Lom 2

Nyɛbɔ́nɔ́sɛ nyɛ́ baacɔ nyɛ́ Bandɔ́mɛsɛ́ áŋa nyɛtálɛ́mánánɔ́

1Mbá kuɔŋɔ́ aná, ɔ ɔ́ŋa aányɛ́, ɔ ŋɔɔ́ bɔsɔnɛna bɔsɔ́ɔ́kɔ́ nyɛkua e ? Bandɔ́mɛsɛ́ kɔ́ yɔ́ɔ lɔ́kɔ́mɛ́na bɔɔbɛ́ anyía ɔ ŋɔɔ́ bɔsɔnɛna bɔsɔ́ɔ́kɔ́ nyɛkua, yiíyi anyía kuɔŋɔ́ bɛ́muátá tɔ́na ɔ ŋɔɔ́ kɛla bɛátɛ́ bɛɛbɛ́ bɛ́ bɛsana. Ɛ́ɛhɛ́ ɔ́ mɔɔ́ bɛ́bɔ́sɔ́nɛ́na nyɛkua kuɔŋɔ́ bɛ́muátá. 2Basɔ́ bekime, tu ŋe sú ményi anyía ekúlú ayɛ́ Bandɔ́mɛsɛ́ ŋɔ́ bɔ́nɔ́sɛ baacɔ a bá ŋa bɔ́ kɛ́la bɛɛbɛ́ bɛ́ bɛsana eébí, wáŋa a taaká noómi. 3Mbá kuɔŋɔ́ awɔ́ ɔ ŋɔɔ́ bɔsɔnɛna baacɔ nyɛkua, kuɔŋɔ́ bɛ́muátá a kɛlaka bɛátɛ́ bɛɛbɛ́ bɛ́ bɛsana, menyí anyía ɔ tɛ kɔ́ɔ́ bɛ́hɔɔ bɔ́nɔ́sɛ cɛ Bandɔ́mɛsɛ́. 4Bandɔ́mɛsɛ́ áŋa na ambányɛ́kɛ́ yɛ́ ɔtɛ́má, u ti tényí bɔ́nɔ́sɛ ɔɔcɔ, wuúci ne oweéhínyínyi. Ɔ ŋɔɔ́ bábɛ́na bɛsana eébí e ? Mbá menyí anyía u ŋɔ yɔ́ɔ kɛla ambányɛ yɛ́ asana anyía u ŋa yáamba ɔ kuɔŋɔ́ íinjie ohónyí wú ɔbɛ́kákálákɛ́na búɔ́wɔ bɔɔbɛ́, mbá á sɔ́mba ɔkɔlɔ́ eé buúbu.#2.4 Ɔkɔ́ŋɔ́na cí etémbí : « ɔbɛ́kɔ́ŋɔ́nɛ́na ɛtɛ́má », ta anyía « ɔbɛ́kɔ́ŋɔ́nɛ́na olíhe », ta anyía « ɔbɛ́kɔ́ŋɔ́nɛ́na nyɛbɛ́kɛ́lɛ́na ». 5Huúúʼ ! Asɛ ɔ́ɔ natá ɔtɛ́má, baabá ! Ɔ tɛ ŋɔ́ɔ waamba ɔbɛ́kákálɛ́na búɔ́wɔ bɔɔbɛ́ ; aáná ɔ ŋɔɔ́ bɛ́áŋɛ́nɛ́na yaandándá yɛ́ bɔ́nɔ́sɛ yɛ́ Bandɔ́mɛsɛ́. U kóó lóbísíkinyi bakɛla maabɛ́ ɔ buɔ́sɛ́ bɔ́ yááyɛ́ atálɛ́mánánɔ́ yɛ́ nyɛkála. 6Ɔ buɔ́sɛ́ eébú, u káá námaka ɔɔcɔ okime a nyɛnamá anyɛ́ u ŋaá bɛ́kɛ́lákɛ́na.#Maŋ 62.13 7Aáná, a aháŋá na baacɔ e bé ŋe bú bíínjie ɔ ɔkɛla bɛmbányɛ bɛ́ bɛsana, bá aambaka anyía Bandɔ́mɛsɛ́ é beébe iínjie nuúmi, wé beébe bɛ́sɔ́mɔ́kɔ, wé beébe iínjíékíne ɛndɛfɔnɔ́ cɛ cɛɛ́tɔ : Beébe eébé u káá kɛla anyía bébú líhéke yɔɔ́sɔɔ́sɔ yí olíhe yí ekúlú ekime.#2.7 E bik. 7-8, Bóol ŋe hémbule indélímínyínyi ci bikotí a ciáŋa e bik. 6. 8Mbá, a aháŋá ne be-wuúci-kɛlɛna aatɔ́ ɔnata, bá tɛ́ látɛ́na taaká, bá kɛ́laka hú bɛɛbɛ́ bɛ́ bɛsana, beébe eébé Bandɔ́mɛsɛ́ kóó lóbísíkinyi, yó beébe lɔ́kɔ́mákɛ́na bɔɔbɛ́. 9Yááŋa anyía baacɔ bekime a bá ŋa bɔ́ kɛ́la bɛɛbɛ́ bɛ́ bɛsana ká bɔ́ lɔ́kɔ́máka muuyé muéŋí ɔ ɔhɔla : Eé buúsebuúse *Besuif, e elime eécí baacɔ a bá tɛ ábɔ́ bá Besuif. 10Mbá Bandɔ́mɛsɛ́ kéé yiínjie nuúmi, yɔ́ bɛ́sɔ́mɔ́kɔ, yó wiínjie mbuumu a baacɔ e bé ŋe bú bíínjie ɔ ɔkɛla bɛmbányɛ bɛ́ bɛsana : Eé buúsebuúse e Besuif, e elime eécí a baacɔ a bá tɛ ábɔ́ bá Besuif. 11Yááŋa anyía eé buúse bɔ́ Bandɔ́mɛsɛ́, baacɔ bekime á bɔ́ŋa bɔkɔ búmɔtɛ́.

