Apokaliipsis 16

Uvaʼs tilt Xhun ipeqʼt koʼp juqvaʼl inqʼa aanxel inqʼa kʼaxkʼo

1Yaʼne vabʼi uvaʼ jankʼalxh tiʼ iqul val uvaʼ eluʼl tuul u tostiuxh. Tul ech tal te juqvaʼl inqʼa aanxel s-eche: —Bʼenoq ex. Tul bʼenoq epeqʼ vet koʼp inqʼa kʼaxkʼo tiibʼa u vatz txʼavaʼ, inqʼa at tuul juqvaʼl inqʼa koopa uvaʼ iqʼomal etaʼn, —xeʼte.

2Bʼenetz vet u bʼaxa aanxel, tul ex ipeqʼ vet koʼp u kʼaxkʼo, uvaʼ at tuul u koopa, tiibʼa u vatz txʼavaʼ. Tul yekich koʼp vet val u txʼiila chin, uvaʼ qʼolomaany kuxhtuʼ, tiibʼa u vatz txʼavaʼ. Atz mamala el vet ul titxhiʼoʼl inqʼa xaol. Tul tira motx poltxʼ vitxhiʼoʼl inqʼa xaol. Tul motx eʼpi, jankʼal inqʼa xaol uvaʼ atich ok tetxhlal u qʼesal txooil maar s-tiʼ, atz inqʼa nikich natxhkʼuulan vivatzibʼal.

3Yaʼne bʼen vet vikaʼv aanxel. Tul ex ipeqʼ vet koʼp u kʼaxkʼo uvaʼ at tuul u koopa tiibʼa u maar. Tul yekich bʼen vet u maar s-kaq, eche ikaqal invaʼq xaol uvaʼ yatzʼel laʼ telaʼ. Tul tira motx kam vet jankʼal inqʼa itzʼlich kam inqʼa atich xeʼ u maar.

4Yaʼne bʼen vet vitoxv aanxel. Tul ex ipeqʼ vet koʼp u kʼaxkʼo uvaʼ at tuul u koopa tiibʼa inqʼa xaomla aʼ, atz tiibʼa inqʼa titzʼebʼal aʼ. Tul yekich bʼen vet inqʼa aʼ s-kaq.#Eeksodo 7.17-21

5Yaʼne vabʼi iyolon u aanxel, u iqatzin tetz inqʼa aʼ. Tul ech tal s-eche:

—QuBʼaal Tiuxh, axh, uvaʼ jikxh nik abʼen s-tiʼ. Atz axh, uvaʼ at axh s-txheel. Atz axh, uvaʼ atxh axh tixeʼal. Atz axh, uvaʼ yeʼl apaʼv. Tul jikxh qat aaqʼt kuʼ inqʼa yol tinuqul tiʼ inqʼa palsan yol. 6Tan qat akʼaxbʼisal inqʼa xaol, inqʼa motx yatzʼon el inqʼa niman eetz, atz inqʼa motx yatzʼon el inqʼa qʼexsan tetz vayol. Echetz s-tiʼile tul kaq vet uvaʼ toq motx tukʼa aaʼn. Tul ikʼulelaqetzxhtuʼ, —xeʼt u aanxel.

7Yaʼne vabʼi iyolon vaʼt u aanxel tu natxhkʼuulabʼal. Tul ech tal s-eche:

—Echxhte, quBʼaal Tiuxh. Axh uvaʼ yeʼxhkam vaʼq tzaʼl ibʼanax savatz. Tan jikxh nik aaqʼt kuʼ u yol tinuqul tiʼ aaqʼt inqʼa kʼaxbʼichil. Tul aʼxh nik abʼan vinuqul tiʼ jankʼal uvaʼ nik abʼaneʼ, —xeʼt u aanxel.

