Ashlish 10

CAB. X

1As honnick mee ainle niartal elley cheet neose veih niau, coamrit lesh bodjal, as goll‐twoaie er e chione, as va’n eddin echey myr y ghrian, as ny cassyn echey goll‐rish pillaryn dy aile. 2As va lioar veg foshlit echey ayns e laue: as hoie eh e chass yesh er yn aarkey, as e chass chiare er y thalloo, 3As deïe eh lesh ard‐choraa, myr ta lion buirroogh: as tra v’eh er n’yllagh, ren shiaght taarnaghyn fockley‐magh nyn goraaghyn. 4As tra va ny shiaght taarnaghyn erreish fockley magh nyn goraa, va mee kiarit dy scrieu; as cheayll mee coraa veih niau, gra rhym, Seal seose ny reddyn shen ta ny shiaght taarnaghyn er vockley magh, as ny scrieu ad. 5As yn ainle honnick mee ny hassoo er yn aarkey, as er y thalloo, hrog eh seose e laue gys niau, 6As loo eh liorishyn ta bio son dy bragh as dy bragh, chroo niau, as ny reddyn t’ayn, as y thalloo, as ny reddyn t’ayn, as yn aarkey, as ny reddyn t’ayn, nagh beagh traa ny sodjey: 7Agh ayns laghyn coraa yn chiaghtoo ainle, tra nee eh toshiaght dy heidey, dy beagh folliaght Yee er ny chooilleeney, myr t’eh er hoilshaghey da e harvaantyn ny phadeyryn. 8As loayr y coraa cheayll mee veih niau rhym reesht, as dooyrt eh, Immee, as gow yn lioar veg ta foshlit ayns laue yn ainle ta shassoo er yn aarkey, as er y thalloo. 9As hie mee gys yn ainle, as dooyrt mee rish, Cur dou yn lioar veg. As dooyrt eh rhym, Gow eh, as ee eh; as nee eh dty volg sharroo, agh bee eh millish ayns dty veeal myr mill. 10As ghow mee yn lioar veg ass laue yn ainle, as d’ee mee eh; as ve ayns my veeal millish myr mill: as cha leah as d’ee mee eh, va my volg sharroo. 11As dooyrt eh rhym, Shegin dhyt’s phadeyrys y yannoo reesht mychione ymmodee pobble, as ashoonyn, as glaraghyn, as reeaghyn.

Currently Selected:

Ashlish 10: CON1810

Highlight

Copy

Compare