Apokaliipsis 18

Uvaʼs tilt Xhun isotzsal el u mam tenam Vaviloonia

1Maʼtichetz vilt vet inqʼae, yaʼne vil ikuʼl invaʼt u aanxel t-amlikaʼ uvaʼ sibʼichxh tiqleʼm. Tul yekich txiqul vet u vatz txʼavaʼ s-kaqaayil taʼn vilitzʼkabʼineʼ. 2Tul jankʼalxh tiʼ iqul sichʼini. Tul ech tal s-eche:

—¡Toqetz eloq vet iqʼij u mam tenam Vaviloonia! ¡Toq eloq vet iqʼij! Tul toq bʼenoq vet s-tatibʼal demoonio. Atz toq bʼenoq vet s-kolbʼal tibʼ jankʼal inqʼa yaabʼla demoonio. Atz toq bʼenoq vet s-tatibʼal jankʼal inqʼa yaabʼla txhaq xichʼomla txoo, inqʼa txoqebʼal kʼuul tilixeʼ.#Isaiias 21.9; 13.19-21; Jeremiias 50.39 3Tan jankʼalxh inqʼa mam tenam vatz txʼavaʼ, tan aʼ qat motx bʼenk vet ikʼuul tiʼ inqʼa txʼijbʼal qʼij, atz tiʼ uvaʼ jitxh Tiuxh, eche uvaʼ nik ibʼan inqʼa mam tenam uvaʼ Vaviloonia chich eʼli. Tul kʼuxh inqʼa mam iqʼesal inqʼa tenam, tan echat kuxh uvaʼe qat motx ibʼane. Tul kʼuxh inqʼa yakol kʼaʼy, tan qat motx bʼeny vet s-txʼiol iqʼij taʼn jankʼal inqʼa kam qat motx ijiqʼbʼa inqʼa xaol, atz taʼn inqʼa qat motx tatxhva inqʼa xaol tiʼ ibʼen s-bʼaʼn inqʼa tatineʼ. Tan jankʼalxh u tenam tuchʼ inqʼa mam iqʼesal, atz tuchʼ inqʼa yakol kʼaʼy, tan qat motx teesa tibʼ t-bʼey vatz quBʼaal Tiuxh, eche nik ibʼan vaʼq vinaq uvaʼ nik ibʼokʼtziil taʼn vaʼq lampaqʼla ixoq tiʼ tukʼal aʼ uvaʼ laʼ qʼabʼan taʼn, tul tetxhal iyansat vet tibʼ u vinaq tuchʼ u ixoq, —xeʼt u aanxel s-ve.#Jeremiias 51.7-9

4Yaʼne vabʼi iyolon tzaan invaʼt u qul t-amlikaʼ. Tul ech tal s-eche:

—Ex intenam, eloq el ex t-inqʼa mam tenam uvaʼ Vaviloonia, chich eʼli. Tul yeʼl ex laʼ bʼoqol ex tiʼ ibʼanax inqʼa paʼv. Echetz yeʼ laʼ epale tuul inqʼa kʼaxkʼo uvaʼ toq motx palka.#Isaiias 48.20; Jeremiias 50.8 5Tan pay vet iviʼ ipaʼvin inqʼa mam tenam vatz quBʼaal Tiuxh. Tul tetxhal toq taqʼ vet kuʼ quBʼaal Tiuxh yol tinuqul tiʼ inqʼa tenam inqʼae. Echetz nik qilte uvaʼ yeʼl vipaʼv u mam tenam Vaviloonia nik isotz s-kʼuul quBʼaal Tiuxh, —xeʼt u qul te vitenam quBʼaal Tiuxh.

6Yaʼne ech tal vet u qul te inqʼa aanxel s-eche: —Aqʼvaq ichʼexel tiʼ inqʼa mam tenam Vaviloonia, eche uvaʼ ulbʼel jolt inqʼa xaol taʼn. Tul aʼl kaʼpaqul palnaʼq vet laʼ etulbʼet, tiʼ uvaʼ ulbʼel jolt inqʼa xaol taʼn, eche vaʼq xaol uvaʼ laʼ bʼoqon imol tiʼ qʼabʼaʼm, tul kaʼpaquletz vet laʼ qʼabʼansal uvaʼ laʼ bʼoqon vimol tiʼ qʼabʼaʼm. Tul antxh u koopa tetz pajbʼal laʼ bʼanbʼel s-tiʼ.#Saalmo 137.8; Jeremiias 50.29 7Tan tiʼ uvaʼ qatxh motx ipalsal ikʼuul tiʼ taqʼt bʼen tibʼ s-nim, atz, tiʼ uvaʼ qatxh motx ipalsal ikʼuul tiʼ ibʼant u tatxhaʼv vitxhiʼoʼl, echetz s-tiʼil bʼeeno ekʼaxbʼisataʼ. Tul bʼeeno etulbʼetaʼ. Tan ech nik tal u mam tenam t-taanima s-eche: «Iqʼesal tenam vatineʼ, eche ikʼuqeʼv invaʼq ixoq t-vikʼuqeʼvbʼal uvaʼ mam iqʼesal t-invaʼq mam tenam. Tul jit in invaʼq txakay ixoq uvaʼ nik isaʼon kam tetz s-te. Atz yeʼl paqul laʼ oqʼ in, eche nik toqʼ vaʼq txakay ixoq,» chich inqʼa mam tenam.