8Yaʼne bʼen vet vikajv aanxel. Tul ex ipeqʼ vet koʼp u kʼaxkʼo uvaʼ at tuul u koopa tiibʼa u qʼij. Tul aʼ vet u qʼij iqatzin itzʼeʼsal inqʼa xaol tuchʼ vitzʼaʼl. 9Jankʼaletz inqʼa xaol motx tzʼeʼsal taʼn vimam tzʼaʼlil u qʼij. Tul tira yoqʼox vet quBʼaal Tiuxh taʼn inqʼa xaol, quBʼaal Tiuxh uvaʼ alon taqʼax koʼp inqʼa kʼaxkʼo s-tiibʼa. Tul jitoq motx titzʼa tibʼ inqʼa xaol t-inqʼa ipaʼv, atz jitoq motx natxhkʼuulal Tiuxh taʼn.

10Yaʼne bʼen vet vitoʼv aanxel. Tul ex ipeqʼ vet koʼp u kʼaxkʼo uvaʼ at tuul u koopa, tiibʼa vixeʼal tal uvaʼ nik ibʼanvat u qʼesal yaabʼla txooil maar iqʼesalil. Tul mam tokto ok tal uvaʼ nikich ibʼanvat u qʼesal yaabʼla txooil maar iqʼesalil. Tul nikich kuxh motx itxhiʼ vet inqʼa xaol taqʼ taʼn mam txhoʼm uvaʼ nikich motx palk veteʼ.#Eeksodo 10.21 11Tul xeʼtaq vet inqʼa xaol tiʼ teesal iqʼij quBʼaal Tiuxh tu amlikaʼ taʼn inqʼa txhoʼm tiʼ vipoltxʼ vitxhiʼoʼl. Tul jitoq motx titzʼa tibʼ tiʼ inqʼa yeʼbʼaʼn uvaʼ nikich motx ibʼan vatz quBʼaal Tiuxh.

12Yaʼne bʼen vet vivaqaq aanxel. Tul ex ipeqʼ vet koʼp u kʼaxkʼo uvaʼ at tuul u koopa tiibʼa u nimla xaomla aʼ Eeufrates. Tul yekich tzaq vet u aʼ. Echichetz laʼ tutxh vet ipale inqʼa mam iqʼesal tuchʼ inqʼa isol uvaʼ laʼ tzaj tu tzaebʼ qʼij.#Isaiias 11.15-16

13Yaʼne vil teluʼl oxvaʼl demoonio uvaʼ, eche peteq ibʼanaxeʼ. U bʼaxa demoonio, aʼ elkuʼl titziʼ u mamaʼ yaabʼla txoo, uvaʼ echiche oʼan. Pet vikaʼv demoonio, aʼ elkuʼl titziʼ u qʼesal txooil maar. Pet vitoxv demoonio, aʼ elkuʼl titziʼ val u qʼexsan tetz val u uqʼeʼybʼal uvaʼ jit inuqul. 14Aʼetz vet oxvaʼl inqʼa yaabʼla demoonio motx kʼutxhun vet inqʼa mamala kaebʼal aanima vatz inqʼa xaol. Tul bʼen vet inqʼa yaabʼla demoonio tiʼ ibʼokʼtziil inqʼa mam iqʼesal inqʼa mam tenam. Tul aʼetz vet inqʼae nikich yaʼlun inqʼa mam iqʼesal tiʼ itxhʼaʼoil quBʼaal Tiuxh t-val u qʼij tetz kʼaxbʼichil uvaʼ alel vet taʼn quBʼaal Tiuxh uvaʼs laʼ ibʼana, u quBʼaal Tiuxh uvaʼ yeʼxhkam vaʼq tzaʼl ibʼanax s-vatz. 15-16Yaʼne vil vet imolt oxvaʼl inqʼa yaabʼla demoonio inqʼa mam iqʼesal inqʼa mam tenam. Tul aʼ imolvat t-val u txʼavaʼ uvaʼ Armajedoon ibʼij tu yolbʼal evreeo.

