II KƆRINTI DIMA 12

1See ka n kpalim n‑nyuuri n bara wa. Ni anfaani seaa ka di ni maa zaa yɔri, n nin tugi m‑paai zii nyaabu yɛla, ni ti Dugma ŋɔn kasigi bunseesi n‑ti ma la. 2Kirisita ninvugsɔ m bɛ ni ka m mi u yɛla: di daama ka ba daa taasi n‑duusi nti paai arizana zii buta daana ziiya. Di yuuma pii ni anaasi an gaari n‑daa la; tɔ - di daa nyɛ la u maŋtoori ningbiŋŋu n daa kyaŋŋi, bee, u daa yi u ningbiŋŋu m‑bakki n‑kyaŋŋi, n ku toaai m‑baŋŋi, kulla Naawunni m mi. 3Ka n laa m‑mi di daama yɛla - di daa nyɛ la u maŋtoori ningbiŋŋu n‑daa la, bee, u daa yi u ningbiŋŋu m‑basi maa, n ku toaai m‑baŋŋi, kulla Naawunni m mi - 4ni, ba daa gbaai u nti du n‑kpɛ Naawunni zisuŋŋu, nti wum yɛliseesi an ku toaai n‑yɛli; soori ka ni ni ninsaala ti tɔ'asi a taabu, halli beela. 5Tɔ: lala doo taabu yɛla zugu ka n nin nyu bara; n ku nyu bara m mammaŋŋa yɛla zugu, ka di yi pa la n nyu a man ŋɔn bugsa seem la zugu. 6Halli n yi ya nyu bara, n ku tumni gyɛrilim di zugu, dama n ya n‑tɔ'asiri la yɛlimaŋni. Amaa n nin kyɛ ni, ni sɔ di teesi n yɛla pam, n‑gaari ba n nin toaai m‑baŋŋi a seem, ban gɔsiri n tuma ka wumni n yɛligu la sahanseaa la. 7Zii ni kasigri yɛla wa daa nyɛ la alahazibu n‑ti ma; dinzugu Naawunni bu boori ni karimbaani mari ma a zugu. Ka di zugu n daa nya Sintaani tuumu tuma n ningbina wa ni nti mugsi ma hoo goaa ŋɔn yi bɛ ni n‑kusiri ma. 8Napɔmbuta ka n daa susi ti Dugma, ni, u nin kyɛ ka ka yi ka kyɛ ma. 9Amaa u daa yɛli ma, ni, “M piini la bɛ ni, halli nyin bu sumni di la, ka di nin sa'asi n‑ti i. Dama n yiiko zoaari m‑paari ka tɔriga n‑tiri bugsim daandima maa.” Dinzugu n nin maali n‑nyu bara man bugsa seem la zugu. Lala nin kyɛ ka Kirisita yiiko nin kpalim m‑bɛ n saani sahakam. 10Dinŋɔ zugu n nin nya sufudoaa man yi bugsa sahanseaa la, ni ban tuuri ma sahanseaa, ni wahala diibu saha gba; ka laa n‑nya sufudoaa namsa ni yɛlimugsa ni, di yi nyɛ Kirisita zugu. Man bukki ni maa, dina ka m mari la yaa.

11Tɔ: n leebi la gyɛrigu ka tɔ'asi gyɛrilim n‑naai. Yarim mun kyɛ ka n niŋi lala: yan daa yi zɛ n nyaaŋŋa di naa n‑sɔa. Ban boonni seeba, ni, ‘tumudima ban gaari zaa’ la muna - halli ni man pa seelli maa zaa, m bu pɔsigi ba ni. 12Bunseesi an wulisiri tuumumaŋni yɛla la ka n daa tumni ya saani, ana ni sugru diibu zaa: an mari alahazibu la, ni makkri yɛla, ni yiiko tuma nla. 13Bumbɔ saani ka ya daa fiilim m‑bu paai Naawunni niriba ban bɛ tinseesi la zaa maa ziiya? - ni, man daa bu zaŋŋi n yɛla m‑mugsi ya la zugu? Eeh, m badima, ya kyɛ n taalli kanŋɔ m‑pɛŋŋi ma! 14Pampaŋŋɔ n laa n‑niŋi siri ni n ti kyɛ ya saani na, din paasiri n kyɛnni buta zugu; ka kyɛnni wa saha gba n ku zaŋŋi n yɛla m‑mugsiri ya. Dama di pa la m boori ya neema, bee, ya ligri, amaa ya mammansi ka m boora. Ya bu nya? - di pa la biisi n ya m‑bɔ n‑zaali n‑ti ba badima ni ba madima, amaa ba badima ni ba madima nin bɔ n‑zaali n‑ti ba. 15Dizugu n nin di man mari seelli maa zaa, halli ka seelli laa n‑kpalim n saani gba, ni n ti suŋŋi ya ya beebu ni; lala m mari sufupeelli n‑ti ma. Ammi, man ŋɔn wuri ya pam la zugu ka yan mun wuri ma beela? - ay, lala ka soori! 16Ni, tɔ! halli m bu zaŋŋi n yɛla m‑mugsi ya gba, amaa ni dinŋɔ zaa yɔri, man ŋɔn nyɛ yɔmsa zaa daana wa, n daa yɔmsi ya n‑gbaai ya. 17Ni, ka dinŋɔna n daa tum ninvugseeba ya saani na. Tɔ! - ba sɔ n daa fa ya n‑ti ma? Ŋɔni n‑daa la? - Ay, ba sɔ zaa daa bu fa ya! 18N daa bɛlim la Taituusi, ni, u kyɛ ya saani na, ka daa tum ti mabisɔ ni u dɔli u na m‑paasi. Tɔ, Taituusi daa fa ya neema? - Ay! u daa bu fa. Pa Sii yinni ni soori yinni maa ka ti dɔla la - m mammaŋŋa ni ban zaa?

19Ka dinŋɔna ya yi teesiri, ni, ti tɔ'asiri ti yɛttɔ'a wa ni yarima ti kari ti yɛlli sariya? Ay, di pa lala, n zɔsuma! Ti bɛ la Kirisita saani ka ti tɔ'asiri Naawunni tooni. Ka tin niŋni seelli zaa nyɛ la din nin kpamsi ya. 20Dama n zɔri la dabeem, man ŋɔn teesi, ni, di yi pa seem n nin kyɛ na ka ku paai ya hoo man boori yan nyɛ seem la. Ka ya gba ku nya ma yan boori m bɛ seem maa. Ii, dabeem mari ma, ni, nangbankpeemni nin bɛ ni, ni nyuuri zappu, ni nyigbu, ni suuri, ni wɔligri, ni nyaanzum, ni galagala, ni karimbaani, ni basabasa zaa tuma an bu dɔli soori. 21Dabeem m mari ma yaasa, ni, n yi kyɛ na ka Naawunni nin laa n‑sigsi ma ya nini ni yaasa, ka n nin nya sufusa'aŋŋu pam ban pun tum tumbeeri la zugu, ka ba ku sakki n‑takki n‑yi lala yɛla ni. Ba tumbeeri wa bɛ la hoo da'ari tuma la, ni zina, ni kɔribeeri tuma an bu dɔli soori halli zaa.

Currently Selected:

II KƆRINTI DIMA 12: maw

Highlight

Copy

Compare