2 Kɔrɛ̃tɛ 9

1È gə wɔ́ pansɛ́ shɛ̀bɛ́ bə̀ nʼê ce dwã yó bə̀ la vò bə pə Yi lyì bí bə̀ ŋwɛ́nɛ́ Zhərəzalɛm nɛ́ mɔ́ yilə, kɔn də̀ nyɔ́ɔ́ bʼà kɛ̃ sɛ́bɛ́ a pə ába rə̀myɛ́ yil yé. 2À yě bʼâ nʼá yâl á pə zhə̀n zhə̀nà. Wɔ́ rə̀myɛ́ è ce à wu yàl nyɛ̀n a zɔ̀m á yò Masɛdwanɛ Kristə-lyì bí sono, a wɔ̀ bə̀ nyǐ Akəyi tənà y Kristə-lyì bí wɔ́ jẽ̀ nè ga bə̀ ju kùr bə̀ nʼê yâl bə pa. Á gə́ nʼá yâl á pə ǹdə́ á wun gakó mó nʼê ce yə̀wâl Kristə-lyì gùúlí lyì nánzhəzhɔ̌ wẽ́. 3Wɔ́ à gə́ jɛ̀rɛ̀ a zɔ̀m á yò mó è ce a twĩ̀ nə́ da-byâ bɛ́ á sõ, sʼá ce jàn nɛ́ á tɛnɛ, mùnì ga à gə́ zɔ̀m á yò a byili ní mú bə̀kʼa yə̀ kɔma yé. 4È gə də̀ rə̀myɛ́, Masɛdwanɛ Kristə-lyì bí gə tó ne bə tú á sõ, bə pwírí á yə̀ tɛnɛ á zhɛ̀, è mʼa yə̀ cìzhìl àmyɛ́ mɔ̀bɔ́ à zhe á zhə̀n mɔ́ ǹdə́ ámyɛ̌ cìcì mú ga yilə. 5Wɔ́ rə̀myɛ́ è ce, à pwírí kɔn mə̂ bʼà lwə̂l nə́ da-byâ bɛ́ bə tó yé bə bə̀ á sõ, mùnì á tɛnɛ pɛnɛ́ y á bwəl è nyí mú á cĩ́. Nə́ gə tú nə́ pwírí á tɛnɛ á zhɛ̀, nə́ mʼâ lwar bə̀ wɔ́ á pùbùlə̀ á mʼá pa, è də̀ lò ń nyɛ́ɛ́ ába yé.

Yi só lò mɔ̀bɔ́ ń nə́ ń pɛ ǹdə́ wu-nyɔ̃̀

6Kɔn rə̀dù ŋwɛ́nɛ́ á mə̂ sʼá lwar: lò mɔ̀bɔ́ ǹ dù námpɔ́lɛ́, wɔ́ námpɔ́lɛ́ ǹ yʼâ jə̀r; sə lò mɔ̀bɔ́ ǹ dù dɛ̃´dɛ̃´, wɔ́ dɛ̃´dɛ̃´ ǹ yʼâ jə̀r. 7Yi só lò mɔ̀bɔ́ ń nə́ ń pɛ ǹdə́ wu-nyɔ̃̀. Rə̀myɛ́ ce, kɔn dɛ̀bɛ́ lò gakó bùl ǹ wẽ́ ǹ la pɔ mɔ́, sə́ pa. Ǹ bə̀ká pə ǹdə́ wu-zhìlù ǹdə wɔ́ lò ń nə́ ń nyɛ́ɛ́ mɔ́ ta yé. 8Yi wɔ̌ rə̀ mʼa pə ába rə̀ pansɛ́ shɛ̀bɛ́ dwí gakó á zhe sə̀ tum mú sə yí ába dɛ̃ gakó sə dàl, á mʼá twĩ̀ tùm-ècɛ̀nà dwí gakó. 9Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:

“Ń nə́ ń pɛ ń kɔn nə̀mwà nɛ̀ ǹdə́ ń wu gakó;

ń tùm-ècɛ̀nà nɛ́ bə zhɔ̌ zhe yé.”

10Wɔ́ Yi rə̀ nʼê pɛ jíjí dwí vwàlnà nɛ̀ ń dwì; wɔ́ rə̀myɛ́ rə̀ nʼê pɛ nyí kùjú w myɛ. Rə̀ bʼa pə jíjí dwí ámyɛ nɛ á dù, rə ce rə lyĩ rə byì rə ce byâ nánzhəzhɔ̌. Á tùm-ècɛ̀nà nɛ́ myɛ bʼa ce byâ nánzhəzhɔ̌ èta. 11Yi mʼa tó rə̀myɛ́ dɛnnɛ rə ce á jǐrh nə̀cɛ̀nà kɔn gakó wẽ́, mùnì ga á ŋwɛ̀nɛ́ á nʼá pɛ ǹdʼá wun gakó. Èta, nə́ gə zhə̀l nə́ pɔ bɛ á jɛ̃̀-kɔn dɛ́, bə̀ nánzhəzhɔ̌ bʼa ce Yi nə̀bán á yilə. 12Pɛnɛ́ y èmyɛ́ mɔ́ wɔ́ Zhərəzalɛm Kristə-lyì bí ni á la mʼá sɛ̃, tɛ̀bɛ́ rə̀ mwìrì bi mú yilə. Kɔn súlí myɛ, bə̀ nánzhəzhɔ̌ bʼa tó èmyɛ́ dɛnnɛ myɛ bə ce Yi nə̀báná. 13Kɔn dɛ́ dɛ̀bɛ́ á la bɛ pɔ èta mɔ́ zhe kùr dɛ̃´dɛ̃´. Rə̀myɛ́ nʼê byili bʼâ zhí Kristə ne ǹdʼá wun gakó yò-ècɔ̀nɔ̀ nyí rí jàn yilə. Á nʼá tó rə̀myɛ́ dɛnnɛ myɛ á byili bʼâmyɛ̌ ǹdə́ Zhərəzalɛm Kristə-lyì bí nyí wɔ́ rə̀dù, e súlí Kristə-lyì bí dwã bɛ́ gakó. Á tum dí rə̀myɛ́ mʼa ce bə cèrhé Yi. 14Sə bə̀ mʼa lwə̀l Yi á yilə, mùnì ga á lwar bə̀ bə̀ wun ní ŋwɛ́nɛ́ ǹdʼába, yò-ècɔ̀nɔ̀ w nánfɔ̀lɔ̀ w kɔ̀bɔ́ Yi wɛ̀rhɛ́ ǹdʼába mɔ́ yilə. 15Yi nə còrhó, rə̀ pɛnɛ́ y nánfɔ̀lɔ̀ w è bə dõ zhe mó yilə!

Currently Selected:

2 Kɔrɛ̃tɛ 9: lee

Highlight

Copy

Compare