8Tul tiʼ kuxh uvaʼ nik motx taqʼ bʼen tibʼ s-nim, tul yeʼ kuxh taqla laʼ opoon invaʼl qʼij, tul laʼ ul inqʼa mam kʼaxkʼo s-tiibʼa. Tan laʼ ul mam vaʼy s-tiibʼa. Atz laʼ ul mam oqʼel tiibʼa inqʼa xaol, inqʼa at t-inqʼa mam tenam inqʼae. Tul laʼ ul kamchil s-tiibʼa. Atz laʼ tzʼeʼsal el taʼn mam xamal. Aʼetz u kʼaxbʼichile uvaʼ laʼ taqʼ quBʼaal Tiuxh tiibʼa inqʼa palsan yolla mam tenam. Tan sibʼ iyakʼil quBʼaal Tiuxh tiʼ taqʼax inqʼa kʼaxkʼo tiibʼa inqʼa mam tenam inqʼae, tiʼ taqʼax ichʼexel tiʼ vipaʼvineʼ.#Isaiias 47.8-9

9Tan jankʼal inqʼa mam iqʼesal vatz u txʼavaʼ qat motx ipalsal ikʼuul tiʼ ibʼanax jankʼal uvaʼ qat motx tatxhva ibʼanaxeʼ. Tan tira josqʼilxh vet s-vatz tuchʼ inqʼa nik motx ibʼaneʼ, eche nik ibʼan vaʼq vinaq uvaʼ josqʼil vet uvaʼ nik ibʼan s-vatz tuchʼ vaʼq lampaqʼla ixoq. Tul il vet vikʼaxkʼoil toq motx tileʼ, atz toq motx oqʼoq veteʼ. Tul toq motx kʼayunoq uvaʼs toq tilt tel isibʼel vitenam uvaʼs sebʼt vet itzʼeʼaʼ. 10Tul niim kuxh laʼ motx txakeʼvk vet tzaan inqʼa mam iqʼesal tiʼ tilix vikʼaxbʼisal u mam tenam. Atz niimetz vet laʼ motx saqink tzaan, tan aʼ laʼ motx ixoʼva vet itzʼeʼsalaq el tuulbʼal u mam tenam. Tul ech laʼ motx tal vet s-eche:

«¡Txumlebʼal, txumlebʼal u mam tenam Vaviloonia, u mam tenam uvaʼ mam yol tatineʼ nik inatxheʼ. Tul yeʼ kuxh taqla qat ul val u mam kʼaxkʼo s-tiibʼa!» chaq vet inqʼa iqʼesal.#Esekieel 26.16-18