Xaʼtetze ech nik tal JesuKriisto s-eche: —Tan u vaqʼbʼebʼal ech laʼ ibʼan, eche taqʼbʼ elqʼom uvaʼ yeʼxhabʼil ootzaqin tetz. Pet inqʼa yeʼl vet paʼv nik ibʼaneʼ, tan at vibʼaʼnil quBʼaal Tiuxh s-tiibʼa inqʼa txʼebʼoʼmy tiʼ u vaqʼbʼebʼal. Tan nik ikol tibʼ vatz u paʼv, eche nik ikolt u xaol u toksaʼm tul yeʼ laʼ tzʼilbʼi. Tul yeʼl paʼv laʼ txhej s-kʼatza uvaʼs laʼ vaqʼbʼeʼ. Tan chʼixvebʼal sinvatz oq laʼ txhej paʼv s-kʼatza, eche vaʼq xaol uvaʼ chʼixvebʼal laʼ tilixeʼ oq yeʼl toksaʼm atoʼk, —xeʼt JesuKriisto.#2 Reeyes 23.29; 2 Kroonikas 35.22

17Yaʼne bʼen vet vijuqv aanxel. Tul ex ipeqʼ vet koʼp u kʼaxkʼo uvaʼ at tuul u koopa tiibʼa u kaqiqʼ. Tul jankʼalxh iyakʼil val u qul sichʼin eluʼl tu tostiuxh uvaʼ tu amlikaʼ tal uvaʼ kʼuqlel quBʼaal Tiuxh. Tul ech tal s-eche: —¡Tzoqpiy vet inqʼa kʼaxbʼichil! —xeʼte.

18Taʼnetz kuxh ipeqʼ vijuqv aanxel vikoopa, tul ul vet kotzʼinebʼ. Atz ul vet raaya uvaʼ oqxh ixhaakalil ibʼana. Tul vululkabʼyichxh veteʼ. Tul mam tiʼnichil ibʼan vet u txʼavaʼ. Tul utxh mam kabʼnaano uvaʼ yeʼxh inpaqxoʼq ibʼana jatqʼix iviinqixsal inqʼa xaol vatz u txʼavaʼ. 19Tul tira yansal vet u mam tenam taʼn u kabʼnaano, u mam tenam uvaʼ ‹Vaviloonia,› chich eʼli. Tul oxtanlen elk taʼn u kabʼnaano. Tul echat kuxh ibʼane jolt inqʼa tenam vatz txʼavaʼ. Tan motx jinp vet inqʼa totzotz. Echetz nik tilixe uvaʼ yeʼl vipaʼv jankʼal inqʼa xaol, inqʼa tu mam tenam Vaviloonia, sotz s-kʼuul quBʼaal Tiuxh. Tan tiʼ taqʼt quBʼaal Tiuxh u kʼaxbʼichil tiibʼa inqʼa xaol, inqʼa palsan yol, inqʼa at t-inqʼa mam tenam uvaʼ ‹Vaviloonia,› chich eʼli. Tul ikʼutxh quBʼaal Tiuxh vikʼaʼnal s-te tiʼ inqʼa ipaʼvineʼ, eche taqʼax qʼuʼich taʼl uuva uvaʼ yuel tuchʼ tzʼakabʼal uvaʼ laʼ yatzʼoni, tul laʼ aqʼax te invaʼq xaol uvaʼ kʼaqel vet u kamchil taʼn. 20Tul tira motx sotz vet inqʼa txʼavaʼ taʼn u kabʼnaano, inqʼa atich okaʼp tuul u maar. Atz tira yeʼl vet inqʼa vitz atiche. 21Tul kuʼ vet ul saq bʼatz t-amlikaʼ tiibʼa inqʼa xaol uvaʼs ipeqʼt koʼp vijuqv aanxel vikoopa. Tul palnaʼqich talal junun inqʼa saq bʼatz s-mutxʼul (80) liivra. Tul motx teesa vet inqʼa xaol iqʼij quBʼaal Tiuxh tiʼ u mam saq bʼatz uvaʼ taqʼ quBʼaal Tiuxh s-tiibʼa. Tan mam yeʼbʼaʼn ulbʼel inqʼa xaol taʼn u nimla vatz kʼaxkʼo uvaʼ koʼp s-tiibʼa.

Currently Selected:

Apokaliipsis 16: ixlC

Highlight

Copy

Compare