1 Kɔrɛ̃tɛ 9

Pwəə tá ń bwə̀l yò-ècɔ̀nɔ̀ nyí rí kɔn yil yé

1Àmyɛ́ də̀ Kristə tùntúm nà? À bə à cìn cǐ nà? À wàr à wɛ̀rhɛ́ kɔn dɛ̀bɛ́ à nʼâ yàlá? À yə̀ nə́ Cinu Yezu nɛ ǹdə́ à yírh nà? È də̀ àmyɛ́ tum dí à twĩ̀ Cinu yil mó rə̀ ce á jǐrh Kristə-lyì nà? 2Bá lyì bí dwã bɛ́ gə tʼâ nyǐ ni ǹdə Kristə tùntúm ta myɛ, ámyɛ̌ nʼá nyǐ ni ǹdə ń tùntúm ta. Ámyɛ̌ gə́ zù Cinu mú nʼê byili bʼà wɔ́ ń tùntúm zhə̀nà, sə à twĩ̀ à tum dí náàcɛ̀nɛ́ Cinu jàn yilə.

3Sə è gə wɔ́ byɛ̀bɛ́ bə̀ nʼê shèè nè mó yilə, à nʼâ wə̀l bè: 4Nə́ bə mə̂ sə nə́ nə kùjú nə́ jí, nə́ nə nɛ̃̌ nə́ nyɔ̀, nə́ tum dí yil nà? 5Nə́myɛ̌ wàr nə́ bʼâ jí kɛ̃ mɔ̀bɔ́ ń wɔ́ Kristə-lò, n tó nə́ba, ǹdə Kristə tùntúmə́ bé dwã bɛ́, ǹdə́ Cinu da-byâ bɛ́ ǹdə́ Pyɛɛrɛ gə́ nʼê wɛ̀rhɛ́ nɛ́ nà? 6È nə wɔ́ àmyɛ́ ǹdə́ Barnabaasɛ dúdú nə́ mə̂ sə nə́ twĩ̀ nə́ mʼé pyà nə́ nyí kùjú? 7Shə̀dáá ŋwɛ́nɛ́ bə̀ tʼâ kwɛ̃̌ y è tum dí yilə? Lò gə zhele cǒ, ǹ bə mə̂ sə́ jí ò byâ bɛ́ nà? Ráá vwã̌-ènɔ̀n gə nə́ ń cə̀r vwàmá, ń bə mə̂ sə n jí nə̀ yil mó?

8À gə́ zɔ̀m nɛ́ mɔ́ də̀ numbyíní surhə dúdú nyə̀ná yé. Muyiisi nyə́ né sɛ́bɛ́ rɛ́ myɛ cìcì nʼê byili èta. 9Bə̀ kɛ̃ nyə́ né sɛ́bɛ́ rɛ́ wẽ́ bə wɔ̀: “Nɔ̃ gə nʼô twĩ̀ kɛ́lɛ́ wẽ́ jíjí jòró yi ní, sə ǹ bə̀ká cə̀r w bʼò bə̀kʼa dɔ̃̀ jíjí rí yé.” È nə wɔ́ vwàmá nɛ́ dúdú yò Yi nʼê nyǐ nà? 10È nə də̀ nə́myɛ̌ yil Yi zɔ̀m èta nà? Zhə̀nà, wɔ́ nə́myɛ̌ yil bə̀ kɛ̃ zɔ̀mà nɛ́ nə̀myɛ́ mɔ́. Èta, lò gə nə́ ǹ vwàlà, ǹ mə̂ sə́ bù bə̀ ǹ mʼâ nə jíjí ń jə̀r. Lò gə nə́ ǹ mà jíjí, ǹ mə̂ sə́ bù bə̀ ǹ mʼâ nə kùjú tɛ̀bɛ́ ǹ nə́ ǹ mà mɔ́ wẽ́. 11Nə́ dù Yi Eshirhə y kɔn dɛ́ á wẽ́. Nə́ nə zɛ̃̀ nə́ bə mə̂ sə nə́ jí á jɛ̃̀-kɔna? 12Lyì bí dwã bɛ́ gə zhe sɔ́má bə̀ nʼê zwẽ á jɛ̃̀-kɔn bə jí, nə́myɛ̌ nə bə sɔ́má zhe nə́ zwẽ á jɛ̃̀-kɔn nə́ jí du lyì bí bə̀myɛ́ mɔ́ nà?

Sə nə́myɛ̌ yə̀ rə̀myɛ́ pyà yé. Nə́ shɛ̀nɛ́ kɔn gakó, mùnì rə̀myɛ́ bə̀kʼa cə̀r Kristə yò-ècɔ̀nɔ̀ nyí rí bwə̂l mó yé ne yé. 13Á yě bə̀ byɛ̀bɛ́ bə̀ nʼê twĩ̀ Yi jù w mú wɔ́ bə̀ tum dí wẽ́ bə̀ nʼê jí ní; byɛ̀bɛ́ bə̀ nʼê zwə́l vwĩ̀ rí vwĩ̀-jìlú w yó mó, bə̀myɛ nʼê nɛ bə̀ cəl vwĩ̀ rí wẽ́. 14Èta, Cinu pɔ nyí bə̀ byɛ̀bɛ́ bə̀ nʼê bwə̀l yò-ècɔ̀nɔ̀ nyí rí mú myɛ mə̂ sə bə jí yò-ècɔ̀nɔ̀ nyí rí bwə̂l mó wẽ́.

