Apokaliipsis 2

UVAʼS TALAX YOL TE JUQTANUL INQʼA NIMAN TETZ JESUUS TUULBʼAL AASIA

Aʼetz inqʼa yole uvaʼ alax te u iqʼon iviʼ xoʼl inqʼa niman tetz Jesuus tu tenam Eefeso

1Yaʼne vabʼi talt JesuKriisto inpaqte. Tul ech tal s-eche:

—Tzʼibʼaetz opoon inqʼa yol te u iqʼon iviʼ uvaʼ, eche aanxel tatin xoʼl inqʼa niman vetz tu tenam Eefeso. Tul ech laʼ aal s-te s-eche: «Ech nik tal uvaʼ atoʼk juqvaʼl inqʼa txʼumil tiqʼabʼ, visebʼal, uvaʼs nik ixaon xoʼl juqvaʼl inqʼa txiqubʼal, uvaʼ ooroxhtuʼ, s-eche: 2–Vootzaqle kam vebʼanoʼm nik ebʼan sinvatz. Atz vootzaqle uvaʼ tira txʼakel ok etaʼn tiʼ vinyolbʼal. Atz vootzaqle uvaʼ nik ekotxʼ evatz t-inqʼa nik palk ex. Tul tira yeʼ nik ekʼul inqʼa bʼanol tetz yeʼbʼaʼn, inqʼa nik taqʼbʼ sexoʼl. Tul tira nik ibʼen sete jabʼil inqʼa nuqxh nik taleʼ uvaʼ inapoostolxhtuʼ. Tul inuqulxh vinyolbʼal nik taleʼ. Tul tira nik ibʼen sete jabʼil inqʼa jitxh nuq nik taleʼ, pet tzʼeqol tzij kuxhtuʼ. 3Atz vootzaqle uvaʼ nik epal titzaʼlal, tiʼ uvaʼ, ex niman vetz. Tul nik ekotxʼ evatz. Atz vootzaqle uvaʼ tira txʼakel ok etaʼn, tiʼ uvaʼ at etaanima s-viʼ. Tul yeʼl ex nik ipal ekʼuul s-ve.

4Pet at vaʼl uvaʼ nik ebʼaneʼ uvaʼ yeʼ nik ibʼan s-ve. Aʼe, uvaʼ yeʼxh vet jankʼal etaanima s-viʼ, echiche vetaanima s-viʼ s-bʼaxa. 5Pet ulsavaq sekʼuul keʼch qat tel ka vetaanima s-viʼ; tan qat jetxhony el ex sinkʼatza. Tul txhoʼnoq sete. Tul qʼaʼvoq etaanima paqte s-viʼ. Tul antxh ebʼan vet echiche vetaanima s-viʼ s-bʼaxa. Pet oqetz yeʼ laʼ ejalpu vetxumbʼal tiʼ tok vetaanima s-viʼ inpaqte, tul yeʼetz kuxh taqla laʼ ul in tiʼ teesal el vetxiqubʼal tu tatibʼal.

6Pet aloq bʼaʼn kuxh vaʼt uvaʼ nik ebʼaneʼ. Tan nik iyan ekʼuul te inqʼa yeʼbʼaʼn uvaʼ nik motx ibʼan inqʼa xaol, inqʼa aʼ kuxh txhʼuyel tiʼ viqejoʼm Nikolaas uvaʼ txhusel ka. Tul echat kuxh ine inpaqte, tan tira nik iyan inkʼuul s-te.{*}#2.6 Vibʼanoʼm inqʼa Apoostol 6.5. ¿Kam talaxe ‹viqejoʼm Nikolaas› nik tal tu versiikulo vajqil uvaʼa? Aʼetz viqejoʼm Nikolaase uvaʼ nikich kuxh iyuj inqʼa bʼaʼnla txhaq yol tiʼ Jesuus tuchʼ u tuqʼeʼybʼal inqʼa Greesia. Tan bʼaʼnich kuxh vatz Nikolaas uvaʼ nikich inatxhkʼuula inqʼa niman tetz Jesuus inqʼa bʼitichla tiuxh. Atz bʼaʼnich kuxh s-vatz kʼuxh kamtel kuxh yansa ibʼ nikich ibʼan inqʼa niman tetz Jesuus. Tan nikich kuxh ikuy Nikolaas ibʼanaxeʼ, eche uvaʼ nikich ibʼan inqʼa Greesia. Aʼetz uvaʼe, nikich tal quBʼaal Jesuus te inqʼa niman tetz, inqʼa tu tenam Eefeso, tiʼ uvaʼ yeʼxhkam nikich inima u tuqʼeʼybʼal Nikolaas. Pet eche uvaʼ nikich ibʼan inqʼa niman tetz Jesuus, inqʼa atich tu tenam Esmiirna, tan nikich motx ikuy tokaʼp inqʼa qeol tetz u tuqʼeʼybʼal Nikolaas s-xoʼl, eche uvaʼ nik tal tu versiikulo 14-15. Tul echat uvaʼe nikich ibʼan inqʼa niman tetz Jesuus, inqʼa atich tu tenam Tiatiira. Tan nikichat ikuy tokaʼp inqʼa qeol tetz u tuqʼeʼybʼal Nikolaas s-xoʼl. ¿Jabʼiletze u Nikolaas nik tal tu versiikulo uvaʼa? Kamal aʼe vaʼl u lotxhonal uvaʼ toksa inqʼa apoostol; aʼe, uvaʼ nik tal t-Vibʼanoʼm inqʼa Apoostol 6.5.

