Ashlish 12

CAB. XII

1As va yindys mooar er ny akin ayns niau, ben coamrit lesh y ghrian, as yn eayst fo e cassyn, as attey dy ghaa rollage yeig er e kione: 2As myr v’ee trome torragh, deïe ee, er‐troailt, as ayns pian dy ve livreit. 3As va yindys mooar elley er ny akin ayns niau, as cur‐my‐ner, dragon mooar jiarg, lesh shiaght king, as jeih eairkyn, as shiaght attaghyn er e ching. 4As hayrn y famman echey yn trass ayrn jeh rollageyn niau, as cheau eh ad er y thalloo: as hass y dragon kiongoyrt rish y ven va aarloo dy ve livreit, dy stroie yn lhiannoo eck cha leah as harragh eh er y theihll. 5As dymmyrk ee lhiannoo mac, va ry‐hoi reill dy chooilley ashoon lesh lorg dy yiarn: as va’n mac eck goit seose gys Jee, as gys e stoyl reeoil. 6As hie yn ven er‐chea gys yn aasagh, raad ta boayl eck kiarit liorish Jee dy jinnagh ad ish y veaghey ayns shen thousane daa cheead as three feed laa. 7As va caggey ayns niau: ren Michael as e ainleyn caggey noi’n dragon, as ren y dragon as e ainleyn caggey; 8As cha dooar ad barriaght, chamoo v’an ynnyd oc ry‐gheddyn arragh ayns niau. 9As va’n dragon mooar er ny eiyrt magh, yn chenn ard‐nieu, enmyssit yn Jouyl as Satan, ta molley yn slane seihll; v’eh eiyrit magh gys y thalloo, as va e ainleyn tilgit magh mârish. 10As cheayll mee coraa ard ayns niau, gra, Nish ta er jeet saualtys, as niart, as reeriaght yn Jee ain, as pooar yn Creest echey: son ta fer‐chassid nyn mraaraghyn tilgit sheese, ren adsyn y chassid fenish yn Jee ain oie as laa. 11As hooar ad barriaght er liorish fuill yn Eayn, as liorish goo nyn veanish; as cha row scansh oc jeh nyn mioys dy jarroo gys y vaase. 12Gow‐jee boggey er‐y‐fa shen, shiuish niaughyn, as shiuish ta cummal ayndoo. Smerg da cummaltee yn thalloo as yn aarkey; son ta’n drogh‐spyrryd er jeet neose hiuish ayns farg eulyssagh, er‐yn‐oyr dy vel fys echeysyn nagh vel e hraa agh giare. 13As tra honnick y dragon dy row eh er ny hilgey gys y thalloo, ren eh tranlaase er y ven v’er n’ymmyrkey yn lhiannoo‐mac. 14As da’n ven ve’r ny choyrt daa skian dy urley vooar, dy voddagh ee getlagh gys yn aasagh, gys yn ynnnyd eck hene: raad ta beaghey kiarit j’ee son traa, as traaghyn, as lieh traa, veih eddin yn ard‐nieu. 15As hilg yn ard‐nieu ass e veeal ushtey myr thooilley, geiyrt er y ven; dy chur urree goll lesh y thooilley. 16As chooin y thalloo lesh y ven, as doshil y thalloo e beeal, as slug ee seose thooilley hilg y dragon magh ass e veeal. 17As va’n dragon elgyssagh noi’n ven, as hie eh dy yannoo caggey rish y chooid elley jeh’n sluight eck, ta freayll annaghyn Yee, as oc ta feanish Yeesey Creest.

Currently Selected:

Ashlish 12: CON1810

Highlight

Copy

Compare