12Baacɔ a bá ŋa bɔ́ kɛ́la bɛɛbɛ́ bɛ́ bɛsana, bé tí menyi *bikotí bí *Moyís, ké bú nyímúkúne ; ɛ́ɛ, bé ké bú nyímúkúne, ta Bandɔ́mɛsɛ́ ti é beébe fanɛ́na e bikotí eébí. Mbá, baacɔ a bá ŋa bɔ́ kɛ́la bɛɛbɛ́ bɛ́ bɛsana, bé menyukune bikotí bí Moyís, Bandɔ́mɛsɛ́ kéé beébe bɔsɔnakɛna bɛsana háyɛ bikotí eébí ŋó tóŋie. 13Yááŋa anyíaʼo, tɛ́ cáŋa balɔ́kɔ́ma bikotí ne eetú bá bɔ́ŋa bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́, mbá be-biíbi-látɛ́na. Beébe Bandɔ́mɛsɛ́ ŋa kɛ́la anyía bábɔ́ bámɔ́kɔ́na bɛtálɛ́mánánɔ́ bɛ́ baacɔ eeyé eé buúse. 14Ekúlú ayɛ́ baacɔ a bá tɛ ábɔ́ bá Besuif, bé tí menyí bikotí bí Moyís, ŋá bɔ́ kɛ́la a máábɔ́ malɔŋa bɛsana ebí bikotí ŋa yáamba, bú ŋo tóŋínyi anyía Bandɔ́mɛsɛ́ mé beébe háya bíáyɛ́ bikotí a manɔ́ŋɔ́ noómi, yiíyi anyía bé ti ŋe bú biíbi menyi. 15A nyɛkɛla eényí, bé ŋe bú tóŋínyi anyía bɛsana ebí bikotí ŋa yáamba áŋa e cííbú ɛtɛ́má noómi. Na túábɔ́ tɔcɔɔ́cɔ́ tɔ́ ɛtɛ́má ne cííbú ibíkéti ŋo tóŋínyi tɔ́na bɔkɔ búmɔtɛ́ a asana eyí bí ŋeé beébe kákálɛ́na, ta anyía bí beébe kamakɛna bikúlú bikúlú. 16Bɛsana eébí káá lɛ́cakana buɔ́sɛ́ abɔ́ Bandɔ́mɛsɛ́ káá tɔ́ma Yésus *Kilís o okokélísi baacɔ a bɛsana bɛ́ nyɛnamba bí cííbú ɛtɛ́má. Asana eéyé Ambányɛ yɛ́ Ɛsɔ́ma eyí i ŋe mí hulinyi baacɔ ŋó tóŋínyi.