7Jaʼletz ex, uvaʼ nik saʼon tootzaqil vinyolbʼal, tul nimavaqetza kam uvaʼ nik tal viTiuxhil Tiuxh sete, ex inqʼa niman vetz. Atz jaʼl ex, uvaʼ laʼ oleʼv ex tiʼ tel iqʼij inqʼa yeʼbʼaʼn, tul laʼetz vaqʼ etokebʼal tiʼ tetxhbʼul vivatz u tzeʼ, u aqʼol tetz qʼij saq uvaʼ yeʼl iyaʼebʼal imotxebʼal, uvaʼ, aʼ atil tinikʼa u bʼaʼnla xhoraal tetz quBʼaal Tiuxh, –chich JesuKriisto,» chaq axh s-te, —xeʼt JesuKriisto s-ve.#Jeenesis 2.9; Apokaliipsis 22.2

Aʼ inqʼa yole uvaʼ alax te u iqʼon iviʼ xoʼl inqʼa niman tetz Jesuus tu tenam Esmiirna

8Yaʼne vabʼi talt JesuKriisto inpaqte. Tul ech tal s-eche:

—Tzʼibʼaetz opoon inqʼa yol te u iqʼon iviʼ uvaʼ, eche aanxel tatin xoʼl inqʼa niman vetz tu tenam Esmiirna. Tul ech laʼ aal s-te s-eche: «In, uvaʼ ibʼaxa; atz in viyaʼtebʼal. Atz in, uvaʼ kam in. Tul itzʼeʼv in inpaqte. Ech nik val s-eche: 9–Vootzaqle uvaʼ nik epal titzaʼlal, tiʼ uvaʼ, ex niman vetz. Tul vootzaqle uvaʼ nik epal t-meebʼaʼil. Poro sinvatz, tan ex txʼiol iqʼij. Atz vootzaqle uvaʼ nik teesal eqʼij taʼn inqʼa nik tal tibʼ s-qeol tetz tuqʼeʼybʼal inqʼa tij imam Israeel. Poro jitetz eche. Pet aʼ kuxh nik inima u uqʼeʼybʼal uvaʼ jeqel taʼn Satanaas. 10Poro yeʼl ex laʼ xoʼv ex kʼuxh toq paloq ex titzaʼlal taʼn. Tan at jolol ex toq aqʼaxoq jaʼ ex t-tzeʼ taʼn inqʼa xaol, inqʼa nik niman u uqʼeʼybʼal uvaʼ jeqel taʼn Satanaas. Echetz laʼ tilixe uvaʼ kʼuqlel ekʼuul s-viʼ. Poro tetxhal laʼ pal ex titzaʼlal tuulbʼal jolol qʼij. Pet kʼuqloq kuxh ekʼuul s-viʼ, kʼuxh laʼ yatzʼax el ex. Echetz laʼ vaqʼte vetxʼaqaʼm sinkʼatza, aʼe u qʼij saq uvaʼ yeʼl iyaʼebʼal imotxebʼal, eche nik taqʼax ikoroona vaʼq saatxhvil. 11Jaʼletz ex, uvaʼ nik saʼon tootzaqil vinyolbʼal, tul nimavaqetza kam uvaʼ nik tal viTiuxhil Tiuxh sete, ex inqʼa niman vetz. Atz jaʼl ex, uvaʼ laʼ oleʼv ex tiʼ tel iqʼij inqʼa yeʼbʼaʼn, tul aʼetz exe, uvaʼ yeʼ laʼ ilon vet u kʼaxkʼo tetz u kaʼv kamchil, –chich JesuKriisto,» chaq axh s-te, —xeʼt JesuKriisto s-ve.

