EFESOFƆ 2

Onanto Dítǝ Nkǝ Binyǝ Nkpe Ɛyɛ Lǝ Kristo Ǝsuǝ.

1Kɔɔ se béta bibu nya bíyifo lebua itsyi lǝ mi koto mentsyuǝmentsyue ǝsuǝ esoo, bíyifo fe betidi ba díkpe lǝ lɛwɔnɔ ǝsuǝ. 2Lefe nǝmfóo, bísiǝ nkpǝ fe kawunsiǝ bua kamfo eto nkpǝsiǝsiǝ seka. Bítǝkǝko ǝsuǝale nnya nlɛ difule kato eto seka budi eto kama. Wǝ ni lɛwɔnɔ nǝ nlɛ keyifo mɔmɔ lǝ mba lɛni bǝ bembutsyue Onanto koto. 3Lǝ sitintii, bomblɛ kenke ǝtsyǝ fe mǝ nya búsiǝ nkpǝ lǝ bo alasa ǝsuǝ, lǝ kase ińyǝ itǝ bo ǝsuǝ eto sinǝ ku nsusu seka. Ditsyǝbi nǝmfo lɛkɛ lǝ bo eso Onanto dínyǝ ɔblɔ ókpe bo, fe kase únyǝ ókpe kawunsiǝ eto betidi kenke, únǝ mǝ koto nɛ. 4Fɛɛ se Onanto eto kaminsǝnyǝnyǝ itǝ bo mfui nya kasekɔ lǝmbǝ lǝ lelabi kplɛ nǝ onkpe utǝ bo esoo, 5se búkpǝ lǝ lɛwɔnɔ ǝsuǝ lǝ bo abua yifoyifo esoo, útǝ busikli búbǝ nkpǝ ku Kristo. Nya ɛyɛ lǝ Onanto eto lefonǝ ǝsuǝǝ, búnyǝ bofokǝtǝ nɛ. 6Se buyifo bani ku Kristo Yesu esoo, ótakasǝ bo úńyǝnsǝ ku wǝ, nya útǝ buudi seka ku Kristo lǝ kato. 7Onanto éyifo nyamfo nkǝ lǝ ufi ote mba luubǝ kama kenke wǝ lefonǝ nǝ lǝmbǝ bokatesǝko ku kulesa saa ku wǝ kafoɛkpɛ lǝ kase únyǝ bo kaminsǝ lǝ Kristo Yesu eso. 8-9Itsyise ɛyɛ lǝ Onanto eto lefonǝ eso bínyǝ bofokǝtǝ, se béfo wǝ bɛnɔ eso. Nya inni lǝ mi kosate eto kulesa saa eto buyifo eso. Bomu iyifo Onanto eto ǝtǝsa nnya úfi útǝ bǝ lǝ kuutsyuǝ saa lǝ ɔyɛ ǝsuǝ kato bobesǝ lǝ nnya ǝsuǝ. 10Onanto díyifo bo ku wǝ kosate eto ani nkǝ lǝ buyifo bani ku Kristo Yesu nkǝ lǝ busiǝ kasɛɛ yifoyifo eto nkpǝ bo wǝ kosate lɛlɔ utsyǝ nkǝ bubǝ busiǝ.

Kristo Éfi Betidi Kenke Ɔ́kɔ Beyifo Bani.

