GALƐSEAA DIMA 3

1Yarim Galɛseaa dima wa! Yan gyɛra dima wa! Ŋɔni n lee n‑zaŋŋi u tiima n‑kyirim ya wa? Ya mammantoori nini n daa nya m‑baŋŋi Yisa Masiiya kum maa yɛla, ni, ba daa kpaasi u n‑tabli dɔpulli zugu! 2Ya yɛlim ma yɛlli yinni wa: ammi, ya daa deaai Naawunni Siiya Vuusim Kasi yan daa tum la zaaligudima ŋɔn wulisi seem tuma zugu, bee, yan daa wum lahabasuŋŋu la ka daa niŋi ka yɛdda zugu? 3Wula zugu ka ya lee n‑nyɛ gyɛra lala? Ya daa piili la ni Naawunni Sii Kasi maa; ya boori la ya ti naai ni ya mammantoori yiiko? 4Ammi, yan daa di wahala seem wa, di daa ka gbinni halli beela? Di yi ti nyɛ la, ni, di siri daa ka gbinni! 5Naawunni ŋɔn zaŋŋi u Sii Kasi n‑ti ya la, ka tum alahazibu tuntumsa n‑ti ya, zaaligudima tumpu zugu n‑daa la? bee, yan daa wum la Naawunni lahabasuŋŋu la ka niŋi ka yɛdda la zugu? 6Ibrahim muna - kaman Litaafi ŋɔn pun yɛli, ni, “U daa sakki n‑niŋi ti Dugma yɛdda, ka u yɛdda maa zugu daa kyɛ ka Naawunni daa yɛli, ni, u nyɛ la yɛlimaŋni daana.” 7Dinŋɔna ya baŋŋma, ni, Ibrahim ya'ansi ni yɛlimaŋni n nyɛ ninvugseeba ban mari yɛdda la. 8Litaafi wulisiya, ni, Naawunni nin ti deaai ban pa Yɛhudiyadima maa hoo yɛlimaŋni dima ba yɛdda niŋbu maa zugu. Ka dizugu ka Litaafi daa daŋŋi m‑mooli lahabasuma maa n‑tisi Ibrahim, ni, “Nyin zugu ka duniya wa niriba zaa nin nya zugsuŋŋu”. 9Ibrahim daa nyɛ yɛdda daana ka daa nya bunsuma nangbambasiri maa di zugu, ka lala ka ŋɔn kam zaa niŋi yɛdda nin ti nya bunsuma la, kaman Ibrahim ŋɔn daa nya seem maa taabu. 10Ban kur zaŋŋi ba mansi n‑sakki n‑tiri zaaligudima tumpu la yɛla, ban m bɛ la mbusu yɛla puuni. Dama Litaafi pun yɛli, ni, “Ŋɔn kam bu kpalim n‑sakkri n‑deaari bunseelli kam din sɔbi n‑dooli zaalikpana gbaŋŋu la puuni n‑niŋni a ni, mbusu bɛ di daama zugu.” 11Dinŋɔna di wulisiya, ni, sɔsɔ ku yi taalli Naawunni saani hoo yɛlimaŋni daana, fukumsi zaaligudima zugu: dama Litaafi yɛliya, ni, “Yɛlimaŋni daana nin nya nyɔvuri u yɛdda niŋbu zugu.” 12Amaa zaaligu yɛla bu dɔli la yɛdda soori; ay! - di nyɛ la hoo Litaafi ŋɔn pun yɛli la, ni, “Ŋɔn kam zaa tum bunseela zaa zaaligu ŋɔn wulisi seem maa nin ti vu.” 13Amaa Kirisita Masiiya mammaŋŋa daa leebi la mbusu tuuri, ni u ti suŋŋi ti ka yiisi ti mbusu galinsi ni na - seesi zaaligu ŋɔn daa mari ti a puuni la; dama Litaafi yɛliya, ni, “Ban zaŋŋi ninvugsɔ zaa n‑yuli doo zugu ni u ti kpi la - Naawunni mbusu bɛ la di daama zugu.” 14Ŋɔn Kirisita daa niŋi lala, ni u kyɛ ka di ti paai ban kam pa Yɛhudiyadima la - Naawunni zugsuŋŋu bunseesi ŋɔn daa pun basi nangbambasiri n‑tisi Ibrahim la nin paai ba na. Ŋɔn Yisa Masiiya zugu ka ba ti deaai a. Dinzugu ti yɛdda puuni ti nin toaai n‑deaai Vuusim Kasi maa, hoo Naawunni ŋɔn daa pun basi nangbambasiri maa.