Aʼ inqʼa yole uvaʼ alax te u iqʼon iviʼ xoʼl inqʼa niman tetz Jesuus tu tenam Peergamo

12Yaʼne vabʼi talt JesuKriisto inpaqte. Tul ech tal s-eche:

—Tzʼibʼaetz opoon inqʼa yol te u iqʼon iviʼ uvaʼ, eche aanxel tatin xoʼl inqʼa niman vetz tu tenam Peergamo. Tul ech laʼ aal s-te s-eche: «In, uvaʼ at u espaada siinxeʼ uvaʼ kaʼvaʼl tej. Ech nik val s-eche: 13–Vootzaqle kam vebʼanoʼm nik ebʼan sinvatz. Atz vootzaql u tenam tal uvaʼ jeqlel ex. Tan tzitzi atil u taqʼil vinimal u uqʼeʼybʼal uvaʼ jeqel taʼn Satanaas. Kʼuxhetz tzitzi atil vinimal u uqʼeʼybʼal uvaʼe, poro ant kuxh txhʼuyel ex tiʼ innimaleʼ. Tan yeʼ nik etanbʼa vinqeexeʼ, kʼuxh tuulbʼal inqʼa qʼij uvaʼs etilt iyatzʼax el Antiipas, vemol s-niman vetz, uvaʼ kʼuqlebʼalichxh kʼuul tiʼ taqʼt ootzaqiloq inqʼa yol s-viʼ. Tan aʼxh u uqʼeʼybʼal at bʼen taqʼil sexoʼl uvaʼ jeqel taʼn Satanaas.{*}#2.13 ¿Kam nik elkaʼpun u yol?: —u uqʼeʼybʼal uvaʼ jeqel taʼn Satanaas, —chiche. Aʼetz nik elkaʼpun tiʼ u tuqʼeʼybʼal inqʼa grieego ti u natxhkʼuulaʼm uvaʼ nikich motx ibʼan tu tenam Peergamo. Tan aʼ atilich val u vatzibʼal tetz val u bʼitichla tiuxh tu tenam Peergamo. Tul sibʼich ichʼij u bʼitichla tiuxh uvaʼe, vinaq vaq laval (36) meetro atich jaʼ ichʼijeʼ. Tul Seeusich ibʼij u bʼitichla tiuxh uvaʼe tu yolbʼal grieego. Pet Jupiterich ibʼij tu yolbʼal latiin. Tul atichetz vaʼl atibʼal tzitzi tal uvaʼ nikich natxhkʼuulalik u bʼitichla tiuxh uvaʼe. Tul kam kuxh kantxhaqla txumbʼal nikich ibʼanax tiʼ inatxhkʼuulal u bʼitichla tiuxh. Atich inqʼa ixoq s-vinaq iqʼonaq iviʼ s-xoʼl. Tul nikich kuxh motx iyansa tibʼ inqʼa ixoq tuchʼ inqʼa vinaq vatz inqʼa bʼitichla tiuxh tiʼ inatxhkʼuulaleʼ. Atz vaʼt nikich ibʼan inqʼa xaol uvaʼ nikich motx itzʼeʼsa ok inqʼa neʼ vatz inqʼa bʼitichla tiuxh. Atz atich jolt bʼitichla tiuxh tzitzi tetz u uqʼeʼybʼal grieego tul nikich inatxhkʼuula inqʼa xaol. Aʼe inqʼae: Eskulaapio, Deemeter, Ateenas, Dioniisio. Jitetz aʼ koqxh u Satanaas nikich inatxhkʼuula inqʼa xaol, pet Satanaas nikich oksan tiviʼ inqʼa xaol inatxhkʼuulal inqʼa bʼitichla tiuxh inqʼae.

