I KƆRINTI DIMA 3

1M mabiisi, n ku toaai n‑tɔ'asi n‑ti ya hoo ban mi Sii maa yɛla la, amaa hoo ban mi ninsaala yɛla la kɔkɔa, dama ya na nyɛ la bileesi zaŋŋi n‑kyaŋŋi Kirisita yɛla. 2Dizugu n daa mɔ'asiri ya la bisim, pa dikpeema; dama ya daa bu sa'ai ditibsa diibu. Halli ni zuna ya na ku toaai n‑deaai ninvugkura diibu, 3dama ya na zi Sii maa yɛla. Nyuuri zappu ni suuri yisigri ŋɔn na bɛ ya saani, pa duniya wa saalidima yɛla ka ya dɔla? 4Ya bu nya? - sɔ yɛtti, ni, Pɔla ka u dɔla; ka sɔ mun yɛtti, ni, Apɔloosi ka u boora: pa duniya wa ninsaalidima yɛttɔ'a nŋɔa? 5Apɔloosi nyɛ la ŋɔni? Bee, Pɔla nyɛ la ŋɔni? Ti zaa nyɛ la Naawunni tuntumniba, ka di kyɛ ka yarima niŋni yɛdda dima, amaa bunseelikam yi la Naawunni saani na n‑ti ti. 6Zaŋŋi n‑kyaŋŋi ya yɛdda yɛla, mani n daa buri bumbura la, ka Apɔloosi mun daa yɔ'ai bumbula la koom, amaa Naawunni yiiko zugu ka a zoaai na n‑niŋna. 7Lala zugu ka ŋɔn butti la pa seela, ka ŋɔn yɔ'ari koom la gba pa seela; din kpa la talasi nyɛ la Naawunni tuma, dama ŋɔna n kyɛ ka di zoaari na n‑niŋna. 8Ŋɔn butti ni ŋɔn yɔ'ari koom la zaa tumni la tumni yinni, ka ti Dugma nin yɔ ba zaa hoo ban tumni seem la. 9Tirima zaa la'am n‑tumni Naawunni tuma: yan mun nyɛ la Naawunni puu ka ti koora, ka laa n‑nyɛ u yiri ka ti meera.

10Mani n nyɛ tammeera ni yɛlimaŋni, hoo man deaai piiniseesi Naawunni saani la, ka n daa nyeebi nyeebri maa; ka sɔ mun deaai m‑meeri n‑tɔmna: tɔ! see ka sɔkam mari u maŋŋa ka baŋŋi ŋɔn tumni u meebu tuma seem. 11Ba daa pun nyeebi nyeebri la suŋŋa, ka sɔsɔ ku toaai n‑nyeebi seaa m‑paasi ka zugu - Yisa Kirisita yɛla ka n tɔ'asiri wa. 12Amaa sɔ zaŋŋi salima m‑mɛ m‑pa nyeebri wa zugu, ka sɔ mun zaŋŋi anzulifa m‑pa, bee kugveela; ka seeba gba zaŋŋi daari, bee moori ni kika'a m‑pa. 13Amaa sariya karibu daari yi paai na, di nin yiisi sɔkam tuma paalu ni na, n‑wulisi an bɛ seem, dama bugum n ya zamsi sɔkam zaa tuma. 14Tɔ; ka bugum yi bu ti nyaŋŋi sɔ tuma, di daama nin deaai u laara sanyoaa. 15Amaa bugum yi di sɔ tuma zaa, di daama nin kɔŋŋi marigu; u mammaŋŋa ku baasi yɔri, amaa u nin ŋmanni la hoo ŋɔn kpeeri bugum ni n‑gatta. 16Ya bu baŋŋi, ni, yarima n nyɛ Naawunni Gyeeŋŋu Duu, bee? Halli Naawunni Siiya bɛ ya ni gba. 17Ninvugsɔ yi sa'am Naawunni gyeeŋŋu ziiya, Naawunni gba nin sa'am di daama. Naawunni Gyeeŋŋu Duu nyɛ la u dinni, kan nyɛ bunkasikasi: ka yarim n nyɛ u Gyeeŋŋu Duu wa.

18Tɔ: yan di kyɛ ka ya sɔ yɔmsi u maŋŋa; ninvugsɔ yi bɛ ya saani ka teesi, ni, u nyɛ la yɛm daana duniya wa saani, kyɛ ka di daama leebi gyɛrigu; ka lala zugu nin kyɛ ka u leebi yɛm daana ni yɛlimaŋni. 19Dama duniya wa yɛm nyɛ la gyɛrilim Naawunni saani. Lala zugu ka di pun sɔbi n‑dooli, ni, “Yɛm daandima maa muna - Naawunni zaŋŋi ba toori yɛmgɔliŋŋa m‑bɛtti n‑gbaari ba.” 20Ka di laa n‑sɔbi, ni, “Ti Dugma m mi yɛm dima teesa zaa, ka a nyɛ la yɔri.” 21Dinŋɔ zugu, di kyɛ ka ya sɔ nyuuri bara ninsaalidima yɛla zugu. Dama bunseelikam zaa nyɛ la ya dinni. 22Ii! - Pɔla nyɛ la ya dinni, ni Apɔloosi, ni Siifasi Piita; yarima n su beesigu ni kum fukumsi; din bɛ ni pampaŋŋɔ ni din nin niŋi zaa - anŋɔ zaa nyɛ la ya dinni. 23Ka ya mun nyɛ la Kirisita Masiiya ŋɔn su ninvugseeba, ka ŋɔn Kirisita nyɛ la Naawunni dinni.

Currently Selected:

I KƆRINTI DIMA 3: maw

Highlight

Copy

Compare