Filipeenses 3

Uvaʼs talt Paʼp uvaʼ yeʼxhkam invaʼq laʼ eesan ka Paʼp tiʼ quBʼaal Jesuus

1Echetz toq val jolt yol sete, ex inmol s-niman tetz Jesuus. Chiibʼoqvaq ex, tan at vet ok u quBʼaal Jesuus tetaanima. Tul yeʼl in nik ipal inkʼuul tiʼ itzʼibʼal bʼen inqʼa yol sete. Tan aʼ inqʼa yol inqʼae yeʼ laʼ kuyun ebʼen tu yeʼbʼaʼn.

2Poro xeevaq etibʼ vatz inqʼa xaol, inqʼa bʼanolaq yeʼbʼaʼn, inqʼa nik alon uvaʼ, tetxhal laʼ juyil el vitxhiʼoʼl inqʼa niman tetz Jesuus. Tan aʼ kuxh isaʼ ekʼaxbʼisaleʼ. Tan echaqe txʼiʼ. 3Tan aʼ nik motx taleʼ uvaʼ tiʼ viqolpeʼl inbʼiil te vitxhiʼoʼl, tul itenametz vet quBʼaal Tiuxh. Yeʼletza. Tan aʼ, oʼe vitenam quBʼaal Tiuxh, tan tuchʼ vet viTiuxhil Tiuxh nik qunatxhkʼuulavat. Aʼetz vet qetxhlale uvaʼ, oʼ vet tetz quBʼaal Tiuxh. Xaʼtetze nik qoksa vet iqʼij u quBʼaal JesuKriisto. Pet jit aʼ kʼuqlel qukʼuul tiʼ iqolpeʼl inbʼiil te u qutxhiʼoʼl.

4Kʼuxhetz kʼuqlelxh ikʼuul inqʼae tiʼ jankʼal inqʼa qejoʼm tiʼ inimal quBʼaal Tiuxh, tul echatetz kuxh ine. Tan tira pal iviʼ nikich inkʼuqbʼat inkʼuul tiʼ inimal inqʼa qejoʼm inqʼae, tiʼ inbʼant yaʼl tiʼ injetxhon ok kʼatz quBʼaal Tiuxh. Tan aʼ, in palnaʼqich in tiʼ inimal viʼ inqʼae. 5Tan qolox vet el inbʼiil te vintxhiʼoʼl uvaʼs tel vajxaqil qʼij valaleʼ. Tul in ixaʼnil Venjamiin, vikʼaol Israeel. Tul inxh evreeo, tij imam Israeel. Tul tij imam Israeel intxutx inbʼaal. Tul antxh iqʼomalich vaʼn kam uvaʼ nik inima inqʼa inmol s-tijaq imam Israeel, inqʼa evreeo, atz kam uvaʼ nik motx iyolbʼe. Tan inich fariseeo. Tul aʼ nikich innima kam uvaʼ nikich inima inqʼa fariseeo tiʼ inqʼa bʼekʼbʼal, inqʼa itzʼibʼa ka Moisees. 6Tul in yeʼlich laʼ kuyun teesal iqʼij inqʼa nikich inqejeʼ. Tan nikich inkʼaxbʼisa inqʼa niman tetz Jesuus. Tul tira qeichxh inqʼa bʼekʼoʼm vaʼn. Tan yeʼxhabʼil invaʼq laʼich txhej iyol tiʼ talt s-ve tiʼ inimal inqʼa bʼekʼbʼal, tan nikich innima s-kaqaayil.