14Pet at kaʼoxvaʼl uvaʼ nik ebʼaneʼ uvaʼ yeʼ nik ibʼan s-ve. Tan at jolol inqʼa sexoʼl uvaʼ nik tetxhbʼu inqʼa oya, inqʼa maʼt toksal vatz inqʼa bʼitichla tiuxh. Atz at jolt inqʼa nik iyansa tibʼ, tiʼ uvaʼ tikʼ nik itxhok vaʼt ikʼulel.#Vibʼanoʼm inqʼa Apoostol 15.20, 29 Tan ech inqʼae nikich itxhus Valaam te Valaak tiʼ teesal inqʼa tij imam Israeel t-bʼey vatz quBʼaal Tiuxh.#Nuumeros 31.16; 25.1-2 15Tul at jolt sexoʼl uvaʼ, aʼ kuxh txhʼuyel tiʼ viqejoʼm Nikolaas uvaʼ nik iyan inkʼuul s-te. 16Pet jalpuvaq vetxumbʼal; atz tanbʼavaq inimal inqʼae. Tan oq yeʼ laʼ etanbʼa, tul yeʼ kuxh taqla laʼ ul in tiʼ ekʼaxbʼisal tuchʼ vinyol, eche laʼ ikʼaxbʼisan vaʼq espaada tuulbʼal txhʼaʼo.

17Jaʼletz ex, uvaʼ nik saʼon tootzaqil vinyolbʼal, tul nimavaqetza kam uvaʼ nik tal viTiuxhil Tiuxh sete, ex inqʼa niman vetz. Atz jaʼl ex, uvaʼ laʼ oleʼv ex tiʼ tel iqʼij inqʼa yeʼbʼaʼn, tul laʼetz vaqʼ u qʼij saq sete uvaʼ yeʼl iyaʼebʼal imotxebʼal. Echetz laʼ vaqʼt sete, eche vaqʼt u manaa tetxhbʼu inqʼa kʼuy emam tiʼ vaqʼt qʼij isaq, u manaa uvaʼ nikich ikol ka inqʼa kʼuy emam uvaʼs atichaq tu tzaqa txʼavaʼ. Atz laʼ vaqʼ vaʼt u tal sivan sete uvaʼ oqxh isaqale. Tul laʼ intzʼibʼa kuʼ val u akʼla bʼij tiʼ u tal sivan. Tul yeʼxhabʼil laʼ ootzaqin u bʼij. Pet taʼn kuxh u xaol laʼ ootzaqin uvaʼ laʼ kʼulun, –chich JesuKriisto,» chaq axh s-te, —xeʼt JesuKriisto s-ve.#Isaiias 62.2; 65.15

Aʼ inqʼa yole uvaʼ alax te u iqʼon iviʼ xoʼl inqʼa niman tetz Jesuus tu tenam Tiatiira

18Yaʼne vabʼi talt JesuKriisto inpaqte. Tul ech tal s-eche:

—Tzʼibʼaetz opoon inqʼa yol te u iqʼon iviʼ uvaʼ, eche aanxel tatin xoʼl inqʼa niman vetz tu tenam Tiatiira. Tul ech laʼ aal s-te s-eche: «In, viKʼaol Tiuxh nik alon sete. In, uvaʼ ech u bʼaqʼ invatz, eche toybʼ xamal. Atz in, uvaʼ ech inqʼa voq, eche itxilixun vroonse t-xamal. Ech nik val s-eche: 19–Vootzaqle kam vebʼanoʼm nik ebʼan sinvatz. Atz vootzaqle uvaʼ nik tel etaanima s-viʼ. Tul vootzaqle uvaʼ kʼuqlelxh ekʼuul s-viʼ. Atz vootzaql inqʼa ebʼaʼnla txhaq bʼanoʼm nik ebʼaneʼ. Atz vootzaqle uvaʼ nik ekotxʼ evatz t-inqʼa itzaʼlal. Tul vootzaqle uvaʼ aʼl tel nik ebʼant yaʼl tiʼ ibʼanax u bʼaʼnla bʼanoʼm tiʼ inqʼa nikich ebʼan s-bʼaxa.

