Santiaago ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
SANTIAAGO
Uvaʼs toq qootzaqitaʼ jaʼl tzʼibʼan u uʼ Santiaago
Aʼetz u uʼe uvaʼ Santiaago ibʼij, uvaʼ itzʼibʼa Santiaago, tan antxh u uʼ nik alon uvaʼ Santiaago tzʼibʼan. Ech uvaʼe nik tal tu Santiaago 1.1.
Atichetz vaʼt u Santiaago, u apoostol, u tatzikich Xhun, u apoostol, u txeyolich txay, Santiaago vitxhaq Jesuus. Pet xamteletz tzokʼpeʼl iviʼ Santiaago taʼn Eroodes Keʼchetz koq laʼich itzʼibʼat Santiaago vaʼq tuʼ. Ech uvaʼe nik tal t-Vibʼanoʼm inqʼa Apoostol 12.1-2.
Pet xamtel ok vaʼt Santiaago s-iqʼon iviʼ xoʼl inqʼa niman tetz Jesuus; Santiaago, val u titzʼinich Jesuus uvaʼ vaʼlich itxutx quBʼaal Jesuus s-tuchʼ. Ech uvaʼe nik tal tu Xhun 7.3-10. Antichetz Santiaago nikich ibʼekʼon xoʼl inqʼa itxhaq quBʼaal Jesuus, inqʼa apoostol tuchʼ inqʼa yaʼnaqich kuxh tok tiʼ inimal quBʼaal Jesuus, kʼuxh jitich itxhaq quBʼaal Jesuus. Ech uvaʼe nik tal t-Vibʼanoʼm inqʼa Apoostol 15.13, 19 tuchʼ u 1 Koriintios 9.5.
Uvaʼs toq qootzaqitaʼ kam s-tuul tzʼibʼal u uʼ Santiaago
Aʼetz u uʼ Santiaago u bʼaxa uʼ tzʼibʼal xoʼl inqʼa uʼ tiʼ viyolbʼal quBʼaal Tiuxh uvaʼs maʼtich tul vet quBʼaal Jesuus vatz txʼavaʼ. Echetz aʼ itzʼibʼal u uʼ Santiaago tuulbʼal u yaʼbʼ oʼvaʼl toxkʼal (45) m.t.J. Tul tira veqlele uvaʼ tij imam Israeel u tzʼibʼan tetz u uʼ Santiaago. Tul antxh te tijaq imam Israeel tzʼibʼalik u uʼ. Tul aʼ tzʼibʼalik u uʼ Santiaago tu tenam Jerusaleen. Tul niketz itxey tibʼ u yol, tiʼ uvaʼ taʼnxh jolol inqʼa tij imam Israeel atich vet ok s-tatxhul inqʼa niman tetz Jesuus. Tul yeʼxh jankʼalich inqʼa jit tij imam Israeel atich ok s-niman tetz Jesuus. Tan, eche uvaʼ atich koqxh vet niman tetz Jesuus, uvaʼ jitich tij imam Israeel, tul niketz tale tu uʼ Santiaago tiʼ inqʼa niman tetz Jesuus uvaʼ jitich tij imam Israeel. Tan aʼ ixeʼt vet inqʼa niman tetz Jesuus naʼoq, inqʼa jitich tij imam Israeel tu yaʼbʼ laval toxkʼal (50) m.t.J.
Aʼetz inqʼa paʼv nik tal tuul u uʼ Santiaago nik kʼutxhun tiʼ inqʼa bʼaxa niman tetz Jesuus, inqʼa tijich imam Israeel. Tul nikat ikʼutxh tu uʼ Santiaago uvaʼ, aʼ nik tal tiʼ inqʼa yol uvaʼ yolox tuulbʼal u kʼulu ibʼ uvaʼ utxh xoʼl inqʼa apoostol tuchʼ inqʼa niman tetz Jesuus tu tenam Jerusaleen. Ech uvaʼe nik tal t-Vibʼanoʼm inqʼa Apoostol 15. Aʼetz ibʼanax u kʼulu ibʼ tu yaʼbʼ vajxaqil toxkʼal, atz maq tu bʼelval toxkʼal (48-49) m.t.J.
Uvaʼs toq qootzaqitaʼ kame u taqʼil vitxhusun Santiaago tuul u tuʼ
Aʼetz inqʼa taqʼil viyol Santiaago uvaʼ itzʼibʼa bʼen te inqʼa niman tetz Jesuus, tiʼ jatvatzul inqʼa bʼaʼnla txhaq txumbʼal laʼ ibʼana. Aʼe inqʼaa: Uvaʼ laʼ motx ikotxʼ inqʼa niman tetz Jesuus ivatz, kʼuxh laʼ kʼaxbʼisal tiʼ inimal inqʼa bʼaʼnla txhaq yol tiʼ Jesuus; atz yeʼ laʼ bʼen taanima tiʼ inqʼa txʼiol iqʼij; atz laʼ imaq tibʼ inqʼa niman tetz Jesuus tiʼ talax yaabʼla txhaq yol tiʼ imol; atz laʼ inatxh inqʼa niman tetz Jesuus Tiuxh tiʼ inqʼa yaabʼ.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Santiaago
U uʼ Santiaago, tan juqvaʼlen tanul elnaʼq inqʼa yol uvaʼ nik tal s-tuul.
Santiaago 1.1
Aʼetz ixeʼtebʼe Santiaago talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Santiaago bʼaʼnil ikʼuul inqʼa niman tetz Jesuus.