7Poro jankʼalxh inqʼa nikich inqejeʼ, atz inqʼa tira sibʼ laʼ taqʼa nikich valeʼ, tan tira yeʼxhkam vet itxaʼk s-ve. Pet aʼ vet een vaanima tiʼ ibʼanax kam uvaʼ nik tal u quBʼaal JesuKriisto. 8Tul ant kuxh nik inbʼan s-txheel. Tan tira yeʼxhkam nik taqʼ inqʼa qeich kuxh vaʼn. Tan tira yeʼ nibʼan eela tuchʼ uvaʼ vootzaq vet u quBʼaal JesuKriisto. Tan tira mamala bʼaʼnil nik taqʼ u quBʼaal JesuKriisto. Echetz, tiʼ uvaʼ, aʼ vet u quBʼaal JesuKriisto at vaanima s-tiʼ, tul yeʼl vet inbʼeeq atoʼk t-vitzʼabʼal inqʼae. Tan ech kuxh vete chʼis sinvatz, tiʼ uvaʼ qat vill vet vibʼaʼnil u quBʼaal JesuKriisto. 9Tul aʼ nik insaʼeʼ uvaʼ vaʼl kuxh vet in tuchʼ quBʼaal JesuKriisto laʼ ibʼana. Pet jit aʼ nik vitzʼa uvaʼ tuchʼ kam uvaʼ laʼ inbʼan tiʼ inimal u bʼekʼbʼal, tul kuyel vet vinpaʼv taʼn quBʼaal Tiuxh. Pet taʼnxh vinqejt u quBʼaal JesuKriisto laʼ bʼanon uvaʼ jit vet in aj paʼvom. Tan ech uvaʼe alel ka taʼn quBʼaal Tiuxh uvaʼ, tiʼ inkʼuqbʼat inkʼuul tiʼ quBʼaal JesuKriisto laʼ ikuyvat inqʼa inpaʼv. 10Tul aʼ insaʼ uvaʼ aʼl tel laʼ vootzaqit u quBʼaal JesuKriisto, atz laʼ vil u tiqleʼm quBʼaal Tiuxh sinkʼatza, eche uvaʼ itzʼeʼvsan u quBʼaal JesuKriisto. Tul aʼ insaʼ laʼ pal in t-inqʼa itzaʼlal uvaʼ palk quBʼaal JesuKriisto tiʼ inimal u quBʼaal Tiuxh. Tul aʼ insaʼ uvaʼ echatxh laʼ inpal tu kamchil, eche uvaʼ ibʼan u quBʼaal JesuKriisto. 11Tan aʼ nik intxʼebʼeʼ uvaʼ vaʼl qʼij laʼ itzʼeʼv in inpaqte kʼuxh maʼt inkameʼ. Tul aʼ quBʼaal Tiuxh ootzaqin tetz kam laʼ ibʼana.

Uvaʼs talt Paʼp, tiʼ uvaʼ laʼ ibʼan inqʼa niman tetz Jesuus yaʼl, tiʼ uvaʼ antxh laʼ til inqʼa bʼaʼnla txumbʼal, tul laʼ ibʼan tetz

12Poro jit aʼ nik vale uvaʼ qat koq opoony vet in tiʼ ibʼanax jankʼal vibʼanoʼm u quBʼaal JesuKriisto, atz jankʼal u tatineʼ. Tul jit aʼ nik vale uvaʼ tzʼeqel vet inchʼij vatz quBʼaal JesuKriisto. Pet sebʼt kuxh in tiʼ taqʼax yaʼl, tetxhal intxhabʼat ibʼanax kam uvaʼ qat isaʼ in u quBʼaal Tiuxh s-tiʼ, tiʼ ibʼanax kam uvaʼ nik isaʼ quBʼaal JesuKriisto s-viʼ. Tan ech s-tiʼile qat isaʼvat in u quBʼaal JesuKriisto. 13Echetz nik valte, ex inmol s-niman tetz Jesuus, uvaʼ qat koq opoony vet in tiʼ ibʼanax s-kaqaayil. Pet aʼ nik inbʼane uvaʼ tira nik insotzsa vet el sinkʼuul jankʼal inqʼa palnaʼq vet kaj; tul tira aʼ nik inbʼanvat vet yaʼl tiʼ itxhabʼal kam uvaʼ yaʼn tuleʼ. 14Atz aʼ nik inbʼanvat vet yaʼl, tiʼ uvaʼ tetxhal vopoon tal uvaʼ kʼaqel vaʼn. Tul tetxhal bʼen inkʼult vintxʼaqaʼm uvaʼ altziimal vet s-ve taʼn quBʼaal Tiuxh. Aʼetz val u txʼaqaʼme uvaʼ altziimal vet te jatvaʼl inqʼa laʼ isaʼ tzaan quBʼaal Tiuxh s-kʼatza. Echetz laʼ inbʼene tu amlikaʼ kʼatz quBʼaal Tiuxh, tiʼ vinimal u quBʼaal JesuKriisto.

