Lom 3

Ta ɔɔcɔ tɛ á bá ɔtálɛ́mánánɔ́ eé buúse bɔ́ Bandɔ́mɛsɛ́

1Yaátɛ́ asana aná, ɔɔcɔ u *Besuif áŋa wu ɔbata anyía : Aátɛ́ ɔbámɔ́kɔ́nɛ́na ɔɔcɔ u Besuif ŋa hɔ́lana e ? #3.1 E bik. 1-9, Bóol ŋa batá ɛmbataka ɛ́táánɔ ecí be-wuúci-nuusi bé Besuif ŋa bɔ́ bá bé wuúci bataka. Aátɛ́ ɔbɛ́áca ŋaá basɔ́ ɔ́ɔ́lɔ e ? 2Ɛ́ɛ, bɛ́ ŋaá basɔ́ ɔ́ɔlɔ buéŋí i ihényí ikime, ananyía Bandɔ́mɛsɛ́ ŋa cáŋa ocúmeke Besuif bíáyɛ́ bɛsana. 3Mbá anyána aná, mbɔ́kɔ báábɔ́ baacɔ a bɔ́mɔtɛ́ ti ómo bú lúmitinine bɛsana eébí,#3.3 Nyɛkɔ́ŋɔ́na a nyɛ́mɔtɛ́ : « báábɔ́ baacɔ a bɔ́mɔtɛ́ ti ómo bú nyíóyísínyi esúŋe eécí ». yiíyi yí ŋo tóŋínyi tɔ́na anyía Bandɔ́mɛsɛ́ áŋa wu olimine, u ti nyíóyísínyi cááyɛ́ esúŋe e ? 4Eéʼeé, tɛ́ cáŋa aáná ; baacɔ ŋá bɔ́ nyɛmana bé omenyi anyía Bandɔ́mɛsɛ́ ŋeé nyíóyísínyi cááyɛ́ esúŋe bikúlú bikime, mbá yááŋa anyía baacɔ bekime e bé ŋe bú wuúci nuusi beébe bá bɔ́ŋa bafalafala. Yááŋa yɔɔ́ŋɔ́kɔ́nɔ́ anyía : « Baacɔ ŋá bɔ́ nyɛmána bé omenyi bikúlú bikime anyía ciɔwɔ ɛmbasɔ́ áŋa ɛtálɛ́mánánɔ́, bé menyukune tɔ́na anyía ɔ ŋɔɔ́ yáka ekúlú eyí bé ŋo yóo kélísi. »#Maŋ 51.6

5Yáakɛlá bɔ́mɔtɛ́ baacɔ ŋa bɔ́ kɔɔna anyía nyíásɔ́ nyɛkɛla nyɛ́ bɛsana a bɛɛbɛ́ ŋɔ yɔ́ɔlɔ baacɔ o omenyi anyía Bandɔ́mɛsɛ́ áŋa ɔtálɛ́mánánɔ́. Aátɛ́ yí etémbí tua sɔ́ŋa tú o beébe bɛ́káma e ? Tua sɔ́ŋa tú o beébe bɛ́káma anyía Bandɔ́mɛsɛ́ tɛ á bá ɔtálɛ́mánánɔ́ ekúlú ayɛ́ u ŋaá basɔ́ bɔ́nɔ́sɛa e ? 6Eéʼeé, yɛ́ tɛ á bá aáná buúse bukime. Mbɔ́kɔ yiíyi aáná, keyé Bandɔ́mɛsɛ́ tɛ á bá wu okélísíki baacɔ bá ɔmɛsɛ́ bekime.

7Yáakɛlá bɔ́mɔtɛ́ baacɔ tɔ́na ŋa bɔ́ kɔ́ɔna anyía bíásɔ́ bɛfala ŋɔ yɔ́ɔlɔ baacɔ o omenyi anyía Bandɔ́mɛsɛ́ áŋa ɔtálɛ́mánánɔ́, mbá bé búle wuúci iínjie nuúmi. Mbɔ́kɔ yááŋa aáná, mbá anyíatɛ́ bá yánáŋa ɔ ɔcɔba ne buúse ɔ ɔ basɔ́ bɔ́nɔ́sɛa anyía tua sɔ́ŋa bakɛla maabɛ́ e ? 8Bɔ́mɔtɛ́ bé etémbí ŋa bɔ́ kɔ́ɔna tɔ́na anyía bé búle kɛla bɔɔbɛ́ anyía bɔmbányɛ á lɛcakana. Aáná bá ŋa bɔ́ basɔ́ óoto anyía basɔ́ tu naŋa tuasɔ́ kɔ́ɔnaka aáná. Ɛ ŋa mɛ́ banɔ́ láana anyía bɔ́nɔ́sɛ cɛ baacɔ eébé á yáaŋa ɛnyɛmánánɔ́.