1. Santiaago 1.2-27
U bʼaxa tanul yol, tan aʼ tal Santiaago, tiʼ uvaʼ laʼ motx ikotxʼ inqʼa niman tetz Jesuus ivatz kʼuxh laʼ pal titzaʼlal, tiʼ uvaʼ tan, niman vet tetz Jesuus. Tan antxh quBʼaal Tiuxh nik kuyun ipal t-inqʼa itzaʼlal tiʼ tiltaʼ oq kʼuqlel ikʼuul inqʼa niman tetz s-tiʼ. Tul yeʼ laʼ itanbʼa ibʼanax u bʼaʼn, kʼuxh nik ipal t-inqʼa itzaʼlal.
2. Santiaago 2.1-13
Vikaʼv nimla tanul yol, tan aʼ tal Santiaago, tiʼ uvaʼ yeʼ laʼ utxhi laʼ ibʼan inqʼa niman tetz Jesuus uvaʼ atxh tatin vaʼq imol s-vatz laʼ ibʼana. Tul yeʼ laʼ utxhi uvaʼ laʼ bʼen taanima tiʼ inqʼa txʼiol iqʼij, tul laʼ yan ivatz te tzaqatz meebʼaʼ.
3. Santiaago 2.14-26
Vitoxv tanul yol, tan aʼ tal Santiaago, tiʼ jaʼl uvaʼ niman tetz Jesuus veteʼ nik taleʼ, tul aʼl bʼaʼn uvaʼ laʼ ilotxh inqʼa nik saʼon tetz. Pet jaʼl uvaʼ yeʼ nik lotxhon vimol uvaʼ nik saʼon tetz, tul jitetz niman tetz Jesuuse.
4. Santiaago 3.1—4.10
Vikajv nimla tanul yol, tan aʼ tal Santiaago, tiʼ uvaʼ laʼ motx ixee tibʼ inqʼa niman tetz Jesuus tiʼ iyoloneʼ. Tul laʼ motx imaq u taqʼ tiʼ talax yaabʼla txhaq yol.
Nikat tal Santiaago paqte, tiʼ uvaʼ laʼ imaq tibʼ inqʼa niman tetz Jesuus tiʼ toksalaq iqʼij, atz tiʼ tetxhataq tibʼ s-vatzaq tiʼ toksataq iqʼij. Tan een tzajnaʼq u txumbʼal uvaʼe kʼatz diaavlo. Pet koq u txumbʼal uvaʼ een tzajnaʼq kʼatz quBʼaal Tiuxh, tan aʼ nik ikʼutxh uvaʼ, aʼ inqʼa bʼaʼnla bʼanoʼm laʼ ibʼana. Tul tzʼuʼkin kuxh laʼ ibʼana.
5. Santiaago 4.11-17
Vitoʼv tanul yol, tan aʼ tal Santiaago, tiʼ uvaʼ yeʼ laʼ teesa tibʼ iqʼij inqʼa niman tetz Jesuus s-vatzaq, atz yeʼ laʼ tal tibʼ yol s-tiʼ s-vatzaq.
Nikat tal Santiaago paqte, tiʼ uvaʼ yeʼ laʼ ibʼaxabʼsa tibʼ inqʼa niman tetz Jesuus tiʼ talax jankʼal inqʼa nik tatxhva ibʼanaxeʼ, tan yeʼ tootzaqlaqe kam iqʼomal taʼn inqʼa qʼij yaʼn tuleʼ.
6. Santiaago 5.1-12
Vivaqaq tanul yol, tan aʼ tal Santiaago tiʼ viyaʼl inqʼa txʼiol iqʼij, inqʼa nik motx subʼun inqʼa taqʼonvil. Tul nik tal Santiaago paqte uvaʼ tetxhal bʼen til u kʼaxkʼo tiʼ isubʼux inqʼa meebʼaʼ.
Nikat tal Santiaago paqte, tiʼ uvaʼ laʼ ikʼotxʼ inqʼa niman tetz Jesuus ivatz s-vatzaq, tul echetz laʼ tilte inqʼa niman tetz Jesuus vibʼaʼnil quBʼaal Tiuxh tiʼ vikotxʼtaq ivatz s-tibʼilaq. Tul laʼ ikotxʼ inqʼa niman tetz Jesuus ivatz t-inqʼa kalabʼaq itzaʼlal uvaʼ nik ipalebʼe, eche uvaʼ ibʼan Joov.
7. Santiaago 5.13-14
Vijuqv tanul yol, tan aʼ tal Santiaago, tiʼ uvaʼ laʼ inatxh inqʼa niman tetz Jesuus Tiuxh tiʼ inqʼa yaabʼ.
Jankʼaletz inqʼa yol uvaʼ tal Santiaago te inqʼa niman tetz Jesuus, tan oksabʼaq tetz t-bʼey. Ayaʼletz uvaʼe yeʼ nikich motx tal inqʼa fariseeo. Aʼetz nikich tal inqʼa fariseeo uvaʼ nimamalich inqʼa bʼekʼbʼal taʼn, poro yeʼ nikich motx ikʼutxh tuchʼ ibʼanoʼm. Aʼetz tal Santiaago uvaʼ jit vet eela vitxumbʼal inqʼa apoostol, atz vitxumbʼal inqʼa niman tetz Jesuus laʼich ibʼan tuchʼ vitxumbʼal inqʼa fariseeo. Tul aʼ ex ikaʼpaqu Santiaago talax inqʼa iyol Jesuus uvaʼ nik tal tu Tio 5.20.
Currently Selected:
Santiaago ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.