KƎLƎKƎ KATE 4
4
Kase Banlɛ Onanto Bɔtɛsǝ Lǝ Wǝ Sekakedikɔ.
1Lǝ lefe nǝmfóo, nsi nyǝ bulǝkǝkate butsyuǝ nya mínyǝ siku sia básini bǝtsyǝ leya lǝ Onanto eto.
Nya mfó mínɔ ɔkɔɛ utsyuǝ wǝ nlɛ bole fe kakpatsyaku nsi nlɛ bufǝ katɛyi mɛ nkǝ, “Bǝ kato mfo, lǝ nlǝkǝ nnya lǝǝbǝ bubǝ kama nte fǝ.” 2Lamfolamfo, Lɛwɔnɔ nǝmǝ áyifǝ dísiǝ lǝ mɛ nya mínyǝ lekankpomɛ ditsyuǝ kato mfó nǝ ǝsuǝ utsyǝ nsi. 3Nwǝ nsi lǝ lekankpomɛ nǝmǝ lǝ buyǝnde fe yaspa ku sardis eto aba nnya lefo koya nya kɔlɛsensǝ ko nlɛ buyǝnde fe emeralda eto leba seka létsyilama lekankpomɛ nǝmǝ. 4Bétsyue akankpomɛ awosi ǝnuǝ ana tsya nya létsyilama lekankpomɛ nǝmǝ, nya beninɛ fosi ǝnuǝ ana tsya ba nkpe awuflubia, nya benti sika sia eto akankpakpa nsi lǝ akpomɛ nyamǝ ǝsuǝ. 5Nya ofamfa ku ɔsitoto eto kɔsɔ lɛ bɔbɔ ketsyi lǝ lekankpomɛ nǝmǝ ǝsuǝ. Atɛ akuanse nlɛ bunyǝ lǝ lekankpomɛ nǝmǝ eto sɛtɔ. Nyamfo ni Onanto eto awɔnɔ akunse nyamǝ nɛ. 6Nya lekankpomɛ nǝmǝ eto sɛtɔ akpa wuee, fe lekpo befi ahũhuɛ beyifo.
Asayifoyifo nya nkpe nkpǝ, nya dikǝ ǝnǝmi kpenkpenkpe sɛtɔ ku kama, ńyǝ etsyilama lekankpomɛ nǝmǝ eto akpake nnya ta kenke 7Etutɛ ále tsyata. Ǝnuǝfǝ ale ɔtrɔmu. Ǝtsyǝfǝ kpe ǝnǝmi fe utidi. Nya anale ale kɔlikpo ko nlɛ bufunini. 8Asa nnya nkpe mfó eto ǝsuǝ saa kpe mbamba akua akua, nya ǝnǝmi diyi nnya etsyilama kalebe saa, nya ɛnlɛ ese busǝ lefe saa katɛyi nkǝ,
“Kɛnkɛ, kɛnkɛ, kɛnkɛ
ni Bonamute Onanto wǝ ni ǝsuǝalenyǝ lefe nǝ ta,
wǝ nsi nkpe mɔmɔ, wǝ dísiǝ taa kasɔ ketsyikokɔ,
wǝ nsi nlɛ bubǝ.”
9Asa nnya nsi nkpe mfó eese atɛsɛ, dibu ku lɛninsɔ eto ese itǝ nwǝ nsi lǝ lekankpomɛ ǝsuǝ wǝ nsi nkpǝ lefe saa isu lefe saa. 10Lǝ beyifo nkoo, beninǝ fosi ǝnuǝ ǝna bamǝ aataka kakpoo kasɔ lǝ nwǝ nsi lǝ lekankpomɛ eto ǝnǝmi kesumu wǝ ke ni nwǝ nsi nkpe itǝ lefe manlo manlo nya bǝǝlǝkǝ mǝ akankpakpa kǝtsyǝ lǝ lekankpomɛ nǝmǝ eto sɛtɔ kese ese katɛyi nkǝ,
11“Bonamute ku bo Onanto!
Fǝ dińyǝ itǝ atɛsɛ ku dibu ku ǝsuǝale.
Itsyise fǝ diyifo asa nnya ta kenke,
nya fǝtǝ fǝ mǝmblǝ siǝ nkpǝ
bo lɛflɔ lǝ fǝ lelabi ǝsuǝ.”
Currently Selected:
KƎLƎKƎ KATE 4: LIP
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc., All rights reserved.
