Kɔn dɛ̀bɛ́ Zhã nɔ mɔ́ 2

Efɛɛzɛ Kristə-lyì gùlú w sɛ́bɛ́ rɛ́

1“Kɛ̃ sɛ́bɛ́ ń pə Efɛɛzɛ Kristə-lyì gùlú w màlɛ́ka y nɛ, ń byili bə̀ mɔ̀bɔ́ cã̀mə́sɔ̌sɛ́ shàlpyɛ̀ y ŋwɛ́nɛ́ ń jə̀jĩ́ y w n jà ń nə́ ń zhə̀l sánə́má pàntámsɛ́ cəcəl w mó wòwə̀:

2‘À yě ǹ gə́ nə́ ǹ twĩ̀ ní mú gakó. À yě ǹ gə́ nə́ ǹ nwɛ̀nɛ̀ nɛ́ mɔ́, ǹdə́ ǹ gə́ nə́ ǹ pyɛ́nɛ́ ǹ cìn ní mú gakó; à yě bə̀ ǹmyɛ́ ǹdə́ lyì-bəlwâlsɛ́ wàr dwã nɛ́ yé. Jàlà nʼê wə̀l bə̀ bə̀myɛ́ wɔ́ à tùntúmə́ sə ǹ dwẽ́ be n nə bə̀ kùrə̀ né, ń pwírí wɔ́ kɔma bə̀ nʼê gòmə̀. 3Ǹ nə́ ǹ pyɛ́nɛ́ ǹ cìnə̀, ǹ nə́ ǹ nwɛ̀nɛ̀ àmyɛ́ yilə, sə ǹ tá ǹ gɛ ǹ wu yé. 4Sə kɔn rə̀dù ŋwɛ́nɛ́ à la mɔ́ búlə́ ju rə̀ yilə: ǹ kə́ ǹ bə nɛ só èlâsɛ̃´ ǹdə ǹ gə́ yà ǹ ju kùr né yé. 5Ká lyǐrh ǹ gə́ yà ǹ ju kùr né mó. Ǹ yà ǹ ju kùr náàcɛ̀nɛ́, sə ǹ ká tu tɛ̃´. Pyìrhí ǹ wu, ń wɛ̀rhɛ́ ǹdə ǹ gə́ yà ǹ ju kùr ǹ nə́ ǹ wɛ̀rhɛ́ nɛ́. È gə də̀ rə̀myɛ́, à bʼa bə̀ a kwè ǹ pàntɛ́mɛ́ y è jàà y wa. 6E jà ǹdə́ rə̀myɛ́ ga, ǹ nə́ ǹ wɛ̀rhɛ́ kɔn rə̀dù rə̀ càn. Ǹ zhɔ̃̀ Nəkwala lyì bí tùntùm-bəlwâlsɛ́ ǹdə àmyɛ gə́ zhɔ̃̀ sɛ̀ nɛ́.

7‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!

‘Lò mɔ̀bɔ́ ǹ la bɛlɛ jú mú, à bʼa pɔ̃́ sɔ́má ń jí nyǔ cǒ w ò ŋwɛ́nɛ́ Yi bɔ́ɔ́ w wẽ́ mó byâ bɛ́.’

Səmyirni Kristə-lyì gùlú w sɛ́bɛ́ rɛ́

8“Kɛ̃ sɛ́bɛ́ ń pə Səmyirni Kristə-lyì gùlú w màlɛ́ka y nɛ, ń byili bə̀ mɔ̀bɔ́ ń wɔ́ kùr-jirə́ ǹdə́ yó-gurə́ ga, n jà ń yà ń cùwə̀, sə ń ká n bwìrhì mú wòwə̀:

9‘À yě ǹ nɔ̀nɔ̀ w ǹdə́ ǹ nə̀mɔ̀ɔ̀rɛ́ yò, ń jà ń wɔ́ nə̀cɛ̀m-bal. À yě bə̀ lyì jàlà nʼê zhìlì ǹ yilə. Bə̀ nʼê wə̀l bə̀ bə̀myɛ́ wɔ́ Zhwifubá, e jʼà wɔ́ kɔma. Lyì bí bə̀myɛ́ wɔ́ Shətana gùlú w lyì. 10Bə̀ká dùr ywẽ nɔ̀nɔ̀ w kɔ̀bɔ́ ǹ la nɔ mɔ́ yil yé. Nyǐnə Shətana bʼa ce á lyì jàlà byə̀nə́-jù wə̀, è la mʼe dwẽ́ ába, sə á bʼâ nwɛ̀nɛ̀ dwã shíyə́. Cə̀ə̀lè ń zhì nà èdù yó kɔn mʼe yí ǹ cu, sə́ yẽ̌ bʼà mʼa pɔ̃́ nyǔ mə̀ tʼâ la zhɔ̌ mə yə̀ ǹ kwândɛ.

11‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!

‘Cu mú twər rə̀lyè nyân mɔ́ wàr kaka mə̀ la mɔ̀bɔ́ ń la bɛlɛ jú mú ni wɔ̀rhɔ́ yé.’

Pɛrgamɛ Kristə-lyì gùlú w sɛ́bɛ́ rɛ́

12“Kɛ̃ sɛ́bɛ́ ń pə Pɛrgamɛ Kristə-lyì gùlú w màlɛ́ka y nɛ, ń byili bə̀ mɔ̀bɔ́ ń zhe búlə́ shù w ò yésé ga zhe nyí mú wòwə̀:

13‘À yě ǹ gə́ ŋwɛ́nɛ́ mə̀gã̌. Wɔ́ Shətana è cǐ gàà mɔ́. Ǹdə́ bə̀ gu à zhə̀n-cínnə Antəpaasɛ á sõ, Shətana y gə́ ŋwɛ́nɛ́ mə̀gã̌ mɔ́ ga, ǹ zhì ǹ nà y yó ń zhí ni. 14Sə kɔn rə̀dù ŋwɛ́nɛ́ à la mɔ́ búlə́ ju rə̀ yilə: lyì jàlà ŋwɛ́nɛ́ ǹ sõ bə̀ zù Balaamɛ, e jà wɔ́ ńmyɛ̌ ń yà ń wò Balakɛ nɛ bə̀ ń swèlè Esərayɛl lyì bí bə dɔ̃̀ vwàmá nyɛ̀bɛ́ bə̀ zwə́l wẽ̀ tɛ̀bɛ́ rə̀ də̀ Yi yó nàmá, sə bə zù fwə̂l tumə wẽ́. 15Lyì dwã myɛ ŋwɛ́nɛ́ ǹ sõ bə̀ nʼê tó Nəkwala lyì bí kàrmɔ́. 16Pyìrhí ǹ wu, sə́ yẽ̌ tùntwə̃̀ə̃̀ né nə̀myɛ́ nɛ. È gə də̀ rə̀myɛ́, kɔn gə yàl námpɔ́lɛ́ à mʼa bə̀ ǹ sõ, sə à bʼa zə búlə́ shù w ò nʼô dwi à nyú w mú a bú ǹdə́ lyì bí bə̀myɛ́ mɔ́.

17‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!

‘Lò mɔ̀bɔ́ ǹ la bɛlɛ jú mú, à bʼa pɔ̃́ mã́nɛ è shèè,#2.17 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili mã́nɛ gə́ yʼà wɔ́ kɔn ná-dwí yil gàà mɔ́. sə à bʼa pɔ̃́ nə́kul-põ, yil nándùl kɛ̃ ò yó, sə lò lò tá ń la yil lé rə̀myɛ́ lwar, è gə də̀ ǹmyɛ́ mɔ̀bɔ́ à la mɔ́ nə́kulu w pɔ mɔ́ dúdú.’

Tiyətiiri Kristə-lyì gùlú w sɛ́bɛ́ rɛ́

18“Kɛ̃ sɛ́bɛ́ ń pə Tiyətiiri Kristə-lyì gùlú w màlɛ́ka y nɛ, ń byili bə̀ Yi Byǐ mú ń yírhə́ né nʼê jə́jɛ̀mɛ́ ǹdə myǐn ta, ń nèsé jɛ̀ ǹdə wɔ́ lù bə̀ mʼe wɛ̀rhɛ́ sɛ nɛ mɔ́ wòwə̀:

