KƎLƎKƎ KATE 14

Yohanes Ǝnyǝ Lesamubi Ku Wǝ Betidi.

1Nyamfo eto kamaa, nnyǝ Lesamubi nǝmǝ se dinyǝ lǝ Sion eto kɔtini ǝsuǝ. Nnyǝ betidi akpi kolofa awosi ana ana (144,000) ba eto nto bawɔni wǝ diye ku wǝ Anto ǝmǝ eto diye bǝtǝkǝ, nya bǝńyǝ wǝ lǝ akɔ. 2Ete mínɔ ɔkɔɛ utsyuǝ wǝ ditsyi kato fe ntu bo nlɛ boto lǝ ketsyue kplɛ nye ofamfa seka bembembe. Ɔkɔɛ wǝ minɔ esi ole fe betidi nlɛ kasanku bɔsɔ. 3Betidi akpi kolofa awosi ana ana bamǝ ńyǝ lǝ lekankpomɛ nǝmǝ ɔflɔ, asa ana nya nsi nkpǝ ku beninǝ bamǝ. Balɛ kusǝ fɔfɔ ko mǝ hã lekase busǝ. Lǝ betidi kenke ntii, mǝ hã ni mba dinyǝ bofo nɛ. 4Mǝ ni basani ba lɛlɛ mǝ ǝsuǝ kɛnkɛ betsyiko lǝ sɛsɔnɔdi ǝsuǝ. Mǝ ni mba dítǝkǝko Lesamubi nǝmǝ kaka ke lɛntɔ. Mǝ disi báfo kayo nɛ lǝ betidi nti nya mǝ ni betidi tutɛ ba befi bǝtǝ Onanto ku Lesamubi nǝmǝ nɛ. 5Bantɛyi tɔ sidia bǝnyǝ, nya bǝnyǝ tɔ kabua saa lǝ mǝ ǝsuǝ bǝnyǝ.

Yohanes Ǝnyǝ Kato Eto Batɔnkpe Itsyǝ Bǝtsyuǝ.

6Nyamfo eto kamaa, nnyǝ Onanto eto ɔtɔnkpe bamba utsyuǝ wǝ nlɛ bufunini kabe kato fanlofanlo ku nkpǝ manlo eto Ditiki Sɛɛ nǝmǝ itǝ betidi ba nkpe kasɔ eto lekpake saa, ese saa, bele saa ku nsɔ saa nsɔ. 7Ófá ɔ́tɛyi nkǝ, “Bibu Onanto lǝ bɛtɛsǝ wǝ sɛkplɛ siamǝ! Itsyise lefe éboyo bǝ okponko kawunsiǝ kenke lekpo. Bisumu wǝǝ diyifo kato ku kasɔ, lekpo ku ntu bo laayifǝ saa eto okle!”

8Onato eto ɔtɔnkpe nuǝfǝ ǝtǝkǝko ututɛ nya ɔnlɛ bɔtɛyi nkǝ, “Oba o-o! Babilonia wǝ lefo diye ǝmǝ aba sitinti! Útǝ betidi kenke ba díkpe nte ɛyɛ lǝ mǝ sɛsɔnɔdidi eto lebua ǝsuǝ ǝkpǝ nte fe bunǝ bǝnǝ mu bǝkpǝ!”

9Onanto eto ɔtɔnkpe tsyǝfǝ ǝtǝkǝko betutɛ inuǝ kama nya ɔnlɛ bofa bembembe katɛyi nkǝ, “Utsyuǝ saa ke lusumu ubutubuki ǝmǝ ku wǝ awesa nyamǝ nya utǝ bǝtǝkǝ leba lǝ wǝ kato nye lǝ wɛ kɔni, 10ebunǝ Onanto eto lɛblɔfi ku wǝ lefonyi kekleke nǝmǝ fe nte bo nkpe ale lɛkɔbetɔ nǝ béfi bákpo lǝ wǝ lɛblɔfi ǝsuǝ! Boofi ute ku ute eto leba bǝtǝkǝ mba diyifo nyamfo bǝnyǝ kanyi lǝ Onanto eto batɔnkpe kɛnkɛ ku Lesamubi nǝmǝ eto ǝnǝmi. 11Ute wǝ nlɛ mǝ botonsǝ eto kuyuǝ ko nlɛ bɔbɔ ketsyi lǝ kanyinyǝnyǝ kamɛ ǝsuǝ ebukabe kato idu manlo isu manlo. Nya lefe saa, ketsye ku kakɔmii, betidi ba dísumu ubutubuki ǝmǝ ku wɛ awesa ku mba ǝsuǝ wǝ diye eto leba ntǝkǝ embɔkɛ diyuǝ kulefe.

