MATIYU 25
25
1Yisa daa laa n‑yɛli, ni, “Dirindaari maa ka Arizana naam yɛla nin ti ŋmanni nŋɔa#:- Pɔ'asara piiya n daa bɛ amriya kyuu tuma ni; ba zaa daa zaŋŋi ba firiladima n‑guusiri amriya doo maa yiri, ni ba ti yi na n‑tuusi doo maa soori, u yi ti taasi pɔ'apaalli maa n‑kunni na. 2Tɔ; ka babanu maa daa mari yam, babanu ban kpalim la mun daa gyɛrigiya ni. 3Ban gyɛrigi la daa mari ba firiladima maa, amaa ba daa bu niŋi kpaam ga'a ni m‑mari m‑paasi. 4Yam daandima maa mun daa mari kpaam ba ga'a ni m‑paasi. 5Tɔ, ka amriya doo maa daa yuui paari na, dizugu daa kyɛ ka goom mari pɔ'asara wa zaa ka ba ti gbisi. 6Ka yuntasuusi ka ba daa wum niriba damni, ka ba kaasiri n‑yɛtti, ni, ‘Doo maa paai na: ya doaai n‑yi na nti tuusi u!’ 7Di saha ka pɔ'asara la daa doaai m‑maali m‑maali ba firiladima maa. 8Ka ban daa kɔŋŋi yam la daa ti yɛli ba taaba, ni, ‘Ya ku ti ti kpaam ka ti niŋi ti firiladima maa ni? - Dama ti dina n kpiira.’ 9Ka yam dima maa daa labsi n‑yɛli, ni, ‘Ay! Mma! - ti ku tisi. Ti gba kpaam ku paai ti. Ya mammansi kyɛma ban koosiri bu saani nti da na.’ 10Dinzugu ka gyɛra maa daa bakki n‑kyaŋŋi ni ba ti da kpaam na; amaa ban daa kyɛnni maa, amriya doo dima maa daa paai na. Di saha ka pɔ'asariseeba ban daa maali siri la daa dɔli n‑kpɛ pɔ'adiri kyuu duu maa ni. Ka ba daa yɔ dunoori maa n‑kpari. 11Tɔ: ka di nyaaŋŋa ka pɔ'asaribanla daa paai na, nti yɛli, ‘Ti Bapira, ti Bapira! I ku kyɛ ka ti kpɛ na?’ 12Ka ŋɔn mun daa labsi n‑yɛli ba, ni, ‘Mma! Yɛlimaŋni ka n yɛtti ya, ni, man bu mi ya.’ ” 13Ka Yisa daa laa n‑yɛli, ni, “Tɔ! Ka dizugu yan di kyɛ ka goom mari ya! Dama ya bu mi dabsiri maa paari na saha deede.”
14Tɔ: ka Yisa daa laa n‑yɛli ba, ni, “Di ŋmanni la nŋɔ : dɔsɔ n daa bɛ ni, ka u boori ni u kyaŋŋi soori, ka u daa booli u toori daaba u saani na n‑zaŋŋi u marigu n‑niŋi ba nuusi ni. 15U daa zaŋŋi n‑ti ba, sɔkam hoo ŋɔn nin toaai m‑mari yam seem zaŋŋi n‑kyaŋŋi a gɔsibu. U daa zaŋŋi la'aboorisi anu n‑ti sɔa, ka sɔ mun daa deaai abayi, sɔ yaasa daa deaai la'abooriga yinni. Ka doo maa naayi gɔ u goorim. Di saha 16ka ŋɔn daa deaai la'aboorisi anu la daa zaŋŋi a n‑walim, ka daa nya abanu m‑paasi a zugu. 17La'aboorisi ayi daana la gba daa tum lala nti nya la'aboorisi ayi m‑paasi. 