Kɔn dɛ̀bɛ́ Zhã nɔ mɔ́ 14

Pyì-bwɛ̀lɛ́ y lyì bí nʼê nún nwə̃́ nándwə̃̀ bə̀ mʼê cèrhé Yi

1A zɛ̃̀ à kʼâ la nyǔ, a pwírí Pyì-bwɛ̀lɛ́ y è zhǐ Səyɔ̃ pyɔ̀ w yó.#14.1 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili Səyɔ̃ kùr gə́ nʼê yâl e wɔ̀ nɛ́ gàà mɔ́. Lyì mɔ̀ɔ̀rhɛ̀ zɔ̌m ǹdə́ shə́-èna ǹdə́ rə̀na (144.000) tó y bə̀ zhǐ. Sə èmyɛ́ ǹdə́ è Da ga yilə né yʼà kɛ̃ bə̀ cílə́ né ne. 2A zɛ̃̀ a nyɛ̀ɛ̀ cəl rə̀ shí dɛ̃̌ yi wə, ǹdə wɔ́ nə̀-fɔ̀lɔ̀ nɛ̃̌ mə̀ nʼê dom, ráá dwà è bya dɛ̃´dɛ̃´ ta, rə jʼà nyɛ̌ ǹdə wɔ́ dàkɔ̌ndɛ rə̀ cìnə́ nʼê dwí ta. 3Lyì bí bə̀myɛ́ nánjə̀jóló w zɛ̃̀ bə̀ nʼê nún nwə̃́ nándwə̃̀ pyɛ̀lɛ̀ də̀gwã́ y ǹdə́ wò-nyùùrí rə̀na y ǹdə́ náncɛsɛ́ yé né. È gə də̀ lyì bí mɔ̀ɔ̀rhɛ̀ zɔ̌m ǹdə́ shə́-èna ǹdə́ rə̀na y (144.000) Yi vwârh cɛ yó mó dúdú, lò lò wàr nwə̃́ y èmyɛ́ ń la nún yé.

4Lyì bí bə̀myɛ́ mɔ́ wɔ́ lyì byɛ̀bɛ́ bə̀ zɔ bə̀ cìn náàcɛ̀nɛ́, bə̀ yə̀ kɛ̃ dwə̀rh gaga yé. Bə̀ nʼê tó Pyì-bwɛ̀lɛ́ y nɛ bə̀ zhə̀l è gə́ la mə̀gã̌ gakó. Yi vwârh bɛ cɛ yó, rə cĩ́ bə̀ dúdú rə̀ cìcì ǹdə́ Pyì-bwɛ̀lɛ́ y yilə. 5Kɔma də́-byǐ yə̀ bə̀ nyú w shí yé. Bə̀ bə yò zhe lò la byilu yé.

Màlɛ́kabá bə̀tɔ̀ bwə̀l bə byili bə̀ bùrsí kɔ́ yi yúwə́

6Rə̀myɛ́ kwã nɛ́, a nə màlɛ́ka dɛ̃̌ dɛ̃̌ yi wə. Wɔ́ yò-ècɔ̀nɔ̀ nyí tɛ̀bɛ́ rə̀ zhe kùr twéé twéé è yʼà zhe è la byilu. Sə wɔ́ lũ w tənə̀rh gakó lyì, dwə́ kùrə̀ gakó lyì, dwə́ zɔ̀mà dúdúmə́ dúdúmə́ lyì nì è la rɛ byilu. 7È yʼà nʼê bya dɛ̃´dɛ̃´ è zhe: “Nyámna Yi sʼá cèrhé re, bə̀ bùrsí kɔ́ yi yúwə́. Cèrhénə mɔ̀bɔ́ ń wɛ̀rhɛ́ dɛ̃̌ yi rí ǹdə́ cɛ y ǹdə́ nə̀-fɔ̀lɔ̀ w ǹdə́ nə̀-bùlsí mú.”

8Màlɛ́ka dõ pú, èmyɛ́ wɔ̀: “Babyəlɔnɛ wǔr, ò wǔr, òmyɛ́ nánfɔ̀lɔ̀ w ò yǔr lũ w cɛmɛ nɛ́ gakó lyì bí, bə tó bə nyɔ̀ ò sɛ̃´ mɔ́ mə̀ wɔ́ ò fwə̂l tumə mó.”#14.8 Gwɛ̃ bə̀ gə́ byili zɔ̀mà nɛ́ jàlà kùr mə̀gã̌ mɔ́. Bə̀ byili Babyəlɔnɛ kùr gə́ nʼê yâl e wɔ̀ nɛ́ gàà mɔ́.

