Ashlish 4

CAB. IV

1Lurg shoh yeeagh mee, as cur‐my‐ner, va dorrys er ny osley ayns niau: as va’n chied choraa cheayll mee, myr dy beagh eh cayrn taggloo rhym; dooyrt rhym, Tar seose gys shoh, as jeeagh‐ym dhyt reddyn shegin ve ny lurg shoh. 2As chelleeragh va mee ayns y Spyrryd; as cur‐my‐ner, va stoyl‐reeoill soit ayns niau, as hoie fer er y stoyl‐reeoil. 3As v’eshyn ren soie, dy yeeaghyn er, clasley rish jasper, as clagh sardine; as va goll twoaie runt mygeayrt y stoyl‐reeoil, ayns shilley myr emerald. 4As runt mygeayrt y stoyl‐reeoil va kiare stuill as feed; as er ny stuill honnick mee kiare shanstyryn as feed nyn soie, coamrit ayns coamrey gial; as v’oc er nyn ging attaghyn dy airh. 5As magh ass y stoyl‐reeoil haink tendreilyn, as taarnaghyn, as coraaghyn. As va shiaght lampyn dy aile, lossey kiongoyrt rish y stoyl‐reeoil, shen ta shiaght spyrrydyn Yee. 6As kiongoyrt rish y stoyl‐reeoil va faarkey dy ghless, goll‐rish crystal: as ayns mean y stoyl‐reeoil as cruin mygeayrt y stoyl‐reeoill, va kiare beiyn lane dy hooillyn cheu‐veealloo as cheu‐chooylloo. 7As va’n chied chretoor casley rish lion, as va’n nah chretoor goll‐rish lheiy, as va eddin ec y trass chretoor goll‐rish dooinney, as va’n chiarroo chretoor myr urley ta getlagh. 8As v’ec dagh fer jeh ny kiare cretooryn shey skianyn mygeayrt‐y‐mysh, as v’ad lane dy hooillyn cheu‐sthie; as cha vel ad scuirr laa ny oie, gra, Casherick, casherick, casherick, Hiarn Yee Ooilley‐niartal, va, as ta, as ta ry‐heet. 9As choud as ta ny cretooryn shen coyrt gloyr, as ooashley, as booise dasyn va ny hoie er y stoyl reeoil, ta bio son dy bragh as dy bragh. 10Ta ny kiare shanstyryn as feed tuittym sheese kiongoyrt rishyn va ny hoie er y stoyl‐reeoil, as coyrt ooashley dasyn ta bio son dy bragh as dy bragh, as t’ad ceau sheese ny attaghyn oc kiongoyrt rish y stoyl‐reeoil, gra, 11T’ou feeu, O Hiarn, dy gheddyn gloyr, as ooashley, as pooar; son t’ou er chroo dy chooilley nhee, as son dty aigney hene t’ad, as v’ad er nyn groo.

Currently Selected:

Ashlish 4: CON1810

Highlight

Copy

Compare