11Tul echat kuxh toq motx toqʼ inqʼa yakol kʼaʼye; tan toq motx kʼayunoq tiʼ tilt visotzeʼl inqʼa tenam inqʼae. Tul yeʼxhabʼil vet invaʼq laʼ loqʼon tel inqʼa ikʼaʼy. 12Yeʼxhabʼiletz vet laʼ loqʼon inqʼa kʼaʼy inqʼae: Inqʼa ooroxhtuʼ; atz inqʼa plaataxhtuʼ; atz inqʼa bʼaʼnla txhaq sivan tetz viqbʼal uvaʼ sibʼ ijaʼmil; atz inqʼa bʼaʼnla txhaq bʼuʼq uvaʼ liinoxhtuʼ; atz inqʼa bʼaʼnla txhaq bʼuʼq uvaʼ sedaliina moraado ikaʼyeʼ tuchʼ inqʼa kaqko ikaʼyeʼ; atz tuchʼ jatvatzul inqʼa aqʼin tzeʼ uvaʼ oqxh itxʼumale; atz kamaq tel kuxh inqʼa kam uvaʼ bʼitel tuchʼ bʼaq; atz kamaq tel kuxh inqʼa kam bʼitel tuchʼ aqʼin tzeʼ uvaʼ jaʼnaq ijaʼmil; atz tuchʼ inqʼa kam uvaʼ nik ibʼitix tuchʼ koovre; atz inqʼa nik ibʼitix tuchʼ txhʼitxhʼ; atz inqʼa nik ibʼitix tuchʼ bʼaʼnla sivan tetz viqbʼal otzotz uvaʼ sibʼxh ijaʼmil; 13atz inqʼa bʼaʼnla txʼumbʼisabʼal, atz inqʼa kaneela, atz inqʼa insieenso, atz taʼlil u tzeʼ miira, atz tuchʼ nimavatzt txʼumbʼisabʼal, atz inqʼa qʼuʼich taʼl uuva, atz inqʼa aseeite, atz inqʼa bʼaʼnla ariina, atz inqʼa triigo, atz inqʼa karneʼl, atz tuchʼ inqʼa iqtzʼomla txoo, vaʼk, chej, atz tuchʼ inqʼa kareʼt, inqʼa aʼl nik ijuxul taʼn chej, atz tuchʼ jankʼal inqʼa xaol, inqʼa nikich motx ikʼayi tiʼ tok tiʼ aqʼon. 14Tul ech laʼ motx tal vet inqʼa yakol kʼaʼy s-eche: «Jankʼalxh inqʼa kam uvaʼ nikich motx tatxhva inqʼa xaol, tan sotzy vet el s-vatz. Atz jankʼalxh inqʼa kam uvaʼ josqʼilichxh s-vatz, atz inqʼa mam yol tilixeʼ, tan yeʼl vet inpaqt laʼ tila, atz yeʼxh tal vet laʼ ileqvat,» chaq inqʼa yakol kʼaʼy.

15Tul laʼ motx txumun inqʼa yakol kʼaʼy. Atz laʼ motx oqʼ veteʼ. Tan tetxhal motx bʼen s-txʼiol iqʼij taʼn inqʼa mam tenam. Ayaʼletz inqʼae laʼ kuxh motx txakeʼv vet tzaan s-naatxh tiʼ tilix vikʼaxbʼ inqʼa mam tenam, tan aʼ laʼ motx ixoʼva vet itzʼeʼsaleʼ. 16Tul ech laʼ motx tal vet s-eche:

«¡Txumlebʼal, txumlebʼal u mam tenam Vaviloonia! Tan yeʼl vet bʼaʼnla txhaq kam laʼ opoon s-xoʼl, eche inqʼa bʼaʼnla txhaq oksaʼm uvaʼ bʼaʼnla txhaq liino uvaʼ moraado ikaʼyeʼ, atz tuchʼ inqʼa kaqko ikaʼyeʼ. Atz yeʼ laʼ motx iviq vet tibʼ tuchʼ kam uvaʼ ooroxhtuʼ, atz tuchʼ kam uvaʼ bʼaʼnla txhaq sivan. 17Tan jit nimal koq qʼij qat sotzkeʼl jankʼal inqʼa imam txʼijbʼal qʼij inqʼa tenam taʼn quBʼaal Tiuxh,» chaq inqʼa yakol.

Tul echat kuxh laʼ itxumun jankʼal inqʼa xaol, inqʼa kam kuxh aqʼonil nik ibʼan viʼ u maar; atz jankʼale inqʼa qʼiʼol vaarko viʼ maar, atz jankʼale inqʼa atoʼk tuul inqʼa vaarko, atz jankʼale inqʼa sol, inqʼa nik ibʼen t-inqʼa vaarko. Tan niimat kuxh laʼ motx saqink vet tzaan uvaʼs laʼ motx tilt itzʼeʼsal el inqʼa tenam inqʼae.

18Tul laʼ motx til vet tel isibʼel vitzʼeʼ inqʼa mam tenam. Tul laʼ motx sichʼini. Tul ech laʼ motx tal s-eche: «¡Aʼxh mam yol itzʼeʼ vet el inqʼa tenam inqʼae. ¡Txumlebʼalxhtuʼ! Tan ¡yeʼl invaʼq tenam ech txʼijbʼal iqʼij eche txʼijbʼal iqʼij inqʼa mam tenam inqʼa qat tzʼeʼy veteʼ!» chaqaq veteʼ. 19Tul laʼ motx txumun inqʼa xaol, inqʼa nik taqʼonv viʼ u maar. Atz laʼ motx oqʼ veteʼ. Tul laʼ motx taqʼ vet jaʼ poqoq tiviʼ tetxhlal vitxumuneʼ. Tul ech laʼ motx tal vet isichʼin s-eche:

