MATIYU 24
24
1Yisa ŋɔn daa yi Gyeeŋŋu Yiri maa ni n‑kyɛnni la, u nyaandɔliba maa daa kyɛ u saani na n‑yɛli u, ni, u gɔsim Gyeeŋŋu Yiri duri ni gooma meebu ŋɔn veeli seem. 2U mun daa labsi n‑yɛli ba, ni, “Ya bu nya anŋɔ zaa? Yɛlimaŋni ka n yɛtti ya wa, ni, a seaa ku kpalim n‑tɔm ka kugkpeaa zugu, amaa a zaa nin ti ŋmɛ n‑wurim n‑lu tiŋŋa na.”
3Di nyaaŋŋa u daa zintiri Ɔlivii Zoori zugu, ka u nyaandɔliba daa kyɛ u saani na nti sɔ'ai m‑boosi u, ni, “Yɛlim ti wula saha ka dinŋɔ nin niŋi. Ka bumbɔ n ti ya niŋi n‑wulisi, ni, i ya n‑labi ni na, ka duniya wa ti ya paai ka saha tariga?” 4Yisa daa labsi n‑yɛli ba, ni, “Ya baŋŋma suŋŋa ka di kyɛ ka sɔ yɔmsi ya. 5Niriba pam nin zaŋŋi n yuuri n‑kyɛ na, ni, ‘Mani n nyɛ Masiiya maa!’ ka ba nin yɔmsi niriba pam m‑basi. 6Ya nin wumni tɔppu damni, bee di lahabaya; ya gɔsima! - yan di kyɛ ka yam-ŋmaa gbaai ya, dama lala nin niŋi pɔi, amaa pa naari maa nla. 7Tinsi dima nin yisigi n‑tuusi taaba tɔppu, ni nadima gba nin tuusi taaba. Kɔm nin ti lu, ka tingbaŋŋu maa nin damni kpa, ka nin damni kpa; 8anŋɔ zaa ti ya m‑bɛ ni hoo pɔ'a pudaana wɔlisigu piiligu beerim ŋɔn bɛ seem. 9Di saha ba nin ti gbaasi ya ka zaŋŋi ya n‑niŋi seeba nuusi ni, ka ba namsi ya ka ku ya. Ban pa Yɛhudiya dima maa zaa nin yaai ya man yuuri zugu. 10Di saha maa ka niriba pam nin ti birisi ka labi nyaaŋŋa, ka seeba mun figsiri taaba ka yaai taaba. 11Ka ziri anabidima pam gba nin ti yi na ka yɔmsiri niriba pam. 12Ban za'asiri soori la nin ti maali n‑zoaai, ka di zugu niriba pam ku laa n‑wuri taaba suŋŋa. 13Amaa sɔ zaa ŋɔn nin kpaŋŋi u maŋŋa m‑bari n‑zaani halli nti paai yɛla wa tariga maa nin nya tiliginsim. 14Ka ba nin ti mooli Arizana naam lahabasuŋŋu wa ka tinkam zaa niriba baŋŋi di yɛla suŋŋa, halli nti paai duniya wa lugri kam. Ba nin niŋi lala pɔi, ka bunseelikam naayi ti naai.
