Lom 8

Olíhe ewú Efúúménénú yí Elilé ŋe yíinjie baacɔ

1Aámbáya aná, Bandɔ́mɛsɛ́ tɛ á bá tɔ́na wu ɔbɔsɔna nyɛkua a baacɔ a bá bɔ́ŋa e nyimónjóló ne Yésus *Kilís háyɛ na nyɛbaná na ɔmɛsɛ́, 2anyía ekúlú ayɛ́ ɔɔcɔ áŋa e nyimónjóló ne Yésus Kilís a nyɛnamá eényí, indélímínyínyi ci *Efúúménénú yí Elilé a cɛ́ ŋaá basɔ́ iínjie olíhe ŋaá basɔ́#8.2 Cɛ́mɔtɛ́ Ciɔɔ́ŋɛ́ cɛ́ buáyá áŋa na « yɔ́ɔ », ta anyía « mɛ ». kátɔ́na ne i indélímínyínyi cɛ na bɔɔbɛ́ ne owé. 3Yááŋa anyía basɔ́, bɔnyɛ baacɔ, tu tɛ ɔmɔ́ sɔ́ bá na makɛ́nda ma ɔlátákɛ́na *bikotí bí *Moyís ; yaátɛ́ asana bɛ́ tɛ ɔ́mɔ́ bá na makɛ́nda ma ɔwaáŋɛ́áka maabɛ́. Mbá bɛsana ebí bikotí tɛ ɔ́mɔ́ bá na makɛ́nda ma ɔkɛlaka, Bandɔ́mɛsɛ́ ŋeé biíbi kɛlaka a nyɛtɔ́ma anyɛ́ u ŋaá tɔ́ma uuyé Ɔɔ́nɔ́. U ŋgeé bíbíéne ɔɔcɔ a ciasɔ́ ihúényínyí, basɔ́ baacɔ, anyía wáa basɔ́ háŋɔ́náka aasɔ́ a bɔɔbɛ́. Aáná Bandɔ́mɛsɛ́ ŋaá bɔ́sɔ́nɛ́na Kilís nyɛkua a yáásɔ́ asana ɔ ɔtábɔ́náka asana yɛ́ bɔɔbɛ́ bɔ́ baacɔ.#8.3 Nyɛkɔ́ŋɔ́na nyí etémbí : « Bandɔ́mɛsɛ́ ŋaá bɔ́sɔ́nɛ́na bɔɔbɛ́ a búáŋa a nyɛbá nyɛ́ baacɔ. » 4U ŋaá kɛ́láka aáná anyía tuasɔ́ bámɔ́kɔ́na banyɛmánánɔ́ bɔmbányɛ e nyinyíóyísínyi nyɛ́ bɛsana enyí bikotí ŋá yaamba, basɔ́ ebé Elilé ŋé kéndisi, tɛ́ cáŋa nyíásɔ́ nyɛbá nyɛ́ baacɔ. 5Yááŋa anyía baacɔ abá nyíábɔ́ nyɛbá ŋé kéndisi ŋa bɔ́ látɛ́na bɛsana e bí ŋeé beébe hámɛ́na ɛ ɛtɛ́má a aháŋá na nyɛ́ábɔ́ nyɛbá. Mbá eebe ebé Elilé ŋe kéndisi ŋa bɔ́ látɛ́na bɛsana e bí ŋeé beébe hámɛ́na ɛ ɛtɛ́má a aháŋá ne Elilé. 6Aáná bɛsana a bɛ́ ŋaá hámɛ́na baacɔ ɛ ɛtɛ́má a aháŋá na nyɛ́ábɔ́ nyɛbá ŋeé beébe cɔbana o owé ; mbá bɛsana e bí ŋeé beébe hámɛ́na ɛ ɛtɛ́má a aháŋá ne Elilé ŋeé beébe cɔbana o olíhe, bé líhéke e mbuumu noómi. 7Ɛ́ɛhɛ́ baacɔ abá bɛsana ŋeé beébe hámɛ́na ɛ ɛtɛ́má a aháŋá na nyɛ́ábɔ́ nyɛbá á bɔ́ŋa beliŋine bá Bandɔ́mɛsɛ́. Bá tɛ ŋá bɔ́ látɛ́na bɛsana abɛ́ Bandɔ́mɛsɛ́ ŋé léne, beébe tɛ́ka na makɛ́nda me o wuúci ɔlɔ́kɔ́mɛ́na buúse bukime. 8Bandɔ́mɛsɛ́ tɛ á bá wu obílénékíne buúse bukime eebe a bá ŋa bɔ́ lɔ́kɔ́mɛ́na bɛsana bɛ́ nyíábɔ́ nyɛbá.

