2 Pyɛɛrɛ 1
1
Pyɛɛrɛ nə́ ń ce byɛ̀bɛ́ bə̀ zù Yezu Kristə mó
1Àmyɛ́ Shəmɔ-Pyɛɛrɛ, à wɔ́ Yezu Kristə tùntùnnə̀ ǹdə́ ń tùntúm, à nʼâ kɛ̃ sɛ́bɛ́ rɛ́ tɛ̀bɛ́. Yezu Kristə wɔ́ nə́ Yi ǹdə́ nə́ Zwennə. Ń wɔ́ wu-cángá cí. Wɔ́ rə̀myɛ́ yilə, ń ce ámyɛ zù mù ǹdə nə́myɛ̌ ta. Wɔ́ ámyɛ̌ nɛ à nʼâ kɛ̃ sɛ́bɛ́ rɛ́ tɛ̀bɛ́ à la pɔ. 2Yi ǹdə́ nə́ Cinu Yezu bʼa cĩ́ bwəl á yó, sə bə̀ yə̀-zùlə́ né jʼâ nʼê súlí á yó w twéé twéé, á gə́ yě bə̀ pár mɔ́ yilə!
Nə́ mə̂ sə nə́ ce nə́ tùntwə̃̀ə̃̀ né yí Yi pùbùlə̀
3Yi gə́ wɔ́ jàn cə́bal mɔ́ ce, rə̀ pɔ nə́ba kɔn dɛ̀bɛ́ gakó rə̀ bʼa ce nə́ zhì nə́ nà y yó nə́ zhí rə̀myɛ́ nɛ, sə nə́ zə myə̂l. Rə̀ ce nə́ lwar mɔ̀bɔ́ ń byẽ̀ nə́ba mùnì nə́ nə ń zùwə́ y ǹdə́ ń cɛ̀nɛ̀ rɛ́ mɔ́ gə́ wɔ́ nɛ́. 4Èta, Yi pɔ nə́ba rə̀ cɛ̀nɛ̀ pansɛ́ nánfwààlɛ́ rə̀ yʼà bwəl nə́ba sə̀ nyí mú. Wɔ́ cɛ̀nɛ̀ pansɛ́ sə̀myɛ́ mɔ́ dɛnnɛ á bʼâ tó né á yẽ̌ shilə námməlwâlsɛ́ sə̀ ŋwɛ́nɛ́ sə̀ nʼê zhìlì lyì bí yò lũ w wẽ́ mó ne, á wu yə̀ òdù ǹdə́ Yi cìcì.
5Rə̀myɛ́ ce, cenə jàn nɛ́ á twĩ̀ tùm-ècɛ̀nà á súlí á Yi-ni-zhú mú ni. Á gə nʼá twĩ̀ tùm-ècɛ̀nà, sʼá lwar Yi pùbùlə̀ né myɛ á súlí. 6Á gə lwar Yi pùbùlə̀ né, sʼá yə̀ cìn-zal cìnə́ myɛ á súlí. Á gə wɔ́ cìn-zal cìnə́, sʼá yə̀ cìn-pyɔ́nɔ́ cìnə́ myɛ á súlí. Á gə wɔ́ cìn-pyɔ́nɔ́ cìnə́, sʼá zhí Yi ni ǹdʼá wun gakó á súlí. 7Á gə zhí Yi ni ǹdʼá wun gakó, sʼá wɛ̀rhɛ́ cɛ̀nɛ̀ ǹdə́ dwã á súlí, sʼá swéné dwã. 8Á gə wɔ́ rə̀myɛ́ gakó cìnə́ kɔn yí, rə̀ bʼa pə ába yə̀wâl rə ce á kwɛrhɛ á lwar nə́ Cinu Yezu Kristə párá. 9Sə lò mɔ̀bɔ́ ǹ də̀ rə̀myɛ́ gakó cí, ǹ wɔ́ ǹdə lyìlyǒ ta, ǹ bə yé né nɛ yé. Ǹ kə́ ǹ yə̀l bə̀ bə̀ vùr ǹ shãã ga yə̀-bəlwàálɛ́ yé.
