1 Pyɛɛrɛ 4

Nə́ tùntwə̃̀ə̃̀ né mə̂ sə nə yə̀ lyì byɛ̀bɛ́ bə̀ yě Yi pár tùntwə̃̀ə̃̀

1Kristə yàl numbyíní, n nwɛ̀nɛ̀. Rə̀myɛ́ ce, ámyɛ cenə jàn nɛ́ á kwè ń nà, sʼá lwar náàcɛ̀nɛ́ bə̀ numbyíní kɛ̀bɛ́ è nwɛ̀nɛ̀, rə̀-ná-cí du yə̀-bəlɔ̀lɔ́ wẽ́. 2Wɛ̀rhɛ́na Yi pùbùlə̀ dwã nɛ́ nyɛ̀bɛ́ nə̀ dàl á la wɔ̀rhɔ́ cɛ yó mó wẽ́, sʼá bə̀kʼá shɛ̀nɛ́ numbyíní shilə námməlwâlsɛ́ yò yé. 3Á yʼâ nʼá wɛ̀rhɛ́ ǹdə lyì byɛ̀bɛ́ bə̀ yə̀l Yi rí tɛ̀bɛ́ rə̀ wɔ́ zhə̀n mɔ́ pár ta dɛ̃´dɛ̃´ shãã ga; á tùntwə̃̀ə̃̀ né yʼà nyɛ̌ yààyàà, á yʼâ zhe bwɛ̃̌-dǔr, á yʼâ wɔ́ sə̀-nyɔ̀ɔ́rɛ, á nʼá jí dɛ̃´dɛ̃´, á nʼá nywɛ̀ dɛ̃´dɛ̃´, á jʼâ nʼá cèrhé wẽ̀ tɛ̀bɛ́ rə̀ də̀ Yi, e jà wɔ́ wẽ̀ dé rə̀myɛ́ còrhó mó rə̀ wɔ́ lwɛlɛ nánfɔ̀lɔ̀ wá. 4Sə èlâsɛ̃´, lyì bí byɛ̀bɛ́ bə̀ yə̀l Yi pár mɔ́ gə́ pwírí á kʼá tʼá tó be á twĩ̀ bə̀ tùntwə̃̀ə̃̀ né námməlwàálɛ́ mɔ́, rə̀myɛ́ jàr bɛ̀, bə zɛ̃̀ bə̀ nʼê tùrh ába. 5Sə Yi tɛnɛ rə̀ jě rə̀ la lyì-nyìrh ǹdə́ cùùrì bùrsì bǔr, bə̀ mʼa bʼe byili bə̀ gə́ twĩ̀ ní. 6Wɔ́ rə̀myɛ́ è ce, bə dámâ bə bwə̀l yò-ècɔ̀nɔ̀ nyí rí bə byili byɛ̀bɛ́ bə̀ cù mú ni. Yi kɔ́ bə̀myɛ bùrsì ǹdə rə̀ gə́ nʼê kɛ́ lò gakó bùrsì sə̀ tó ǹ tùntwə̃̀ə̃̀ né ne né. Bə̀ bwə̀l yò-ècɔ̀nɔ̀ nyí rí bə byili bi, mùnì ga bə wɛ̀rhɛ́ Yi pùbùlə̀ ǹdə́ Eshirhə náàcɛ̀nɛ́ jàn.

Nə́ mə̂ sə nə́ sɛ̃ dwã nɛ ǹdə́ pansɛ́ shɛ̀bɛ́ Yi pɔ nə́ba mɔ́

7Lũ zhɔ̌ bwəlse. Rə̀myɛ́ ce, pyâna surhə nyɛ̀bɛ́ nə̀ càn. Dɛ̃̌na á cìnə̀, mùnì ga á ŋwɛ̀nɛ́ á ce Yi. 8Sə kɔn du, swénénə dwã ǹdʼá wun gakó, bə̀ sónó nʼô vùr yə̀-bəlwàálɛ nánzhəzhɔ̌. 9Zwẽnə dwã zhəəle, sə ŋwɔ́ŋwɔ̌ bə̀kʼa yə̀ nɛ́ yé. 10Yálna tùntùnnə̀ nántwə̂rh, sə lò gakó zə pɛnɛ́ y kɛ̀bɛ́ Yi pɔ mɔ́ mɔ́, ń mə́ sɛ̃ ǹ dõ ne náàcɛ̀nɛ́. 11Lò mɔ̀bɔ́ ǹ zhe Yi zɔ̀mɛ̀ rɛ́ bwə̂l pɛnɛ́, ǹ mə̂ sə́ bwə̀l lè ń byili lyì bí ni; lò mɔ̀bɔ́ ǹ zhe lyì bí ni sãɔ̃ pɛnɛ́, ǹ mə̂ sə́ sɛ̃ bɛ ǹdə́ jàn dɛ́ tɛ̀bɛ́ rə̀ nʼê shí Yi sõ mó; mùnì ga Yi nə zùwə́ kɔn gakó wẽ́, Yezu Kristə jàn yilə. Wɔ́ rə̀myɛ́ rə̀ cǐ còrhó ǹdə́ jàn, byinə nə̀ bə zhɔ̌ zhe yilə! Amɛ̀n!