9Mbá aá banɔ́ abá nyɛbá nyɛ́ baacɔ ti ŋéé kéndisi, Elilé yiíyi yɛ́ ŋaá banɔ́ kéndisi mbɔ́kɔ Elilé yɛ́ Bandɔ́mɛsɛ́ áŋa náánɔ́. Mbɔ́kɔ ɔɔcɔ tɛ á bá ne Elilé yí Kilís eéyé nááyá, u tɛ á bá uuyé ɔɔcɔ aná. 10Mbɔ́kɔ Kilís áŋa náánɔ́ e cíínú ɛtɛ́má noómi, ta ayɛ́ cɛɛ́tɔ a yánáŋa ci owé a asana na bɔɔbɛ́ ; asana ɔ́mɔtɛ́, yááyɛ́ Elilé ŋaá banɔ́ iínjíétúne olíhe#8.10 Nyɛkɔ́ŋɔ́na a nyɛ́mɔtɛ́ : « mbá Elilé áŋa indíné ci olíhe… » anyía Bandɔ́mɛsɛ́ ŋaá banɔ́ hiíte háyɛ bɛtálɛ́mánánɔ́ bɛ́ baacɔ eeyé eé buúse. 11Yááŋa anyía, mbɔ́kɔ Elilé yí Ooci ewú u ŋeé héényi Yésus Kilís e biwéewé áŋa taaká e cíínú ɛtɛ́má noómi, u kéé héényiki tɔ́na cíínú cɛɛ́tɔ e biwéewé na makɛ́nda ma yááyɛ́ Elilé a yáaŋa náánɔ́. 12Yaátɛ́ asana, banɔ́ báámɛ benyíinyí, tua sɔ́ŋa beékínyínyi anyía túésú líhéke háyɛ Elilé ŋé léne, tɛ́ cáŋa tɔ́na háyɛ nyíásɔ́ nyɛbá nyɛ́ baacɔ ŋa basɔ́ nyɛ́kɛ́tɛna anyía túésú líhéke. 13Mbɔ́kɔ nu ŋa nɔ́ látɛ́na bɛsana a bɛ́ ŋaá banɔ́ hámɛ́na ɛ ɛtɛ́má a aháŋá na nyíánɔ́ nyɛbá, nu ŋa nɔ́ cɔ́baka o owéékúne. Mbá, mbɔ́kɔ a makɛ́nda me Elilé nu ŋe nú ményisi bɛɛbɛ́ bɛ́ bɛsana abɛ́ nu ŋa nɔ́ kɛla, nu ké nú líhéke. 14Aáná baacɔ ebé Elilé yɛ́ Bandɔ́mɛsɛ́ ŋé kéndisi á bɔ́ŋa baáná bá Bandɔ́mɛsɛ́. 15Yááŋa anyía Bandɔ́mɛsɛ́ tɛ ɔ́mɔ́ banɔ́ iínjie elilé a yɛ́ ŋaá banɔ́ tíŋe bɛɔ́lɛ́, yɛ́ banɔ́ cɔ́bakana tɔ́na e bulíkílíki, mbá u ŋaá banɔ́ iínjie Elilé a yɛ́ ŋaá banɔ́ céŋísi bááyɛ́ baáná bá ɔfana#8.15 Fanáka ne bik. 23 na Kal 4.5-6., anyía e Elilé eéyé tu ŋa sɔ́ kɔɔna okelú ɔ ɔmuaná anyía « Ába » ɛ́cɛ anyía « Taatá ! » 16Elilé eéyé bɛ́muátá ŋe yóónyísínyi yáásɔ́ elilé#8.16 Nyɛkɔ́ŋɔ́na a nyɛ́mɔtɛ́ : « Ne Elilé yɛ́ Bandɔ́mɛsɛ́ na yáásɔ́ ŋaá basɔ́ oónyísínyi… » anyía tua sɔ́ŋa baáná bá Bandɔ́mɛsɛ́. 17Ɛ́ɛ, tua sɔ́ŋa baáná bá Bandɔ́mɛsɛ́ ; yaátɛ́ asana tua sɔ́ŋa tɔ́na na nuafa aáyá a bɛnyɛ́ma abɛ́ u ŋaá basɔ́ bɛ́tánákɛ́ná. Na basɔ́ ne Kilís, tu ké sú híítéke nuafa a bɛnyɛ́ma eébí anyía tu ŋa sɔ́ lɔ́kɔ́ma muuyé ɔlɔŋɔ, na basɔ́ ne wuúci. Aáná tɔ́na tu ká sɔ́ bá na nuafa, na basɔ́ ne wuúci, eéyé e nuúmi.