15Ya nin ti nya bumbɛseelli kan kyisiri la - anabi Daniyɛli ŋɔn daa tɔ'asi seaa yɛla nla - ka ba zaŋŋi n‑zaali luginseaa kan nyɛ Naawunni bunkasi la ni, n‑sa'amna [kyɛ ka ninvugsɔ ŋɔn karimni anŋɔ baŋŋi suŋŋasuŋŋa]. 16Tɔ: ya yi ti nya lala, di saha maa yan kyɛ ka ban bɛ Gyuudii tingbaŋŋu la ni maa zɔ n‑du zɔya ni. 17Yan di kyɛ ka ban bɛ pii zugu ti sigi tiŋŋa na n‑zaŋŋi yiri puuni sɛseela; 18ka seeba ban bɛ puri ni di labi nyaaŋŋa nti zaŋŋi ba kpari. 19Di saha maa di nin ti kpeem pam n‑tisi pɔ'apuusi dima ni pɔ'aseeba ban mari biisi ka ba na mɔ'ara. 20Dizugu ya susim Naawunni ka yan zɔri sahanseaa wa bu kyɛ na waari saha, bee, Vuusim Dabsiri maa ni. 21Dama di saha maa ka mugsi nin ti bɛ ni pam, ka a taabu n na zi n‑niŋi duniya piiligu saha halli ni zuna, ka ti ku laa n‑nya lala taabu yaasa. 22Ka ba yi daa bu ŋmaai dabsa maa n‑gyiŋŋi, saalibii n daa ka ni n‑da naa n‑nya tiliginsim, amaa Naawunni ŋɔn daa yiisi seeba la zugu ka ba siri daa ŋmaai dabsa maa. 23Ka di saha maa, sɔ yi ti yɛli ya, ni, ‘Nyama, Masiiya maa bɛ la kpa.’ bee ‘Kpa sa ka u bɛ ni.’ yan di niŋi ba yɛdda. 24Seeba nin ti doaai na m‑ma'ari ziri, ni, ban n nyɛ Masiiya, bee, ban n nyɛ anabidima; ba nin tum alahazibu tunkara ni ba ti yɔmsi niriba m‑basi, halli ni Naawunni ŋɔn yiisi seeba maa gba, amaa Naawunni ku sakki lala. 25Ya bu nya? - man pun daŋŋi n‑yɛli ya seelli kam zaa. 26Niriba yi ti yɛtti ya, ni, ‘Ya gɔsima, u bɛ la yoo ni!’, yan di kyaŋŋi; bee, ni, ‘Ya gɔsima, u bɛ la duu puuni!’, yan di niŋi lala yɛdda. 27Dama Ninsaala Bii kyɛnni na dabsiri maa yi ti paai, u nin ŋmani hoo saa ŋɔn yi nya'asira, n‑neaai sangbana gbinni n‑yi wuntampusiri ya'ari wa zaŋŋi n‑kyaŋŋi wuntanluri ya'ari wa sa. 28Tɔ: bunkpiiŋŋu ŋɔn bɛ seela, bɛni ka zuusi nin ti la'am taaba.”
29Ka u daa laa n‑yɛli ba, ni, “Amaa wahala maa nyaaŋŋa, di saha maa deede, ni#:-
‘Wuntaŋŋa nin ti zibgi zimm!
Ka namboaa la ku laa m‑pɛligi:
Saŋmariwuusi nin ti yi saazugu n‑lu na,
Ka arizana yiiko daandima zaa nin damna.’
30Di saha ka makkri nin ti niŋi sangbana ni n‑wulisi Ninsaala Bii maa yɛla, ka ninsaalidima ban bɛ duniya wa ni maa nin ti kumna - lugri kam, ni butiri kam, dima - ba yi ti nya ‘sɔ ka u ŋmani ninsaala, bee, Ninsaala Biiya ka u pɔtti na, ka sangbana gyiligi u’ ka u ti mari yiiko ni gyirima veelim pam. 31Ka u nin ti kyɛ ka ba peebi kikaa pampam pɔi, ka u naayi tum u malaakadima maa ka ba yi na m‑paai duniya wa lugri kam zaa n‑nya ŋɔn yiisi seeba la, ka la'asi ba taaba na.”
32Ni, “Ya kyɛ ka kinkaŋŋa yɛla wulisi ya di gbinni ŋɔn nyɛ seem: ya yi ti nya ka lala tii maa wula na bu kpaŋŋi ka a pusiri la vapaala, ya nin baŋŋi, ni, siga saha m pɔtta. 33Ka di bɛ la lala: ya yi ti nya yɛla wa zaa, ya nin baŋŋi, ni, saha maa pɔriya. 34Yɛlimaŋni ka n yɛli ya wa, ni, zuna niriba zaa ku gaari, see ka dinŋɔ zaa naayi niŋi. 35Saazugu ni tingbaŋŋu nin gaari, amaa man yɛttɔ'a wa ku gaari.”
