Jamys 5

CAB. V

1Tar jee nish shiuish gheiney berchagh, keayn‐jee as gull‐jee son nyn dreihys hig erriu. 2Ta nyn merchys er n’gholl mow, as nyn goamraghyn eeit lesh lhemeenyn. 3Ta’n airh as aargid eu mergit; as bee’n mergey oc feanish nyn ’oï eu, as nee eh gee yn eill eu myr aile: ta shiu er stoyral seose tashtaghyn cooidjagh gour ny laghyn s’jerree. 4Cur‐my‐ner, ta faill ny labreeyn, ta er vuinn ny magheryn eu, ta lieriuish er ny reayll voue dy molteyragh, gaccan: as ta eam ny beayneeyn er n’gholl stiagh ayns cleayshyn y Chiarn dy Heshaght‐chaggee flaunys. 5Ta shiu er veaghey ayns soailid as rouanys er y thalloo; ta shiu er veiygh nyn greeaghyn, myr ayns laa yn vuitchoorys. 6Ta shiu er gheyrey as er varroo yn er‐cairal; as cha vel eh dy lhiettal shiu. 7Fark‐jee er‐y‐fa shen, vraaraghyn, derrey cheet y Chiarn. Cur‐my‐ner, ta’n eirinnagh farkiagh son mess berchagh y thallooin, as t’eh farkiagh foddey er y hon, derrey hig fliaghey cooie ny imbaghyn. 8Fark‐jee shiuish myrgeddin dy surransagh; niartee‐jee nyn greeaghyn: son ta cheet y Chiarn tayrn er‐gerrey. 9Ny gow‐jee sproght goanlyssagh ry‐cheilley, vraaraghyn, er‐aggle dy bee shiu er nyn gheyrey: cur‐my‐ner ta’n briw shassoo ec y dorrys. 10My vraaraghyn, gow‐jee ny phadeyryn, t’er loayrt ayns ennym y Chiarn, son sampleyr jeh surranse seaghyn, as jeh meenid. 11Cur‐jee my‐ner, ta shin jeeaghyn orroosyn dy ve maynrey ta gymmyrkey seaghyn. Ta shiu er chlashtyn jeh meenid Yob, as cre chiare y Chiarn da ec y jerrey: dy vel y Chiarn feer chymmoil, as jeh myghin veigh. 12Agh erskyn ooilley, my vraaraghyn, ny jean‐jee loo, chamoo liorish niau, ny liorish y thalloo, ny liorish loo erbee elley: agh lhig da’n ghlare eu ve she, she, as cha nee, cha nee; er‐aggle dy duitt shiu fo briwnys. 13Vel unnane erbee ny mast’ eu ayns seaghyn? lhig da padjer y ghoaill. Vel fer erbee gennal? lhig da arraneyn‐moyllee ’ghoaill. 14Vel veg ching ny mast’ eu? lhig da fys y choyrt er fir‐reill ny hagglish; as lhig daue padjer y ghoaill er e hon, gooillaghey eh lesh ooil ayns ennym y Chiarn: 15As nee’n phadjer lesh credjue yn aslayntagh y lheihys, as ver y Chiarn bea sodjey da; as my t’eh er n’yannoo peccah, bee eh er ny leih da. 16Gow‐jee rish nyn voiljyn yn derrey yeh da’n jeh elley, as gow‐jee padjer yn derrey yeh son y jeh elley, dy vod shiu v’er nyn lheihys: S’mooar y bree t’ayns padjer jeean creeoil yn dooinney crauee. 17Va Elias ny ghooinney fo annooinidyn dooghyssagh casley rooin hene, as ghuee eh dy jeean nagh jinnagh eh fliaghey: as cha ren eh fliaghey er y cheer fey three bleeaney as shey meeghyn. 18As ghow eh padjer reesht, as haink fliaghey veih niau, as hug y thalloo magh yn mess eck. 19Vraaraghyn, my ta unnane erbee eu goll er‐shaghryn veih’n irriney, as fer dy hyndaa eh; 20Lhig da fys ’ve echey, dy jean eshyn ta chyndaa yn peccah veih shaghrynys e raad, sauail annym veih baase, as ymmodee peccaghyn y choodaghey.

Currently Selected:

Jamys 5: CON1810

Highlight

Copy

Compare