20Pet at kaʼoxvaʼl uvaʼ nik ebʼaneʼ uvaʼ yeʼ nik ibʼan s-ve. Tan nik ekuy tatin val u ixoq sexoʼl uvaʼ nik tal tibʼ s-qʼexsan tetz viyol quBʼaal Tiuxh. Tul nik ibʼokʼtzii inqʼa vaqʼonvil tiʼ iyansat tibʼ tuchʼ invaʼtoʼq uvaʼ jit ikʼulel tibʼ s-tuchʼ. Atz nik ibʼokʼtzii inqʼa vaqʼonvil tiʼ tetxhbʼul inqʼa etxhbʼubʼal uvaʼ maʼt toksal vatz inqʼa bʼitichla tiuxh, eche uvaʼ ibʼan u ixoq u Jesaveel s-naʼya.#1 Reeyes 16.31; 2 Reeyes 9.22, 30

21Qatetz intxʼebʼlaʼ uvaʼ laʼ titzʼa tibʼ u ixoq, tul yeʼ nik titzʼa tibʼ. 22Echetz s-tiʼile toq inkuy ipal u ixoq t-mam kʼaxbʼichil tuchʼ inqʼa imol s-aj paʼvom. Atz toq vaqʼ vaʼl yaabʼil tiʼ u ixoq, eche nik ibʼan vaʼq xaol uvaʼ aqʼbʼil kuxh nik ikuʼ vatz txʼatxh, oq yeʼ laʼ titzʼa tibʼ tiʼ vipaʼv. 23Jatvaʼletz inqʼa txhʼuy vet tiʼ vitxhusuʼm u ixoq, tul tira toq inyatzʼeʼl. Echetz laʼ vaqʼt tootzaqie jankʼal inqʼa niman vetz uvaʼ tira nik vileʼ kam uvaʼ nik titzʼa, atz kam uvaʼ at tu taanima. Tul laʼ vaqʼ itxʼaqaʼm junun inqʼa niman vetz tiʼ kam inqʼa ibʼanoʼm.#Saalmo 7.9; Jeremiias 17.10

24Petetz ex inqʼa niman vetz, ex inqʼa tu Tiatiira, tan yeʼl vaʼtoʼq yol laʼ val sete, ex inqʼa yeʼ qat ok bʼen ex tiʼ u txhusbʼal uvaʼe, atz yeʼ qat ok bʼen ex tiʼ tootzaqil tel inqʼa ‹imamala txumbʼal› tetz vitiuxh nik taleʼ. Tan jit tetz Tiuxhe. Pet aʼ kuxh u uqʼeʼybʼale uvaʼ jeqbʼamal vet taʼn Satanaas. Echetz yeʼl vaʼtoʼq yol laʼ val sete tiʼ etok t-bʼey. 25Pet bʼaʼn u txhusbʼal uvaʼ iqʼomal etaʼn. Tan yeʼ laʼ el ka ex s-tiʼ, tetxhal etxʼebʼt vul inpaqte. 26Echetz jaʼl uvaʼ laʼ oleʼv tiʼ tel iqʼij inqʼa kantxhaq, tul aʼ laʼ inima kam uvaʼ nik valeʼ, tetxhal ikameʼ. Aʼetz uvaʼe, laʼ vaqʼ tiqleʼm tiʼ ibʼekʼon tiibʼa inqʼa laʼ palsan iyol quBʼaal Tiuxh.

27Tul tuchʼ kʼaʼnal

laʼ motx bʼekʼon ka,

eche nik ibʼekʼon

vaʼq mam iqʼesal

uvaʼ iqʼomal

itxhʼitxhʼ bʼaara taʼn.

Tul tira bʼeeno laʼ ikʼaxbʼisat

inqʼa palsan yol,

eche ipaxil el

invaʼq bʼitich txʼavaʼ vaaso.#Saalmo 2.8-9

Echatetz u viqleʼme qat inkʼul te vinBʼaal, 28tan laʼat vaqʼ bʼen s-nim tuchʼ u tiqleʼm tiʼ tatin sinkʼatza, tul ech vet laʼ itxiqun tatin sinkʼatza, eche vitxiqun u txʼumil uvaʼ yeʼ sebʼ nik ibʼen s-qʼalaʼm. 29Jaʼletz ex, uvaʼ nik saʼon tootzaqil vinyolbʼal, tul nimavaqetza kam uvaʼ nik tal viTiuxhil Tiuxh sete, ex inqʼa niman vetz, –chich JesuKriisto,» chaq axh s-te, —xeʼt JesuKriisto s-ve.

Currently Selected:

Apokaliipsis 2: ixlC

Highlight

Copy

Compare