Mɔŋɔlɛ́ e ekúlú yí muuyé

18Ɛ ŋa mɛ́ lɛca anyía muuyé amɔ́ tu ŋa sɔ́ lɛca aámbáya ti ŋéé húéséténe te butíkítíki ne nuúmi anɔ́ Bandɔ́mɛsɛ́ káá basɔ́ námbɔnɛna. 19Bɛnyɛ́ma bikime abɛ́ Bandɔ́mɛsɛ́ ŋeé kétiki ŋaá tátá na mɔŋɔlɛ́ mekime ɔ ɔlɛca buɔ́sɛ́ abɔ́ u kó ko tóŋínyi nuúmi a bááyɛ́ baáná. 20Bɛnyɛ́ma eébí ŋa kaá bɛ́sɔ́kɛ́tɛ́na e butéŋí a bɔ́ tɛ á bá ne indíné ; aá taaká tɛ́ cáŋa biíbi bí ŋeé lénéke aáná, mbá Bandɔ́mɛsɛ́ u ŋeé biíbi sékítínyí e butéŋí eébú. Ta híáná, mɔŋɔlɛ́ me o biíbi kátɔ́naka a yánáŋa. 21Yááŋa anyía Bandɔ́mɛsɛ́ kéé kétúnyíki bɛnyɛ́ma eébí e butéŋí bú bunyímé, bí o hiíteke nuafa ne e nyilimíné nyí bundukúméné ne e nuúmi nɔ́ bááyɛ́ baáná. 22Tu ŋe sú ményí o otúme buáyá ɔ ɔkɔɔ́háma aámbáya anyía bɛnyɛ́ma bikime abɛ́ Bandɔ́mɛsɛ́ ŋeé kétíki ŋaá kɛmba, bɛ́ lɔ́kɔ́máka ɔkála háyɛ oónjú ewú u ŋeé númi obíéne. 23Mbá bɛ́ tɛ á bá bímuócí ɔ ɔkɛ́mba aáná. Basɔ́ tɔ́na abá Bandɔ́mɛsɛ́ ŋa cáŋa ɔ basɔ́ iínjie yááyɛ́ Elilé, tu ŋa sɔ́ kɛmba tɔ́na e cíísú ɛtɛ́má. Tu tátáka na mɔŋɔlɛ́ mekime nyɛ-basɔ́-hiíte anyɛ́ Bandɔ́mɛsɛ́ káá basɔ́ hiíte háyɛ bááyɛ́ baáná bá ɔfana, yɔ́ kátɔ́náka buúse bukime ciasɔ́ cɛɛ́tɔ. 24Yááŋa anyía tua sɔ́ŋa na mɔŋɔlɛ́ o otúme ekúlú ayɛ́ Bandɔ́mɛsɛ́ ŋaá basɔ́ nóhíki, ta yɛ́ cáŋa á bá anyía tu tɛ ŋá sɔ́ lɛ́ca nuúmi. Ekúlú ayɛ́ ɔɔcɔ ŋa lɛ́ca bɔkɔ abɔ́ u ŋa mɛ́nɛna mɔŋɔlɛ́, u ti ŋé túné é meéme háya e buúbu, anyía ta ɔɔcɔ tɛ ŋá háya mɔŋɔlɛ́ a bɔkɔ abɔ́ u ŋa lɛ́ca. 25Mbá tua suánáŋa na mɔŋɔlɛ́ a bɔkɔ abɔ́ tu tɛ ŋá sɔ́ lɛca ; aáná tú me sú eéhínyínyi o buúbu tátá.

