KƆLOOSIDIMA 3

1Ka dinŋɔna ya pun la'am Kirisita saani n‑yisigi: ka di yi bɛ la lala, see ka ya bɔ bunseesi an bɛ saazugu, bɛni ka ŋɔn Kirisita zi u zizii ni, Naawunni nudirigu ziiya. 2Ya kyɛ ka ya teesa bɛ saazugu buna wa ni, pa duniya wa buna la ni. 3Dama ya kpi ni, ka ya nyɔvuya yi la'amni Kirisita saani n‑sɔ'ai Naawunni beebu zii la ni. 4Halli ya nyɔvuri n nyɛ Kirisita la, ka ŋɔn Kirisita yi ti yiisi u mammaŋŋa paalu ni, ya gba nin la'am m‑bɛ u saani n‑yi paalu na ni gyirima.

5Lala zugu, see ka ya ku ya duniya wa ni kɔrisi yɛla zaa - zina nla, ni tumpoosa boobu an mari da'ari, ni kɔribeeri, ni ligri ni neema boobu, ka di ŋmani la wuna gyeeŋŋu la, dama ya boori ana n‑gaari ya Naawunni boobu: ya kyɛ ka a zaa basi yɔri. 6Dama anŋɔ taabu zaa zugu n kyɛ ka Naawunni sufu yisigra. 7Sahanseaa la ya daa bɛ la beesikanŋɔ taabu, ka dɔli lala sɔya la. 8Amaa pampaŋŋɔ see ka ya za'asi anŋɔ dima: suuri, ni teesibeeri, ni putoo tuma, halli yan di kyɛ ka ya nɔya tɔ'asiri yɛttɔ'ayɔya n‑tuuri Naawunni ni ninsaala gba. 9Yan di laa m‑ma'ari ziri n‑tiri taaba: ya bu nya? - ba zaŋŋi ya beesikurigu yɛla m‑basi, ni ka tuma zaa, hoo nira ŋɔn yeaai kparibeoo m‑basi seem la; 10ka laa n‑yɛ kparipaalli, bunveelli. Ka beesipaalli wa mari yɛmpaalli ka di yi Naawunni ŋɔn naam ka maa saani na, ka kur ŋmanni la Ŋɔna. 11Beesipaalli wa puuni ka wɔligri ka ka saani zaŋŋi n‑kyaŋŋi Griikadima ni Yɛhudiyadima, bee ban guni ni ban bu guni saani: di yi ti nyɛ tinzundima ni Sitiiya tingbaŋŋu moo ni niriba, bee daaba ni ban su ba mansi yɛla - ay! Kirisita nyɛ la bunseelikam n‑tiri ba sɔkam zaa.

12Naawunni siri yiisi ya, ni ya ti leebi u maŋŋa niriba; ka laa n‑wuri ya. Ka lala zugu ya nin zaŋŋi beesipaalli wa kpariveelli n‑yɛa - di nyɛ la: nambɔzoaa ni kuŋŋa, nirilim, mansigsigu, mangbaari ni sugru. 13Ya sakkma n‑tisi taaba, ka ya sɔ yi ti nya u taraana taalli, see ka di daama kyɛ u taalli maa m‑pɛŋŋi u. Hoo ti Dugma ŋɔn kyɛ ya taalli m‑pɛŋŋi ya seem la, ya gba kyɛ m‑pɛŋŋi ya taaba. 14Anŋɔ zaa n nyɛ bunsuma, amaa see ka ya zaŋŋi wurilim m‑paasi a zugu, ni a zaa ti tɔŋŋni taaba ka niŋi suŋŋa deede. 15Ya kyɛ ka Kirisita sufudoaa su ya sufu zaa fukumsi, dama di zugu ka ba daa booli ya, ni ya ti leebi hoo ningbiŋŋu yinni. Ka laa n‑leebi seeba ban puusiri Naawunni sahakam. 16M‑paasi yaasa, ya kyɛ ka Naawunni yɛligu bɛ ya ni, ni ka bunsuma zaasa. Ya zaŋŋi bamsim zaa n‑wulisiri taaba Naawunni wurilim yɛla, ka kpamsiri taaba sufu. Ya kur yuumni Litaafi yuuma n‑wulisira, ni wungyeeŋŋu yuuma, ni Sii Kasi yuuma gba; ya yuumni ya sufu ni m‑puusiri Naawunni sahakam. 17Ka ya yi ya tumni seelikam, bee, ya tɔ'asi seelikam zaa, ya kyɛ ka ya niŋni a zaa ti Dugma Yisa yuuri zugu. Ya tim ti Ba Naawunni pɛ'abu ŋɔn Yisa zugu sahakam.

18Pɔ'aba, ya wumni n‑tiri ya siridima kpaaŋŋu la; dama lala yi sumsi ban bɛ ti Dugma saani maa.

19Yan mun dɔppa, ya wuri ya pɔ'aba ka di yisigri ya suuri n‑niŋni ba.

20Ya biisi la muna - ya wumni n‑tiri ya ba ni ya ma dima bunseelikam zaa puuni; dama lala m maari ti Dugma sufu.

21Yan mun ninvugkura, yan di kyɛ ka ya biisi beebu tɔ n‑ti ba; ka di yi pa lala ya nin daam ba sufu.

22Daaba, ya wumni n‑tiri ya duniya wa dugmadima, ni gyirima ni ninzoaa. Ya gyeemma ba, pa la ban yi gɔsiri ya kɔkɔa, hoo ninvugseeba ban boori ni ba nya duusigu ninsaalidima saani, amaa ya zaŋŋi ya sufu zaa n‑tumni n‑tiri ba sahakam, ka zɔri Naawunni gba. 23Bunseelikam zaa yan niŋna, ya niŋma di ni ya sufu zaa n‑tiri Naawunni, pa la ninsaalidima. 24Ya mi halli, ni, ya Dugma nin yiisi ya faari na n‑yɔ ya. Ya tumma ya daaba tuma la n‑tiri ya Dugma Kirisita. 25Ŋɔn yi tumni tumbeeri muna, ba nin niŋi u hoo u tuma wa ŋɔn yi sumsi seem la, dama Naawunni bu gamsira.

Currently Selected:

KƆLOOSIDIMA 3: maw

Highlight

Copy

Compare