12“Nyamfo lɛ bote nkǝ mba ni Onanto eto betidi nya beetsyue Onanto eto etiki koto nya báfo Yesu banɔ, ńyǝ kekleke lǝ mǝ kanyinyǝnyǝ ǝsuǝ.”

13Nya mínɔ ɔkɔɛ utsyuǝ kato ɔnlɛ bɔtɛyi nkǝ, “Wɔni nyamfo ǝtsyǝ bǝ idu mɔmɔ ɛntɔɔ, bákpo betidi ba diyifo bani ku Bonamute fɛ békpe atsyɔ!” Nya Lɛwɔnɔ nǝmǝ léfo lǝ nnya ǝsuǝ nkǝ, “Ee, bootsyǝ ɔnwɛ lǝ mǝ nyifo ǝsuǝ. Nya boonyǝ mǝ kayofofo.”

Kawunsiǝ Eto Bɛkuɛnke Eto Lefodife Eboyo.

14Nnya kamaa, nnyǝ asɔmiloku flubia ǝtsyuǝ, nnya ǝsuǝ lele utidi eto ditsyǝbi nsi. Úti sika eto lekankpakpa lǝ disi nya ɔnlɛ sɛyikpɛbe sia nkpe kobe lǝ kɔni. 15Mfó nya ɔtɔnkpe bamba utsyuǝ lɛbɔ utsyi lǝ Disumuyo nǝmǝ kafo nya ófã bembembe ótsyese nwǝ nsi lǝ asɔmiloku nyamǝ ǝsuǝ ɔ́tɛyi nkǝ, “Bike biamǝ lefodife éboyo, nyaso fi fǝ sɛyikpɛbe lǝ afodi bidike biamǝ itsyise kasɔ eto bidike biamǝ eboyo lefodife!” 16Nya nwǝ nsi lǝ lɛsɔmiloku nǝmǝ ǝsuǝ lɛwunya wǝ sɛyikpɛbe siamǝ ofia nya ófodi kawunsiɛ eto bɛkuɛnke biamǝ kenke.

17Nnya kama, nnyǝ Onanto eto ɔtɔnkpe bamba wǝ lɛbɔ utsyi Onanto eto kedikǝtǝkɔ, nya wǝ tsya nlɛ sɛyikpɛbe sia nkpe kobe.

18Nya Onanto eto ɔtɔnkpe bamba tsya wǝ nsi lǝ ute eto kɛnyɛ, lɛbɔ utsyi kedikǝtǝkɔ eto leba mfó úbǝ. Ɔtɔnkpe ǝmfo áfã ku ɔkɔɛ bembembe ɔ́tɛyi ɔtɔnkpe wǝ nlɛ sɛyikpɛbe nkǝ, “Fi fǝ sɛyikpɛbe sia nkpe kobe lǝ alɛ nte eto eyibibi nnya nkpe lǝ kawunsiǝ eto ɔkpɔ ǝmǝ kafo, itsyise eyibibi nyamǝ ebobe itǝ bɔlɛ.”

19Nyaso Onanto eto ɔtɔnkpe ǝmǝ awunya wǝ sɛyikpɛbe siamǝ ofia nya ɔlɛ ebibi nyamǝ lǝ kawunsiǝ kenke ókpo lǝ kaka bǝǝkǝ eyibibi eto ntu kakpo ka ni Onanto eto lɛblɔfi kplɛ nǝmǝ ǝsuǝ. 20Nya béké eyibibi nyamǝ lǝ kaka ǝsuǝ beeke eyibibi eto ntu kakpo ǝmǝ lǝ umǝmflɔ, nya kɔtɔ lɛbɔ kɔ́bɔdi fe esunkpo lofa ǝnu sɔ̃ɔ̃ lǝ dikulǝbi ǝsuǝ nya kotsyo tsya fe akpa anɔ.

Currently Selected:

KƎLƎKƎ KATE 14: LIP

Highlight

Copy

Compare