaa nyɛ la nyuuri zappu, ni ninvugkuubu; ba boori la zaba, n‑yɔmsiri niriba, m‑mari halibeoo, ka zuuri la niriba nyaaŋŋa; 30ba tuuri la niriba ka yaai Naawunni gba; ka nyari ba mansi, m‑mari karimbaani, n‑nyuuri bara, ba kur boori la ba maali n‑nya yɛttɔ'abeeri sɔpaala; ba za'asiri ba ba ni ba ma noori; 31ba ka yɛm, bee yɛdda, bee wurilim, bee namboo. 32Ba mi halli, Naawunni ŋɔn zaali seem zaŋŋi n‑kyaŋŋi lala tuma maa, ni, di sum ni ban tumni lala maa kpi. Amaa di zaa yɔri, ba sini ka tumni a ni, ka din gaari zaa nyɛ la ba suŋŋni la seeba ni ba gba tumni lala.

Currently Selected:

ROOM DIMA 1: maw

Highlight

Copy