36Ni, “Amaa di daari maa, bee di saha, ŋɔn ya m‑paai sahanseaa la ka sɔsɔ bu mi deede, halli malaakadima ban bɛ arizana ni la bu mi, Naawunni Bii maa gba bu mi, na'ala ti Ba maa kɔkɔ m mi. 37Hoo din daa kur niŋni seem Nuhu saha la, lala ka di ti ya n‑niŋi Ninsaala Bii gba kyɛnni na saha maa. 38Koom ŋɔn na bu kyɛ na n‑di ba sahanseaa la ka niriba daa diri ni ka nyuura, ka diri pɔ'aba ka zaŋŋni ba bipunsi n‑tiri dɔppa, halli nti paai Nuhu ŋɔn daa ti kpɛ nyarintitaari maa ni dahinseaa maa. 39Amaa ni dinŋɔ zaasa, ba daa bu mi din ya n‑niŋi, halli ka koom maa daa ti di ba zaa n‑kyaŋŋi. Tɔ: di nin ti nyɛ la lala Ninsaala Bii maa ŋɔn yɛ n‑ti kyɛ na sahanseaa la. 40Di saha dappa ayi nin ti bɛ ba puu ni n‑tumna, ka Naawunni kpikki yinni ka kyɛ yinni. 41Ka pɔ'aba ayi nin ti la'am n‑neemni ba kyi neeri zugu, ka Naawunni kpikki yinni ka kyɛ yinni. 42Yan di gbisi yaa! dama ya bu mi sahaseaa ka ya Dugma maa ti ya n‑kyɛ na. 43Ya baŋŋma dinŋɔa: ni, yiddaansɔ yi da mi sahanseaa na'ayiga ŋɔn ya kyɛ u yiri na, u naa n‑ku gbisiri goom ka kyɛ ka u kabi n‑kpɛ u yiri maa ni na. 44Dinŋɔ zugu ya gba niŋma siri, dama sahanseaa yan bu teesiri u yɛla maa, lala saha ka Ninsaala Bii maa ti ya kyɛ na.”
45Ka Yisa daa laa n‑yɛli “Ninvugŋɔni n lee n‑nyɛ daabsɔ ŋɔn mari yam ni yɛdda? - ka u dugma zaŋŋi u yiri biisi maa fukumsi n‑niŋi di daama nuu ni, ni u tiri ba diibu, mɔnni basibu saha maa. 46Pa ŋɔna n nyɛ daabsɔ ŋɔn nin nya sufupeelli, dama u dugma kuli na m‑paai u, u lala tuma maa ni? 47Yɛlimaŋni ka n siri yɛtti ya, ni, u nin ti zaŋŋi u bunseelli kam fukumsi n‑niŋi lala daabri nuu ni. 48Amaa daabsɔ yi bɛ ni n‑nyɛ ninvugbeoo, ka ti yɛli u sufu ni, ni, u dugma maa yuuya pam ni u kulibu na, 49ka dizugu ka u piili m‑buuri u daabtaaba, ka dira, ka nyuuri daam danyuuriba saani m‑bugra; 50u dugma maa yi ti paai dahinseaa daabri maa ŋɔn bu teesiri u yɛla, bee sahanseaa ŋɔn bu mi u yɛla maa, 51ka u dugma maa nin ti darigi u tubri ka ŋmaasi u bisibisi ka nin ti zaŋŋi u m‑paasi birikɔnsi dima maa zugu: bɛni ka ba kur kumna ka ŋɔbri ba nyina.”
Currently Selected:
MATIYU 24: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.