26Híáná tɔ́na, *Efúúménénú yí Elilé ŋaá basɔ́ ɔ́ɔ́lɔ e úúsú olíhe ú belumitinine anyía tu tɛ asɔ́ bá na makɛ́nda ; tu ti ŋé sú ményi ɔbɛ́cɔ́kɔ́lɛ́na háyɛ yɛ́ ŋaá bɛ́ámba, mbá Elilé bɛ́muátá yɛ́ ŋá basɔ́ bɛ́cɔ́kɔ́lɛ́nɛ́na Bandɔ́mɛsɛ́ na ɛmbɛ́cɔbɛ́ cɛ ɔtɛ́má noómi a cɛ́ tɛ ŋá háma e nyuúté. 27Aáná Bandɔ́mɛsɛ́, Mubúlúne ɛtɛ́má cɛ́ baacɔ, ŋé ményi tɔ́na aátɛ́ Elilé ŋa yaámba ɔbata, anyía Elilé ŋa bɛ́cɔ́kɔ́lɛ́nɛ́na baacɔ bá Bandɔ́mɛsɛ́ a nyɛnamá enyí bú ŋeé wuúci bíléníne.

28Tu ŋe sú ményi tɔ́na anyía Bandɔ́mɛsɛ́ ŋeé híkisi bɛsana bikime#8.28 Nyɛkɔ́ŋɔ́na a nyɛ́mɔtɛ́ : « bɛsana bikime ŋaá kɛ́ka… » a bɛ́ ŋá hámɛ́na be-wuúci-léne ; beébe eébé u ŋɔɔ́ lɔ́ŋɔ́kɔ́ háyɛ u ŋaá tákákɛ́ná. 29Yááŋa anyía Bandɔ́mɛsɛ́ ŋaá cáŋacáŋa o beébe táfáka buáyá,#8.29 Ta anyía : « Bandɔ́mɛsɛ́ ŋaá caŋácáŋa o beébe menyi buáyá… » yɔ́ cáŋacaŋa ɔsɔ́mbɔ́tɔ́na buáyá anyía bá hɔ́áka uuyé Ɔɔ́nɔ́ ɔ ɔkɛla anyía uuyé Ɔɔ́nɔ́ oócí á bámɔ́kɔ́na ɔɔ́nɔ́ u buúsebuúse ɛ ɛkatɛ́katɛ́ cɛ baáná beéŋí bé etémbí. 30Aáná, baacɔ abá Bandɔ́mɛsɛ́ ŋaá cáŋacáŋa ɔsɔ́mbɔ́tɔ́na buáyá anyía bá hɔ́áka uuyé Ɔɔ́nɔ́, u ŋeé beébe lɔ́ŋɔ́kɔ́ tɔ́na ; eebe abá u ŋɔɔ́ lɔ́ŋɔ́kɔ aáná, u ŋaá kɛ́lá anyía bá bámɔ́kɔ́na bɛtálɛ́mánánɔ́ bɛ́ baacɔ eeyé eé buúse ; ebé u ŋaá kɛ́lá anyía bá bámɔ́kɔ́na bɛtálɛ́mánánɔ́ bɛ́ baacɔ eeyé eé buúse, u ŋeé beébe iínjíé nuafa eeyé e nuúmi.