«¡Aʼxh mam yol itzʼeʼ u tenam uvaʼe! Tan ibʼaʼnil u txʼijbʼal iqʼij u tename uvaʼe, tul il oʼ qat bʼeny vet oʼ s-txʼiol iqʼij taʼn. Tul nal kuxh qat isotzeʼl u mam tenam s-kaqaayil!» chaqaq veteʼ, —xeʼt u aanxel.#Esekieel 27.25-36

Uvaʼs talt u aanxel uvaʼ laʼ chiibʼ vet inqʼa niman tetz Jesuus tiʼ visotzeʼl inqʼa tenam, inqʼa palsan yol

20Yaʼne vabʼi vaʼt u qul tu amlikaʼ. Tul ech tal s-eche: —Chiibʼoqvaq vet ex tiʼ visotzeʼl u tenam uvaʼe, jankʼal ex, uvaʼ een ex tu amlikaʼ, atz jankʼal ex inqʼa niman tetz Jesuus, atz ex inqʼa apoostol, atz ex inqʼa qʼexsan tetz viyol quBʼaal Tiuxh. Tan qat taqʼl vet quBʼaal Tiuxh u kʼaxkʼo tiibʼa inqʼa mam tenam, inqʼa motx kʼaxbʼisan ex. Tan qat taqʼl quBʼaal Tiuxh jabʼistee u kʼaxkʼo uvaʼ ikʼulel vet laʼ tatxhi, —xeʼt u qul.#Jeremiias 51.48; Apokaliipsis 6.9-11

21Yaʼne vil vaʼt u aanxel uvaʼ sibʼichxh iyakʼil. Tul tiqʼo tzaan val u sivan uvaʼ sibʼich ichʼijeʼ echich ibʼanax, eche invaʼq mamaʼ cheʼbʼal. Tul ilumi koʼp xeʼ u maar. Tul ech tal u aanxel te u mam tenam s-eche:

—Kametzxh uvaʼ qat isotz kuʼ u sivan jaqʼ u maar, tul echatetzxh laʼ ulbʼel isotzsal ele u mam tenam Vaviloonia. Tul yeʼl inpaqt laʼ ilix ivatz u mam tenam uvaʼe.#Jeremiias 51.63-64; Esekieel 26.12 22Atz yeʼl inpaqt laʼ abʼil tutxh bʼitz taʼn xaol. Atz mij vet invaʼq kam laʼ oqʼsali, kʼuxh aarpa, atz jitoq invaʼq aj, atz jitoq invaʼq trompeeta. Atz jitoq laʼ atin vet bʼitolaq tetz kam tuul u mam tenam uvaʼe. Atz jitoq laʼ abʼil vet itiʼn invaʼq cheʼbʼal s-tuul.#Esekieel 26.13 23Atz jitoq laʼ ilix vet itxiqun tzaan invaʼq txiqubʼal tuul u mam tenam uvaʼe. Atz jitoq laʼ abʼil vet invaʼq chelem xaak tiʼ iyolbʼet chiʼla txhaq yol te invaʼq u chelem ixvaak. Atz jitoq laʼ abʼil vet invaʼq chelem ixvaak tiʼ iyolbʼet chiʼla txhaq yol te invaʼq u chelem xaak. Tan qat ibʼokʼtziil vet ex inqʼa mam yakol tiʼ isotzsal ekʼuul. Echetz qat tok vet etaanimae tiʼ inqʼa txʼijbʼal qʼij tetz inqʼa mam yakol. Tan jankʼal ex inqʼa tenam qat bʼeny ekʼuul tiʼ tatxhval inqʼa txʼijbʼal iqʼij tetz vatz txʼavaʼ. Echetz qat motx teesale inqʼa tenam t-bʼey taʼn inqʼa mam yakol, eche uvaʼ nik ibʼan invaʼq aj qʼij tiʼ isotzsal ikʼuul inqʼa xaol.#Jeremiias 25.10 24Tul toqetz sotzoq el u tenam uvaʼe, tiʼ uvaʼ qat iyatzʼ inqʼa qʼexsan tetz viyol quBʼaal Tiuxh. Atz toq sotzoq, tiʼ uvaʼ iyatzʼeʼl inqʼa niman tetz quBʼaal Tiuxh. Tiʼetz vet jankʼal vikaqal inqʼa niman tetz quBʼaal Tiuxh uvaʼ qat ixaonsa, tul toq ulk vet u kʼaxbʼichil s-tiibʼa, —xeʼt u aanxel.#Jeremiias 51.49

Currently Selected:

Apokaliipsis 18: ixlC

Highlight

Copy

Compare