ƐFƐSUSI DIMA 3

1Dinŋɔ zaa zugu ka man Pɔla gbaantiri n‑susira - man ŋɔn bɛ dansarika duu ni Kirisita Yisa zugu. Ka di nyɛ la yaseeba ban pa Yɛhudiya dima suŋŋsim maa zugu ka n susira.

2- N siri mi halli, ni, ya pun wum Naawunni ŋɔn zaŋŋi tunseaa n‑zaali ma, ni, yarima zugu ka u dɔli la u wurilim soori ka kyɛ ka n suŋŋni ya. 3Ka laa m‑mi, ni, kana n nyɛ yɛlisɔ'ariseaa kan yi paalu n‑ti ma, dama m pun sɔbi lala beela n‑ti ya. 4Dinŋɔ nin kyɛ ka ya karim man ŋɔn daa sɔbi gbanseaa la, nti baŋŋi man ŋɔn mari bamsim seem zaŋŋi n‑kpa Kirisita yɛlisɔ'ara maa. 5Yɛla wa daa bu yi paalu n‑ti ninsaalidima saha din gaari la ni; ay! - di daa pa la hoo Naawunni Sii maa ŋɔn zaŋŋni a pampaŋŋɔ n‑wulisiri n‑tiri Naawunni tuumudima ni anabidima seem la. 6Yɛla wa gbinni muna - di nyɛ la: ni, lahabasuŋŋu maa zugu nin kyɛ ka ban pa Yɛhudiya dima maa ni Yɛhudiya dima maa zaa nin la'am n‑di faari maa. Ba nin la'am n‑labgi ningbiŋŋu yinni, ba nin la'am n‑nyari bunsuma, bunseesi Naawunni ŋɔn basi noori, ni, u nin tisi la zaa. 7Lala lahabasuŋŋu tuma ka man tumna: Naawunni wurilim piini zugu ka n deaai tuma wa ka leebi u tuntumna, pa m mammaŋŋa zugu; ŋɔn Naawunni n daa zaŋŋi u yiiko n‑kpeesi ma, ni n ti tumni lala. 8Man muna - halli ni Naawunni niriba zaa ŋɔn gaari ma zaa yɔri, u daa zaŋŋi piini wa n‑ti ma na, ni n ti moonni lahabasuŋŋu n‑tiri ban pa Yɛhudiya dima la. Ka lala ka ba ti baŋŋi Kirisita nya'asim ŋɔn tibsa seem, halli ni sɔ ku toaai m‑baŋŋi di gbinni zaa yɔri. 9Naawunni n daa naam duniya maa zaa, ka yɛla wa soori daa sɔ'ai u saani sahakam: ka yɛlisɔ'ara wa ka n yɛtti paalu ni, ni ya nini ti neaai. 10Naawunni daa niŋi lala, ni u ti kyɛ ka pampaŋŋɔ u yɛm nin ti dɔli la u nyaandɔliba ban la'amni n‑gyeemni u la, m‑paai saazugu naama ni yiiko dima. 11Di zaa nyɛ la hoo ŋɔn Naawunni ŋɔn daa pun gbaai seem, ka ti Dugma Yisa Kirisita puuni ka u lala sufuyuubu yɛla yiiri paalu na. 12Ŋɔn Yisa zugu, ni ti yɛdda ŋɔn bɛ u ni la zugu, ka ti nya soori ni ti nin toaai m‑paai Naawunni saani na ka bu zɔri dabeem, ka vi ka ti. 13Anŋɔ zaa zugu ka n yɛtti ya, ni, yan di gbarigri beesigu ni, man ŋɔn namsiri ya zugu la zugu, dama lala nyɛ la duusigu n‑ti ya.

14- Tɔ, ka di nyɛ la anŋɔ zaa zugu ka n gbaantiri n‑susiri ti Ba Naawunni. 15Ti Ba n siri nyɛ u, ka di zugu ba boonni ŋɔn Naawunni ŋɔn su sɔkam zaa maa lala: arizana ni, ni tingbaŋŋu ni gba, ka ba boonni ba, ni, ‘dɔ'am yinni babiitiri’. 16N susiri u ni, ni, u nin kyɛ ka u Sii Kasi maa ti kpamsi ya ya sufu ni, hoo u maŋtoori gyirima ŋɔn tibsa n‑veela seem. 17Ka n laa n‑susiri, ni, Kirisita nin bɛ ya sufu ni la, ya yɛdda niŋbu zugu; ka lala nin kyɛ ka wurilim nin kyɛ ka ya zɛ yummu, hoo tiiya kan mari nya'asuma, bee duu kan mari nyeebkpeema. 18-19Ni, ya nin mari yiiko, yan ni Naawunni niriba zaa, n nin nyaŋŋi m‑baŋŋi Yisa wurilim ŋɔn yɛlima seem, n‑wa'a seem, n‑du seem, n‑zulim seem zaa, halli ni di siri yakki n‑gaari ti bamsim zaa zugu gba. Lala bamsim nin kyɛ ka Naawunni beesigu zaa paali ya, ka ya mun beesigu nin wulisi Naawunni yɛla zaasa.

20Tɔ: ka dinŋɔna Naawunni mari yiiko din nin toaai n‑tumni n‑gaari tin susi seem, bee, tin teesi seem maa zaa, ka u lala yiiko m bɛ ti ni n‑tumna. 21Lala gyirima ni duusigu ka u nyaandɔliba la'amni n‑tiri u, Yisa Kirisita Masiiya puuni, beoo kam, yuumni kam, halli ni saha din ka tɔriga. Ammi.

Currently Selected:

ƐFƐSUSI DIMA 3: maw

Highlight

Copy

Compare