9Ánɔ lɛcá aná ! Ya mɛáŋa otóŋgínyínyi anyía na basɔ́ Besuif na baacɔ bé etémbí tua sɔ́ŋa basɔ́ bekime na ɔtɛ́má awɔ́ ú ŋa basɔ́ hámɛ́na ɔkɛla bɔkɔ búmɔtɛ́. Ɛ́ɛhɛ́ basɔ́ Besuif tu tɛ ŋá sɔ́ hɔ́la baacɔ bé etémbí te butíkítíki. 10Aáná Ciɔɔ́ŋɛ́ ŋaá kɔɔna cɛsɛ : « Ta ɔɔcɔ ɔmɔtɛ́ tɛ á bá ɔtálɛ́mánánɔ́ eé buúse bɔ́ Bandɔ́mɛsɛ́, ta hú ɔmɔtɛ́. » 11Ta ɔɔcɔ ɔmɔtɛ́ tɛ á bá ne injiŋé cɛ ɔlɔ́kɔ́máka bɔmbányɛ bɛsana bɛ́ Bandɔ́mɛsɛ́ ; ta ɔmɔtɛ́ tɛ aamba ohónyí wú o wuúci menyi. 12Baacɔ bekime ma bɔ́ bɛ́yúátáka ambányɛ yí ohónyí, bɔ́ bɛ́áhákɛ́na e eciké ; ta ɔmɔtɛ́ tɛ ŋá kɛ́la ambányɛ yɛ́ asana, ta hú ɔmɔtɛ́.#Maŋ 14.1-3 13Yááŋa anyía maabɔ́ mehúnyi ŋɔ yɔ́ɔ́nɔ́nɔ;#3.13 Nyɛkɔ́ŋɔ́na a nyɛ́mɔtɛ́ : « Yááŋa anyía mehúnyi a má ŋa háma a cáábɔ́ eété ŋeé bébe ɔ ɔlɔ́kɔ́ma ne eétú. » úúbú ɔtáŋa néŋékéne;#Maŋ 5.10 maabɔ́ mehúnyi eémé áŋa háyɛ hɛlɔkɔ hɛ́ ciɔ́hɔ.#Maŋ 140.4 14Cáábɔ́ eété ŋe hémúnyi hú bɛahɔ́ ; #Maŋ 10.7 15bá bɔ́ŋa fiaŋɔ fiaŋɔ ɔ ɔkɔwɔɔ́nɔ́kɔ baacɔ. 16A bɛhaála bikime abɛ́ bá ŋa bɔ́ hɔ́la, hú ne ekume ne muuyé bé ŋe bú síkíne baacɔ aá ciabɔ́ elime. 17Bé ti ŋé bú menyi olíhe ú mbuumu na bɔsɔ́ɔ́kɔ́;#Ɛsa 59.7-8 18bé ti kéke Bandɔ́mɛsɛ́ buúse bukime.#Maŋ 36.2

19Basɔ́ bekime tu ŋe sú ményi bɔmbányɛ anyía bɛsana bikime ebí *bikotí ŋe yéékúnyi ŋaá lɛ́cá hú baacɔ e bé ŋe bú bíékínyi ɔlátɛ́na bikotí. Bú ŋo tóŋínyi anyía ta ɔɔcɔ tɛ bɔ́ŋɔ ohónyí wú ɔbɛ́kála, tɔ́na anyía ɔɔcɔ okime áŋa na nyɛkua eé buúse bɔ́ Bandɔ́mɛsɛ́. 20Yaátɛ́ asana yááŋa anyía Bandɔ́mɛsɛ́ tɛ káá kɛla anyía ta ɔɔcɔ ɔmɔtɛ́ á bá ɔtálɛ́mánánɔ́ eeyé eé buúse a nyɛlátɛ́na anyɛ́ u ŋa látɛ́na bikotí. Yááŋa anyía bikotí ŋo tóŋínyi bú tóŋínyi baacɔ anyía bé menyukune maabɔ́ maabɛ́.