11Bekloma biǝ bíambɔ bitsyi lǝ Yudafɔ ǝsuǝ, bomu bále mi fe betidi ba lenyi Onanto. Yudafɔ eyifo mba laala alo, nya baaka mi bafɛfɛ bǝ betidi laanla alo. Fɛɛ sitintii, mba laala alo eeyifo ǝsuǝ eto sinǝ eto lekpa nǝ betidi leefi ani keeyifo. 12Bekloma biǝ lǝ lefe nǝmfóo, bínyǝ kɔsɛsɛ lǝ Kristo ɔflɔ nya bíyifo bafɔ nya bíenyifo Onanto eto betidi ba úlǝkǝ fe kase Yudafɔ. Nya bíankɛ lǝ kɛnyɛ ka Onanto lékle ku wǝ betidi ku asa nnya eto kɛnyɛ útsyǝ ku mǝ. Nya isi enso ni bǝ kusubebe kukutsyuǝ saa mankɛ mi itǝ kulesa nya Onanto saa tsya mankɛ mi. 13Fɛɛ mɔmɔɔ, ɛyɛ lǝ Kristo eto ukpǝ wǝ úkpǝ lǝ disi ǝsuǝǝ, bóokpa mi mba díńyǝ kɔsɛsɛ kɔ tsya bíbǝ bíyifo bani ku Kristo Yesu.

14Itsyise Kristo kosate léboko diyuǝ lǝ bo nti lǝ lefe nǝ eto lefe únǝ lɔniyifoyifo óboko Yudafɔ ku mba lenni Yudafɔ nti. Nya úfi wǝ ǝsuǝ óba kekisi ka nte fe ofati wǝ lɛkɛ lǝ mi nti úlǝkǝ. 15Úlǝkǝ Yudafɔ eto kɔfi ku mǝ akpayifoyifo lenti ɛyɛ lǝ mǝ nkpǝ bo úsiǝ lǝ ǝsuǝ eto sinǝ ǝsuǝ bǝ lǝ ɔkɔ akpa ǝnuǝ nyamǝ beyifo mǝ utidi fɔfɔ ɔni bǝ lǝ beyifo bani ku wǝ, itǝ lǝ diyuǝ lǝ dibǝ lǝ mǝ nti. 16Ɛyɛ lǝ Kristo eto ukpǝ wǝ úkpe lǝ uyikabie ǝsuǝǝ, ókpla kǝdiǝ ka lɛkɛ lǝ akpa ǝnuǝ nyamǝ eto nti. Nya ɛyɛ lǝ ukpǝ ǝmǝ ǝsuǝǝ, ótsyasǝ betidi akpa ǝnuǝ bamǝ eto nti béyifo utidi ɔni nya úyifo mǝ bani ku Onanto. 17Nyaso se Kristo díbǝǝ, óbe diyuǝ eto Ditiki Sɛɛ letsya útǝ mi betidi ba letsyonko Onanto ku bomba lɛfi wǝ. 18Ɛyɛ lǝ Kristo ǝsuǝ nnya bo akpa ǝnuǝ nyamǝ kenke, Yudafɔ ku mba lenni Yudafɔ ɛyɛ lǝ Lɛwɔnɔ Kɛnkɛ ǝsuǝǝ, bofo buńyǝ lǝ Anto Onanto eto ǝnǝmi.

19Nyaso mimba lenni Yudafɔ ensini bafɔ ku bayɛkusutidi bio. Biyifo betidi bani ku mba ni Onanto eto bebi, ku bǝmǝmbi lǝ wǝ diyo eto betidi nti. 20Mi tsya eyifo fe ofati wǝ báto bǝtǝkǝ kekleke lǝ ketsyikokɔ eto leba nǝ batɔnkpe ku bǝnyɛlǝkǝtidi lékpe lǝ kasɔ nya Kristo Yesu kosate ni oseke ǝmǝ. 21Wǝ ni utidi wǝ lɛkɔbe diyo nǝ báto bǝtǝkǝ mfó eto akpa nnya kenke ɔkɔ, nya útǝ léfiani Onanto eto kedikǝtǝkɔ kɛnkɛ. 22Nya lǝ mi lɔniyifoyifo ku wǝǝ, balɛ mi tsya booto fe diyo kakɔ ku mi bǝtsyuǝ bǝ lǝ befiani kǝsiǝkɔ itǝ Onanto ɛyɛ lǝ wǝ Lɛwɔnɔ nǝmǝ ǝsuǝ.

Currently Selected:

EFESOFƆ 2: LIP

Highlight

Copy

Compare