15M mabiisi, n yɛ zaŋŋi la ti beoo kam yɛla n‑ŋmansi n‑wulisi ya#:- tɔ, niriba ayi yi ti zaali yɛttɔkka ka sakki n‑ti taaba, sɔ ku toaai n‑kpiisi ka, bee, m‑paasi ka seela. 16Tɔ; ka Naawunni daa basi nangbambasiri n‑tisi, ni, ‘Ibrahim nyaaŋŋa’. Litaafi bu tɔ'asiri la nyaaŋŋa dima pam yɛla amaa, ni, ‘nyaaŋŋa’ - ninvugyinni kɔkɔa. Di nyɛ la: ni, Kirisita Masiiya maa. 17Man ŋɔn boori n yɛli seem la nyɛ la nŋɔa#:- Naawunni daa pun lɔ la nangbanyinni yɛliseaa n‑ti Ibrahim ka daa basi nangbambasiri n‑zaali ka. Di nyaaŋŋa di daa yuui m‑paai yuunkɔbsinaasi ni pisita pɔi, ka zaaligu daa yi na. Tɔ! Lala zaaligu ku toaai n‑nyaŋŋi n‑sa'am daŋŋni yɛlli maa ka kpiisi Naawunni nangbambasiri la. 18Dama Naawunni piini yi da dɔli fukumsi zaaligudima maa, dinŋɔna di daa bu naa n‑dɔli u nangbambasiri maa yaasa. Amaa u nangbambasiri basibu zugu ka Naawunni daa zaŋŋi piini maa n‑tisi Ibrahim. 19Tɔ, ka fukumsi zaaligu maa gbinni? Ka daa paasiya, ni ka yɛ n‑wulisi tumbeeri ŋɔn nyɛ seela, ka laa n‑wulisi, ni, ka yɛ m‑bɛ ni n‑guusira, halli ka Ibrahim ‘nyaaŋŋa’ la ti yi na, ban daa basi nangbambasiri maa n‑ti sɔ la. Malaakadima saani ka lala fukumsi zaaligu maa daa paai na ka di bɛ la sindaanzɔtta nuu ni. 20Tɔ: ka sindaani daana yɛttɔ'a pa la ninvugyinni kɔkɔ saani; Naawunni mun n nyɛ yinni.

21Kala, di wulisiya, ni, lala fukumsi zaaligudima maa galim la Naawunni nangbambasiri maa? Ay, halli beela! Dama ninsaala yi daa nyaŋŋi n‑deaai zaaligu seaa kan mari nyɔvuri, dinŋɔna sɔkam siri da naa n‑niŋi yɛlimaŋni daana, zaaligu maa zugu. 22Amaa Litaafi yɛliya, ni, duniya wa zaa bɛ la ala'akyi tumbeeri yiiko suulinsi puuni; ka dizugu kyɛ ka piiniseesi an bɛ nangbambasiri maa puuni, zaŋŋi n‑kpa yɛdda zugu la, nin nyɛ la ninvugseeba ban mari yɛdda la dina.

23Amaa yɛdda saha maa ŋɔn daa na bu paai na, fukumsi zaalikpana maa daa kur guri ti kaman dansarika dima, halli ka yɛdda yɛla kyɛnni na ti yi paalu. 24Dinzugu zaaligu maa daa su ti yɛla zaa kyappi, halli ka Kirisita ti paai na, din ti yɛ kyɛ ka ti yi Naawunni taalli puuni hoo yɛlimaŋni dima, ti yɛdda niŋbu zugu. 25Pampaŋŋɔ yɛdda saha ŋɔn yi paai na wa, ti bu laa m‑boori fukumsi nti su ti n‑gura.

26Di nyɛ la Kirisita Yisa yɛdda la zugu ka yarima zaa n nyɛ Naawunni biisi. 27Ya ninvugseeba zaa ban daa su Naawunni koom la Yisa Masiiya puuni, ya daa zaŋŋi u n‑yɛ hoo ban yeeri sutura la. 28Ka dinzugu Yisa saani ka Yɛhudiyadima ni ban pa Yɛhudiyadima yɛla laa n‑ka ni, bee, daaba ni ban su ba mansi yɛla, bee, dappa ni pɔ'aba yɛla - anŋɔ zaa laa n‑ka ni. Ya zaasa nyɛ la bunyinni Kirisita Yisa Masiiya puuni. 29Ya yi nyɛ la Kirisita ŋɔn su seeba, tɔ, ka dinzugu ya nyɛ la Ibrahim nyaaŋŋa dima, ka ya nin ti deaai Naawunni ŋɔn daa basi nangbambasiseesi maa.

Currently Selected:

GALƐSEAA DIMA 3: maw

Highlight

Copy

Compare