Ɔbá ɔtálɛ́mánánɔ́ eé buúse bɔ́ Bandɔ́mɛsɛ́

21Mbá aámbáya Bandɔ́mɛsɛ́ mo tóŋínyi baacɔ anyána u ŋa kɛla anyía bá bámɔ́kɔ́na bɛtálɛ́mánánɔ́ bɛ́ baacɔ eeyé eé buúse ; u ti ŋeé beébe kɛla aáná a nyɛlátɛ́na anyɛ́ bá ŋa bɔ́ látɛ́na *bikotí. Ne tufule tú bikotí, ne tufule tú *behémúnyi bɛsana ŋa bɔ́ cáŋa otóŋgínyi anyía 22Bandɔ́mɛsɛ́ ŋaá kɛ́la anyía baacɔ á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse yáaŋa anyía bá ŋa bɔ́ háya mɔŋɔlɛ́ né Yésus *Kilís ; asana eéyé ŋa lɛca baacɔ bekime e bé ŋe bú lumitinine, nyɛálɔ́nána tɛ á bá ɛ ɛkatɛ́katɛ́ cɛ baacɔ. 23Yááŋa anyía baacɔ bekime ŋa bɔ́ kɛ́la bɛsana a bɛɛbɛ́, buátɛ́ bɔkɔ bá tɛ abɔ́ bá bá ɔkɔɔ́háma hoóhi ne nuúmi nɔ́ Bandɔ́mɛsɛ́. 24Mbá Bandɔ́mɛsɛ́ ŋaá kɛla anyía baacɔ á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse e etémbí ne etémbí, a yááyɛ́ yaála yí nuubo. U ŋa hɔ́lɛ́na né Yésus Kilís ; wuúci u ŋeé beébe háŋɔ́náká a buɔ́lɛ́ bɔ́ bɔɔbɛ́. 25Wuúci oócí Bandɔ́mɛsɛ́ ŋa kɛ́lá anyía bé wuúci sɔ́mbɛ́na ; maayɛ́ manɔ́ŋɔ́ mɔ́ hámɔ́kɔ́na, a asana na nyɛnyɛanɛna nyɛ́ maabɛ́#3.25 Buhúnyi bɔ́ « ɔnyɛanɛna bɔɔbɛ́ » áŋa bɔ́ ɔlɔ́kɔ́mána tɔ́na anyía « oloosi hilóbi hɛ́ Bandɔ́mɛsɛ́ a asana na bɔɔbɛ́ » (fanáka 1Sŋ 2.2 ; 4.10 ; Luk 18.13 ; Ebe 2.17). ma baháya mɔŋɔlɛ́ nááyá.#3.25 Nyɛkɔ́ŋɔ́na nyí etémbí : « ma baháya mɔŋɔlɛ́ e uuyé owé ». U ŋaá kɛ́láka aáná o otóŋínyi baacɔ anyía wáŋa ɔtálɛ́mánánɔ́. U ŋaá nyɛ́ánáka máábɔ́ maabɛ́, tɛ́ka ne o beébe bɔ́nɔ́sɛ́áka ; 26u ŋeé beébe eéhíkínyínyí. Aámbáya aná u ŋoó tóŋínyi baacɔ anyía baháya mɔŋɔlɛ́ né Yésus á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse. U tóŋgínyi tɔ́na anyía wáŋa ɔtálɛ́mánánɔ́.

27Yaátɛ́ asana ɔɔcɔ tɛ ɔ́mɔ nyɛ́mána wu obílémbíki wuúci bɛ́muátá. Yááŋa anyía tɛ́ cáŋa a nyɛlátɛ́na anyɛ́ tú ŋa sɔ́ látɛ́na bikotí, yiíyi Bandɔ́mɛsɛ́ ŋá kɛ́lá anyía basɔ́, túásɔ́ bámɔ́kɔ́na bɛtálɛ́mánánɔ́ bɛ́ baacɔ eeyé eé buúse ; mbá u ŋaá kɛ́lá aáná a asana na mɔŋɔlɛ́ amá tu ŋa sɔ́ háyá né Yésus Kilís. 28Tu ŋe sú óónyísínyi anyía Bandɔ́mɛsɛ́ ŋaá kɛ́lá anyía ɔɔcɔ okime á bá atálɛ́mánánɔ́ yɛ́ ɔɔcɔ eeyé eé buúse a mɔŋɔlɛ́ amá u ŋaá háya nááyá ; tɛ́ cáŋa a nyɛlátɛ́na nyí bikotí. 29Yááŋa anyía Bandɔ́mɛsɛ́ tɛ á bá hú Bandɔ́mɛsɛ́ ci *Besuif bímuócí, mbá wáŋa tɔ́na Bandɔ́mɛsɛ́ cɛ baacɔ bekime bé etémbí, 30anyía Bandɔ́mɛsɛ́ áŋa hú ɔmɔtɛ́ a baacɔ bekime. Wuúci oócí u káá kɛ́la anyía baacɔ bekime, ne Besuif na baacɔ bé etémbí, á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse hú a mɔŋɔlɛ́ amá bá ŋa bɔ́ háya né Yésus Kilís. 31Yááŋa anyía nyɛkɛla anyɛ́ Bandɔ́mɛsɛ́ ŋa kɛ́lá anyía túásɔ́ bámɔ́kɔ́na bɛtálɛ́mánánɔ́ bɛ́ baacɔ eeyé eé buúse hú o olumitinine ti ŋeé témbúnyísi bikotí buúse bukime ; mbá nyí ŋeé biíbi óónyísínyi bú oónyísínyi.

Currently Selected:

Lom 3: lem

Highlight

Copy