18Amaa ŋɔn mun daa deaai la'abooriga yinni la daa mari u ligri maa n‑kyaŋŋi n‑gbi bɔ'ari m‑pi u daana maa ŋɔn zaŋŋi seelli n‑ti u maa. 19Di nyaaŋŋa ka daaba wa dugma la daa kuli na, ka yɛli, ni, ba niŋma ligri maa laasaabu ka u nya. 20Ka ŋɔn daa deaai la'aboorisi anu la daa kyɛ na m‑mari a na, ni abanu yaasa m‑paasi a zugu, ka yɛli, ni, ‘M Ba, I daa bu zaŋŋi la la'aboorisi anu n‑ti ma? Tɔ - nnya abanu m‑paasi a zugu: man nya nyoori seelli m‑paasi nla.’ 21Ka u dugma daa yɛli u, ni, ‘Mboo! Daabsuŋŋu ni yɛdda daana n nyɛ i! Nyin ŋɔn su yɛttɔ'abisi fukumsi n‑zɛ yimmu maa, n nin zaŋŋi bunkara fukumsi n‑ti i ka i mara. Dizugu kyɛm na ti di n nya'asim maa.’ 22Ka la'aboorisi ayi daana la gba daa kyɛ na nti yɛli, ‘M Ba, i daa bu zaŋŋi la la'aboorisi ayi n‑ti ma? Tɔ - nnya abayi m‑paasi a zugu: man nya nyoori seelli m‑paasi nla.’ 23Ka u dugma daa yɛli u, ni, ‘Mboo! Daabsuŋŋu ni yɛdda daana n nyɛ i gba! Nyin ŋɔn su yɛttɔ'abisi fukumsi n‑zɛ yimmu maa, n nin zaŋŋi bunkara fukumsi n‑ti i ka i mara. Dizugu kyɛm na ti di n nya'asim maa.’ 24Ka ŋɔn daa deaai la'abooriga yinni la naayi kyɛ na nti yɛli, ‘M Ba, n daa mi halli, ni, putoo daana n kur nyɛ i, ni, i boori ni i nya bunseelli kam zaa yɔri, ka kyeeri nyin daa bu buri seelli. 25Ka dabeem daa mari ma dizugu, ka n daa kur zaŋŋi i ligri maa n‑sɔ'ai; dinzugu deaam i ligri.’ 26Ka u dugma daa yɛli u, ‘Nyin bibeoo wa! Nyin bunkyɔ'aŋŋu wa! Ni, i daa mi, ni, mani n nyɛ sɔ ŋɔn boori buna yɔri, ka kyeeri man bu buri seelli, fa? 27Tɔ! Ka bɔ n daa lee n‑niŋi i ka i daa bu zaŋŋi n ligri maa n‑dooli bankyi dima maa nuu ni, ka man da kuli na wa, n naa n‑kur nya nyoori m‑paasi n la'adaya maa zugu?’ 28- Ka daa yɛli u niriba maa, ni, ‘Ya deaam ligri maa u saani n‑zaŋŋi m‑paasi sɔ ŋɔn mari la'aboorisi piiya maa. 29Sɔkam zaa ŋɔn mari seelli, ba nin zaŋŋi n‑ti u ka u nya m‑paasi halli nti zoaai, amaa ŋɔn ka seelli maa ŋɔna, halli ŋɔn mari seelli fiiŋ maa ka ba nin ti fa ka kyɛ u yɔri.’ 30Ni, ‘Ka bunkyɔ'aŋŋu wa muna - ya gbaama u ka zaŋŋi u n‑yi m‑basi zibsim ni sa. Bɛni ka ba kur kumna ka ŋɔbri ba nyina.’ ”
31Ni, “Dama Ninsaala Bii ŋɔn ya zaŋŋi u gyirima neesim n‑kyɛ na sahanseaa la, ka malaakadima zaa ŋɔn nin la'am n‑dɔli u, di saha u nin zini u naam ziziveelli zugu. 32Ka ba nin la'asi duniya wa niriba zaa u saani na. Ŋɔn mun ti ya wɔligi ba taaba, hoo bunkɔbgura ŋɔn wɔligri u bunkɔbri seem, nti kyɛ ka peesi m bɛ kpa, buusi mun bɛ la kpa. 33Ka u nin kyɛ ka peesi gaari nti zɛ u nudirigu ziiya, buusi mun zɛ la u nuzaa ziiya. 