Aabɛ́ yɛ́ nyɛbɛ́kɛ́lɛ́na yí Besuif eé buúse bɔ́ Bandɔ́mɛsɛ́

17Mbá kuɔŋɔ́ awɔ́ ɔ ɔ́ŋa ɔɔcɔ u *Besuif, ɔ́ mɔɔ́ waákɛ́mɛ́nɛ́na *bikotí, a sánáka ɛŋɔ́nɔ anyía ɔ ɔ́ŋa ɔɔcɔ u Bandɔ́mɛsɛ́, 18o ŋoó menyi nyíáyɛ́ nyɛháŋa, e menyukune obúlúne bɛmbányɛ bɛ́ bɛsana ananyía u na maá banɔ́ eékúnyíki a bíáyɛ́ bikotí. 19O ŋoó bíkéti anyía ɔ ŋɔɔ́ lɛcana bɔmbányɛ, ɔ ɔ́ŋa wu okendiki ondíméndíme, e bíkétíki anyía o ŋoó tóŋínyi eese a baacɔ a bá ŋa bɔ́ kánda i ibíne. 20O ŋoó bíkéti tɔ́na anyía ɔ ɔ́ŋa wu oweékúnyíki be-ti-menyí ; o ŋoó tóŋínyi banásɛ́ bɛsana ananyía o ŋoó menyi, isuŋí tɛ́ka, anyía e bikotí noómi o ŋoó menyi bɔmbányɛ bɔmbányɛ bɛsana bikime, e menyukune tɔ́na taaká. 21Asɛ o ŋoó weékúnyi bɔsɔ́ɔ́kɔ́ bɛsana, yiíyi anyía o ti ŋóo menyi ta bɔkɔ ; bíékúnyíki aná ! Asɛ o ŋoó leke baacɔ buébi, yiíyi anyía o ŋoó weébe ! 22Asɛ o ŋoó koti baacɔ ɔkanda tusɔmɔ, yiíyi anyía o ŋoó tuútu kanda ! Asɛ o ŋoó kényéme bɛbɔ́kɔ́bɔ́kɔ, yiíyi anyía o ŋoó weébe eé meébe amá baacɔ ŋé bú nyémi bɛbɔ́kɔ́bɔ́kɔ ! #2.22 Besuif a bɔ́mɔtɛ́ ŋa bɔ́ bá bábɔ́ bandáka bɛbɔ́kɔ́bɔ́kɔ ta anyía bé biíbi túéke, ɔlata na bɛnyɛ́ma ebí be-ti-menyí Bandɔ́mɛsɛ́ ŋa bɔ́ bá bébú nyemikinyi cííbú bɛbandɔ́mɛsɛ́, yiíyi anyía bikotí ŋaá bá bí ti e lumitine ɔkɛla aáná (Tet 7.25). 23Ɔ ŋɔɔ́ sána ɛŋɔ́nɔ anyía o ŋoó menyi bikotí, yiíyi anyía ɔ ŋɔɔ́ bábɛ́na Bandɔ́mɛsɛ́ ekúlú eyí o tí ŋóo biíbi látɛ́na. 24Yááŋa anyía Ciɔɔ́ŋɛ́ cɛ́ Bandɔ́mɛsɛ́ cɛ́sɛ : « Baacɔ a bá tɛ ábɔ́ bá Besuif ké bú fénékíne Bandɔ́mɛsɛ́ anyía yáánɔ́ aabɛ́ yɛ́ nyɛbɛ́kɛ́lɛ́na, banɔ́ Besuif. »#Ɛsa 52.5

Taaká cɛ ɔbɛ́áca áŋa e elilé noómi

25Yááŋa anyía *Besuif naŋa bábɔ́ bɛ́ácáka o otóŋínyi anyía bá bɔ́ŋa e nyimónjóló na Bandɔ́mɛsɛ́. Mbɔ́kɔ ɔ ŋɔɔ́ látɛ́na bɔmbányɛ bɔmbányɛ *bikotí bí *Moyís bikime, aáná úúwu *ɔbɛ́áca áŋa o ohónyí, mbá mbɔ́kɔ o ti ŋóo biíbi látɛ́na aáná bikime, úúwu ɔbɛ́áca áŋa etémbí. 26Mbɔ́kɔ iindú cɛ ɔɔcɔ a cɛ́ tɛ á bá u Besuif, ŋa látɛ́na bɔmbányɛ bɔmbányɛ bikotí bí Moyís, wáŋa háyɛ ɔbɛ́ácánɔ́ a nyɛlɛca nyɛ́ Bandɔ́mɛsɛ́. 27Ɔɔcɔ awɔ́ u ŋaá látɛ́na bɔmbányɛ bɔmbányɛ bikotí bí Moyís, wuúci iindú, wuúci oócí u kó yóo kélísíki, kuɔŋɔ́ awɔ́ asɛ ɔ ɔ́ŋa ɔbɛ́ácánɔ́, kuɔŋɔ́ ne bikotí bɛɔ́ŋɔ́kɔ́nɔ́ mbá, e ti biíbi látɛ́na. 28Tɛ́ cáŋa ɔbɛ́áŋía yɔɔlɛ́ɔlɛ́ a yɛ́ ŋá lɛcana aá cɛɛ́tɔ ú ŋó tóŋínyi anyía ɔ ɔ́ŋa taaká ɔɔcɔ u Besuif ta anyía ɔ ɔ́ŋa taaká ɔbɛ́ácánɔ́ ; 29mbá taaká cɛ ɔɔcɔ u Besuif áŋa ɔ ɔtɛ́má noómi. Ɔɔcɔ oócí Bandɔ́mɛsɛ́ ŋé lémbi, mbá tɛ́ cáŋa nyilémbi nyɛ́ baacɔ. Taaká cɛ nyɛbɛ́áca áŋa e elilé noómi ; tɛ́ cáŋa a nyɛlátɛ́na nyí bikotí a bɛɔ́ŋɔ́kɔ́nɔ́.

Currently Selected:

Lom 2: lem

Highlight

Copy