Bə̀ gə nʼê nwɛ̀nɛ̀ nə́ba myɛ, sə è bə̀kʼa yə̀ lwɛlɛ nə́ wɛ̀rhɛ́ yé

12À dɔwabá nántwə̂rh, á ŋwɛ́nɛ́ myìn-zhù wẽ́ á nʼá nwɛ̀nɛ̀, sʼá yě rə̀ nyí ni. Rə̀ də̀ kɔ̀-jàrmà yé. Nɔ̀nɔ̀ w òmyɛ́ mɔ́ bʼa ce lyì bí lwar á gə́ mə̂ nɛ́. 13Fǔnə ǹdə́ wu-nyɔ̃̀ á gə́ tó Kristə ne á nwɛ̀nɛ̀ mɔ́ yilə. Ń zùwə́ y gə tú è duwə, á bʼâ fùù ǹdə́ wu-nyɔ̃̀ nánfɔ̀lɔ̀ kɔn dwini. 14Lyì bí gə nʼê tùrh ába á gə́ wɔ́ Kristə-lyì mú yilə, á bʼâ yə̀ wu-nyɔ̃̀ cìnə́, bə̀ Yi Eshirhə y è wɔ́ zùwə́ cí mú só á yó. 15Ámyɛ̌ mə̀dù ga bə̀ká shɛ̀nɛ́ bə nwɛ̀nɛ̀ mɔ́ bə̀ ǹ gu lò, bə̀ ǹ ŋwɔ̀là, bə̀ ǹ wɛ̀rhɛ́ lwɛlɛ, ráá ǹ fwɛ̃´ ń tu zɔ̀mà wẽ́ yil yé. 16Bə̀ gə nʼê nwɛ̀nɛ̀ mɔ́ ǹ gə́ wɔ́ Kristə-lò mó yilə, sə bə̀ká dùr cìzhìl yé, sə́ ce Yi nə̀báná, bə̀ gə́ nʼê zə Kristə yil lé bə̀ byẽ̀ mó mó yilə.

17Zhə̀nà, bùrsí yi yúwə́, sə wɔ́ Yi lyì bí bə̀ la mʼe ji sə̀ kùrə̀. Sə sə̀ gə ju kùr ǹdə́ nə́myɛ̌, wɔ́ etər byɛ̀bɛ́ bə̀ tʼâ zwẽ Yi yò-ècɔ̀nɔ̀ nyí rí mú yó la nɛ́ gu? 18Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:

“Byɛ̀bɛ́ bə̀ nʼê wɛ̀rhɛ́ cɛ̀nɛ̀ mɔ́ cìn nɛrɛ́ gə bʼa yə̀ zwini;

etər kɔn nə bʼa yə̀ nɛ́ yə̀-bəlwàálɛ cìnə́ bé ǹdə́ byɛ̀bɛ́ bə̀ tʼâ nyàm Yi nyə́ né mó yilə?”

19Wɔ́ rə̀myɛ́ è ce, byɛ̀bɛ́ bə̀ nʼê nwɛ̀nɛ̀ bə̀ gə́ nʼê wɛ̀rhɛ́ Yi pùbùlə̀ né mó yil mó mə̂ sə bə jʼâ nʼê wɛ̀rhɛ́ cɛ̀nɛ̀ gaga, sə bə ce bə̀ cìn námpúm bə̀ wârhna mɔ́ jɔ̃̀ wà; bə̀ ń wɔ́ zhə̀n-cí.

Currently Selected:

1 Pyɛɛrɛ 4: lee

Highlight

Copy

Compare