15Echetz jatvaʼlxh oʼ, inqʼa txhabʼamalxh vet tiqʼol viyolbʼal quBʼaal Tiuxh qaʼn, tul vaʼl koqxh vet qitzʼabʼal. Pet oqetz vaʼten uvaʼ nik etitzʼa, tul antxh u quBʼaal Tiuxh laʼ aqʼon etootzaqibʼal tiʼ itxhabʼal tiqʼol viyolbʼal. 16Pet kʼuxhetz kamxh laʼ ul ikʼutxh tibʼ s-quxoʼl s-quvatzaq, tul ant kuxh u bʼaʼnla txumbʼal laʼ qukʼutxh s-quvatzaq. Tan ech uvaʼe qat qutxhabʼa, tul il oʼ uy oʼ tzitza taʼn.

17Tul toq val sete, ex inqʼa niman tetz Jesuus, uvaʼ antxh ebʼan kam uvaʼ nik inbʼaneʼ. Atz aʼ vaq etil kam vibʼaʼnla bʼanoʼm jolt inqʼa qumol, inqʼa qutxhus tiʼ ibʼanax inqʼa bʼaʼnla txumbʼal. 18Poro nal laʼ motx ibʼen sete uvaʼ at in jolt inqʼa xaol nik motx tal tibʼ s-niman tetz Jesuus. Poro nik itxhoʼn s-te uvaʼ nik qal inqʼa yol tiʼ vikam quBʼaal JesuKriisto vatz kurus. Aloq jatpaqx kuxh val sete. Tul tira nik voqʼ, tiʼ uvaʼ ech nik ibʼanaxe. 19Jankʼaletz inqʼa xaol inqʼae, tan aʼ vet kʼaqel u tzʼeqxichil taʼn. Tan aʼ tira een kʼayimal taanima tiʼ inojsal inqʼa tuul viʼ uvaʼ, aʼ laʼ ikʼayivat taanima tiʼ quBʼaal JesuKriisto. Tul at inqʼa kam uvaʼ chʼixvebʼal nik motx ibʼaneʼ, poro bʼane nik koq motx ichʼixv s-te. Pet aʼl nik motx toksat iqʼij s-tiʼ. Tan aʼaq kuxh een taanima tiʼ ibʼanax inqʼa yeʼbʼaʼn uvaʼ nik ibʼan inqʼa xaol vatz txʼavaʼ, inqʼa yeʼ ootzaqin tetz quBʼaal Tiuxh.

20Pet koq oʼ, tan een vet quʼal tu amlikaʼ, tal uvaʼ toq tzajk u Chitol qetz uvaʼ nik qutxʼebʼ tuleʼ; aʼe u quBʼaal JesuKriisto. 21Tan at tiqleʼm u quBʼaal JesuKriisto tiʼ ibʼekʼon tiibʼa jankʼal inqʼa kam vatz txʼavaʼ, tan tira at tiqʼabʼ jankʼal s-kaqaayil. Xaʼtetze at tiqleʼm tiʼ ijalpul u qutxhiʼoʼl uvaʼ chʼixvebʼal kuxhtuʼ. Tul tikʼ laʼ taqʼ vet vaʼt qutxhiʼoʼl, uvaʼ eela vet tuchʼ u tetz uvaʼ sibʼ vet tatineʼ.

Currently Selected:

Filipeenses 3: ixlC

Highlight

Copy

Compare