9Màlɛ́ka dõ kʼe pú, èmyɛ́ bya e wɔ̀: “Lò mɔ̀bɔ́ ǹ cèrhé bǔ-ku w ǹdə́ ò nyɔrhɔ w bə̀ mɔ mɔ́, ń jà ǹ zhe ò myɔrhɔ ǹ cíl yó, ráá ǹ jɛ̃̀ nɛ̀, 10ǹmyɛ bʼâ nyɔ̀ Yi lyim sɛ̃´ mɔ́. Bə̀ yə̀ sɛ̃´ mɔ́ mə̀myɛ́ mɔ́ pùl ǹdə́ nɛ̃̌ yé. Yi ló mo rə̀ lyim dí kâ-zɔ̌m mɔ́ wa. Bə̀ mʼa zə myǐn mú ǹdə́ púrhú cə́m mó bə nwɛ̀nɛ̀ mɔ́ dɛ̃´dɛ̃´ Yi màlɛ́kabá ǹdə́ Pyì-bwɛ̀lɛ́ y yé né. 11Myǐn mú mə̀ nʼê nwɛ̀nɛ̀ bɛ̀ mɔ́ nyɛ̀ɛ̀sɛ́ nʼê dwi byinə nə̀ bə zhɔ̌ zhe yilə. Zhə̀nà, lò mɔ̀bɔ́ ǹ cèrhé bǔ-ku w ǹdə́ ò nyɔrhɔ w bə̀ mɔ mɔ́, ò yil lé myɔrhɔ w jʼà dɛ̃ ǹ yala nɛ, ǹ bʼâ nwɛ̀nɛ̀ cəcɛ̃ ǹdə́ nə̀nyɔ́nɔ́ ga, ǹ tá ǹ la shìrhə́ nɔ yé.”

12Rə̀myɛ́ ce, byɛ̀bɛ́ bə̀ wɔ́ Yi lyì, bə̀ nʼê zwẽ rə̀ nyə́ né, bə jʼa zhí Yezu ni mú mə̂ sə bə zə cìn-pyɔ́nɔ́.

13Rə̀myɛ́ kwã nɛ́, à nyɛ̀ɛ̀ cəl dɛ̃̌ yi w rə̀ wò nè: “Kɛ̃ ń wɔ̀: ‘Kɔn zhí èlâsɛ̃´, wu-nyɔ̃̀ cìnə́ wɔ́ lyì byɛ̀bɛ́ bə̀ cù ǹdə́ bə̀ zù Cinu mú.’ Eshirhə náàcɛ̀nɛ́ wòwə̀: ‘Zhə̀nà, bə̀ bʼa yẽ̌ bə̀ lyààrɛ́ nɛ bə shǐrh, sə bə̀ tùm-ècɛ̀nà nɛ́ tó be.’ ”

Lũ w jíjí rí jòró wə́

14À gwẽ̌ la nyǔ, a pwírí ébɔ̃ námpõ ò duwə, sə à nɔ lò ǹdə wɔ́ numbyíní ta è jě ò yó. È yʼà pú sánə́má pyɛ̀lɛ̀ yə́-pú, dã̀mə̀kɔ̀lɔ̀ ŋwɛ́nɛ́ è jɔ̃̀ wà, ò zhe nyí dɛ̃´dɛ̃´. 15Màlɛ́ka dõ shí Yi jì y wẽ́ e du, e bya e ce mɔ̀bɔ́ ń jě ébɔ̃ w yó mó ne e wɔ̀: “Zə ǹ dã̀mə̀kɔ̀lɔ̀ w ń jə̀r, bə̀ jòró w yi yúwə́. Lũ w jíjí rí byìl rə yí jə̂r.” 16Rə̀myɛ́ yó, mɔ̀bɔ́ ń jě ébɔ̃ w yó mó dul ń dã̀mə̀kɔ̀lɔ̀ w lũ w wẽ́, e jʼa yə̀ jòró lũ w púlə́púlə́ wẽ́.

17Màlɛ́ka dõ shí Yi jì y è ŋwɛ́nɛ́ dɛ̃̌ Arəzana w mɔ́ wẽ́ e du. Dã̀mə̀kɔ̀lɔ̀ ŋwɛ́nɛ́ èmyɛ jɔ̃̀ wà, ò zhe nyí dɛ̃´dɛ̃´.

18Màlɛ́ka dõ zɛ̃̀ e shí vwĩ̀-jìlú w səta. Wɔ́ èmyɛ́ è yʼà cǐ myǐn mú. E bya e ce kɛ̀bɛ́ è zhe dã̀mə̀kɔ̀lɔ̀ w ò zhe nyí mú ni e wɔ̀: “Zə ǹ dã̀mə̀kɔ̀lɔ̀ w ń kwẽ sɛ̃´-cǒ byâ bɛ́ lũ w wẽ́ mó pwəərhé, bə̀ rə̀ byìlə̀.” 19Màlɛ́ka y zhə̀n ga dul è dã̀mə̀kɔ̀lɔ̀ w lũ w wẽ́, e kwẽ sɛ̃´-cǒ byâ bɛ́, e ló Yi lyim dí kùlkṍ w nánfɔ̀lɔ̀ w bə̀ mʼê wɛ̀rhɛ́ sɛ̃´ mɔ́ mɔ́ wẽ́. 20Bə zə rɛ bə du cɔ w wa, bə nɔ̀ rɛ̀. Jal shí kùlkṍ w bə̀ mʼê wɛ̀rhɛ́ sɛ̃´ mɔ́ mɔ́ wẽ́ mə du mə dùr nə̀-gɔ̀lɔ̀ mə yí ǹdə coló zwã̌-àtɔ̀ ta, sə mə̀ lyìmə̀. Eshã gə zù mə̀ wẽ́, mə̀ bʼa yí è nyì-kwẽ́ ne.

Currently Selected:

Kɔn dɛ̀bɛ́ Zhã nɔ mɔ́ 14: lee

Highlight

Copy

Compare