1 KORINTOFƆ 4

Boeyifo Kristo Eto Keyifo Lǝ Ɔnukualɛ Ǝsuǝ.

1Utsyuǝ saa kǝǝnyǝ bo fe Kristo eto beyifoyifo ba béfi Onanto eto etiki kulakula lǝ lefe nǝ léfe mmǝǝ, bákpe kɔni bǝ bɔlɛ nya ola. 2Nya lesa nǝ lefé itǝ nwǝ laabe Boanto Onanto eto asa ǝsuǝ ni bǝ úyifo keyifo kamǝ lǝ ɔnukualɛ ǝsuǝ. 3Lǝ mɔ kutsyee, yǝnlǝ mɛ bǝ kuutsyuǝ kponko mɛ lekpo lǝ mɔ ditiki ǝsuǝ nye ɛyɛ lǝ kawunsiǝ kamfo eto kobe ǝsuǝ unyǝ nkǝ nta mbu. Maankponko mɔ ǝsuǝ lekpo kulaa tsya lǝ ditiki nǝmǝ ǝsuǝ. 4Mɔ lɛkɔɛsi anlo mɛ dikpi saa. Fɛɛ nyamfo anlɛ bote nkǝ meenyifo kabua saa, eso mbɔbɔ mfe lǝ kabua ku lǝ mɔ etikididi kemiǝ. Itsyisee, Bonamute wǝ loofo mɛ lekpo bokponko nɛ. 5Nyaso yanle bǝ kuutsyuǝ saa kponko wǝ utsyuǝ lekpo isu ese lefe nǝ Bonamute Yesu eto dibǝfe nǝmǝ leyo. Lǝ ubǝǝ, wǝ ni futsyǝ lookponko utsyuǝ saa lekpo nɛ. Nya wǝ ni nwǝ luulǝkǝ asa bua kenke nnya lɛkula lǝ lekple ote nya wuulǝkǝ asa bua nya betidi nlɛ bubu tsya ote. Mfo nya Onanto lɔɔtɛsǝ utidi saa dińyǝ itǝ atɛsǝ.

6Mɔ bayimi, bǝ lǝ befo asa nnya bɔnlɛ bɔtɛyi ɛyɛ lǝ mɔ ku Apolo ǝsuǝ kasɔ bɔnɔɔ, nwɔni nyamfo bǝ lǝ bebe bekase. Nya lǝ bekase asa nnya eto kasɔ etiki nyamfo nlɛ bulǝkǝ kate nya báwɔni bátɛyi bǝnkǝ, “Bikeyifo asa bikayɛ lǝ kusu ǝsuǝ tlolololo.” Lǝ nyamfo esoo, biembu betidi bǝtsyuǝ bakplǝnyǝ beso babamba. 7Owoe díyifo fǝ nya fankpǝ kutǝkǝ fanso fuutsyuǝ? Asa nnya nkpǝ fǝ kenkee, Onanto ni nwǝ dífi útǝ fǝ. Lǝ nko intee, beso faabesǝ ǝsuǝ kato fenkǝ inni Onanto ni wǝ dítǝ fǝ asa nnya nte fǝ.

8Lee asa nnya bela biǝ biakɛɛ, bíuńyǝ nyamblɛ kokoo? Nye batabinyǝ bíkafiani? Lee bíofiani baka lǝ lefe nǝ eto lefe bo lenni tɔ baka? Ɛlɛkɛ! Eni seka ele bǝnkǝ bikedi pɛfɛ bǝ lǝ bo tsya lǝ budi se ku mi! 9Itsyise ele mɛ fenkǝ bo mba ni batɔnkpee, kesiǝkɔ ka Onanto dífi utǝ bo ni kafɛfɛkɔ. Nya buyifo fe betidi ba bálo dikpi bǝ lǝ balo mǝ lǝ mba kenke eto ǝnǝmi. Nya buyifo abesa nnya kawunsiǝ kenke ku Onanto eto batɔnkpǝ ńyǝ baanlɛ bobe. 10Buyifo bamumu lǝ Kristo eso. Fɛɛ mi eyifo babesibe se biyifo bani ku Kristo eso! Bo eyifo betidi ba lɛyɔkpɔ eso bumbǝ ale. Fɛɛ mii, biyifo mba nkpe ale. Buyifo betidi bimba lǝ betidi eto ǝnǝmi. Fɛɛ mii, bekpe dibu. 11Ibǝ ese mɔmɔɔ, boǝsiǝ kukpɛnsǝ ku utukuɛ. Nya bikǝ kpãã saa ǝmbǝ bo boalɛ. Nya betidi laablɛ bo. Nya bumbǝ kakɛkɔ saa boǝsiǝ. 12Nya boeyifo keyifo kekleke kabe bo ǝsuǝ. Lǝ betidi ékudi boo, boo, boakpo mǝ atsyɔ. Lǝ ibǝ bǝ bǝǝtǝkǝko bo lǝ bate bo ohiãa, bo boakpe nkɛale. 13Lǝ báka bo, boefi kafo buɛɛ eto etiki kǝtǝ mǝ mbuayɛ. Betidi ǝǝnyǝ bo fe kuku. Buyifo kawunsiǝ kamfo eto kuku ku ekubi ibǝ ǝsǝ mɔmɔ.

14Minlɛ mi kukue komfo eto okle bɔwɔni bǝ lǝ mfi nkpe mi kofani. Bomu bǝ lǝ nlɛ mi kɔlɛ fe mɔ bebi lala seka. 15Itsyise lǝ ite bǝ bekpe betidi akpi lefosi ba laalɛ mi ola kulaa tsya lǝ mi bofokanɔ eto nkpǝ bo binsi ǝsuǝǝ, bimbǝ antomǝ kpǝ. Itsyise fe kase binsi nkpǝ nya biyifo lɔni ku Kristo esoo, mɔ ni mi anto, se mɔ ni Ditiki Sɛɛ nǝmǝ boboko mi eso.

16Lǝ nya esoo, nlɛ mi lekpakpa miǝ lǝ bitǝkǝko mɔ ditsyǝbi kama. 17Nyamfo ǝsuǝ eso minlɛ Timoteo botsyese mi nɛ. Uyifo mɔ ubi lala wǝ leeyifo Bonamute Yesu eto keyifo lǝ kusu ǝsuǝ. Wuubǝ oklomasǝ mi kase mǝǝsiǝ nkpǝ fe Kristo eto nle bo eto kusu mǝǝtǝkǝko. Nya nyamfo maate bafokanɔfɔ kenke kaka kee minsu.

18Mi nti eto bǝtsyuǝ átaka bǝńyǝ abesǝ mǝ ǝsuǝ kato eso mǝ bǝtsyuǝ fɛfɛ, itsyise bébu bǝnkǝ, mensi embusinkli mbǝ mi ɔflɔ. 19Nya lǝ Bonamute Yesu átɔnɔɔ, muubǝ nyǝ mi lǝ lefe kliminti ǝsuǝ. Nya mɔ kosate muubǝnyǝ ǝsuale nnya betidi ba laabesǝ ǝsuǝ kato nkpe, nya moobe lǝ inni etiki bimba banlɛ budii. 20Itsyise Onanto eto sekadidi aanyɛ ku etiki bimba budi. Bomu yaayɛ ku ǝsuǝale. 21Bela biǝ mbǝ mi ɔflɔ lǝ mbǝ nnǝ mi kato lee, lee mbǝ mi ɔflɔ lǝ lelabi ku diyuǝ ǝsuǝǝ?

Currently Selected:

1 KORINTOFƆ 4: LIP

Highlight

Copy

Compare