II KƆRINTI DIMA 13

1N kyɛnni kanŋɔ nin paasi buta: ni, “Yɛlli kam zaa nin zaani suŋŋa, niriba ayi-ata yi di di sɛhara n‑dɔli la taaba.” 2N buyi kyɛnni maa saha ka n daa pun bɛ ya saani nti daŋŋi n‑yɛli n yɛttɔ'a wa, ka man ŋɔn ka ya saani pampaŋŋɔ n ya maali n‑yɛli yaasa. Ni, n yi labi na n ku kyɛ ban daa pun tum tumbeeri la, ka ku laa n‑kyɛ baseeba ban paasi ba zugu la pampaŋŋɔa. 3Di gbinni nyɛ la: ya daa boori la n wulisi ya ka ya baŋŋi, ni, Kirisita tɔ'asiri man yɛttɔ'a wa puuni. Tɔ: ya baŋŋma, ni, u pa la bumbugsiga n‑ti ya: ay! - u siri mari la yiiko ya saani. 4U siri daa bukki ni ka ba daa kpaasi u n‑tabli dɔpulli zugu; amaa ni lala maa zaa yɔri, pampaŋŋɔ u mari la nyɔvuri m‑bɛ ni Naawunni yiiko zugu. Lala taabu ti gba la'am u saani m‑bukki, amaa Naawunni yiiko zugu ti nin bɛ u ni n‑tumni n‑tiri ya.

5Ya viisim ya mansi n‑nya yan bɛ la yɛdda niŋbu maa ni, bee? - Ya zamsima ya mansi. Bee, ya na bu mi, ni, Yisa Kirisita bɛ la ya saani? Ya yi pa la seeba ban lu zamsigu ni, u bɛ ni. 6M mari tama, ni, ya nin ti baŋŋi, ni, tirima bu lu zamsigu ni. 7Tɔ: ti susiri Naawunni, ni, ya ku tum din bu tu. Pa la ni niriba ti nya tirima, ni, ti nyaŋŋi zamsigu maa ni. Ay! - tin boori seem nyɛ la: ni, yarima nin tumni din tu, halli ni tirim bɛ la hoo ban lu zamsigu ni gba. 8Dama ti ku toaai n‑niŋi seelli n‑galim yɛlimaŋni maa, see ka ti dɔli la yɛlimaŋni soori n‑tumna. 9Ti yi ti bukki ka yan mun kpeem, ti mari sufupeelim di zugu. Ti kur susiri Naawunni, ni, ya nin nyaŋŋi seelikam suŋŋa. 10Lala zugu ka n sɔbri anŋɔ man na ka ya saani maa, ni n yi ti kyɛ na n ku mari kukɔri nyiim n‑zaŋŋi n yiiko m‑mugsiri ya. Ti Dugma zaŋŋi yiiko wa n‑ti ma, ni m maali ya yɛla ka a kyaŋŋi tooni ka ku labi nyaaŋŋa.

11Yɛttɔ'a maa naari, m mabiisi, nyɛ la: ni, ya kpalim suŋŋa. Ya kyɛ ka ya kpaŋŋi ya mansi, kyɛ ka ya sufu kpamsi, ka mari nangbanyinni n‑ti taaba, ni sufudoaa zaa. Naawunni siri nyɛ la Sufudoaa ni Wurilim Daana, ka u nin bɛ ya saani. 12Ya puusima taaba suŋŋasuŋŋa ti wurilim puusigu ni. Tiŋŋa wa Naawunni niriba puusiri ya zaa na.

13-14Ti Dugma Yisa Kirisita Masiiya piinisuma bɛ ya zaa saani, ni Naawunni wurilim, ni Sii Kasi la suŋŋsim zaa.

Currently Selected:

II KƆRINTI DIMA 13: maw

Highlight

Copy

Compare