Aátɛ́ yááŋa yɔ ɔ basɔ́ aálɔ́na ne nulénéne nɔ́ Bandɔ́mɛsɛ́

31Aátɛ́ yí etémbí aná e ? Ta ɔɔcɔ tɛ á bá wu ɔ basɔ́ yáka anyía Bandɔ́mɛsɛ́ áŋa na basɔ́. 32U ti ómo kékenyi te uuyé Ɔɔ́nɔ́ u bɛ́muátá, mbá u ŋeé wuúci sɔ́mbɛ́ná háyɛ etúké a yáásɔ́ asana basɔ́ bekime. Híáná u káá basɔ́ bóosiki tɔ́na na bɛnyɛ́ma bí etémbí bikime e elime ci uuyé Ɔɔ́nɔ́. 33Aányɛ́ wáŋa wu ɔsɔ́mɛ́na aná baacɔ abá Bandɔ́mɛsɛ́ ŋaá táfáká e ? Yááŋa anyía wuúci bɛ́muátá u ŋaá kɛ́láka anyía bá bámɔ́kɔ́na bɛtálɛ́mánánɔ́ bɛ́ baacɔ eeyé eé buúse. 34Aányɛ́ wáŋa wu o beébe bɔsɔnɛna nyɛkua e ? Ta ɔɔcɔ. Yááŋa anyía Yésus *Kilís wuúci bɛ́muátá u ŋeé wé ; mbá ɔ ɔhɔla owé, u ŋaá háanyua e biwéewé. Wáŋa limine a aháŋá yɛ́ ɔɔbɔ́ ú manɔ́mɛ ú Bandɔ́mɛsɛ́, u bɛ́cɔ́kɔ́lɔ́kɛ́na a yáásɔ́ asana. 35Aányɛ́ wáŋa wu ɔ basɔ́ eélúnyi ne nulénéne enú Kilís ŋa basɔ́ léne e ? Muuyé ayɛ́ʼ ? Ɔbɛ́ákɛ́na ayɛ́ʼ ? Mutekesene ayɛ́ʼ ? Ɛcaná ayɛ́ʼ ? Mecíli ayɛ́ʼ ? Ekume ayɛ́ʼ ? Ta anyía owé e ? 36Yááŋa yɔɔ́ŋɔ́kɔ́nɔ́ anyía : « Ɔ yɔ́ɔ́wɔ asana úúsú olíhe áŋa ɔkɛ́mánɔ́ a nɔmɔnyɛ́ ekúlú ekime, bá basɔ́ hiítéke háyɛ bitúké bɛ́ ɔkɔsɛ́kaka. »#Maŋ 44.23 37Mbá tu ŋa sɔ́ hɔ́la ɔyáka bɛsana eébí bikime a makɛ́nda me Ooci awɔ́ u ŋaá basɔ́ lénéké. 38I ŋe mí menyi bɔmbányɛ bɔmbányɛ anyía te owé, te olíhe, te *bililé bɛ́ masɔ́ma, te metéŋí, ta ɛkɛ́nda cí etémbí, ta bɛsana bɛ́ aámbáya, ta bɛ́ nɔɔyá, 39ta bɛnyɛ́ma bɛ́ ɔ ɔmuaná, ta bɛ́ ɛ ɛmbana cɛ ɔmɛsɛ́,#8.39 Nyɛkɔ́ŋɔ́na a nyɛ́mɔtɛ́ : « ta a bucaha ɔ ɔmuaná, te e bunjibí noómi… » ta bɔkɔ bú etémbí a bɛnyɛ́ma ebí bé ŋe kétíki tɛ á bá bɛ́ ɔ basɔ́ ɔwaálɔ́na ne nulénéne anɔ́ Bandɔ́mɛsɛ́ ŋaá basɔ́ tóŋínyi e elime ci uusú Otéŋí a Waáŋá Yésus Kilís.

Currently Selected:

Lom 8: lem

Highlight

Copy