10Da-byâ, Yi cír ába, rə byẽ̀ ába. Rə̀myɛ́ ce, cenə jàn nɛ́ á zhì á nà y yó á shɛ̀ rə̀ byə̀l lé twéé twéé. Á gə nʼá wɛ̀rhɛ́ èta, á tʼá la tɛ̃´ tu gaga yé. 11Èta, á bʼâ nə sɔ́má á zù nə́ Cinu ǹdə́ nə́ Zwennə Yezu Kristə tənà y è ŋwɛ́nɛ́ byinə nə̀ bə zhɔ̌ zhe yil mó wẽ́ nàná.
Nə́ mə̂ sə nə́ zhì nə́ nà y yó zhə̀n dɛ́ bə̀ byili nə́ba mó wẽ́
12Wɔ́ rə̀myɛ́ è ce, ǹdʼá jɛ̀rɛ̀ á yě ywẽ̀ né nə̀myɛ́, á zhǐ á nà y yó zhə̀n dɛ́ bə̀ byili ába mó wẽ́ ga, à gwẽ̌ nʼâ lyǐrh ne ába twéé twéé. 13À nʼâ bùl bʼà gə́ gwẽ̌ ŋwɛ́nɛ́ lũ w wẽ́ mó, à mə̂ sʼa sɛ̃ ába á surhə né pul ywẽ̀ né nə̀myɛ́ shò-kwã nɛ́. 14Nə́ Cinu Yezu Kristə ce a lwar bʼà bwə́l zhǐr lũ w ò nʼô lyɛ̃ mɔ́ wẽ́. 15Sə à bʼa wɛ̀rhɛ́ à gə́ wɔ̌ nɛ́ gakó, mùnì ga, à gə tú à tɛ̀nɛ́ myɛ, sʼá bə̀kʼá swě ywẽ̀ né nə̀myɛ́ gaga yé.
16Nə́ gə́ byili ába nə́ Cinu Yezu Kristə jàn dɛ́ ǹdə́ ń twírí y yò mó, è də̀ səswalsɛ numbyíní tɛ́rɛ́ ǹdə́ è surhə nə́ mʼé byili ába yé. Nə́ cìcì yírhə́ nɔ ń zùwə́ yə́. 17Ń Da Yi wòwə̀: “Mɔ̀bɔ́ wɔ́ àmyɛ́ Byǐ, à só mo dɛ̃´dɛ̃´. Wɔ́ ńmyɛ̌ à cír.” Wɔ́ rə̀myɛ́ yi ní, Yi jàn-bə-swɛ̃´-zhe cə́bal mɔ́ pɔ mɔ pyɛ̀lɛ̀ ǹdə́ zùwə́ nánfɔ̀lɔ̀. 18Nə́ gə́ yʼâ tó mo nə́ ŋwɛ́nɛ́ pyɔ̀ w náàcɔ̀nɔ̀ w yó mó yi ní, wɔ́ rə̀myɛ́ yó cəl lé rə̀myɛ́ mɔ́ zhì dɛ̃̌ rə zɔ̀m, nə́ cìcì zhã̌ nyɛ̀ɛ̀.
19Wɔ́ rə̀myɛ́ è ce nə́ zwẽ Yi nyì-zwennə bé zɔ̀mà nɛ́ nə́ zhǐ kẽkẽ, tə́tɔ̀ná tɛ̀nɛ́ yé. Ámyɛ mə̂ sʼá cili ni náàcɛ̀nɛ́, bə̀ nə̀ wɔ́ ǹdə pàntɛ́mɛ́ è yə̂r cə-byín wẽ́ ta, kɔn la bʼe yí cə-lár, cə-lár nə̀ŋwɔ w du o yə̂r á wun ní. 20Sə kɔn du, lwarna bə̀ lò tɛ̀nɛ́ ń wɔ̌ Yi nyì-zwennə zɔ̀mà nɛ́ nə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó kùrə̀ ń la byilu ǹdə́ ń sə̀pwà jàn yé. 21Lò tɛ̀nɛ́ ń zɔ̀m nyì-zwennə zɔ̀mà ǹdə́ ń sə̀pwà pùbùlə̀ yé. Wɔ́ Eshirhə náàcɛ̀nɛ́ è ce lyì zɔ̀m zɔ̀mà nɛ́ nyɛ̀bɛ́ nə̀ shí Yi sõ mó.
Currently Selected:
2 Pyɛɛrɛ 1: lee
Highlight
Copy
Compare
Share
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.