34Di saha maa ka Naa maa nin ti tɔ'asi n‑ti baseeba ban zɛ u nudirigu zii la n‑yɛli, ni, ‘Ya kyɛm na, yan zugsuŋŋu daandima wa, m Ba saani! Ya ti deaai naam maa, dama ba daa pun maali ka siri ni ka ti nyɛ ya dinni, halli duniya wa piiligu saha. 35Dama kɔm ŋɔn daa mari ma sahanseaa la, ya daa zaŋŋi diibu n‑diisi ma; kɔnyuuri gba ŋɔn daa mari ma, ya daa zaŋŋi koom n‑ti ma ni n nyu: n daa yi tinseaa ni n‑goora, ka ya daa deaai ma hoo ya saana n‑kpeesi ya yiya ni. 36Halli n daa ka kparigu ka kyɛnni yɔri, ka ya daa yeeli ma kyinkyina; ban mun daa gbaai ma n‑kpari dansarika duu, ka ya daa kaai ma bɛni.’ 37Ka ninvugsuma wa nin labsi n‑yɛli u, ni, ‘Ti Dugma, bɔn daari ka ti daa nya i ka kɔm mari i ka ti suŋŋi i? Bee, kɔnyuuri m mari i ka ti ti i koom ni i nyu? 38Bɔn daari ka ti daa nya i ka i goora ka daa deaai i, bee, i daa kyɛnni yɔri ka ti yeeli i kparigu? 39Bee, bɔn daari ka ti daa nya i ka i ka alaafɛa, bee, n‑kpari la duu, ka ti daa kyɛ i saani na n‑suŋŋi i di zugu?’ 40Di saha ka Naaba nin labsi n‑yɛli ba, ni, ‘Yɛlimaŋni ka n yɛtti ya wa, ni, yan daa niŋi lala n‑ti m mabiisi wa yinni, halli ŋɔn poora zaa, mani ka ya daa suŋŋni maa.’
41Tɔ: ka di saha maa u nin ti tɔ'asi n‑ti baseeba ban zɛ u nuzaa zii maa, ni, ‘Ya kyɛma sa! Zugbeoo bɛ ya zugu, ya kyɛm Bugum bun bu kpiira ziiya, dama ba maali bu siri n‑ti Sintaani ni u tuntumniba zaa. 42Dama kɔm ŋɔn daa mari ma sahanseaa la, ya daa bu zaŋŋi diibu n‑diisi ma; kɔnyuuri gba ŋɔn daa mari ma, ya daa bu zaŋŋi koom n‑ti ma ni n nyu: 43n daa yi tinseaa ni n‑goora, ka ya daa bu deaai ma hoo ya saana n‑kpeesi ya yiya ni; n daa kyɛnni yɔri, ka ya daa bu ti ma kparigu; n daa ka alaafɛa, ka ba daa kpari ma dansarika, ka ya daa bu suŋŋi ma.’ 44Ka niriba wa gba nin labsi n‑yɛli u, ni, ‘Ti Dugma, bɔn daari ka ti daa nya i ka kɔm bee kɔnyuuri m mari i, bee, i daa ka beebu ziiya, bee kparigu, bee n‑kɔŋŋi alaafɛa, bee n‑kpari duu, ka ti daa bu suŋŋi i?’ 45Di saha ka u nin labsi n‑yɛli ba, ni, ‘Yɛlimaŋni ka n yɛtti ya wa, ni, yan daa bu niŋi lala n‑ti banŋɔ yinni, halli ŋɔn poora zaa, mani ka ya daa mɔŋŋi suŋŋsim maa.’ 46Ka lala niriba nin ti kyaŋŋi namsigu din ka naari ziiya, ka banŋɔ muna, ninvugsuma la, ba nin paai nyɔvuri kan ka naari ziiya.”
Currently Selected:
MATIYU 25: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.