19‘À yě kɔn dɛ̀bɛ́ gakó ǹ nə́ ǹ wɛ̀rhɛ́ mɔ́. À yě ǹ gə́ só ǹ dwã bɛ́ nɛ́; à yě ǹ gə́ zhí Yi ni ní; à yě ǹ tùm-ècɛ̀nà nɛ́ yò; à yě ǹ gə́ nə́ ǹ pyɛ́nɛ́ ǹ cìn ní; à yě bə̀ ǹ nə́ ǹ twĩ̀ dɛ̃´dɛ̃´ èlâsɛ̃´ du ǹ gə́ ju kùr ǹ yà ǹ nə́ ǹ twĩ̀ ní. 20Sə kɔn rə̀dù ŋwɛ́nɛ́ à la mɔ́ búlə́ ju rə̀ yilə: ǹ yẽ̌ Zhəzabyəə ne ń nə́ ń twĩ̀. Kɛ̃ mɔ́ ńmyɛ̌ mɔ́ zhe bə̀ ńmyɛ̌ wɔ́ Yi nyì-zwennə, ń nə́ ń yǔr à tùntùnnə̀ bé bə yẽ̌ Yi ni, bə zù fwə̂l tumə wẽ́, sə bə dɔ̀m vwàmá nyɛ̀bɛ́ bə̀ zwə́l wẽ̀ tɛ̀bɛ́ rə̀ də̀ Yi yó nàmá. 21À yʼà yẽ̌ mo mùnì ga n zhɛ́rhɛ́ ń tùntwə̃̀ə̃̀ né, sə n lwə̀l sǔbri ń fwə̂l mó yilə, sə ń tá ń yâl n lwə̀l sǔbri yé. 22Nyǐnə à bʼa ce n tu címí, n nwɛ̀nɛ̀ dɛ̃´dɛ̃´, ńmyɛ̌ ǹdə́ byɛ̀bɛ́ bə̀ nʼê fwə̂l ǹdə́ mɔ mɔ́ ga. Rə̀myɛ́ wɔ́ bə̀ gə yẽ̌ bə̀ tùntwə̃̀ə̃̀ né nyɛ̀bɛ́ bə̀ nʼê twĩ̀ ǹdə́ mɔ mɔ́ nɛ fòró a yẽ̌ be. 23À bʼa gu ń bə̀sɔ́ná bɛ́. Rə̀myɛ́ yi ní, Kristə-lyì gùúlí bʼa lwar bʼà yě numbyínsí wun bùlə̀ né ǹdə́ sə̀ shilə né. À mʼa kwɛ̃̌ á mə̀dù mə̀dù gakó kɔn mɛrhɛ ǹdə́ ń tùntwə̃̀ə̃̀ né.

24‘Sə è gə wɔ́ ámyɛ̌ Kristə-lyì bí byɛ̀bɛ́ á dàl Tiyətiiri ní, á zhɔ̃̀ lyì bí bə̀myɛ́ còrhò mó, á jʼâ yə̀ pyà sʼá lwar ywẽ̀ né nyɛ̀bɛ́ bə̀ nʼê byẽ̀ bə̀ Shətana ywẽ̀ né nə̀ shèè mó mó yilə, cilinə: à tʼâ la ába zhĩĩ dõ zhũ yé. 25Jʼá zə kɔn dɛ́ dɛ̀bɛ́ á cèrhè mó kẽkẽ á mʼá dɛ̃̀ à twírí yə́. 26-27Lò mɔ̀bɔ́ ǹ la tũ̌ àmyɛ́ yil kɔn mʼe yí cə-kɔ́lɛ́ y mɔ́, wɔ́ ǹmyɛ́ ǹ bʼâ jí bɛlɛ. À mʼa pɔ̃́ ŋwɔ̀nɔ́ ǹdə à Da gə́ pɔ àmyɛ ŋwɔ̀nɔ́ nɛ́ ń cìní tənə̀rh, ń kál sə̀ lyì bí ǹdə́ jàn nánkùlù. È bʼa yə̀ ǹdə bə̀ gə́ yʼa lo dɔ nə́kwánsɛ nɛ́. 28Sə à bʼa pɔ̃́ nəkɔkɔ́lɛ́ nə̀ŋwɔ wá.

29‘Lò mɔ̀bɔ́ ǹ zhe zhã̌, sə́ cili kɔn dɛ́ dɛ̀bɛ́ Eshirhə náàcɛ̀nɛ́ nʼê byili Kristə-lyì gùúlí ni mú!’

Currently Selected:

Kɔn dɛ̀bɛ́ Zhã nɔ mɔ́ 2: lee

Highlight

Copy

Compare