Juudas ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
JUUDAS
Uvaʼs toq qootzaqitaʼ jaʼl tzʼibʼan u uʼ Juudas
Aʼetz u uʼe uvaʼ Juudas ibʼij, uvaʼ itzʼibʼa Juudas. Tan antxh u uʼ nik alon uvaʼ Juudas tzʼibʼan. Ech uvaʼe nik tal tu Juudas 1. Poro nimalen kuxh inqʼa bʼij Juudas nik tal t-inqʼa uʼ tetz viyolbʼal quBʼaal Tiuxh. Pet aʼ nik tal u uʼ uvaʼa, tiʼ Juudas, u titzʼinich Jakoovo, atz u titzʼinich quBʼaal Jesuus. Aloq taʼn kuxh itxutx quBʼaal Jesuus eelaich tuchʼ Juudas. Pet jitich eela ibʼaal. Tan ikʼaolich Xhuʼl Juudas. Tul antichxh Santiaago ibʼij Jakoovo, u tatzik Juudas, Santiaago uvaʼ tzʼibʼan u uʼ Santiaago. Tio 13.55 tuchʼ tu uʼ Vibʼanoʼm inqʼa Apoostol 15.13, 22. Tul aʼich Juudas iqʼesal xoʼl inqʼa iqʼon iviʼ xoʼl inqʼa niman tetz Jesuus tuulbʼal u yaʼbʼ vajxaqil toxkʼal (48) m.t.J. uvaʼs tutxh u molo ibʼ tu tenam Jerusaleen.
Uvaʼs toq qootzaqitaʼ kam s-tuul tzʼibʼal u uʼ Juudas
Niketz tal inqʼa aj txumbʼal tiʼ viyolbʼal quBʼaal Tiuxh uvaʼ kamal aʼ itzʼibʼal t-vixeʼtebʼal u yaʼbʼ oxkʼalal (60) m.t.J., atz maq tuulbʼal jolt inqʼa yaʼbʼ tetxhal topoon tu yaʼbʼ laval imutxʼ (70). Atz kamal aʼ itzʼibʼal u uʼ Juudas uvaʼs bʼiilich kuxh itzʼibʼat Luʼ u kaʼv tuʼ.
Uvaʼs toq qootzaqitaʼ kame u taqʼil vitxhusun Juudas tuul u tuʼ
Aʼetz u taqʼil viyol Juudas uvaʼ itzʼibʼa bʼen te inqʼa niman tetz Jesuus, tiʼ uvaʼ laʼ ixee tibʼ tiʼ jolol inqʼa xaol uvaʼ niman tetz Jesuus nik taleʼ, poro aʼe tan, yaabʼla txhusbʼal kuxh inqʼa nik motx ipaxsa paʼl. Pet aʼ laʼ inima inqʼa niman tetz Jesuus kam uvaʼ tal inqʼa iapoostol quBʼaal Jesuus s-te. Tul aʼ laʼ ilotxhvat tibʼ tiʼ ichʼij tuchʼ inqʼa bʼaʼnla txhaq yol tiʼ u quBʼaal Jesuus, uvaʼ yeʼxhkam yujel tuchʼ joltaq yaabʼla txhusbʼal.
Tul nikat tal Juudas tiʼ taqʼax jaʼp nimla kʼaxkʼo tiibʼa inqʼa tzʼeqol tzijla txhusul, eche uvaʼ ibʼan quBʼaal Tiuxh tiʼ ikʼaxbʼisal jolol inqʼa tij imam Israeel, eche uvaʼ nik tal tuul vibʼaxa iyol qubʼaal tiuxh.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Juudas
U uʼ Juudas uvaʼ itzʼibʼa ka Juudas, tan kaʼvaʼl nimla tanul elnaʼq inqʼa yol uvaʼ nik tal s-tuul.
Juudas 1-2
Aʼetz ixeʼtebʼe Juudas talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen bʼaʼnil ikʼuul inqʼa niman tetz Jesuus.
1. Juudas 4-19
U bʼaxa tanul yol, tan aʼ tal Juudas, tiʼ uvaʼ yeʼlich laʼ motx taqʼ tibʼ inqʼa niman tetz Jesuus eesaloq t-bʼey taʼn inqʼa nikich tal tibʼ s-alol tetz viyolbʼal quBʼaal Tiuxh, inqʼa jit aʼ vinuqul nikich motx taleʼ. Tan tuulbʼal inqʼa qʼij inqʼae, tan nikich iyujux inqʼa bʼaʼnla txhaq yol tiʼ Jesuus tuchʼ kamaq kuxh uqʼeʼybʼalil. Tan nimal inqʼa uqʼeʼybʼal nikich alon uvaʼ jit Tiuxh koqxh Jesuus s-vatz. Echetz s-tiʼile tulsa Juudas s-kʼuul inqʼa niman tetz Jesuus, tiʼ uvaʼ tetxhal laʼ ul mam kʼaxkʼo tiibʼa inqʼa jit aʼ vinuqul nik taleʼ.
2. Juudas 20-21
Vikaʼv tanul yol, tan aʼ tal Juudas, tiʼ uvaʼ laʼ motx taqʼ tibʼ itial inqʼa niman tetz Jesuus s-vatzaq tiʼ yeʼ itanbʼat inimal vinuqul tiʼ Jesuus.
Juudas 24-25
Tiyaʼtebʼaletz veteʼ, tul nik inatxh Juudas quBʼaal Tiuxh tiʼ toksal inqʼa niman tetz Jesuus tiqʼabʼ quBʼaal Tiuxh.
Currently Selected:
Juudas ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.