15Sə àmyɛ́ yə̀ rə̀myɛ́ rə̀dù ga pyà yé. È də̀ rə̀myɛ́ yil à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ myɛ yé. À gə cù cɔ̃̀ lò gə la tɛ̀bɛ́ rə̀ wɔ́ à wu-nyɔ̃̀ kɔn èta mɔ́ vǔr à wẽ́. 16À gə nʼâ bwə̀l yò-ècɔ̀nɔ̀ nyí rí, à tʼâ pyà à cìn còrhó yé. Bə̀ rə̀ wɔ́ à yó-lyẽẽ́ tum. À gə yə̀ rɛ̀ bwə̀l, wɔ́ yò ò zhǐ à yó wə. 17È gə yʼà wɔ́ à sə̀pwà pùbùlə̀ yil à nʼâ bwə̀l lè, à yʼà mə̂ sʼa nə kwândɛ. Sə è də̀ à sə̀pwà pùbùlə̀ yil à nʼâ bwə̀l lè yé. Rə̀ wɔ́ à nyɔ́ɔ́ tum. 18È nə wɔ́ byè rə̀ wɔ́ à kwândɛ? À kwândɛ́ wɔ́ a bwə̀l yò-ècɔ̀nɔ̀ nyí rí nánfò; à bə̀kʼa pyà kɔn dɛ̀bɛ́ bə̀ yʼà mə̂ sə bə pɛ̃ yò-ècɔ̀nɔ̀ nyí rí bwə̂l yil mó yé.

19Zhə̀nà, à də̀ lò mə̀dù ga yóm yé. Sə à zə à cìn a yə̀ lyì bí gakó yə-bal, mùnì ga a nə lyì nánzhəzhɔ̌ bə zù Kristə. 20À gə ŋwɛ́nɛ́ Zhwifubá sõ, à nʼâ wɛ̀rhɛ́ ǹdə bə̀ ta, mùnì ga a yíní bi. À gə ŋwɛ́nɛ́ byɛ̀bɛ́ bə̀ nʼê zwẽ Muyiisi nyə́ né mó sõ, àmyɛ nʼâ zwẽ ne, mùnì ga a yíní bə̀myɛ. E jà lò tá ń nyɛ́ɛ́ nɛ yé. 21À gə ŋwɛ́nɛ́ byɛ̀bɛ́ bə̀ yə̀l Muyiisi nyə́ né mó sõ, à nʼâ wɛ̀rhɛ́ ǹdə àmyɛ yə̀l nè ta, mùnì ga a yíní bə̀myɛ. Sə rə̀myɛ́ tʼâ yâl rə wɔ̀ bʼà tʼâ zwẽ Yi nyə́ né yé. Zhə̀nà, à nʼâ zwẽ Kristə nyí rí. 22À gə ŋwɛ́nɛ́ byɛ̀bɛ́ bə̀ yə̀ Yi ni zhí námpúm mú sõ, à nʼâ wɛ̀rhɛ́ ǹdə àmyɛ yə̀ Yi ni zhí námpúm ta, mùnì ga a yíní bi. Èta, à yàl ǹdə lò gakó ta, mùnì ga a ŋwɛ̀nɛ́ a vwârh lyì jàlà. 23À nʼâ wɛ̀rhɛ́ rə̀myɛ́ gakó, mùnì ga àmyɛ nə cəl yò-ècɔ̀nɔ̀ nyí rí nə̀cɛ̀ndɛ́ wẽ́.

24Á yě náàcɛ̀nɛ́ bə̀ lyì byɛ̀bɛ́ bə̀ nʼê nyɔ̀ dwã ǹdə́ ywə́l dǔr, wɔ́ bə̀ gakó bə̀ nʼê dùrə̀. Kwândɛ́ jʼà wɔ́ lò mə̀dù ń la rɛ nɔ. Rə̀myɛ́ ce, dǔrnə ywə́l mó náàcɛ̀nɛ́, mùnì á nə kwândɛ. 25Sə byɛ̀bɛ́ gakó bə̀ nʼê dùr ywə́l mó mó nʼê pyɛ́nɛ́ bə̀ cìnə̀, bə wɛ̀rhɛ́ ǹdə bə̀ gə́ wɔ̌ nɛ́, mùnì ga bə nə kwândɛ. E jà kwândɛ́ rə̀myɛ́ mɔ́ nʼê cɔ̀ làlà, rə̀ tʼâ dɛnɛ yé. Sə nə́myɛ̌ nʼé pyɛ́nɛ́ nə́ cìnə̀, mùnì ga nə́ nə kwândɛ tɛ̀bɛ́ rə̀ tʼâ la cɔ̌. 26Wɔ́ rə̀myɛ́ è ce àmyɛ́ tʼâ dùr yààyàà yé. È nyɛ̌ ǹdə wɔ́ má à nʼâ mà ta, sə à tʼâ mà cə-ká w yé. 27À wɔ̌ à yala nɛ́, rə̀myɛ́ ce, à nʼâ pyɛ́nɛ́ à cìn dɛ̃´dɛ̃´, mùnì ga Yi bə̀kʼa võ nè kwândɛ, a jà a bwə̀l yò-ècɔ̀nɔ̀ nyí rí a byili lyì dwã nɛ yé.

Currently Selected:

1 Kɔrɛ̃tɛ 9: lee

Highlight

Copy

Compare